Faaauau Galuega Faalemalumalu

Malumalu o Papeete Tahiti

Na toe faapaiaina e Elder L. Tom Perry o le Korama a Aposetolo e Toasefululua le Malumalu i Papeete Tahiti i ni sauniga se lua ia Novema 2006. Na uluai faapaiaina ia Oketopa 1983, ma na toe faia ni galuega mo le faafouina o le malumalu mo le 15 masina lea na toe faateleina ai le vai mo papatisoga ma potu mo faamauga ma faia ai ma se nofoaga tutotonu o autalavou mo fanau o le a faamauina i o latou matua.

E tusa ma le 10,000 tagatanuu o Tahiti na auai i le toe faapaiaga, lea na faasalalauina i falelotu tutotonu o Siteki i Tahiti faapea foi ma le aai i Sate Leki, Niu Kaletonia ma le Iunivesite o Polika Iaga i Hawaii.

Malumalu o Oquirrh Mountain Iuta

Sa pulefaamalumalu Peresitene Gordon B. Hinckley i le sauniga o le suaina o le eleele mo le malumalu o Oquirrh Mountain Iuta i le aso 16 o Tesema, 2006. Sa auai ai foi Peresitene Thomas S. Monson ma Peresitene James E. Faust, o fesoasoani i le Au Peresitene Sili; o Elder Russell M. Nelson o le Korama a Aposetolo e Toasefululua o ia lea sa taitaiina le sauniga ma na auai atu foi iai nisi o le Korama a Aposetolo e Toasefululua faapea foi ma nisi o le Korama a Fitugafulu.

O fuafuaga faataatitia mo le Malumalu o Oquirrh Mountain Iuta e aofia ai se faatagata e 9 futu (2.7 mita) le maualuga o le agelu o Moronae lea o le a tietie i le tumutumu o se pou maai e tusa ma le 193 futu le maualuga (59 mita). O le a fausiaina le malumalu i luga o se ogaeleele e tusa ma le 11 eka (4.5-ha) i le auvae mauga o Oquirrh faafeagai tonu ma le mauga o Wasatch i le itu i Sasae.

O le a avea South Jordan, Iuta, le nofoaga o le a faatuina ai le malumalu o Oquirrh Mountain, ma aai muamua i le lalolagi e fausia ai ni malumalu se lua. O le aai foi lea o loo tu ai nei le malumalu o Jordan River i Iuta. O le malumalu fou, o le lona sefulutolu ai lea o malumalu i totonu o Iuta.

Quetzaltenango, Kuatemala

I le sauniga o le suaina ma le faapaiaina o le eleele mo le fausiaina o le malumalu o Oquirrh Mountain i Iuta, na faalauiloa ai e Peresitene Gordon B. Hinckley fuafuaga mo le fausiaina o le malumalu i Quetzaltenango, Kuatemala. Ma o le lona lua ai lea o malumalu i totonu o Kuatemala.

O le malumalu i Quetzaltenango na saunoa iai Peresitene Hinckley o se malumalu laitiiti. O malumalu laiti na faalauiloa e Peresitene Hinckley i le konafesi aoao ia Oketopa 1997, e mafai ona fausiaina i se tau itiiti e matua laitiiti ifo nai lo malumalu tetele e maua ai e le toatele o tagata o le ekalesia faamanuiaga o le malumalu.

O Isi Malumalu

O loo faaauau pea galuega o malumalu i Curitiba Brazil, Draper Iuta, Panama City Panama, Rexburg Idaho, ma Twin Falls Idaho.

Ua faailoa mai e le Ekalesia i le taimi nei, e tusa ma le 135 malumalu ua iai nei e aofia ai malumalu o loo fausiaina pe o loo ua faaaogaina nei.

Mo nisi faamatalaga e uiga i malumalu i le lalolagi atoa, asiasi ane i le Uepi saite a Malumalu o le Ekalesia (www.lds.org/temples).