Ua Maua Tusitusiga Paia Fusitolu i le Gagana Toga ma le Gagana Haiti

O le uluai taimi lenei, o le a maua ai e tagata o le Ekalesia e tautatala i le gagana Toga ma le gagana Haiti ia tusitusiga paia fusitolu i la latou lava gagana.

E tusa ma le 80,000 tagata o le ekalesia e tautatala i le gagana Toga ma le 14,000 i le gagana Haiti o le a faamanuiaina i tusitusiga paia fusitolu, o loo aofia ai le Tusi a Mamona, Mataupu Faavae ma Feagaiga, Penina Tau Tele, ma le Taiala mo Tusitusiga Paia.

Ua saunoa foi Tod Harris, le pule o faaliliuga o tusitusiga paia e faapea, o loo aofia ai foi i totonu o le fusitolu lea ia faafanua, o ata, ma le faasologa o le Ekalesia.

Sa maua le Tusi a Mamona i le gagana Toga talu mai le tausaga 1946, o le Mataupu Faavae ma Feagaiga ma le Penina Tau Tele na maua talu mai le tausaga e 1959, ae o le lolomiina o tusitusiga paia fusitolu ua faailoga ai le taimi muamua ua tuufaatasia ai tusi e tolu i se lomiga e tasi, o le saunoaga lea a le susuga ia Kai Andersen, o le failautusi o le Komiti o Tusitusiga Paia.

Na saunoa le uso ia Andersen, E ui lava ina sa maua le Tusi a Mamona i le gagana Haiti talu mai le 1999, ae o le Mataupu Faavae ma Feagaiga ma le Penina Tau Tele faatoa maua ina ua maea ma faasalalau tusitusiga paia fusitolu.

O tusitusiga paia fusitolu i le gagana Toga ma le gagana Haiti o loo aofia ai le faaliliuga lata mai o le Tusi a Mamona atoa ai ma faamatalaga lagolago i lalo.

Sa galulue faatasi le au faaliliu, o i latou sa nafa ma le iloiloina, ma taitai faalelotu e faaliliu tusitusiga paia i se gagana ua filifilia, na saunoa iai le uso ia Harris, ma o le umi o le taimi e faatino ai nei galuega e eseese lava.

Ua faamalosia foi tagata o le Ekalesia e le Au Peresitene Sili ina ia iai a latou lava tusitusiga paia mo suesuega i taimi uma, sauniga lotu, ma tofiga mo aoaoga.