Savali a Faiaoga Asiasi

Avea o se Tufugaaao o le Atua e ala i le Tu Malosi ma le Mausali

Filifili ma faitau ma le agaga tatalo mai lenei savali ni mau ma aoaoga e fetaui ma tulaga o loo manaomia e uso o loo e asia. Fetufaai atu i ai ou aafiaga ma molimau. Valaaulia foi i latou o loo e aoaoina ia faapena foi ona fai.

O Le a le Uiga o le Ia Malosi ma le Mausali?

Peresitene Gordon B. Hinckley: “E matuai taua lava le tutu mausali o tamaitai o le Ekalesia mo le mea sao ma tonu… . E tatau ona [outou] amataina i totonu o o [outou] lava fale. E mafai ona [outou] aoaoina atu i totonu o a [outou] vasega. E mafai ona [outou] faaleoina atu i totonu o o [outou] afioaga ma alalafaga” (“Tu Malosi ma le Mausali,” Fonotaga Faaleaoaoga a Taitai i le Lalolagi Atoa, Ian. 2004, 21).

Peresitene Iosefa F. Samita (1838–1918): “Pe a maea ona tatou faia o mea uma lava ona o le upumoni, ma tetee atu i le leaga ua aumai e tagata i o tatou luga, … o lo tatou tiute o le tutumau pea. Tatou te le faamaamulu; tatou te le taooto i lalo… . Ina ia tutu malosi e faafetaiai i mea faafeagai ua lofituina, pe a uma ona e faia o mea uma e te mafai, o le lototele o le faatuatua ia. O le lototele o le faatuatua, o le lototele lea o le alualu i luma. O [i latou] e maua le uiga faaleAtua e faaauau pea; e le faatagaina i latou e tutu, pe afai e mafai ona latou faia pea. O i latou ua le na o ni tagata ua pulea e lo latou lava malosi ma le poto; a o i latou ua faauuina i le tulafono maualuga ma faamoemoega faaleAtua.” (Aoaoga a Peresitene o le Ekalesia: Iosefa F. Samita [1998], 55).

E Faapefea ona Faaaoga Au e le Alii Pe a Ou Tu Malosi ma le Mausali?

MFF 84:106: “Afai foi e i ai so outou e malosi i le Agaga, ia na ave faatasi ma ia lē vaivai, … ina ia faamalosia foi o ia.”

Anne C. Pingree, fesoasoani lua i le au peresitene aoao o le Aualofa: “Sa faamalamalama mai e le Alii o i latou ‘o le a talia i le Ekalesia i le papatisoga’ i se isi vaega, o le a latou ‘mananao e tauave i o latou luga le suafa o Iesu Keriso, ma se naunautai e auauna atu ia te ia e oo i le iuga.’ O lona uiga o le ‘tutumau ma le le mafaagaeetia, ia fua mai pea i galuega lelei’ i aso taitasi o o tatou olaga… . O le a poloaiina i tatou e faia mea uma tatou te mafaia, e i ai nisi tulaga, e sili atu nai lo le auala ua tatou iloa e faia ai” (“Ia Tuputupu A’e i La Le Atua,” Liahona, Me 2006, 74–75, 76).

Elder Richard G. Scott o le Korama a Aposetolo e Toasefululua: “E le mafai i le asō ona e iloa po o le a se mea o le a mafai ona e faataunuuina i le olaga, mai lena filifiliga sa e faia e te usiusitai mausali i le Alii. O lou naunautai gugu e le fiu, e te ola i se olaga amiotonu, o le a faaluaina ai ia te oe musumusuga ma le mana e sili atu ma lou malosi i le taimi nei e te malamalama i ai… . E mafai ona e agavaa e ala mai i lena mana paia e avea ma tufugaaao o le Atua e faataunuu ai mea sa le mafai ona e faia na o oe” (“O Le Faia o Filifiliga Sa’o,” Liahona, Iulai 1991, 37–38).

Peresitene James E. Faust, Fesoasoani Lua i le Au Peresitene Sili: “Ou te faamalo atu ia te outou taitoatasi mo a outou galuega amiotonu i aso taitasi. E ui o a outou galuega ua na o sina vaega toaitiiti o loo iloaina, ae o loo tusitusia i le tusi o le ola a le Tamai Mamoe, lea o le a susueina i se aso e molimauina ai la outou tautua maelega, naunautai, ma galuega i le avea ai ma ni ‘tufugaaao o le Atua e faataunuu a’i lenei galuega tele’ [Alema 26:3]” (“Tufugaaao o le Atua,” Liahona, Nov. 2005, 114).