O Le Taavale Lanumoli
I le popofou o le ma faaipoipoga na ma aooga ai ma lo’u toalua i le itu i matu sasae o le Iunaite Setete, lea e matautia ai le taumalulu ma tele le masima i le auala. Ina ua mavae ni nai taumalulu, na amata ona pala le tino o le ma taavale tuai, ma iu ai ina pu le fola o le taavale ina ua tu ai se pasese. Faatasi ai ma se manatu o le a lelei mea uma, na ou faatauina ai ni apa alumini ma ni faamau uamea, ma valaau atu i o’u matua pe mafai ona ma asiasi atu i le faaiuga o le vaiaso e fai faalelei le taavale.
Na ma taunuu atu ua leva le po o le Aso Faraile, ma na ma alapopo lava ma lo’u tama i le Aso Toonai e fai le fola o le taavale. Na ma tosoina i tua le fala pa’u ma tau sue se uamea malosi e mafai ona faamau i ai apa. Na leai se mea na maua ae na o uamea pala. Na tilotilo le tasi i le isi ma le filemu, toe ufiufi fala, ma o loa e fai le ti.
Ina ua taunuu le ma malaga faagesegese ma le faaeteete e lima itula i lo ma fale mautotogi, na tatagi le telefoni ao ma savavali atu i totonu. Na tonu ia Tina ua ia “manaomia” se taavale fou ma mafaufau ai pe ma te mananao i lana taavale tuai. Na lapatai mai tama o le taavale ua tolu tausaga ma ua tele maila ua faaaoga ai. Ona tausua ane lea o lo’u tina ailoga e afaina tele—sa aveina e se tagata e totogi atoa le sefuluai. Na matou talie, ma ina ua tuu i lalo le telefoni, na ma sisiva faataamilo i lo ma fale e faafetaia ai lenei manai mai le lagi.
E ese le manaia o le taavale lanumoli. E fa faitotoa, ea malulu, ma leai ni pupu pala. Na uma ai a ma aoga ma amata ai a ma galuega muamua. Ae ina ua uma le ono tausaga o faaaoga ma faaopoopo i ai le 80,000 maila (129,000 km), na avea nei ma taavale auleaga na ou alu ai i le galuega. O le vali lanumoli sesega ua matafi i le la, ua le ola le ea malulu, ua le alu i lalo le faamalama o le itu a le avetaavale, ma ua toe sue foi se taavale fou a tina e faatau (lea ua matuai manaomia lava). Na laitiiti tele le tau e maua i lana taavale tuai pe a faafesuiai o lea na tonu ai i o’u matua e aumai ma maua.
I le lotolotoi o lo ma fiafia ua toe i ai se ma taavale e fou atu, na ma mafaufau ai po o le a le mea e fai i le taavale lanumoli. Ioe, na auleaga, ae na faamoemoeina le ola a le afi. E mafai ona maua mai ai ni nai tala i se fanua mo lapisi, ae na ma taufai lagona e tatau ona sue se isi e mafai ona foai atu i ai.
I le taeao o le Aso Sa na ou alu atu ai i le ofisa o le failautusi a le uarota e fesili pe na te manaomia se taavale. O i laua ma lona toalua na i ai se fanau talavou. Na ataata o ia ma fai mai, leai faafetai; na te lei manaomia se isi taavale. Ae, i le tulimanu o le ofisa na i ai se tagata o le uarota sa tusitusi ai. Na tepa ae i luga i le faalogo o tau se taavale, o lea na ou faalauina ai le lisi tele o mea ua leaga. Ae na ou tau atu ia te ia e lelei lava pau, e faamoemoeina le afi, ma e le matua leaga aua na ave lava i taimi uma e se tagata e totogi atoa le sefuluai.
E tasi le la taavale ma lona toalua, ma e faigaluega o ia i le po ae faigaluega le tamaitai i le ao. Na ia le taliaina ni avanoa faigaluega lelei ona e manaomia ai e ia le taavale ae na manaomia foi e lona toalua. O se taavale lona lua e mafai ai ona faateleina a la tupe maua ma tatala ai avanoa siisii i luga mo ia. O lea na ma avatuina ai ia i laua le taavale tuai lanumoli.
Na semanu o lenei mea e na o se mea manaia e manatua pe ana leai le ma talanoaga i le tolu masina mulimuli ane. Na mananao lenei tagata o le uarota ma lona toalua ma te iloa teisi lo laua tulaga talu ona ma tuuina atu le taavale. E pei lava o le tulaga masani i ulugalii fou, e utiuti le tupe, faatasi ai ma le fanau mai o le la pepe muamua, ua vave faateleina le tupe alu nai lo tupe maua. Na misi le totogiina o le la sefuluai ma na matua le lelei o la faalogona i ai. I masina taitasi na faaopoopo o la lagona le lelei, ae na la le iloa po o le a se auala e foia ai le faafitauli. Ua atoa le ono masina e lei totogiina le la sefuluai, ma sa la tatalo ma lagona ai ua tatau ona faasa’o mea ma le Alii. O le taeao o le Aso Sa lena, ina ua ou savali atu i le ofisa o le failautusi, sa ia tusia ai se tasi o ana siaki o le sefuluai, ma le mafaufau pe o le a faapefea ona totogi ana matafaioi tau tupe i le masina o i luma.
O lou manatu muamua lava o lo’u matamuli i la’u tala ula e uiga i le taavale na aveina e se tagata e totogi atoa le sefuluai. Ae a o ou tomanatu i lea tulaga, na ou maofa i le auala e tausia ai e le Alii Ana folafolaga pe a tatou tausia a tatou folafolaga. E lei mago le vaitusi na tusi ai lana siaki ae savali atu ma le le iloa i le faitotoa le fofo o lona faafitauli.
E masani ona ou tomanatu i le faataitaiga o le faatuatua na faaalia e lenei ulugalii talavou. Ou te toafilemu i le iloa afai ou te faaalia le faatuatua, o loo i ai se tasi i se mea e mafai ona i ai i le nofoaga sao i le taimi sao e fesoasoani e foia o’u faafitauli. E ese lo’u faafetai mo se Tama i le Lagi o lē e silafia lelei i tatou ma Ia faamanuiaina i tatou e tusa lava pe lei maea ona faaalia lo tatou faatuatua.