O Faataitaiga o Faiaoga Maoae

Peresitene Thomas S. Monson

Fesoasoani Muamua i le Au Peresitene Sili

Ua uma ona tatou faalogologo i nisi o faiaoga silisili ona maoae o le Ekalesia, ua latou tuuina mai ia i tatou ni malamalamaaga matagofie i le tele o elemene ma mataupu faavae o le aoao atu lelei.

E pei ona sa ta’ua, o i tatou uma lava o faiaoga, ma ua ia i tatou se tiute e aoao atu i le mea sili tatou te mafaia.

Ou te fia faasoa atu ni nai faataitaiga o tagata sa ou iloa na pa’i mai i lo’u olaga ma aoao mai ia te au ni lesona taua e le mafai ona galo.

E Tofu Tagata Uma ma se Tala

Sa ou mafaufau lava i se tasi o Pulega Aoao ua faamalolo faamamaluina, o Elder Marion D. Hanks, o se faiaoga maoae tele i le seminare, inisitituti, ma le Ekalesia. Sa ia faaaogaina ni metotia eseese se tele faafaiaoga.

Sa i ai se taimi, sa taamilo ai Elder Hanks i se misiona, ma faatalanoa faifeautalai taitasi sa galulue i lena eria patino. Sa ou i ai i se tofiga i se eria e sosoo ai, ma sa matou malaga faatasi ai i le malaevaalele ma Elder Hanks ma le peresitene o le misiona.

Sa ta’u atu e Elder Hanks i le peresitene o le misiona o se faamanuiaga lona asiasi atu ma faatalanoa faifeautalai taitasi. Fai mai a ia, sa na lagona le uunaia o ia e fesili i se tasi o faifeautalai tamaitai, “Faamolemole faamatala mai e uiga i lau misiona ma pe o le a sau faalogona i le tofia o oe e avea ma se tuafafine faifeautalai.”

Sa faamatala [e le tuafafine lenei], o lona tama faatauvaa, o se faifaatoaga, sa ositaulagaina ma le naunautai mea e tele mo le Alii ma Lona malo. O loo ia faatupeina foi ni misiona a ni atalii se toalua o loo faamisiona, i le taimi na talanoa atu ai [lona tama] ia te ia i se tasi aso e uiga i lona naunautaiga e avea [lona afafine] ma se faifeautalai, ma sa faamatala atu e lona tama le auala na fesoasoani atu ai le Alii ia te ia ina ia saunia e fesoasoani atu ia te ia [tamaitai faifeautalai].

Sa alu atu o ia [lona tama] i le faatoaga e talanoa ma le Alii, e ta’u atu ia te Ia e faapea ua le toe i ai ni ana meatotino e faatau atu pe ositaulagaina pe faaaoga e faamau ai se nonogatupe. Sa ia fia iloa pe mafai faapefea ona ia fesoasoani i lona afafine ina ia alu i se misiona. Sa ia lagonaina le musumusuga e toto ia aniani. Sa ia manatu e le o malamalama o ia. E le ola lelei aniani i lenei tau; e le o totoina foi e isi tagata ia aniani; e leai foi sona malamalama i le totoina o aniani.

Ina ua mavae ona fagatua ma le Alii mo se taimi, sa ia toe lagonaina foi le uunaia o ia e toto le aniani. O lea sa ia nonoina ai se tupe mai le faletupe, faatau ni fatu, toto ma tausi ma tatalo.

Sa le lelei ia elemene o le laueleele; ae sa lauolaola le toga aniani. Sa ia faatau atu le seleselega; totogi ana aitalafu i le faletupe, le malo, ma le Alii; ae teu le vaega na totoe i se teugatupe i lalo o le igoa o lona afafine—lea na lava e tausia ai o ia i lana misiona.

Ona ta’u atu lea e Elder Hanks i le peresitene o le misiona, “O le a le galo lava ia te au le tala po o lea taimi po o loimata i ona mata po o lona leo po o le lagona sa ia te au a o ia faapea mai, ‘Brother Hanks, e leai ma so’u faafitauli i le talitonu lea i se Tama Faalelagi alofa o lē e silafiaina o’u manaoga ma o le a fesoasoani ia te au e tusa ai ma Lona atamai pe afai e lava ona ou lotomaualalo.’”

Sa aoao atu e Elder Hanks se lesona taua: O tamaiti uma i totonu o se potuaoga, o alii talavou po o tamaitai talavou taitoatasi, o tamaiti aoga taitoatasi o le seminare po o le inisititiuti, o tagata matutua taitoatasi i vasega o Aoaoga Faavae o le Talalelei, o faifeautalai taitoatasi—ioe, o i tatou uma lava—o loo tofu ma se tala e faamatalaina. O le faalogo o se elemene taua a o tatou aoao atu ma a o tatou aoaoina mai.

“E Sili le Manuia o Le na te Foai i Lo Manuia o Le na te Talia”

O se mea na ou oo i ai a o o’u laitiiti, lo’u i ai i aafiaga o se faiaoga sili ona mataalia ma musuia o le sa faalogo mai ma alofa ia i matou. O lona igoa o Lucy Gertsch. I le matou vasega o le Aoga Sa, sa ia aoaoina ai i matou e uiga i le foafoaina o le lalolagi, o le Pau o Atamu, o le taulaga togiola a Iesu. Sa ia aumaia i lona potuaoga e avea o ni malo faaaloalogia ia Mose, Iosua, Peteru, Toma, Paulo, e oo lava ia Keriso. E ui matou te lei vaai ia i latou, ae sa matou aoao e alolofa, faamamalu, ma faataitai ia i latou.

E lei i ai se taimi na sili atu ai ona tumau lana aoaoga po o lona aafiaga e pei o le isi taeao o le Aso Sa ina ua ia faasilasilaina mai ma le faanoanoa le maliu o le tina o se tasi o le vasega. Sa matou misia Billy i lena taeao ae matou te le iloa le mafuaaga o lona le auai atu.

Sa faaautu le lesona i le, “E sili le manuia o le na te foai i lo manuia o le na te talia” (Galuega 20:35). I le ogatotonu o le lesona, sa tapuni ai e le matou faiaoga le tusi lesona ma tatalaina o matou mata ma o matou taliga ma o matou loto i le mamalu o le Atua. Sa ia fesili mai, “E fia se tatou tupe o loo i ai i le tupe o le pati a le tatou vasega?”

O aso o le pau o le tamaoaiga na vave atu ai se tali mimita: “Fa tala ma le fitusefululima sene.”

Ona ia fautua mai lea ma le le gaoia, “O le aiga o Billy o loo matuai pagatia lava ma faanoanoa. O le a so outou manatu ae tatou asiasi atu i le aiga i lenei taeao ma tuuina atu la outou tupe ia i latou?”

Ou te manatuaina pea le savavali atu o lena vasega laiti i na atufalega e tolu, ma ulufale atu i le fale o Billy, faafeiloai ia te ia, o lona uso, tuafafine, ma le tama. Na iloagofie ua leai lona tina. Ou te manatuaina pea lava ia loimata na vaaia i o matou mata uma a o tuuina atu lena teutusi o loo i ai le tupe faapelepele o le matou pati mai lima o lo matou faiaoga i lima o se tama loto faavauvau o loo manaomia le fesoasoani.

Sa matou toe foi vave atu i le falesa. Ua mama o matou loto nai lo le taimi muamua, ua sili atu ona faatumulia i matou i le olioli, ua matuai faalolotoina lo matou malamalama. O se faiaoga musuia a le Atua na aoaoina ana tamaiti ma teineiti i se lesona faavavau o le upumoni paia: “E sili le manuia o le na te foai i lo manuia o le na te talia.”

Pe mafai ea ona tatou toe faaupuina ia upu a soo i le ala i Emau: “Pe lei mu ea o matou loto i totonu ia i matou … ina ua faamatala mai foi e [ia] o tusi ia i matou?” (Luka 24:32).

Sa iloa lelei e Lucy Gertsch ana tamaiti aoga. E lei toilalo o ia e fesootai atu ia i latou o e misi i se Aso Sa pe le o mai foi. Sa matou iloa sa ia popole mo i matou. E leai ma se tasi o i matou e faagaloina o ia po o lesona sa ia aoaoina mai.

I le tele ma le tele o tausaga mulimuli ane, ina ua pulapula lagoto le soifua o Lucy, sa ou asiasi atu ai ia te ia. Sa ma toe manatunatu i na aso ua leva a o avea o ia ma o matou faiaoga. Ma te talanoa i tagata uma o le matou vasega ma po o a mea a le tagata ia o loo fai i le taimi nei. O lona alofa ma lona popole ua autausaga o i ai.

O Mataupu Faavae o le Faatuatua

O se isi faiaoga musuia i lo’u olaga o Erma Bollwinkel, o se tasi o le aufono a le Peraimeri a le matou siteki. Na te faamamafaina mai pea le taua o le aoaoina o Mataupu Faavae o le Faatuatua. O le mea moni lava, e le mafai ona matou faauu mai i le Peraimeri seiloga matou te taulotoina atu atoa ia te ia Mataupu Faavae o le Faatuatua. O se luitau lea mo tamaiti laiti ulavavale, ae sa matou tumau mausali ma faamanuiaina. O se taunuuga, sa ou mafaia ai i lo’u olaga atoa ona taulotoina ia Mataupu Faavae o le Faatuatua.

I le tele o tausaga i le avea ai ma se tasi o le Korama a Aposetolo e Toasefululua, sa i ai so’u tiutetauave mo Siamani i Sasae, e pei ona sa iloa ai o le Malo Temokalasi o Siamani. I lenei tofiga, sa matuai aoga ai lava lo’u malamalama i Mataupu Faavae o le Faatuatua. I a’u asiasiga taitasi i le 20 tausaga sa ou vaaia ai lena eria, ou te faamanatu atu ai pea i o tatou tagata o loo i lena eria le Mataupu Faavae o le Faatuatua lona sefululua: “Matou te talitonu i le usiusitai i tupu, ma peresitene, ma faipule, ma faamasino, i le usiusitai ma faamamalu ma lagolagoina le tulafono.”

O a matou sauniga i tua atu o le mea sa lauiloa o le Papupuni Uamea sa mata’ituina lava e le malo komunisi iina. I le amataga o le vaitau o le 1980, ina ua matou sailia le faamaoniga mai taitai o le malo e fausia se malumalu iina, ma mulimuli ane ina ua talosagaina se faatagaga mo alii talavou ma tamaitai talavou mai lena eria e auauna atu i ni misiona i le lalolagi faapea foi mo isi ina ia oo mai i lo latou atunuu e faamisiona ai, sa latou faafofoga mai ona faapea mai lea, “Elder Monson, sa matou mataoe mo le 20 tausaga, ma ua matou iloaina ai e mafai ona matou faatuatuaina oe ma lau Ekalesia aua ua matou iloa o oe ma lau Ekalesia o loo aoaoina o outou tagata ina ia usiusitai i tulafono o le laueleele.”

Ou te fia faasoa atu se isi faataitaiga o le taua o le aoaoina o Mataupu Faavae o le Faatuatua. I le fasefululima tausaga talu ai sa ma galulue ai ma se alii e igoa ia Sharman Hummel i le pisinisi lomitusi i le Aai o Sate Leki. Sa ma tietie atu i se tasi taimi ma ia i la’u taavale mai le galuega ma sa ou fesiligia o ia pe na faapefea ona maua lana molimau o le talalelei.

Sa ia tali mai, “E malie tele, Tom, ona ua e tuuina mai ia te au lena fesili, aua o le vaiaso lava lenei matou te o ai ma lo’u toalua, ma la’u fanau, i le Malumalu o Manti, e faamauina ai iina mo le faavavau.”

Sa faaauau lana tala, “Sa matou nonofo i Sasae. Sa ou tietie atu i se pasi e agai atu i San Francisco e faamautuina lo’u tagata i se kamupani lomitusi fou, ona ou toe foi ai lea e aumai lo’u toalua ma la’u fanau. Mai lava i le Aai o Niu Ioka e oo mai i le Aai o Sate Leki e leai lava ni mea mananaia na tutupu ai. Ae i le Aai o Sate Leki na ulufale atu ai se teineitiiti talavou i totonu o le pasi—o se teineitiiti o le Peraimeri—ma sa nofo i o’u tafatafa. E alu o ia i Reno, Nevada, e asiasi i le uso o lona tina. A o alu le matou malaga agai i sisifo, sa ou matauina ai se laupapa tele o faasalalauga, ‘Asiasi i le Aoga Sa a Mamona i lenei vaiaso.’

“Sa ou fai atu i le teineitiiti, ‘Ou te matea ai lava se toatele o Mamona i Iuta, a ea?’

“Sa ia tali mai, ‘Ioe, alii.’

“Ona ou fai atu lea ia te ia, ‘O oe o se Mamona?’

“Sa ia toe tali mai foi, ‘Ioe, alii.’

Ona fesili atu lea o Sharman Hummel, “O a mea e talitonu i ai Mamona?” Ona tauloto atu lea e lena teineitiiti le mataupu faavae muamua o le faatuatua, ona ia talanoa lea e uiga i ai. I le faaauau ai, sa ia tuuina atu ia te ia le mataupu faavae lona lua o le faatuatua ma talanoa e uiga i ai. Ona ia tuuina atu lea o le tolu ma le fa ma le lima ma le ono ma mataupu faavae uma lava o le faatuatua ma talanoa e uiga uma i ai. Sa ia iloa lelei i lo latou faasologa sa’o.

Sa fai mai Sharman Hummel, “Ina ua matou taunuu i Reno, ma matou tuuina atu lena teineitiiti laitiiti i lima o le uso o lona tina, sa matuai faagaeetia lava au.”

Fai mai o ia, “I le ala atoa lava e tau atu i San Francisco sa ou mafaufau ai, ‘O le a le mea na uunaia ai lena teineitiiti laitiiti e iloa lelei ana aoaoga faavae?’ Ina ua ou taunuu i San Francisco, o le mea muamua lava na ou faia,” na fai mai ai Sharman, “o le sue lea o itulau samasama mo le Ekalesia a Iesu Keriso o le Au Paia o Aso e Gata Ai. Sa ou telefoni atu i le peresitene o le misiona, ma na ia auina mai ni faifeautalai se toalua i le mea sa ou nofo ai. Sa avea au ma se tagata o le Ekalesia, sa avea lo’u toalua ma se tagata o le ekalesia, na avea uma le ma fanau ma ni tagata o le ekalesia, na mafua mai ona o se teineitiiti o le Peraimeri na iloa lelei ana Mataupu Faavae o le Faatuatua.”

Ou te mafaufau i upu a le Aposetolo o Paulo, “Aua ou te le ma i le talalelei ia Keriso: aua o le mana lava lea o le Atua e ola ai” (Roma 1:16).

I le tolu masina talu ai, na oo mai ai le aiga o Hummel i le Aai o Sate Leki mo le faaipoipoga a le la tama teine, o Marianne. Sa latou afe mai i le ofisa; ma sa manaia le matou feiloaiga. Na o mai uma le fanau teine e 6, faatasi ai ma atalii faaletulafono e 4, ma fanau a fanau e 12. O loo tumau ma malolosi le aiga atoa i le Ekalesia. Ua uma ona ulu uma le fanau teine i le malumalu. E anoanoai i latou ua maua le malamalama o le talalelei e ala i tagata o lenei aiga—e mafua uma lava ona o se teineitiiti sa aoaoina i ai Mataupu Faavae o le Faatuatua, ma sa ia te ia le tomai ma le lototele e folafola atu le upumoni i se tasi sa sailia le malamalama o le talalelei.

“Ia Saunia i Taimi Uma”

Ou te fiafia i le poloaiga a le Alii o loo maua i le vaega e 88 o le Mataupu Faavae ma Feagaiga: “Ou te tuuina atu foi ia te outou le poloaiga ia outou aoao le tasi i le tasi i mataupu o le malo. Ia outou aoao atu ma le filifiliga ma o lo’u alofa tunoa o le a mafuta ma outou” (MFF 88:77–78).

I le tele o tausaga ua mavae, a o o’u malaga i luga o le ea i se tofiga i saute o Kalefonia, sa nofo ifo ai i lalo se tamaitai talavou lalelei i le nofoa o loo avanoa i o’u tafatafa. Sa amata ona ia faitauina se tusi. I lo’u fia iloa, sa ou autilo atu ai i le autu: O Se Galuega Taua ma le Ofoofogia. Sa ou faapea atu ia te ia, “Oi, ai o oe o se Mamona.”

Sa ia tali mai, “Oi, e leai. Aisea ua e fesili ai?”

Sa ou tali atu, “O loo e faitauina se tusi na tusia e se tagata lauiloa o le Ekalesia a Iesu Keriso o le Au Paia o Aso e Gata Ai.”

Sa ia faapea mai, “E sa’o? Na tuu mai e sa’u uo ia te au, ae le tele so’u iloa e uiga i ai. Ae peitai, ua oso ai lava lo’u fia iloa.”

Ona ou mafaufau lea, “Pe tatau ona ou fai sa’o i ai ma talanoa atili i ai e uiga i le Ekalesia?” Ma na oo mai upu a le Aposetolo o Paulo i lo’u mafaufau: “Ia saunia pea lava outou e tali atu ma le agamalu ma le mata’u ia i latou uma o e fesili mai ia te outou i le uiga o le faamoemoe o loo ia te outou” (1 Peteru 3:15). Sa tonu ia te au o le taimi lenei e tatau ai ona ou tuuina atu la’u molimau.

Sa ou ta’uina atu ia te ia faapea o so’u faamanuiaga i tausaga ua mavae le lagolago atu ia Elder Richards i le lolomiina [o le tusi] O Se Galuega Taua ma le Ofoofogia. Sa ou faamatalaina atu ia te ia se mea e uiga i lena alii maoae. Sa ou tauina atu ia te ia le fia afe o tagata ua taliaina le upumoni ina ua maea ona faitau i mea na ia saunia.

Ona ou maua lea o le avanoa, e oo atu lava i Los Angeles, e tali atu ai i ana fesili e uiga i le Ekalesia—o fesili atamai na sau mai se loto o loo sailia le upumoni. Sa ou talosaga ia te ia pe mafai ona ou faafesootaia ni faifeautalai tamaitai se toalua e valaau atu ia te ia. Sa ou fesili i ai pe fia auai i le tatou paranesi o loo i San Francisco, i le mea o loo nofo ai. O le ioe ana tali uma.

Ina ua ou toe foi i le fale, sa ou tusi atu loa ia Peresitene Irven G. Derrick o le siteki a San Francisco ma tuuina atu ia te ia lenei faamatalaga. Pe mafai ona outou mafaufau i lo’u fiafia, ina ua ou maua se valaau mai ia Peresitene Derrick i ni nai masina mulimuli ane ma sa ia faapea mai, “Elder Monson, o lea ou te valaau atu e uiga i a Yvonne Ramirez, se tamaitai faigaluega i luga o vaalele, se tamaitai talavou na nofo i ou tafatafa i se faigamalaga agai i Los Angeles, o se tamaitai talavou na e saunoa mai faapea e le o se mea na tupu fua lona nofo i ou tafatafa ma sa ia faitauina le [tusi] O se Galuega Taua ma le Ofoofogia i lena malaga. Uso Monson, o lea faatoa avea lava o ia ma se tagata fou O Le Ekalesia a Iesu Keriso o le Au Paia o Aso e Gata Ai. O lea e fia talanoa atu ia te oe ma faailoa atu lona loto faafetai.” O le mea moni sa matuai sili atu lo’u olioli. O se telefoni maoae tele.

O Le Faataitaiga a Peresitene MaKei

O se faataitaiga o se faiaoga maoae o Peresitene Tavita O. MaKei, o le na valaauina au e avea ma se uso o le Korama a Aposetolo e Toasefululua. Sa ia aoao atu ma le alofa ma le magafagafa. O ia o le faataitaiga sili o mea sa ia aoao atu. Sa agalelei lona loto, o ona uiga foi sa tauagafau. O ia o se faiaoga o le upumoni e tusa ai ma le faataitaiga a le Faaola.

Sa ou matauina lenei uiga, a o lei taitai ona avea au ma se Pulega Aoao, pe a ou ulu atu i lona ofisa e iloiloina nisi o faamaoniga o lomiga o se tusi sa matou lolomiina. I lena feiloaiga patino, sa ou matauina ai se ata i luga o le puipui, ma sa ou faapea atu ia te ia, “Peresitene MaKei, manaia tele le ata. Pe o se ata o le tou fale a o e laitiiti i Huntsville, Iuta?”

Sa faalagolago o ia i tua o lona nofoa, ma tuu mai se ataata faa Tavita O. MaKei e pei ona masani ai ma faapea mai, “Sei ou faamatala atu ia te oe e uiga i le ata. Na oo mai se tamaitai lalelei e feiloai ia te au i se tasi aso o le tautotogo ma tauaao mai lena ata matagofie, ua faavaaina ma saunia e tuu i luga o le puipui. Sa ia faapea mai, ‘Peresitene MaKei, sa ou faaaluina le tele o le taumafanafana e vali ai lenei ata o le fale o ou tuaa.’” Fai mai o ia sa ia taliaina le meaalofa ma faafetai tele atu ia te ia.

Ona faapea mai lea, “E te iloa, Uso Monson, e ese le fale na vali e lena tamaitai lelei. O le fale e sosoo ai sa ia valiina! Ou te lei maua le lototele e ta’u atu ai ia te ia e sese le fale na ia valia.”

Peitai sa ia tuuina mai lenei saunoaga—ma o se lesona taua lenei mo i tatou uma. Na ia saunoa, “O le mea moni lava, Uso Monson, sa ia valiina le fale sa’o mo au, aua, a o ou laitiiti, ou te taotooto i luga o le moega sa i luma o le faapaologa o le fale o o’u tupuaga, o le vaaiga sa ou iloa atu i lena faapaologa puipui, o le fale tonu lava lea sa ia valiina. Sa ia valiina le fale sa’o mo au!”

O Lesona e uiga i le Auauna Atu i Isi

O nisi o lesona sili e aoaoina i le olaga e maua mai o tatou matua. O lo’u olaga na ou aoaoina ai ni lesona taua a o o’u tuputupu ae. E masani lava o na lesona e faatatau lea i le auauna atu i isi. E tele mea ou te manatuaina o aso o lo’u laitiiti. O le tulimatai atu i le toonai i le afiafi o le Aso Sa o se tasi o ia mea. A o lolofi atu i matou le fanau i le tulaga ua i ai, o le matua fiaaai lava, ma nonofo naunautai i le laulau ua sasala le manogi o le fasipovi tao ma ua faatumulia ai le potu, ae faapea mai Tina ia te au, “Tommy, ae tatou te lei aai, ave le ipu meaai lea i le Toeaina o Bob, ona e vave mai ai lea.”

Sa le mafai ona ou malamalama pe aisea matou te le aai ai muamua ona ave mulimuli ai lea o lana ipu meaai. Ou te le fesiligia lava ae ou te tamoe atu i lona fale ma faatalitali ma le naunau a o savali faatosotoso mai Bob i le faitotoa. Ona ou tuuina atu lea i lona lima le ipu meaai. Na te tuuina mai ia te au le ipu mama o le Aso Sa ua tuanai ma aumai mai se 10 sene e fai ma totogi o la’u tautua.

E tumau lava la’u tali: “E le mafai ona ou taliaina le tupe. E sasa ai au e lou tina.”

Ona ia faasolosolo lea o lona lima maanuminumi i lo’u lauulu enaena ma faapea mai, “Lo’u atalii e, ua e maua se tina lelei. Fai i ai faafetai tele lava.”

Ou te manatua foi lena toonai i le afiafi o le Aso Sa na foliga mai na sili atu ona tofo lelei ina ua ou fo’i mai i lo’u tiute.

O le tama o lo’u tina, o Tamamatua Thomas Condie, na aoaoina mai foi ia te au se lesona mamana lea na aofia ai le Toeaina lenei o Bob, o le na oo mai i o matou olaga i se auala tulaga ese. Na maliu lona toalua i le 80 o ona tausaga ina ua faatafunaina le fale sa ia mautotogi ai i se potu e tasi. Sa ou faalogo ia te ia o faamatala i lo’u tamamatua lona pagatia a o matou nofonofo i luga o le suigi tuai o le faapaologa o lo’u tamamatua. Ma si ona leo faanoanoa, sa ia faapea atu ai ia Tamamatua, “Lau Susuga Condie, ua ou le iloa le mea a fai. E leai so’u aiga. E leai se mea ou te alu i ai. E utiuti la’u seleni.” Sa ou mafaufau po o le a se tali a Tamamatua.

Sa matou faalue ai pea i le suigi. Ona aapa ifo lea o Tamamatua i lana taga ma to ane i fafo se ato tupe tuai, o se tali i lo’u naunau, sa ia teuina ai tupe mo nai taui faapitoa. O le taimi lenei sa ia toeseina ai se ki ma tuu atu i le Toeaina o Bob.

Sa ia faapea atu ma le agamalu, “Bob, o le ki lenei i lo’u fale lea e sosoo atu. Ave. La’u ane i ai au mea. E pule lava oe i le umi e te fia nofo ai. E leai se tupe e totogiina ma e leai lava se tasi e aveeseina oe.”

Sa maligi loimata o le Toeaina o Bob, ma tafe ifo i lalo o ona alafau, ona mou atu ai lea i totonu o lana soesa uumi, sinasina. Na loimatā foi mata o Tamamatua. E leai ma sa’u tala na faia, ae o lena aso na avea ai lo’u tamamatua ma tagata sili ona maoae ua ou iloa. Sa ou mitamita e tauave lona igoa. E ui o au o se tamaitiiti, ae o lena lesona sa matuai mamana lona aafiaga i lo’u olaga.

O nai lesona na mai le tele o lesona na ou aoaoina mai ia i latou o e na ootia ai lo’u olaga ma na aoaoina ai au.

Ou te toe faamamafa atu, o i tatou uma lava o faiaoga. E tatau ona tatou manatuaina pea ina ia aua ne’i o tatou aoao atu na o upu; ae tatou te aoao atu foi e ala i o tatou tagata ma le auala tatou te ola ai i o tatou olaga.

O Le Faataitaiga Lelei Atoatoa

A o tatou aoao atu isi, ia tatou mulimuli i le faataitaiga a le faiaoga atoatoa, o lo tatou Alii ma le Faaola o Iesu Keriso. Na ia tuua Ona tulaga aao i le oneone o le matafaga ae na Ia tuua aoaoga o mataupu faavae i loto ma olaga o i latou uma o e na Ia aoao atu i ai. Sa Ia aoao atu Ona soo i na ona po—ma ua Ia fetalai mai foi ia i tatou i na lava upu—“Ia e mulimuli mai oe ia te au” (Ioane 21:22).

Ia tatou agai i luma ma le agaga o le usiusitai, ina ia mafai ona faapea foi ona faia ia i tatou e pei ona tautalagia e uiga i le Togiola, “O oe o le aoao ua maliu mai mai le Atua” (Ioane 3:2). Ia faapea lava ona fai, ou te tatalo atu ai, i le suafa o Iesu Keriso, amene.

• A o e faitauina aafiaga o i le saunoaga a Peresitene Monson, o a ni lagona na oo atu ia te oe e uiga i le aoaoina mai ma le aoao atu? O a ni ou aafiaga o se tagata aoao, e tutusa ma faataitaiga o i ai i nei tala?

• E faapefea e aafiaga taitasi o loo faamatala mai e Peresitene Monson ona faapupula mai ai le tulaga maualuga o le aoao atu a le Faaola? Tatalo ma mafaufau loloto po o a mea e mafai ona e faia e mulimuli ai i le faataitaiga a le Faaola.