Manatu Faaopoopo mo Taimi o Fetufaaiga, Iuni 2007

O manatu faaopoopo nei e mafai e taitai o le Peraimeri ona faaaogaina faatasi ma le Taimi o Fetufaaiga o loo lomia i le Liahona o Iuni 2007. Mo le lesona, faatonuga, ma le gaoioiga e o faatasi ma nei manatu, tagai i le “Manatua!” i itulau U4 ma le U5 i le vaega a tamaiti o le lomiga lenei.

Mafaufau o oe o se tusitala. Faaali i tamaiti le Ata o le Talalelei 208 (Ioane le Papatiso i le papatisoina o Iesu). Fai i ai e fesoasoani atu ia te oe e saili po o le a le mea o loo tupu i le ata. Faamatala e manaomia e le tusitala ona sailia mea e ono. Tusi i lalo upu o le a, o fea, o afea, o ai, e faapefea, ma le aisea i luga o ni fasipepa ma faaali atu ia i latou. Fesili i tamaiti ina ia faailoa mai tali o nei upu. E mafai ona e faatonu i latou e sue i le Mataio 3:13–17. Mo se faataitaiga, o le tali i le o ai o “Iesu na papatiso e Ioane” O le tali i le i fea o le “i le vai o Ioritana.”

A maea ona tali uma nei fesili, ona tuufaatasi lea o nei tali e fai se tala. Valaau le taitai pese e taitai tamaiti e usu le pese “Papatisoga” (Tusipese a Tamaiti, 54), ma faamalamalama o fesili e lima muamua o loo taliina i le fuaiupu muamua ae o le fesili aisea o loo taliina i le fuaiupu lona lua.

Faamatala iai na faia e Iesu se faataitaiga mo tatou ma e tatau ia i tatou uma taitoatasi ona papatisoina. Tuuina atu iai lau molimau o Iesu o le Alo o le Atua.
Faaali atu iai le papa falaoa ma le sioti vai. Ia faaali atu foi iai le Ata o le Talalelei 604 (Tufatufaina o le Faamanatuga). Fesili i tamaiti po o le a le eseesega o vaiauli ma isi falaoa ma le falaoa ma le vai o le faamanatuga. Faamatala iai o le faamanatuga e paia aua e faapaiaina e i latou o iai le pule o le perisitua. E faamanatu mai ai ia i tatou le tino ma le toto o Iesu.

Faaaoga le vaega o le Tumau i le Faatuatua e uiga i le faamanatuga ma le mataupu e 23 o le Mataupu o le Talalelei e fesoasoani ia te oe i le fatuina o fesili e pei o le “O ai na amataina le faamanatuga?” (Keriso), “O ai e tufatufaina le faamanatuga?” (o le au perisitua, e masani lava o alii tiakono), ma “O le a le mea e tatau ona tatou mafaufau iai ao tufatufaina le faamanatuga?” (Keriso ma lana Togiola). Fesili ia lava ni fesili e fesoasoani ai i tamaiti ina ia malamalama i le faamanatuga. Ia faaaoga ata o le faamanatuga e fai ai se paso. Otioti ata i ni vaega laiti o le paso, ia tutusa le aofai o vaega ma fesili. O taimi uma e sao ai se tali i se fesili, ia valaaulia le tamaitiiti e faapipii le vaega o le paso i le laupapa. A maea ona faatumu le paso, ona usu lea o se pese po o se Viiga e faatatau i le Faaola. E ui ina faapea o le faamanatuga o le taimi e tatau ona fifilemu ai, ae o le taimi foi e fiafia ai pe a tatou mafaufau i mea na faia e Iesu mo i tatou. Tuuina atu le molimau i lona alofa mo i tatou uma ma le taua o le faamanatuga.
Taimi o Pesepesega: “Ou Te Fiaola i le Talalelei” (Tusipese a Tamaiti, 72). Fesili i tamaiti, “O le a le mea tou te mananao i ai?” Tuu le avanoa i ni tamaiti se toatele e tali ai ina ia lautele ma tele ni manatu. Lisi uma i luga o le laupapa manatu ia.Fai i tamaiti o le a e tauina atu ia i latou le mea o loo e manao iai. Usu le fuaiupu muamua o le “Ou Te Fiaola i le Talalelei.” Fesili i ai po o le a le mea e te manao iai (ola i le talalelei). Aoao atu le fuaiupu muamua o le pese. Fesili i tamaiti pe faapefea ona latou maua mea e pei ona lisiina i luga o le laupapa. Tau iai o le a mafai ona latou ola i le talalelei pe afai o le a latou faia mea e pei ona tauina mai i le tali o le pese. Usu le tali o le pese. Faamatala iai o se faaupuga o se tautinoga ma e fai pea ma fai pea. Faasino iai le upu taumafai ma le ola ai. Fesili i tamaiti ina ia mafaufau i mea e mafai ona taumafai e fai ma mea e mafai ona latou fai atu ai ina ia ola ai i le talalelei. Mo se faataitaiga, e mafai ona tali mai se tamaitiiti, “O se mea e mafai ona ou taumafai e fai o le faitau tusitusiga paia,” po o le, “E mafai ona ou ola faafetai e faaalia ai lou agaga fiafia.” Fesili i tamaiti e mafaufau i se mea se tasi e mafai ona latou faia i lenei vaiaso “ina ia ola ai i le talalelei i aso uma.” Tau atu ia i latou o le ola i le talalelei e amata i le faia o le mea sao. Tautino atu i tamaiti o le a e faia se mea faapitoa i lenei vaiaso ina ia e ola atili ai i le talalelei. Molimau atu i le moni o le talalelei ma le olioli na te aumaia.