Tuu Le Malamalama i Lou Olaga
O le toatele o outou o loo tauivi ma lo outou faasinomaga. Atonu e taumate nisi o outou po o le a le lumanai mo outou. O loo tuuina mai e le lalolagi ni uunaiga faatosina. E matua le mautonu ai. O nisi o outou atonu e le gata ina le mautinoa le mea o loo agai i ai, ae atonu o loo outou fesiligia foi lo outou taua moni lava. Sei ou tautino atu ia te outou, ou te talitonu ma lo’u loto atoa o outou o se tupulaga filifilia.
Ou te tautala e uiga i le o ese mai le pouliuli ma o atu i le malamalama. Ua faapea mai Mika: ‘E ui ina ou nofo i le pouliuli, ae o Ieova o lo’u malamalama ia.” (Mika 7:8).
O Le Ala Tatou Te Maua ai le Malamalama
Tatou te maua le malamalama mai le Alii. E mafai ona tupu lenei mea ia i tatou pe a tatou suesue i tusitusiga paia ma “[ua] tatalaina ai o tatou mata ma [ua] faapupulaina ai lo tatou malamalamaga” (MFF 76:12). O le suesue i tusitusiga paia i aso uma e faamalamalamaina ai la tatou vaaiga faaleagaga ma tatalaina ai o tatou malamalamaaga i le poto atili. Ou te taumafai e faitau mai tusitusiga paia i le faaiuga o le aso. E aumaia ai se filemu maoae. Ou te moe lelei ai i le faia o lenei mea.
Tatou te maua le malamalama faaleagaga pe a tatou auai i sauniga faamanatuga. O le ai ma inu i le faamanatuga ma le musumusuga o le sauniga tapuai i vaiaso taitasi e fafagaina ai a tatou maa faaleagaga.
Tatou te maua le malamalama faaleagaga pe a tatou tali atu i valaauga. O le tautua i se valaauga i le Ekalesia e sili atu le faamanuiaina ai o i tatou nai lo isi.
Tatou te maua le malamalama faaleagaga pe a totogi a tatou sefuluai, aua e mafai ai ona tatalaina mai pupuni o le lagi (tagai Malaki 3:10).
Tatou te maua le malamalama faaleagaga pe a tatou usuina viiga. O le usuina o viiga e faamalosia ai i tatou ma aumaia faatasi ai i tatou i le faaleagaga.
Tatou te maua le malamalama faaleagaga pe a tatou tatalo. A o avea ma se taulealea talavou, na faitau ai le Perofeta o Iosefa Samita, “Ae afai ua leai se poto i so outou, ina ole atu ia i le Atua, o le foai tele mai i tagata uma” (Iakopo 1:5).
Ou te fautuaina ia outou faitauina lana faamatalaga o le Uluai Faaaliga, lea na mulimuli mai ina ua ia finafinau o le a ia saili le poto mai le Atua. Na ia tusia, “Ina ua oo ifo le malamalama i o’u luga sa ou vaaia …” O le a le mea na ia vaaia? Na vaai o ia i le Tama ma le Alo. Ina ua faaiuina le faaaliga, na ia faapea mai, “Sa leai so’u malosi ina ua alu ese atu le malamalama” (Talafaasolopito—Iosefa Samita 2:17, 20).
E manino lava, tatou te le o faatalitali i se asiasiga faalelagi, ae ua agavaa i tatou i le faateleina o le malamalama faaleagaga ma le faalemafaufau pe afai tatou te muai saili “le malo o le Atua, ma lana amiotonu” (Mataio 6:33).
O Le a le Manulauti o lo Tatou Faatuatua?
O se vaega o lo tatou o mai i le malamalama e faalagolago lea i le manulauti o lo tatou faatuatua. Pe vaaia ea le malamalama o se malosiaga saua po o se saolotoga? A o matutua a’e le autalavou, latou te lagonaina mana fou, tuinanau fou, ma faamoemoega fou. Ae peitai ua ta’u atu ia i latou, o nisi o nei mea e tatau ona taofiofia. O le taofiofi o o tatou tuinanau, po o le usitaia ma le tatau o faatapulaa, e alagatatau mo lo tatou tuputupu ae faaletagata lava ia ma le alualu i luma. E pei ona fai mai Alema, “Ia e taofi ou tuinanau uma, ina ia faatumuina oe i le alofa” (Alema 38:12).
I ni nai tausaga talu ai na talanoa ai se polokalama na faasalalauina i le lotoifale e uiga i pagota na faafalepuipuiina, o e na faalalataina ni solofanua aivao. A o faia faauooga a pagota ma solofanua, na latou aoao ai e uiga i le onosai, pulea o le loto ita, faaaloalo mo isi, ma le taua o le galue i totonu o se faiga faatulagaina. A o latou vaaia le aoaoina e solofanua o le usiusitai i a latou faatonuga, na latou iloa ai auala na semanu e mafai ona latou aloese mai ai i mea sese mataga na mafua ai ona latou i ai i le falepuipui.
I lo tatou lalolagi i aso nei, ua tele naua leo i tusi faitau, mekasini, televise, ma tifaga e faaali ai faiga feusuai i fafo atu o le faaipoipoga o se mea ua taliaina i le olaga lautele, e oo lava ina faapea o se tulaga manaomia. O nisi tagata talavou, ua seetia i lenei taufaasese, ua fesili faapea: “Aisea e sese ai?” “Ua mausali le alofa o le tasi i le isi!” Na tali e Elder Jeffrey R. Holland o le Korama a Aposetolo e Toasefululua lenei fesili e faapea:
“I tulaga o le alofa molitino faaletagata, e tatau ona e faatali! E tatau ona e faatali seia mafai ona e tuuina atu mea uma, ma e le mafai ona e tuuina atu mea uma se’i vagana ua e faaipoipoina aloaia ma faaletulafono. O le tuuina atu i se auala e le faatulafonoina o se mea e le o sau meatotino e tuuina atu (manatua, ‘e le aia foi outou ia te outou’ [tagai 1 Korinito 6:19]) ma o le tuuina atu na o se vaega lea e le mafai ona sosoo atu ma le meaalofa o lou tagata atoa, o le avanoa lea mo [lou] faatamaiaga faalelagona. Afai e te faaauau pea ona sailia le faamalieina faaletino e aunoa ma le faamaoniga mai le lagi, ua e uia le ala matautia e afaina ai lagona faaleagaga, faalemafaufau lea e mafai ona e faavaivaia ai uma lou moomoo mo se tuinanau faaletino ma lou malosi e tuuina atu se tautinoga ma le loto atoa i se tasi ua e alofa moni i ai i se taimi mulimuli mai… . I le aso o lau faaipoipoga o le meaalofa sili e mafai ona e tuuina atu i lau soa e faavavau o lou tagata sili lea—e mama ma lē pona ma agavaa mo le mama e faapena ona tauia mai ai.”1
O Le Faatuatua e Aveeseina Mai i Tatou mai le Pouliuli
O lo tatou faatuatua e le o se faaputuga o ni talitonuga ma faiga masani ua mamafa tele e le mafai ona tauaveina. Ua iloa e i latou o e ua o ese mai le pouliuli, e tauaveina i latou e o latou faatuatua. O le faatuatua e le mamafa; o le faatuatua na te siitia ma tuuina mai ia i tatou apaau e aveina atu ai i tatou i luga o nofoaga faigata. E pei ona folafola mai e Isaia, “A o e faatalitali ia Ieova e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina” (Isaia 40:31).
O le sau i fafo mai le pouliuli i le malamalama e faasaolotoina ai i tatou mai le itu pogisa o o tatou agaga, lea e oo mai ona o le matau, lotovaivai, ma le agasala. E mafai ona e iloa se tasi ua sau i le malamalama e ala i ona foliga ma ona uiga. Na matagofie le fetalaiga a le Faaola: “Ua ou sau ina ia latou maua le ola, ia maua atili ai lava” (Ioane 10:10).
Talu mai le aso 11 o Setema, 2001, ua matou popole e uiga i se isi ituaiga o pouliuli—o uunaiga a tagata faatupu faalavelave ma ave faamalosia isi. Ua outou tutupu ae i se lalolagi e ese mai nai lo [le lalolagi na] ou tupu ae ai. Mo le tele o tausaga na matou femalagaai ai i vaalele e aunoa ma le sueina o a matou ato pe ui foi i ni masini saili auupega.
A’u uo talavou pele e, o o outou fili e le o ni tagata uma e faatupu faalavelave ma ni tagata e ave faamalosia isi. O nisi o loo i totonu o a outou lava tupulaga—atonu e oo lava i totonu o le vaega tou te ta’ua o uo—o e o le a faamalosiauina outou ia faasaolotoina outou lava mai tulaga faasaina ae faataitai i fualaau faasaina, meainu malolosi, po o le faia o tuinanau o feusuaiga ma se isi o le isi itupa—po o se isi foi o lau lava itupa. O i latou o le au faitio, o le au faatuiese, ma le au le talitonu—soo se tasi e taofiofia i tatou i le pouliuli ma taumafai e taofiofia i tatou mai le mauaina o le malamalama i la tatou malaga e faavavau. O isi faatupu faalavelave faaleagaga e aofia ai i latou o e uunaiina ponokarafi, o i latou e leai ni tulaga taua [i o latou olaga]. O nei tagata o loo i le pouliuli, e leai ni faatuatua, ma e le naunau e saili se mana e sili atu nai lo i latou lava mo tali i fesili ma faafitauli. O nisi e i ai lena manatu faapito, le lelei o latou lagona ia i latou lava, ma vaivai le faatuatua, e le mafai ai ona latou manatu i le mauaina o le malamalama ma le poto i se isi lava ala.
Avea ma Tagata e Puipuia le Faatuatua
E tatau ona avea i tatou uma lava ma tagata e puipuia le faatuatua. A o tatou puipuia lo tatou faatuatua, tatou te o ese mai le pouliuli ma agai atu i le malamalama. O outou le autalavou tou te tauaveina faatasi le tiutetauave o le folafola atu o le upu moni o le talalelei toefuataiina. Na pau le ala tou te mataalia ai i le faia o lenei mea, pe a outou taumafai e faia le mea tonu i o outou olaga taitoatasi. Ina ia faia lenei mea o le a outou manaomia ai se malamalamaaga ma se molimau o aoaoga faavae autu o le Ekalesia. O nei [aoaoga] faavae autu o lo tatou faatuatua e muamua, o Iesu o le Keriso, o le Alo o le Atua, ma o le Togiola o le lalolagi ma lona lua, o le Atua le Tama ma Lona Alo, o Iesu Keriso, na faaali moni lava i le Perofeta o Iosefa Samita, ma toefuataiina le atoatoaga o le talalelei ma le Ekalesia moni.
Mai lea e mulimuli mai ai faamoemoega o le Ekalesia: Muamua, ia saunia ona tagata mo le olaga atoatoa. “O lenei, ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia” (Mataio 5:48). Lona lua, ia faatupuina ma uunaia ona tagata e avea o se tino o le Au Paia, lotogatasi i le faatuatua ma galuega. Lona tolu, ia folafola atu le savali o le upu moni toefuataiina i le lalolagi. Lona fa, ia laveaiina o tatou tagata oti.
Atonu o loo outou sauniuni e auauna atu o ni faifeautalai faamisiona. O le valaauina e tautua o se faifeautalai mo lenei Ekalesia e le o se aia tatau ae o se faamanuiaga. O le auaunaga faafaifeautalai e maua ai le olioli, ae e le o ni fiafiaga ma taaloga; o se galuega faigata. O le apoapoaiga a le Alii i faifeautalai o loo i ai i le vaega e 4 o le Mataupu Faavae ma Feagaiga: “O outou o e o atu i le galuega a le Atua, ia outou auauna atu ia te ia ma o outou loto atoa, ma mafaufau atoa, manatu atoa ma le malosi atoa, ina ia mafai ona outou tutu ma le le pona i luma o le Atua i le aso gataaga” (f. 2).
O auaunaga faafaifeautalai uma lava e talitonu i le agavaa faaletagata lava ia. Na fetalai le Alii, “Ia mama outou o e tauaveina ipu a le Alii” (MFF 38:42). O nisi o outou o loo agavaa, ae ona o faafitauli faalesoifua maloloina atonu e le mafai ai ona onosaia tulaga faigata o le talaiga i le misiona. Atonu o le a outou maua nisi ituaiga avanoa e auauna atu ai o le a avea ma faamanuiaga sili ia te outou.
Taliaina o le Togiola
I ni nai tausaga taluai, a o i ai Elder Merrill J. Bateman o le Au Peresitene o le Au Fitugafulu i Iapani, na faailoa atu e faifeautalai o ia i se uso Iapani talavou o le na faatoa auai lava i le Ekalesia. Na sau o ia mai se olaga e le Kerisiano. Ina ua feiloai o ia i faifeautalai, na fiafia o ia i le savali, ae na le mafai ona malamalama pe lagonaina le tulaga manaomia mo se Faaola, ma e lei i ai sana molimau e faatatau i le talalelei. I se tasi aso na tonu i faifeautalai e faaali ia te ia se ata tifaga e uiga i le Togiola. Na matamata le alii talavou i le ata, ae na te lei maua ai lava se molimau.
“O le taeao na sosoo ai sa alu ai o ia i le galuega. Na faigaluega o ia i se fale fai matatioata… . Na oo atu se tamaitai matua i totonu o le faleoloa. Sa manatua e ia le sau o lea tamaitai matua i ni nai vaiaso i luma atu. Sa ta’e ia te ia lana matatioata. Sa ia manaomia se pea fou. I lona oo mai muamua, sa le lava sana tupe ma na toe foi ai e toe faaputu se isi tupe ia mafai ai ona faatau le matatioata fou. Ina ua sau o ia i lena aso, na ia toe faaali atu lana matatioata ia te ia ma faaali atu foi ma lana tupe ua i ai nei. Na ia iloaina ai, e lei atoa lava lana tupe. Ona oo mai lea o se manatu ia te ia: O loo i ai sa’u tupe. Ou te le tau taua ia te ia. E mafai ona ou faaatoaina le tau. Ona ia fai atu lea ua lava lana tupe, ma ave lana matatioata, [ma] faatulaga le aso e toe foi atu ai pe a uma ona ia faia le matatioata… .
“Sa toe foi mai le tamaitai i se taimi mulimuli ane. E foi mai ua uma ona saunia lana matatioata mo ia. Na ia tuuina atu ia te ia, ma sa tago loa ua sulu [ma alaga atu] ‘… Ua ou vaai. Ua ou vaai.’ Ona amata loa lea ona tagi o ia. I lena tulaga, sa amata ai ona tupu i totonu o le loto o lea alii, se lagona mu ootia ma sa oo ina faateleina i totonu ia te ia. Fai mai o ia, ‘… Ua ou malamalama. Ua ou malamalama.’ Na amata ona tagi o ia. Na ia tamoe atu i fafo o le faitotoa, e sue faifeautalai. Ina ua ia maua i laua, sa ia fai atu, ‘Ua ou vaai! Ua pupula o’u mata! Ua ou iloa o Iesu o le Alo o le Atua. Ua ou iloa sa fuli ese le maa mai le tuugamau ma i lena taeao matagofie o le Eseta na toetu mai ai o Ia nai le oti. E mafai ona ia faaatoaina faaletonu i lo’u olaga i taimi ou te le atoatoa ai.’”2
E mafai ona tatou vaai uma e ala i le malamalama o musumusuga, o le Agaga lea o le Agaga Paia. O le a faamalamalamaina lo tatou ala mai le pouliuli ma faigata. O le auala sili ona mautinoa e o ese mai ai i le pouliuli ae oo atu i le malamalama, e ala lea i le fesootaiga ma lo tatou Tama Faalelagi e ala i le faagasologa ua taua o faaaliga faalelagi. Na folafola mai e Peresitene Uilifoti Uitilafi (1807–98), “Soo se taimi lava na i ai se nuu o le Alii i le lalolagi na Ia faailoa maia, o lena nuu na taitaia i faaaliga.”3 O le musumusuga a le Atua e avanoa mo tagata uma o e saili ma le agavaa i taitaiga a le Agaga Paia. E sili ona moni lenei mea ia i latou o e ua mauaina le meaalofa o le Agaga Paia.
E Faaauau Pea Faaaliga
O i latou o fia o mai i fafo o le pouliuli ma o atu i le malamalama e tatau ona mautinoa o loo ola i latou i musumusuga ma faaaliga e auala mai i o tatou perofeta, tagatavaai, ma tali faaaliga. Ua tau mai e Amosa ia i tatou, “E le faia lava se mea e le Alii o Ieova, a e faaalia lona finagalo i ana auauna o perofeta” (Amosa 3:7). Mo le tele o seneturi ua faaauau pea ona faalogologo perofeta i musumusuga a le Alii aua ua ia i latou le tiutetauave o le faailoa atu o le finagalo o le Alii i isi.
O le auala sili lava mo outou tagata talavou e ola latalata atili ai i le Faaola o le lagolagoina lea o Lana perofeta soifua i le lalolagi, o le Peresitene o le Ekalesia. Afai tatou te le mulimuli i le perofeta soifua, po o ai lava o ia, ua tatou oo i tulaga matautia o le oti faaleagaga.
Ou te molimau atu o le faagasologa o faaaliga faifai pea e oo mai i le Ekalesia i taimi uma. E oo mai i aso uma. E manaomia lenei tulaga mo le Ekalesia e faataunuuina ai lana misiona. A aunoa ma faaaliga o le a tatou toilalo. E manaomia e le Ekalesia i taimi uma le taitaiga a le ua faaao i ai, o le Alii ia ma le Faaola o Iesu Keriso.
O faaaliga faifai pea o le a le mafai ma e le mafai ona faamalosia e uunaiga mai tagata i fafo ma mea e tutupu. E le o le [tulaga] e pei ona taua e tagata o “faaaliga o tulaga alualu i luma a le lautele.” E le amata mai perofeta; e mai le Atua. O le Ekalesia ua taitaiina e le perofeta i lalo o le musumusuga, taiala ma le taitaiga a le Alii.
O lo’u talitonuga ma le tautinoga i le moni faalelagi o le Ekalesia ua aofia ai nei se vaitaimi umi lava—o le umi lava o loo ou manatuaina ai. O lena molimau ua tupu malosi a o mavae atu tausaga. O le malamalama faapitoa i le moni o lenei talalelei na oo mai a o le’i valaauina au i le tofi paia faaaposetolo ma ua faamaonia i le tele o taimi talu mai lena [vaitaimi]. Ou te molimau atu ia te outou tupulaga talavou, o loo i ai i le talalelei tali i lui ma faafitauli o le olaga. O le auala mautinoa lea i le fiafia ma le faataunuuina o le folafolaga a le Faaola, o le “filemu lea i lenei lalolagi, ma le olaga faavavau i le lalolagi a sau” (MFF 59:23).
Mai se lauga i se faeasaite a le Ofisa o Aoga a le Ekalesia i le aso 8 o Setema, 2002.