Savali a le Au Peresitene Sili
O Se Feteenaiga Faaauau Pea, o se Manumalo Faamautuina
Toeitiiti lava atoa le selau tausaga talu lo’u fanau mai, ma mo se vaega tele o lena taimi, o i ai pea taua i le lotolotoi o tagata i se tasi vaega o le lalolagi po o se isi foi. E le mafai e se tasi ona taumateina le matautia o mafatiaga o loo mafua mai i nei taua i le lalolagi atoa. E faitau miliona soifua ua maimau. O manuaga matautia mai taua ua tuua ai tino ua faaleaogaina ma mafaufau ua faaleagaina. Ua tuua aiga e aunoa ma ni tama ma ni tina. I le tele o taimi, o le autalavou o e ua valaauina e tau, ua faaumatia o latou ola ae o e o loo ola pea ua suia o latou natura i le i ai o le ita lea o le a faigata ona toe aveesea mai ia i latou. Ua faamaimauina tupe a atunuu, ma o le a le mafai lava ona toe maua mai.
O tulaga matautia o taua e foliga mai e matua le alagatatau lava ma e matua matautia le maimau ai o le ola o tagata faapea foi punaoa a atunuu. Tatou te fesili, pe o le a i ai ea se taimi e faamutaina ai le faaaogaina o lenei auala matautia ma le leaga e taulimaina ai feeseeseaiga i le va o atalii ma afafine o le Atua?
Ae o loo i ai foi se isi taua o loo faaauau pea, mai lava a o le i faia le lalolagi ma e foliga o le a faaauau ai pea mo se taimi umi lava. O se taua lea e oo i tua atu o fanua ma pulega faaleatunuu. Na taua e Ioane le Tali Faaaliga lena tauiviga:
“Ua tau foi le taua i le lagi: o Mekaeli ma ana agelu ua latou tau ma le tarako; ua ‘au foi le tarako ma ana agelu e tau ai le taua,
“A ua latou le manumalo; e le toe maua foi i le lagi se mea latou te nonofo ai.
“Ua lafo foi le tarako tele, o le gata tuai lea, ua igoa i le tiapolo i le ma Satani, o lē faasese i le lalolagi uma: ua lafo ifo i le lalolagi, ua lafo foi ana agelu faatasi ma ia” (Faaaliga 12:7–9).
O Le Tauiviga Faifai Pea
O lena taua, e ese le tiga, e ese le malosi, e lei faamutaina lava. O le taua lea i le va o le upu moni ma le mea sese, i le va o le saolotoga ma le faamalosia, i le va o e mulimuli ia Keriso ma i latou o e ua faafitia o Ia. Ua faaaogaina e Ona fili togafiti uma i lena feteenaiga. Ua latou gauai i le pepelo ma le taufaasese. Ua latou faaaogaina tupe ma oa. Ua latou faaseseina mafaufau o tagata. Ua latou fasiotia ma faaumatia ma auai i ituaiga uma o faiga leaga ina ia faasalaveia le galuega a Keriso.
Na amata le fasioti tagata i le lalolagi ina ua fasiotia e Kaino ia Apelu. Ua tumu le Feagaiga Tuai i tala o lea lava tauiviga faavavau.
Na faaalia i tuuaiga leaga e tetee ai i le Tagata mai Kalilaia, le Keriso, o le na faamaloloina ma’i ma siitia loto ma faamoemoe o tagata, o Ia o le na aoaoina le talalelei o le filemu. O Ona fili, na faaosofia e lena mana leaga, na latou pueina o Ia, faatigaina o Ia, tuitui o Ia i le satauro, ma taufaifai e tetee ia te Ia. Ae o Lona mana faaleatua, na Ia manumalo ai i le oti lea na faaooina atu e Ona fili, ma e ala i Lana taulaga na aumaia ai le faaolataga mai le oti i tagata uma.
Na faaauau pea lena taua faavavau seia oo ina faaumatia ai le galuega na Ia faatuina, i faiga piopio ia na pesia ai mulimuli ane, ina ua ufitia le lalolagi i le pouliuli ma ufitia tagata i le pogisa (tagai Isaia 60:2).
Ae o au o le Atua e le mafai ona faaumatia. O le Malamalama o Keriso na ootia ai le loto o se tagata iinei ma se tagata iina, ma na oo ina tele le lelei na i ai e ui lava i le tele o faiga saua ma puapuaga.
Na oo mai se taimi o le fanaufouina, ma ni tauiviga mo le saolotoga—tauiviga ia na tele le toto na faamasaaina ma osiga taulaga na faia ai. Na musuia tagata e le Agaga o le Atua ina ia faavaeina se nuu lea e mafai ona puipuia ai le saolotoga o tapuaiga ma le saolotoga e faailoa atu ai lagona ma le saolotoga o filifiliga. Ona mulimuli mai ai lea o le tatalaina o le augatupulaga o le atoatoaga o taimi i se asiasiga a le Atua le Tama Faavavau ma Lona Alo Pele, o le Alii toetu o Iesu Keriso. Na sosoo mai i lenei asiasiga mamalu ia asiasiga a agelu e toefuataiina mai ki ma le perisitua anamua.
Peitai e lei maea le taua. Na toe faafouina ma suia lona autu. Na i ai le faatuiese. Na i ai sauaga. Na i ai le tulieseina mai lea nofoaga i lea nofoaga. Na i ai le fasiotiaina o le perofeta talavou a le Atua ma lona uso peleina, i le 163 tausaga talu ai i le masina lenei.
Na sosola ese le Au Paia o Aso e Gata Ai mai o latou fale lelei, a latou lafu manu, a latou faatoaga, o latou faleoloa, lo latou malumalu matagofie lea na fausiaina e ala ia latou osigataulaga maoae. Na o mai i latou i vanu o mauga, e faitau afe i latou na maliliu i le ala. Na o mai i latou i le ituaiga o nofoaga lea na faatonuina e Peresitene Iosefa Samita ia le Toasefululua ina ia saili, “lea e le mafai e le tiapolo ona tutulieseina mai ai i tatou.”1
Ae e lei taofia lava taumafaiga a le tiapolo. I le konafesi o Oketopa 1896, na tulai ai Peresitene Uilifoti Uitilafi (1807–98), a ua matua lava o ia, i le Tapeneko i le Lotoa o le Malumalu ma faapea atu:
“E lua lava mana o i luga o le fogaeleele ma le lotolotoi o tagata o le lalolagi—o le mana o le Atua ma le mana o le tiapolo. I lo tatou talafaasolopito ua i ai ni o tatou aafiaga uiga ese. Ina ua i ai le nuu o le Atua i luga o le fogaeleele, e le afaina lava po o le a le augatupulaga, o Lusifelo, le atalii o le taeao, ma le miliona ma miliona o agaga sa pauu ma tuliesea mai le lagi, ua faasagatau atu i le Atua, faasagatau i le Keriso, faasagatau i le galuega a le Atua, ma faasagatau i le nuu o le Atua. Ma e le o faavaivai i le faia o lea lava tulaga i o tatou aso ma augatupulaga. Soo se taimi lava e tuu mai ai e le Alii Lona aao e faatinoina se galuega, e galulue foi na mana e faatoilaloina.”2
Na silafia e Peresitene Uitilafi le mea na ia saunoa i ai. I lena taimi na faatoa tea ai o ia ma na aso faigata ma le matautia ina ua tetee mai le malo i o tatou tagata, ma naunautai e faaumatia lenei Ekalesia o se faapotopotoga. E ui i faigata o na aso, sa lei faavaivai le Au Paia. Sa latou agai i luma i le faatuatua. Na tuu atu lo latou faatuatuaga i le Silisili Ese, ma na Ia faaalia ia i latou le ala e tatau ona latou mulimuli ai. Na latou taliaina lena faaaliga i le faatuatua ma savavali ai i le usiusitai.
O Le Mamanu o Feteenaiga
Peitai e lei faamutaina ai le taua. Na tau faaitiitia, ma tatou te faafetai mo lena mea. Ae ui i lea, ua faaauau pea le tauiviga a le fili o le upumoni.
E ui i le malosi o i ai nei le Ekalesia, e foliga mai o loo osofaia pea i tatou mai se tasi vaega po o se isi. Ae tatou te faaauau pea. E tatau ona tatou faaauau pea. Ua tatou agai i luma, ma o le a faaauau pea ona tatou agai i luma. O nisi taimi e ogaoga faafitauli. O isi taimi ua na o ni faafitauli mitimiti i le lotoifale. Ae o vaega uma lava o se mamanu.
Sa lagonaina le tetee i taumafaiga faifaipea a le toatele, i totonu ma fafo o le Ekalesia, ina ia faatamaia le faatuatua, ia ta’u faatauvaaina, ia tauvalea, ia molimau pepelo, e faaosooso ma faatosina ma faamalosia o tatou tagata i faiga e le tusa ai ma aoaoga ma tulaga faatauaina a le galuega lenei a le Atua.
E faifai pea le taua. E pei lava o le tulaga sa i ai i le amataga. Atonu ua le ogaoga tele, ma ou te faafetai ai mo lena tulaga. Ae o mataupu o loo mafua ai e tutusa lava. O i latou o e pauu ai, e taua lava i latou e pe foi o i latou o e na pauu i aso ua mavae. O se taua e faaauau pea. O alii o le perisitua, faatasi ma afafine o le Atua o a tatou soa ma uo, o vaega uma o le vaegaau a le Alii. E tatau ona tatou lotogatasi. O se vaegaau e le faatulagaina lelei, o le a le manumalo. E taua lo tatou tutu faatasi, ia tatou savavali faatasi o se au e tasi. E le mafai ona tatou fevaevae’ai, ae faamoemoe e manumalo. E le mafai ona ia i tatou le le faamaoni ae faamoemoe e lotogatasi. E le mafai ona tatou le mama ae faamoemoe i le fesoasoani a le Silisili Ese.
O alii talavou o le perisitua, o tiakono, aoao, ma ositaulaga, ua tuuina i o latou luga i o latou tofiga faaleperisitua le tiute ia folafola le talalelei, ia aoao atu le upu moni, ia faamalosiau i e vaivai ina ia malolosi, ia “valaau atu i tagata uma ia o mai ia Keriso: (MFF 20:59). O tamaitai talavou o le Ekalesia e le itiiti ifo so latou tiutetauave ia usiusitai i poloaiga a le Atua ma ia auauna atu o ni faataitaiga o le faatuatua ma le ola mama.
E leai se atalii po o se afafine o lo tatou Tama Faalelagi e tatau ona tagofia ni mea o le a faavaivaia ai le mafaufau, le tino, po o le agaga faavavau. O ia mea e aofia ai fualaau oona, ava oona, tapaa, ma ponokarafi. E le mafai ona outou aofia ai i gaoioiga le mama. E le mafai ona outou faia nei mea ma avea ma toa i le galuega a le Alii i le tausinioga tele e faavavau lea e fai pea lava pea mo agaga o fanau a lo tatou Tama.
E le mafai e alii o lenei Ekalesia ona le faamaoni pe amio le sa’o i a latou ava, i o latou aiga, i o latou tiutetauave faaleperisitua pe afai e tatau ona totoa i le uunaiina i luma o le galuega a le Alii i lenei taua tele mo le upu moni ma le faaolataga. E le mafai ona latou le faamaoni ma piopio i mea faaletino e aunoa ma le faaleagaina ai o o latou ofutau. O tamaitai o lenei Ekalesia, pe o i latou o ni ava, tina, po o tuafafine o e e le’i maua ni soa, e le mafai ona le faamaoni pe amio le sa’o i a latou feagaiga ma faamanuiaga ma auauna ai o ni lagolago malolosi i le malo e pei ona tatau ai ona avea i latou.
I a tatou sauniga, e masani ona tatou lagiina se viiga ua leva:
O ai e au ma le Alii? O ai?
Faailoa mai i le taimi nei.
E fesili leai se fefe:
O ai e au ma le Alii? O ai?
E le o se taua masani,
E le o se fili masani.
Ua ala le fili;
O ai e au ma le Alii? O ai?3
O Se Valaau e Tautino
I ni nai tausaga talu ai na faamatala mai ai e se uo ia te au se la talanoaga ma se tasi tagata o le Ekalesia. Na fesili la’u uo i lana uo pe na te lagonaina le latalata atu i lona Tama Faalelagi. Na tali le alii na te le lagona se latalata i ai. Aisea ua leai ai? Na ia faapea mai, “O le mea moni lava, ona ou te le manao ai.” Ona ia faaauau lea e faapea, “Ana fai ou te latalata i le Tama Faalelagi, atonu o le a Ia manao mai i se tautinoga mai ia te au, ae ou te le i saunia mo lena tulaga.”
Mafaufau i ai—o se alii ua tauaveina i ona luga le suafa o le Alii i le papatisoga, o se alii ua faafouina ana feagaiga ma le Alii i ana sauniga faamanatuga, o se alii ua taliaina le perisitua a le Atua ae peitai ua faapea mai afai e latalata o ia i lona Tama Faalelagi, o le a ono manaomia se tautinoga mai ia te ia, ma e lei saunia o ia mo lena tulaga.
I le galuega lenei e tatau ona i ai le tautinoga. E tatau ona i ai le agaga atoa. Ua tatou i ai i se tauiviga maoae faavavau e fitoitonu lava i agaga o atalii ma afafine o le Atua. Tatou te le o faiaina. O loo tatou manumalo. O le a faaauau ona tatou manumalo pe afai tatou te faamaoni ma amiotonu. E mafai ona tatou faia. E tatau ona tatou faia. O le a tatou faia. E leai se mea ua finagalo mai ai le Alii ia i tatou e le mafai ona tatou le faataunuuina i le faatuatua.
Ou te mafaufau i le fanauga a Isaraelu ina ua latou sosola ese mai Aikupito. Na latou tolauapi i tafatafa o le Sami Ulaula. Ina ua toe tepa atu i tua, na latou iloa ai Farao ma ana vaegaau ua o mai e faaumatia i latou. Na lofituina o latou loto i le matatau. O le i ai o vaegaau i o latou tua ma le sami i o latou luma, na latou fetagisi ai i le matatau tele.
“Ona tali atu lea o Mose i le nuu, Aua tou te fefefe, a ia outou laulau tutu ma vaai atu i le olataga mai ia Ieova, o le a faia e ia mo outou i le aso nei: aua o Aikupito ia tou te vaai atu i ai i le aso nei, tou te le toe iloa lava i latou e faavavau.
“O le a tau Ieova mo outou, a e faalologo outou.
“Ona fetalai mai lea o Ieova ia Mose, … fai atu i le fanauga a Isaraelu, ia latou o atu pea ia” (Esoto 14:13–15; faaopoopo le faamamafa).
Ona vaelua lea o le sami, ma agai atu le fanauga a Isaraelu i lo latou faaolataga. Na mulimuli atu tagata Aikupito i lo latou faaumatiaga.
Pe le tatau ea ona tatou o atu pea ia i le faatuatua? O Ia o lo tatou taitai faavavau, o le Alii o Iesu Keriso, ua luiina i tatou i upu o faaaliga. Na Ia fetalai:
“O le mea lea, ina siitia ia o outou loto ma olioli, ma fusi ae o outou sulugatiti, ma ia ofu outou i o’u ofu tau, ina ia outou mafai ona tetee atu i aso leaga… .
“O le mea lea, tumau ia, a o fusi o outou sulugatiti i le upu moni, ma ofu i le ufi fatafata o le amiotonu, ma faaseevaeina o outou vae i le sauniuniga o le tala lelei o le filemu, na ou auina atu ai a’u agelu e tuuina atu ia te outou;
“O tago i le talipupuni o le faatuatua o le a mafai ai ona outou tineia u fanafana mu uma lava a e amioleaga;
“Ma ave le pulou tau o le faaolataga, ma le pelu o lo’u Agaga, … ma ia faamaoni seia ou sau, ma o le a aveina ae outou, ma o le mea ou te i ai tou te i ai foi” (MFF 27:15–18).
O Se Lumanai Susulu
E faaauau pea le taua. O loo faaauau i le lalolagi atoa e faatatau i mataupu o le saoloto ma le faamalosi. O loo faaauau e se vaegaau o faifeautalai e faatatau i mataupu o le upumoni ma le mea sese. O loo faaauau i o tatou lava olaga, i aso taitasi, i o tatou aiga, i a tatou galuega, i a tatou faapotopotoga faaleaoga; o loo faaauau e faatatau i fesili o le alofa ma le faaaloalo, o le lotonuu ma le faamaoni, o le usiusitai ma le amio sao. O loo tatou aafia uma ai—tamaitiiti, talavou, tagata matua, o i tatou taitoatasi. O loo tatou manumalo, ma e le’i susulu faapenei le lumanai.
Ia faamanuia i tatou e lo tatou Atua i le galuega o loo ua manino lava ona faataatia mai i o tatou luma. Ia tatou faamaoni. Ia tatou totoa. Ia ia i tatou le lototetele e faamaoni ai i le faatuatuaga ua tuuina mai e le Atua i totonu o i tatou taitoatasi. Ia tatou le matatau. “Aua [sii mai upu a Paulo ia Timoteo] ua le foaiina mai e le Atua ia te i tatou le Agaga e matau ai; a o le Agaga e faamalosi ai, ma alofa ai, ma mafaufau tonu ai. O lenei, aua e te ma i le molimau i lo tatou Alii” (2 Timoteo 1:7–8).
Manatu mo faiaoga o aiga
A uma ona e suesue ma le agaga tatalo i lenei savali, ona fetufaai atu lea e faaaoga ai se metotia e uunaia ai le auai o tagata o loo e aoaoina. O ni nai faataitaiga nei:
-
Faaaoga le tusitusiga e toe iloiloina ai le talafaasolopito o le taua a le lelei ma le leaga lea na amataina talu mai le taimi a o le’i Foafoaina le lalolagi. Ia faamalamalama atu o le Malamalama o Keriso ua faatusaina i le faamoemoe i se lalolagi pouliuli. Faitau le vaega “O Se Lumanai Susulu.” Ia fautua atu ni gaoioiga e mafai ona tatou faia e manumalo ai i le taua i le va o le lelei ma le leaga.
-
Tusi upu o le 2 Timoteo 1:7–8 i luga o ni kata mo tagata taitoatasi o le aiga. Valaaulia tagata o le aiga e tusi i tua o le kata se sini a le tagata lava ia ina ia avea ma se soo o Iesu Keriso e malosi le tautinoga. Fai atu i tagata o le aiga e faapipii le kata i se nofoaga e faigofie ona latou vaai i ai i aso uma.
-
Aumai se tusipese ao e asiasi i aiga taitasi. Valaaulia tagata o le aiga e faaaoga le faasino upu e sue ai viiga e uunaia ai le [agaga] tautino. Filifili se viiga se tasi e usuina pe faitauina leotele. Faatusatusa nei upu i vaega o le saunoaga a Peresitene Hinckley. Faaiu i le toe iloiloina o le valaau a Peresitene Hinckley ia tautino ma lana molimau e uiga i le lumanai susulu mo e auauna faamaoni i le itu a le Alii.