Manatu mo afiafi faaleaiga

O nei manatu e mafai ona faaaoga mo aoaoga i le potuaoga faapea foi i le aiga.

“Tuu Le Malamalama i Lou Olaga,” i. 16: Ia tuu e se tasi o le aiga se pusa po o se ato i luga o lona ulu e ufiufi ai. Fesili i le tagata lena e faamatala mea o loo ia vaai i ai. Fesili pe faapefea ona tutusa lena aafiaga ma le pouliuli faaleagaga. Filifili faataitaiga mai le tala e aoao ai mea tatou te maua ai le malamalama faaleagaga.

“Lagolagoina o Lou Epikopo,” i. 30: Ia tusia i lalo e tagata o le aiga ni lu’i latou te faafeagai pe latou te ono faafeagai. Iloilo tagata sili e ono talafeagai ona fesoasoani i nei lu’i. (O tali e mafai ona aofia ai matua, faiaoga o aiga po o faiaoga asiasi, ma le epikopo.) Faitau le vaega “Faamama Lana Avega,” ma toe iloilo matafaioi a le epikopo. Talanoaina auala e mafai ona lelei ai le lagolago a le aiga i le epikopo. Fuafua se gaoioiga faaleaiga e faia ai se mea manaia mo lo outou epikopo po o le peresitene o le paranesi.

“Misia o le Ipu a le Lalolagi,” i. 37: A o e faitauina le tala, ia faalogologo tagata o le aiga mo auala na avea ai Fabiana o se faataitaiga lelei. Mo se gaoioiga, togi se polo i tagata eseese o le aiga. A o latou sapoina le polo, ia latou faasoa mai pe faapefea ona avea i latou ma faataitaiga lelei i isi.

“Na Avea Ai i Matou o se Aiga,” i. 38: Talanoaina ma iloilo afiafi faaleaiga ua mavae. Toe iloilo mea e ono na faia e le aiga o le na tusia le tala na faamanuiaina ai a latou afiafi faaleaiga. Fai se siata e iloa ai tofiga o afiafi faaleaiga, ma mafaufau ai i ni autu o afiafi faaleaiga i le lumanai.

“Maata’i Fee Matautia,” i. U2: Faamatala le maata’i fee ma lisi nisi o faaosoosoga e faaaogaina e Satani e faatosina ai tagata. Ia tusi e tagata o le aiga ni faataitaiga o nei maata’i fee faaonaponei. Saili ni mau e faailoa mai ai pe faapefea ona foia ma teena nei faaosoosoga. Talanoaina pe faapefea ona fai atu leai i mea leaga.