Lesona mai le Feagaiga Fou
Agaga Faafetai mo le Togiola
Ina ua latalata i le faaiuga o Lana galuega i le lalolagi, na maliu atu ai le Faaola ma Ona soo i le Mauga o Olive, i le Fanua i Ketesemane.
Tatou te faitau i le Luka, i le Feagaiga Fou:
“Ua maliu atu o ia i fafo, ua savali atu i le mauga o Olive, ua faapea lana masani; ua mulimuli atu foi ona soo ia te ia.
“Ua oo atu ia i lea mea, ona fetalai atu lea o ia ia te i latou, Ia outou tatalo nei oo mai le faaosoosoga ia te outou.
“Ona maliu ese lea o ia ia te i latou e pei o le togi a le maa ona mamao, ona tootuli ai lea o ia ua tatalo,
“Ua faapea atu, Lo’u Tama e, a e finagalo i ai, ia e ave ese lenei ipu ia te au, ae aua le faia lo’u loto, a o lou finagalo.
“Ona faaali mai ai lea ia te ia o le agelu mai le lagi, ua faamalosi ia te ia.
“Ua puapuaga o ia, ua atili ai lana tatalo; o lona afu foi ua pei o ‘alu‘alu toto ua pau ifo i le eleele” (Luka 22:39–44).
O iina na totogiina ai e le Faaola le tau mo faanoanoaga, agasala, ma solitulafono uma a tagata ola uma o e na ola po o e o le a ola ai. O iina na Ia inuina ai le ipu oona ma puapuagatia ai ina ia le puapuagatia i latou uma o e salamo. Na sosoo ma lenei aafiaga matautia, na aveina atu o Ia i Kolokota ma tutui i se satauro, o le isi foi faiga le alofa ma le saua ma le tiga na uia e Ia ina ia aumaia ai le Togiola mo tagata ola uma.
E le mafai ona vaai faalemafaufau i ai se tagata i le tulaga na puapuagatia ai le Faaola ina ua Ia tauaveina i Ona luga le avega mamafa. I se faaaliga na tuuina atu i le Perofeta o Iosefa Samita ia Mati 1830, tatou te maua ai sina vaaiga puupuu i lenei mafatiaga ina ua folafola atu e le Faaola:
“Aua faauta, o a’u, le Atua, na puapuagatia i nei mea mo tagata uma, ina ia latou le puapuagatia pe afai latou te salamo;
“A e peitai, afai latou te le salamo, e ao ina latou tiga e pei o a’u;
“O le tiga lea na faagateteina ai a’u lava, o le Atua, le silisili ese i mea uma, ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le ipu oona, ae teena—
“Ae ui i lea, ia i le Tama le viiga, ma na ou inu ma faaumaina ai a’u sauniuniga i le fanau a tagata” (MFF 19:16–19).
I le faaiuga, e na o le Togiola lava e mafai ona faamaloloina ai o tatou olaga. Na faamatalaina e se tagata o le Ekalesia ona lagona a o feagai o ia ma le faagasologa o le salamo ma iloa ai le mana faamalolo o le Togiola: “O le taimi i le va o le solitulafono ma le ta’uta’u atu sa matua faigata. Na ou ola i taimi uma ma le iloa lelei o le mea leaga na ou faia. Na ou i ai i se tulaga loloto o le pogisa, lē fiafia ma le faaesea, muamua sa leai se faamoemoe ma faatigaina e lagona atuatuvale, ae peitai, e le i masalosalo lava le moni o le talalelei ma le mana laveai o le Togiola. Na ou iloaina, mo au lava e na o le tasi lava le ala e mafai ona faamaloloina ai.
“O le ta’uta’u atu i lo’u toalua ma la’u fanau o le mea na ou faia, o le mea aupito sili lea ona faigata ua ou faia i le olaga. Ina ua mavae lena, i le faaauau ai o laasaga o le salamo, o le ta’uta’u atu i lo’u epikopo ma le peresitene o le siteki, e le i matuai faigata tele. Mulimuli ane, na mafai ona ou faamatuueseina a’u lava mai le avega lea na ou aumaia i o’u lava luga. Na ou lagonaina le mama [o le mafaufau] i le tapeina o lo’u igoa ma isi taunuuga talafeagai.
“E maoae le olioli na [ou] maua ina ua faatagaina a’u ou te toe papatiso ma toe maua le Agaga Paia. Mulimuli ane, na faataunuuina ai le folafolaga o le Togiola i le auala aupito manino ma sili ona matagofie ina ua toefuataiina mai o’u faamanuiaga.
“I le aluga o tausaga, na ma iloa ai ma lo’u toalua o le Togiola e aumaia le toafilemu ma le faamalologa e le gata i le tagata agasala, ae sili atu foi i lena, e i ai le mana e faamalolo ma toefuatai ai foi le na afaina ai. Ou te molimau atu ai i lenei mea ma le agaga loloto o le faafetai.”
Ana tatou malamalama i le maoae o le alofa o le Faaola mo i tatou ina ua Ia togiolaina a tatou agasala, ua tatou alolofa ia te Ia i taimi uma, faafetai ia te Ia, ma tausi Ana poloaiga.
E pei ona matauina e Peresitene Iosefa Filitia Samita (1876–1972): “O se tasi o agasala sili ona matautia, i le tele ma le maoae … o le agasala o le le loto faafetai. A tatou solia se tulafono, e le afaina po o le a lo tatou manatu e laitiiti ma le taua, ua tatou faaalia lo tatou le loto faafetai i le Faaola. E le mafai ona tatou malamalama i le maoae o lona puapuagatia ao ia tauaveina le avega o agasala a le lalolagi atoa, o se faasalaga e matua ogaoga le tiga, ua tau mai ia i tatou na sau ai le toto mai pu ninii o lona tino, ma na tupu a o lei auina atu o ia i le satauro. O le faasalaga o le tiga faaletino mai le tutuiina o fao i ona lima ma vae, e le o le vaega silisili lena o ona mafatiaga, e ui e mautinoa lava le matua matautia o le tiga o lena mea. O le mafatiaga sili atu o le tigaina faaleagaga ma le faalemafaufau mai le avega o a tatou agasala lea na ia tauaveina. Ana tatou malamalama i le maoae o lena mafatiaga ma lona mafatiaga i luga o le satauro, e mautinoa lava e leai se isi o i tatou o le a loto e tausalaina i le agasala. O le a tatou le tuu avanoa i faaosoosoga, i le faamalieina o manaoga ma tuinanau le paia ma o le a le i ai foi se avanoa o Satani i o tatou loto. E pei ona i ai, soo se taimi tatou te agasala ai, tatou te faaali atu le leai o so tatou agaga faafetai ma le le amanaiaina o le puapuagatia o le Alo o le Atua lea e mafua ai ma ala mai ai lo tatou toetutu mai le oti ma ola ai e faavavau. Ana tatou matua malamalama ma mafai ona lagonaina i sina vaega itiiti, le alofa ma le naunautaiga alofa tunoa o Iesu Keriso e puapuagatia ai mo a tatou agasala ua tatou naunautai e salamo mai a tatou solitulafono uma lava ma auauna ia te Ia.”1
O le Togiola a le Faaola o le mea matua silisili lea ona maoae na tupu i le talafaasolopito. Na folafola mai e Peresitene Gordon B. Hinckley: “E leai lava se isi mea o le talafaasolopito o le tagata e faatusa i ai. E leai se isi mea ua tupu e mafai ona faatusalia. O le matua leai o se manatu faapito faatasi ai ma le alofa le faatuaoia mo tagata uma, na avea ai ma aga e le mafaatusalia o le alofa mutimutivale mo le lalolagi atoa.”2
Ia tatou maua le agaga faafetai i taimi uma mo lenei meaalofa matagofie, o le Togiola a le Alo o le Atua, lo tatou Faaola ma le Togiola.