2007
Fesili & Tali
Iuni 2007

Fesili & Tali

“Ua ou toe foi mai i le ekalesia ma taumafai e faia se amataga fou i le olaga ina ua mavae le faia o ni mea sese, ae ua ou fefe ne’i ou toe pau foi. E faapefea ona ou faatoilaloina lenei atuatuvalega?”

  • Ina ia foia lou fefe i le pau ese, “fetaomi atu i luma” i le ala sao ma le vaapiapi.

  • Usitai i le afioga a le Atua, o loo maua i tusitusiga paia ma aoaoga a perofeta o aso e gata ai.

  • Tapuai i le Atua, saili ia lagona Lona alofa, ma salamo ina ia mafai ai ona faamalosi oe e le Faaola.

  • Aua le amanaiaina tagata o e faifai mai ia te oe i lou taumafai e fai le mea sao.

Liahona

E le na o oe [ua i ai] lenei lu’i. Tatou te faia uma lava ni mea sese, ma e mafai ona tatou pauu uma pe afai tatou te le faaeteete. E mafai ona e maua nisi o tali i lau fesili i le 1 Nifae 8, o se faamatalaga o le miti a Liae. O nai mea ia na vaaia e Liae e mafai ona fesoasoani ia te oe:

Na ia vaaia tagata o “fetaomi atu i luma” i le ala sao ma le vaapiapi—o lona uiga, o loo taumafai e faamaoni. Ae o nisi “ua feseseai i latou, ma ua le toe iloa” (f. 23). Na oo atu nisi i le laau o le ola ae peitai “ua maasiasi i latou, ona o e ua tauemu ia te i latou, ma ua latou pauu ese i ala leaga ma ua le iloa” (f. 28). O isi na taunuu; “ua latou fetaomi mai i luma i le ala, o piimau pea i le ai uamea, ua oo ina taunuu mai ma faapauu ma ua latou aai i le fua o le laau” (f. 30). O le fua o le laau ua faatusaina i le alofa o le Atua—o faamanuiaga o le Togiola a Iesu Keriso.

Matau mea na latou faia ina ia latou faamanuiaina. Afai e te faia nei mea, e mafai ona e faatoilaloina lou atuatuvale i le pau ese atu.

  1. 1. Fetaomi atu i luma. Ua faamalamalama mai e Nifae: “O le mea lea e tatau ai ona outou fetaomi atu i luma ina ua i ai le faamoemoe atoatoa lelei, i le ma le alofa atu i le Atua atoa ma tagata uma. O lea, afai tou te fetaomi atu i luma, o fiafia i le afioga a Keriso, ma tumau lava e oo i le iuga, faauta, o loo faapea ona fetalai mai le Tama: Tou te maua le ola faavavau” (2 Nifae 31:20).

  2. 2. Piimau i le ai uamea. Na fai mai Nifae o le ai uamea “o le afioga lea a le Atua; o i latou uma o e faalogo foi i le afioga a le Atua, ma taofi mau i ai, e le fano i latou e faavavau, e le mafai foi tofotofoga ma u fanafana mu a le ita mai ona manumalo ia te i latou e oo i le tauaso e taitaiese ai i latou i le malaia” (1 Nifae 15:24).

  3. 3. Aai i le fua o le laau. O le aai i le fua o le laau o lona uiga o le lagonaina lea o le alofa o le Atua i lou olaga. E mafai ona e tatalo ina ia e lagona lena alofa, ma e mafai ona e salamo, ma faatagaina le Togiola e faamanuia ai lou olaga.

  4. 4. Aua le amanaiaina i latou o e faifai mai ia te outou mo le faia o le mea sa’o. I le miti a Liae, o i latou o e na amanaiaina le faifai mai a tagata na i le fale tele ma le inosia na pauu ese. O lena fale ua faatusa i le faamaualuga ma talitonuga o le lalolagi. Aua o lena fale e le’i i ai se faavae, “ua pau, ma ua nutipalaina” (1 Nifae 11:36). O le faamaualuga o le lalolagi e le tumau; o le faia o le mea sao o le a faamanuiaina ai oe e faavavau.

O le faia o nei mea e fa o le a fesoasoani ia te outou e fausia i luga o le faavae o le talalelei a Iesu Keriso, “o le faavae mau lea, o le faavae foi lea, afai e ati ae tagata i ona luga, e le mafai lava ona pauu i latou” (Helamana 5:12).

Au faitau

I le tolu tausaga talu ai na ou alu ese ai ma le Ekalesia. Na faanoanoa lo’u loto ona o a’u mea sese, ma ou filifili ai e toe foi i le Ekalesia. Na ou fefe e pau atu i le sese, ona ou filifili lea ou te alu ifo i o’u tulivae ma faia le mea ou te lei faia mo se taimi umi: o le tatalo i lo tatou Tama Faalelagi. Na ou ole atu ia te Ia e fesoasoani mai ia te a’u e tuua faaosoosoga ina ia le i ai se avanoa o le tiapolo i lo’u loto aua na te faaumatia lo’u filemu ma faanoanoa ai lo’u agaga. Na tuu atu lo’u faatuatuaga i le Alii mo Ia e faamalamalama mai lo’u ala. O lenei la ua ou maua le filemu i lo’u loto. Afai e te lagona le faanoanoa ona o au agasala ma mea sese, faitau le 2 Nifae 4:17–35.

Elder John Sanchez, 21, Misiona a Piura Perú

E tofotofoina i tatou ma tatou te faia mea sese i aso uma e ui lava atonu o loo tatou i totonu o le Ekalesia. Ae o le mea taua o lo tatou salamo faamaoni mo mea ua tatou faia ma tausinio i aso uma e tetee atu i faaosoosoga ma, ia sili atu i mea uma, ia agavaa ma tatalo e le aunoa ma ole i le Tama Faalelagi mo le fesoasoani, aua Na te le faagaloina lava i tatou. Afai tatou te mananao moni e sui, o le a Ia fesoasoani ia i tatou aua e alofa tele o Ia ia i tatou.

Denise E., 18, Rancagua, Chile

A e lagonaina le fefe, ia tatalo, anapogi, ae maise lava ia suesue i tusitusiga paia. O loo i ai iina le afioga a le Alii, ma o loo i ai iina tali i a tatou fesili. Manatua e le tuuina mai e le Alii ni poloaiga e aunoa ma le saunia o le ala mo i tatou e faataunuuina ai. Ma e alofa tele o Ia ia i tatou o lea Na te faamagaloina ai i tatou pe a tatou salamo.

Ana A., 16, Falcón, Venesuela

Muamua, e tatau ona tatou iloa e alofa le Tama Faalelagi ia i tatou e tusa lava pe afai ua tatou pauu. O le ki lava o le toe tulai ma taumafai pea. Lona lua, ia malamalama o le loto vaivai o le auupega lea a Satani e taofia ai i tatou mai le ausiaina o le fiafia moni lea e na o le talalelei a Iesu Keriso e maua ai. O se tasi o togafiti sili a le tiapolo o le tataiina lea o o tatou manatu e taulai atu pea i a tatou agasala po o mea sese ua tea ma le atuatuvale nei toe tupu i le lumanai. O nei ituaiga manatu e na ona taofia ai i tatou mai le agai i luma ma le faaleleia o i tatou lava. Mulimuli, o se upusii lenei ou te ola ai: “Aua le avea lou fefe i lou pe, e taofia ai oe mai lou taalo i le taaloga.” O i tatou o fanau a lo tatou Tama Faalelagi, ma faatasi ma Lana fesoasoani, o le a tatou manumalo.

Chad C., 20, Iuta, ISA

I au tatalo faaletagata lava ia, sasaa atu ou lagona fefe e uiga i le pau ese. Faitau tusitusiga paia i aso uma ina ia maua ai le malamalama o le talalelei ma ia lagona ai le Agaga. Auai i sauniga lotu uma, malaga i le malumalu, ma gaoioiga e talafeagai ai, ina ia e lagonaina ai le Agaga i le tele e mafai ai. E atamai foi le saili mo fautuaga mai lou epikopo ma ou matua.

Jaclyn B., 17, Kansas, ISA

Ou te iloaina ou lagona. Ua ou toe foi mai i le lotu, ma o lea ua ou toaga i gaoioiga uma lava a le Ekalesia e aofia ai le galuega faafaifeautalai. O se tasi o lesona ua ou aoaoina o le, ia malosi le faatuatua ia Iesu Keriso. Afai tatou te faatuatua ia te Ia, o le a fesoasoani tatou te malolosi ai. Ou te iloa ua na o Iesu Keriso lo tatou faavae mautu lea, e pei ona fai mai le Helamana 5:12.

Cheenee L., 17, Bulacan, Filipaina

E alofa ma malamalama lo tatou Tama Faalelagi ia i tatou. Na te silafia tatou te le atoatoa ma tatou te vaivai gofie. Ou te iloa e alofa lo’u Tama Faalelagi ia te a’u ma tuuina mai ia te au le malosi ou te faaauau ai pea e ala i le suesue o tusitusiga paia, tatalo, ma le anapogi. A tatou pauu, e tatau lava ona tatou toe tutu i luga i taimi uma.

Celeste S., 20, Oslo, Norway

O tali o loo faamoemoe o se fesoasoani ma ni manatu, ae le o se faasilasilaina atu o ni aoaoga faavae o le Ekalesia.

E sili atu le malosi o au feagaiga nai lo le malosi o faaosoosoga. Aua nei faatagaina le atuatuvale i agasala ua tuanai e faavaivaia ai lau tautinoga e salamo ma lafoai na agasala. Manatua! Ua folafola mai e le Atua e faasaoina oe ‘nai lima o le na inoino [ia te oe], ma na [faaolaina oe] nai le lima o le na ita i ai’ (Salamo 106:10).”

Elder Jeffrey R. Holland o le Korama a Aposetolo e Toasefululua, “O Mea Ou te Manao e Iloa e Tagata Fou Uma o le Ekalesia—ma ia Manatua e Tagata ua Leva i le Ekalesia,” Liahona, Oke. 2006, 14.