Lesona 7 Anomea a le Faiaoga

Toefuataiga o le Perisitua

Ina ua mavae se periota o le liliuese, sa faapea loa ona toefuatai mai le pule o le perisitua a le Atua i le lalolagi. O le toefuataiga na saunia ai le ala mo le faatulagaina o Le Ekalesia a Iesu Keriso o le Au Paia o Aso e Gata Ai. I le lesona lenei, o le a aoao ai e tamaiti aoga le mafuaaga e matuai taua ai le perisitua i le Ekalesia a le Alii ma le ala e mafai ai ona tatou maua le mana o le Faaola e ala i sauniga.

Fautuaga mo le Aoaoina Atu

FAALELEIA O LO TATOU AOAO ATU MA LE AOAOINA

Vaai atu i au tamaiti aoga o ni tagata e mafai ona avea ai i latou. Na aoao mai Peresitene Thomas S. Monson, “O loo ia i tatou le tiutetauave e vaai atu ai i tagata, e le o le tagata o loo latou i ai ae o tagata e mafai ona avea ai i latou” (“Vaai Atu i Isi i Tagata e Mafai ona Avea ai i Latou,” Ensign po o le Liahona, Nov. 2012, 70). Tatalo ia mafai ona e vaai atu i au tagata aoga faapei ona vaai ai le Tamā Faalelagi ia i latou. O le faia o lea mea, e mafai ona fesoasoani e te malamalama ai i le taua o tamaiti aoga taitasi ma iloa ai le alofa ma le popole o le Tama Faalealgi mo Ana fanau taitoatasi.

E matuai manaomia tele le perisitua i le Ekalesia a le Alii.

Mafaufau e faaali atu le fesili lenei a’o lei taunuu atu tamaiti aoga ona fai atu lea i ai e faasoa mai o latou manatu e uiga i ai pe a amata le vasega.

• O le a se taimi na e lagonaina ai lata mai nei le faamanuiaina ona o le perisitua?

Faaali atu le saunoaga lenei o le aoaoga faavae mai ia Elder Jeffrey R. Holland o le Korama a Aposetolo e Toasefululua:

Elder Jeffrey R. Holland

O le perisitua a le Atua, ma ona ki, o ona sauniga, o lona faapogai paia ma le mafaia ona fusifusia i le lagi mea e fusifusia i le lalolagi e le mavavaeeseina i le Ekalesia moni a le Atua aua e tutasi lava ia, ma a na le seanoa lena, semanu e leai se Ekalesia a Iesu Keriso o le Au Paia o Aso e Gata Ai. (Jeffrey R. Holland, “O Le Mea ua Sili Ona Tulaga Ese ai i Tatou,” Ensign po o le Liahona, Me 2005, 43; ua faaopoopo le faamamafa)

• O a ni upu po o fasifuaitau e tulaga ese mai ia te oe i le saunoaga a Elder Holland? Aisea?

A o e faatautaia faasoa ma talanoaga a tamaiti aoga, atonu e te faaaogaina nisi o autu ma fesili nei, e fesoasoani ia loloto atili ai le malamalama o tamaiti aoga i nai elemene o le saunoaga a Elder Holland. Atonu e sili atu le taua o le talanoa maeaea i se fesili se tasi pe lua nai lo o le taumafai e kava fesili uma. E mafai ona faaleleia lau talanoaga a o faasoa mai foi e tamaiti aoga le mea na latou aoaoina mai anomea mo sauniuniga.

Faamatalaga: O le a e talanoaina sauniga i le afa lona lua o le lesona lenei. Ia manatua ia lava se taimi e tuu mo lena talanoaga ina ia mafai ona iloa ma malamalama lelei tamaiti aoga i le taua o sauniga.

O le perisitua e matuai taua tele i le Ekalesia a le Alii (tagai i le vaega 1 o anomea mo sauniuniga).

• Aisea e te manatu ai e matuai manaomia tele le perisitua i le Ekalesia a le Alii? O le a le malamalama ma ki o le a tatou misia pe ana le toefuataiina mai le perisitua?

• O a ni auala e matuai manaomia ai lava le perisitua i lou lava olaga?

O le perisitua e faalelagi lona afuaga (tagai i le vaega 1 o anomea mo sauniuniga).

• Na faapefea ona toefuatai mai le perisitua?

• O le a le mea ua aoao mai e le toefuataiga o le perisitua ia te oe e uiga i lou Tama Faalelagi ma Iesu Keriso?

E matuai taua tele ki o le perisitua i le Ekalesia a le Alii (tagai i le vaega 2 o anomea mo sauniuniga).

• O a ki o le perisitua?

• Ua faapefea ona avea ki o le perisitua o se faamanuiaga i lou olaga?

A o faasoa mai e tamaiti aoga ni aafiaga ma tuuina mai molimau i le perisitua ma lona toefuataiga, atonu foi e te manao e faasoa atu lou agaga faafetai ma le molimau i le ala ua faamanuiaina ai lou lava olaga e le toefuataiga o le perisitua.

O sauniga ma feagaiga o le perisitua e manaomia mo lo tatou faaolataga.

Faamalamalama atu faapea, ia Setema 1832, pe tusa e lua tausaga talu ona maua le Perisitua Mekisateko mai ia Peteru, Iakopo ma Ioane, na faapea ona maua ai e Iosefa Samita se faaaliga ua fesoasoani tatou te malamalama lelei ai i le perisitua. Sa aofia ai le upumoni e faapea, o sauniga faaola e faia e ala i le pule o le perisitua, e fesoasoani e saunia ai i tatou e toe foi atu i le afioaga o le Atua. Valaaulia tamaiti aoga e suesue i le Mataupu Faavae ma Feagaiga 84:18-22, ma vaavaai pe faapefea ona saunia e sauniga i tatou e toe foi atu i le afioaga o le Atua.

• E tusa ai ma nei fuaiupu, o le a le faamanuiaga taua e maua e ala i sauniga o le perisitua?

• O a nisi o uiga e mafai ona i ai o le fuaitau “mana o le faale-atua”? (A uma ona tali mai tamaiti aoga, atonu e te manao e fautua atu o le “faaleatua” o lona uiga “e faapei o le atua.” O le mana o le faaleatua e aofia ai le mana o le Atua e fesoasoani ia i tatou ia faapei o Ia.)

Faaali atu ma faitau le saunoaga lenei mai ia Elder David A. Bednar o le Korama a Aposetolo e Toasefululua, ma fai i tamaiti aoga e vaavaai mo ni uiga e ono i ai o le fuaitau, “mana o le faaleatua”:

Elder David A. Bednar

O sauniga o le perisitua e tatala ai le faitotoa ma maua ai le avanoa i le mana o le faale-atua. … E le mafai e le mafaufau o le tagata ma gagana faaletino ona sa’olele pe lava le faamalamalamaina o le uiga o le fuaitau faaletusi paia, “o le mana o le faaleatua.” Ae o le tuufaatasiga atoa o faamanuiaga o le Togiola—laveaiga mai agasala; malosiaga e fai ma avea ai ma [se tagata] lelei; o le meaalofa faaleagaga o le filemu patino; o malosiaga tauia e fesoasoani tatou te fetaia’i ai ma le le fiafia, faiga le tonu, faiga le tutusa, le sa’o, ma le tele o isi mea—e mautinoa lava le aofia ai o se vaega o le mana o le faaleatua. … Ina ia o mai i le Faaola, e tatau i se tagata ona uia muamua le faitotoa o le papatisoga ma maua le meaalofa o le Agaga Paia—ona faaauau pea ona fetaomi atu i luma i le ala o feagaiga ma sauniga e taitai atu ai i le Faaola ma faamanuiaga o Lana Togiola (tagai 2 Nifae 31). E matuai manaomia lava sauniga o le perisitua ia “o mai [atoatoa ai] ia Keriso, ma faaatoatoaina ia te ia” (Moronae 10:32; tagai foi i ff. 30–33). A aunoa ma sauniga, e le mafai ona maua e se tagata ia faamanuiaga uma ua avanoa e ala i le taulaga togiola e le iu ma faavavau a le Alii (tagai Alema 34:10–14)—o le mana lava lea o le faaleatua. (David A. Bednar, Power to Become [2014], 75–77)

• O le a se mea ua tatou aoao mai i le saunoaga a Elder Bednar e uiga i le “mana o le faaleatua”? O le a se mea ua tatou aoaoina e uiga i le faamoemoega o sauniga o le persitua? (I le faaaoga ai o upu a tamaiti aoga, tusi pe faaali atu se upumoni e talitutusa ma lenei: E ala i sauniga ma feagaiga o le perisitua, ua mafai ai ona tatou maua faamanuiaga o le Togiola a le Alii, lea ua tuuina mai ai ia i tatou le mana e avea ai faapei o le Atua.)

• O a ni auala e te manatu ua sosoo ai e sauniga faapitoa o le Perisitua Arona ma le Mekisateko i tatou i faamanuiaga o le Togiola a le Faaola? (Pe a manaomia, tuu atu i tamaiti aoga se taimi e toe faamanatu ai faamatalaga o loo i le vaega 3 o anomea mo sauniuniga.)

Tuu atu i tamaiti aoga ni nai minute e mafaufau loloto ai i sauniga o le perisitua na latou auai ai lata mai nei lava. Fai atu i ai e mafaufau pe na faapeī o latou lagona, ma po o le a le uiga o na sauniga i lo latou alualu i luma e faavavau. Ona faaali atu lea o fesili nei e mafaufau i ai tamaiti aoga.

• O le a se sauniga e ono sili atu le anoa ia te oe e ala i le faaaogaina o mea ua e aoaoina i le aso? (Faamalosiau i tamaiti aoga e tusifaamaumau ma faatino o latou lagona.)

• O le a se mea na e aoaoina ma lagonaina i le aso, ua faateleina ai lou naunau e auai i sauniga o le perisitua?

Pe a talafeagai ai, valaaulia tamaiti aoga e faasoa atu a latou molimau i auala ua fesoasoani ai le pule o le perisitua, ki, ma sauniga ia i latou e lagona ai le alofa o le Tama Faalelagi.

Mo Le Isi Taimi

Valaaulia tamaiti aoga e mafaufau po o le a le matafaioi ua faia e le Ekalesia i o latou olaga. A o latou suesue i anomea mo sauniuniga mo le lesona e sosoo ai, faamalosiau atu ia i latou e vaavaai mo faamanuiaga ua faaavanoaina e le Alii mo tagata faamaoni o Le Ekalesia a Iesu Keriso o le Au Paia o Aso e Gata Ai.