Na Avea Ai i Matou o se Aiga
Auala e ono na matou faia ai ni afiafi faaleaiga ’anoa.
Ua ou aoaoina mai a’u aafiaga e leai se faafitauli faapea e matua maoae, e le mafai e se aiga e malosi le faavaeina i mataupu faavae o le talalelei ona onosaia ma le manuia pe foiaina. O le mea lea ua mafai ai ona ma iloaina ma lo’u toalua le mamana o afiafi faaleaiga faamanuiaina. A o ma taumafai malosi e avea afiafi faaleaiga taitasi ma aafiaga fiafia ma ’anoa, o loo ma faataatiaina le faavae mo le fausiaina o se aiga fiafia.
E tusa o se tausaga talu ona ma faaipoipo ma lo’u toalua, na o mai ai afafine e toatolu o lo’u tuagane laitiiti matou te nonofo. Na talosaga mai foi le tuafafine laitiiti o lo’u toalua ma sa’u uo teine pe mafai ona matou nonofo faatasi mo sina taimi, ma talu ai e le’i i ai se ma fanau, na ma taliaina ai i latou uma. Na faafuasei ona le toe avea i maua na o se ulugalii; ua toatele lo ma aiga.
A o lei oo i lea taimi, na le mamafa tele ia i maua ma lo’u toalua le faia o afiafi faaleaiga aua sa na o le toalua i maua, ae ona o le faaopoopoga fou i lo ma aiga, na ma fuafua ai e faataunuuina ma le faamaoni le polokalama i lo matou aiga.
Mai la matou uluai afiafi faaleaiga faatasi, e lei toe tutusa ai o matou Aso Gafua, pe o le a toe tutusa foi o ma olaga, ona o na aafiaga matagofie. O le ma fale sa masani ona filemu, na amata ona faatumulia i musika. O tamaiti sa le mafai ona faitau, na amata ona iloa ma atiina ae le fiafia i ai. O i latou o e na matamumuli ma fefefe e faia ni tofiga na tuputupu ae lo latou lototetele ma faaali mai le naunau e faia ni vaega, e oo lava i le ofo mai e faia ni aoaoga faapitoa. Na i ai le fiafia i le vaiaso atoa a o talatalanoa tagata uma e uiga i mea na matou faia i le po o le Aso Gafua ua tea atu ma po o le a foi le mea o le matou faia i le isi afiafi faaleaiga e sosoo ai. Na faateleina lagona fiafia a o faasolo ina latalata mai le Aso Gafua ma ao pisi tagata o le aiga e faia sauniuniga mo a latou “mea lilo e faateia ai le aiga.”
O le mautinoa e fiafia le afiafi faaleaiga na avea ma uunaiga mo tagata uma e faia o latou tiute i le aiga. O afiafi faaleaiga taitasi na aumaia ai malamalamaaga ma sailiiliga na faatamaoaigaina ai o matou olaga.
O nisi nei o manatu na fesoasoani e faamanuiaina ma mataalia ai a matou afiafi faaleaiga:
1 Fuafua. Na fai soo a matou fono faaleaiga e fuafua ai autu o vaiaso taitasi ma malilie ai ina ia faia se kalena e fuafua mamao ai mo le tolu masina.
2 Faaaafia tagata uma. Na tofu le tagata ma lana mea e fai, mai le fuafuaina o autu ma gaoioiga e oo i le tofia o lesona ma le tofia o taitai o le afiafi faaleaiga. O i latou o e na matamumuli ma fefefe na tuuina atu i ai le faamalosiauga ma fesoasoaniga faapitoa ia mautinoa ai e faataunuuina ma le manuia o latou tofiga ma fesoasoani ia i latou ia iloa le taua o la latou fesoasoani i le afiafi faaleaiga.
3 Faia se polokalama faatulaga lelei ae mafai ona fetuutuunai. Na matou tausia se api lea na matou tusia ai autu o vaiaso taitasi ma tusia ai mea na tutupu i afiafi faaleaiga taitasi. Na fesoasoani lea ia i matou e manatua ai lesona, taaloga, gaoioiga, ma autu ua maea ona matou faia ma faigofie ai ona matou tulitataoina tofiga na faia muamua. O le tiutetauave o le tagata e taitai le faasilasila o le autu o le vaiaso fou ma faamautu tofiga mo le isi afiafi faaleaiga na tusia i le api. E faamanatu foi e le tagata lea i tagata uma a latou vaega mo le isi afiafi faaleaiga.
4 Ia talia manaoga ma fiafiaga o tagata uma o le aiga. Na filifilia ma le toto’a ia autu, lesona, gaoioiga, e oo lava i taaloga ina ia faailoa ai manaoga faapitoa faaleaiga ma faatumau ai le fiafia i le afiafi atoa. O vaega uma na fesootai lelei e faamalosia ai faamoemoega o le afiafi. I le amataga, na ma faamautinoaina ma lo’u toalua e fesootai gaoioiga uma i le autu ma le faamoemoega, e le’i leva lava ae iloa foi e le tagata sili ona laiti o le matou aiga ona faia lea tulaga.
Mo se faataitaiga, ina ua uma se lesona na faaautuina “Faaalia o le Agaga Talisapaia mo lo Tatou Aiga,” ona fai mai lea o le taitai ia i matou e nonofo i se lio ma faalogo i upu o le agaga faafetai na faaali e tagata taitoatasi. Ona matou faia lea o ni vaega se lua ma lisiina mea aoga e mafai ona aoaoina mai i le talisapaia e le tasi o le isi.
5 Ia tausisi i ai ma faamaoni. Atonu o se tasi o vaega sili ona taua i le faamanuiaina o a matou afiafi faaleaiga o lo matou tausisi lea i le faataunuuina ma le faaaafiaina o tagata taitoatasi. Na matou faailoa atu i taimi uma lo matou naunautai e fesoasoani i soo se tasi i soo se taimi. I le vaiaso atoa matou te vaavaai mo e manaomia le fesoasoani, ma na faaalu o matou taimi e vaai ai pe faapefea ona matou fesoasoani ia i latou. Afai na i ai ni fautuaga po o ni talosaga na matou lotogatasi e faatinoina i aso e sosoo ai, na matou fesoasoani e ala i le faapipiiina o faamanatu i luga o puipui ma faia se lisi e siaki ai.
6 Faaaoga punaoa o loo maua. Na i ai a matou mea e faaaoga, tusi lesona, ma isi punaoa i le faletusi a lo matou aiga e pei o le Tusi Lesona mo Afiafi Faaleaiga (aitema nu. 31106) ma isi tusi lesona a le Ekalesia, tusi o taaloga, tusi o manatu, o tusitusiga paia, ma mekasini a le Ekalesia. Na matou faaputuina foi sapalai eseese o mea e faaaoga i ofisa mo tagata uma e faaaoga mo gaoioiga.
Na ma aoaoina foi ma lo’u toalua o le afiafi faaleaiga o se auala lelei lea mo le talanoaina o mataupu faaleaiga i se auala e le taufaamatau. Na le i ai se otegiaga, tuuaiga, tomumu, po o se taufaifai. O se taimi lea e faailoa atu ai le alofa, atiina ae tomai, totoina tulaga faatauaina, fausia le lototele, faateleina le atamai, ma aoao mataupu faavae e faavavau. O le tausisi pea ia faia se taumafaiga tuufaatasi e faia afiafi faaleaiga, na faamanuiaina ai lo matou aiga.
Ua toe foi atu nei nai ou tei teine i lo latou tama, ua alu ese lou uso faaletulafono e nofo na o ia, ae ua nofo nei la’u uo teine i se fale mo tamaiti aooga e latalata i le aoga o loo aoga ai. Ua ma toe foi lava i le na o maua e toalua. Ae o loo faia pea a ma’ua afiafi faaleaiga e faatumulia i le fiafia ma ’anoa. O nisi taimi ma te valaauliaina ai isi aiga matou te auai faatasi, a o isi taimi ma te faaaogaina le avanoa matagofie e aoao ai ia iloa atili e le tasi le isi, foia faatasi o ma faafitauli, ma faailoa le talisapaia o le tasi e le isi. O a ma autu ma gaoioiga o loo faaauau pea ona faigofie ma taulai atu i le ausiaina o o ma manaoga.
E leai so ma masalosalo o le afiafi faaleaiga o se polokalama musuia. O afiafi faaleaiga ’anoa taitasi o se poloka faufale e faaopoopo i le puipuiga e tetee atu i malosiaga o loo saili e faaumatia aiga fiafia ma faamanuiaina.