O Mai e Faalogo i le Siufofoga o se Perofeta
Maata’i Fee Matautia
I le tele o tausaga ua mavae, i se tofiga i motu matagofie o Toga, sa faamanuiaina ai au e asiasi atu i le aoga a le tatou Ekalesia, le Aoga Maualuga a le Liahona. A o ou ulu atu i se tasi o potuaoga, sa ou matauina ai le gauai atu o tamaiti i lo latou faiaoga. Sa uu i lona lima se mea uiga ese e foliga o se maunu i’a e gaosi mai se maa lapotopoto ma ni atigi figota lapopoa. Na ou aoaoina ai le upu faaToga mo lea maunu o le maka-feke. O lona uiga o se “maata’i fee.”
Sa faamalamalamaina e le faiaoga e faapea e sopoia e le aufaifaiva i Toga se aau, e aloalo o latou paopao i le lima e tasi ae faatautau ifo i le isi lima le maata’i fee i le isi itu. E oso faatotope a’e se fee ma se’i atu le maunu, faapea ua maua sana meaai lea e manao i ai. Talu ai ona o le mau ma le malosi o le pipii a le fee ona o lona natura lea, na te le faamamuluina le mea taua ua ia maua, e mafai ai lava e se faifaiva ona tata a’e i totonu o le vaa.
Sa faigofie mo le faiaoga le faailoa atu i le autalavou naunautai ma le tiotio e faapea o le tiapolo—o Satani lea—e i ai ana maata’i fee lea e maileia ai tagata masalosalo ma pulea ai o latou taunuuga.
O aso nei o loo siomia ai i tatou e maata’i fee lea e taumafai Satani e faatosina i tatou ina ia maileia ai. O le taimi lava e pipiimau i ai, o maata’i fee faapea e matuai faigata lava—ma o nisi taimi e toetoe lava a le mafai—ona faamamulu.
O loo i ai pea i o tatou luma le maata’i fee o amioga le mama ma ponokarafi. Ua ou ta’ua le isi maata’i fee lea o fualaau oona, e aofia ai le ava malosi.
O loo i ai le isi anoanoai o maata’i fee lea o loo faatautau ifo e ia i o tatou luga ina ia taitaiese ai i tatou mai le ala o le amiotonu. Ua tuuina faatogafiti na maata’i fee o loo natia ma tauanau mai i tatou ina ia uu mai i latou ma ia mamulu ese atu ai le mea e sili ona tatou manaomia. Ia aua nei faaseseina. Ua tuuina mai e lo tatou Tama Faalelagi ia i tatou le malosi e mafaufau ai ma alofa ai. Ua ia i tatou le mana e tetee atu ai i faaosoosoga.
Faatali teisi e tatalo. Faalogo i lena leo filemu ma le itiiti lea e tautala mai i le taele o o tatou agaga. O le faia faapea, tatou te liliuese ai mai le faatafunaga, mai le oti, ae maua i le fiafia ma le ola faavavau.
Mai se lauga o le konafesi aoao o Aperila 2006.
MEA E MAFAUFAU I AI
-
Aisea e uumau ai e se fee se maata’i fee? Aisea na te le faamamuluina ai? E faapefea ona fesootai lenei mea i au lava filifiliga?
-
E faapefea ona tatou iloa maata’i fee a Satani?
-
E ese mai maata’i fee o le le ola mama, ponokarafi, ma fualaau oona, o a nisi [maata’i fee] e tatau ona nofouta i ai?