Lesona 3 Anomea a le Faiaoga

Mauaina o le Malamalama Faaleagaga

Ua faaali mai e le Alii mataupu faavae e mafai ona taiala ai i tatou i la tatou sailiga mo le mea moni (tagai “Mauaina o le Malamalama Faaleagaga,” Pepa Faamatalaga Autu o le Atamai i Aoaoga Faavae [2018]). O le lesona lenei o le a faateleina ai le malosi o tamaiti aoga e faaaoga mataupu faavae o le mauaina o le malamalama faaleagaga ma iloilo le faatuatuaina o punavai.

FAALELEIA O LO TATOU AOAO ATU MA LE AOAOINA

Faailoa atu taunuuga o aoaoga a tamaiti aoga. O taunuuga o aoaoga o faamatalaga ia e iloilo ai po o a malamalama ma tomai e tatau ona aoaoina e tamaiti aoga mai se aafiaga faaleaoaoga. O taunuuga mo lesona taitasi o lenei kosi o loo faamaoti atu i le faatomuaga o le lesona. Ia saoloto e faailoa atu nei taunuuga i tamaiti aoga. Ia tuu atu i taunuuga o le lesona e fesoasoani e taiala oe a o e fetuutuunaia anomea o le lesona ma iloilo le faamanuiaina o aafiaga faaleaoaoga o tamaiti aoga.

Fautuaga mo le Aoaoina Atu

Ua tuuina mai e le Alii se mamanu e maua ai le malamalama faaleagaga.

Faaali atu ia fesili nei: E afaina le i ai o ni fesili e uiga i le Ekalesia? Aisea pe aisea e leai ai? Valaaulia ni tamaiti aoga se toalua pe toatolu e faasoa mai o latou manatu.

Faitau faatasi o se vasega le Iosefa Samita—Talafaasolopito 1:8–10, ma vaavaai mo upu po o fuaitau na faaaoga e Iosefa e faamatala ai ana fesili ma popolega i mea tau lotu. Fai atu i tamaiti aoga e faasoa mai se mea na latou maua, ma mea ua latou aoaoina e uiga i le fai atu o fesili, mai i le faamatalaga a Iosefa.

Tusi le faamatalaga lenei i luga o le laupapa: E mafai ona ou maua le malamalama faaleagaga a o o’u …

Fai i tamaiti aoga e faailoa mai ni mataupu faavae se tolu mai i anomea mo sauniuniga e faauma ai lenei faamatalaga. (A o tali mai tagata aoga, ia mautinoa e faailoa ma faaali mai ia mataupu faavae nei:

1. Faatino i le faatuatua.

2. Iloilo manatu ma fesili ma se vaaiga e faavavau.

3. Saili le malamalama atili e ala i punaoa mamana ua filifilia.

Fai i tagata aoga e faamatala mai mea ua latou malamalama i ai e uiga i nei mataupu faavae taitasi. Afai e manaomia, tuu atu sina taimi mo i latou e toe faamanatu anomea mo sauniuniga.

Fai atu i tamaiti aoga e faitau le Iosefa Samita—Talafaasolopito 1:11–14, ma vaavaai pe na faapefea ona faaalia i faatinoga a Iosefa Samita ia nei mataupu faavae o le mauaina o le malamalama faaleagaga, a o ia sailia tali i ana fesili ma popolega. Valaaulia tamaiti aoga e faasoa mai mea na latou aoaoina.

Filifili ma faaali atu se fesili e tasi pe sili atu na e maua mai i tamaiti aoga, lea e mafai ona latou faaaoga i ai mataupu faavae o le mauaina o le malamalama (tagai i le gaoioiga “Tusifaamaumau Ou Lagona Uunai” i le vaega 1 o anomea mo sauniuniga). Ia faamalamalama atu, e ui o le a mafai ona e faaaogaina na’o ni nai fesili na auina atu i le taimi o le vasega lenei, ae o le a e vaavaai mo ni avanoa e mulimuli mai i le mataupu aoaoina o le kosi e talanoaina ai isi fesili na e mauaina.

Faamatalaga: O le faamoemoega o le gaoioiga lenei, ia tuu atu ai i tamaiti aoga se avanoa e talanoa ai e uiga i auala o le a latou faaaoga ai mataupu faavae o le mauaina o le malamalama faaleagaga i fesili eseese. E le o faamoemoe e tuuina atu ai ni tali i fesili faapitoa. Ia faaeteete e aua ne’i nofonofo ai pea i faamatalaga auiliili o se fesili po o se faafitauli.

Ia talanoa i auala o le a faaaoga ai e tamaiti aoga ia mataupu faavae ua faaali atu i luga o le laupapa e saili ai tali i se po o ni fesili ua filifilia. O fesili tulitatao o loo i lalo e mafai ona avea o se vaega o lau talanoaga:

• E faapefea ona tatou faatino i le faatuatua a o tatou sailia se tali i le fesili lenei?

• E faapefea ona fesoasoani se vaaiga e faavavau ia i tatou e tali ai lenei fesili? O le a se mea ua tatou iloa e uiga i le Tama Faalelagi ma Lana fuafuaga o le faaolataga, e mafai ona fesoasoani ia i tatou e vaai atu ai i lenei fesili mai se vaaiga e faavavau?

• O a ni punaoa ua atofaina mai le lagi e mafai ona fesoasoani ia tatou malamalama lelei ai i lenei autu? O a nisi punavai faatuatuaina e mafai ona fesoasoani ai? (Faamatalaga: Atonu e aoga le avatu o tamaiti aoga i le itulau o le Autu o le Talalelei i le ChurchofJesusChrist.org e faataitai atu ai se punavai faatuatuaina lea foi e faasino atu ai i sootaga o mau ma saunoaga faaperofeta.)

Fai atu i se tamaitiiti aoga se toatasi pe toalua e faasoa mai pe ua faapefea ona faamanuiaina i laua i mataupu faavae e tolu o le mauaina o le malamalama faaleagaga i la laua sailiga mo le malamalama faaleagaga.

E mafai ona tatou iloiloina le faatuatuaina o punavai.

Faaali atu se vaega o le vitio “Divinely Appointed Sources” (faailo o taimi 0:00 i le 4:19).

Fai atu i tamaiti aoga e vaavaai po o a ituaiga o punavai o faamatalaga e sili ona faatuatuaina ae o lē fea ua i ai le mafai e faaleaga ai lo tatou malamalama o le upumoni.

A uma ona e taofia le vitio, mafaufau e fai atu nisi o fesili e pei o nei, e fesoasoani ai i tamaiti aoga e mafaufau i le eseesega i le va o punavai faalelagi, punavai faatuatuaina, ma punavai e le faatuatuaina pe faataumaoia.

• O a punavai aupito mama ia e mafai ona tatou sailia ai ni tali?

• E faapefea ona e iloatino pe faatuatuaina se punavai o faamatalaga pe leai?

• O le a lau mea e fai pe a e tau i ni punavai o faamatalaga ua fuafuaina e faaleaga ai le faatuatua?

Ina ia faaalia le taua o le faaaogaina o punavai faatuatuaina pe a suesue i le talafaasolopito o le Ekalesia, fai atu i tamaiti aoga e vaai faalemafaufau i le tulaga lenei: O loo e sailia nisi faamatalaga e uiga i Molimau e Toatolu o le Tusi a Mamona. I lau sailiga na e tau ai i le faamatalaga lenei mai ia Stephen Burnett, o lē sa ola i le vaitaimi lava lea na ola ai Matini Harisi, ma ua e le mautinoa pe sa’o le faamatalaga pe leai.

Ua umi ona ou mafaufau ma le loto i ai i le talafaasolopito o lenei ekalesia ma tau fuafua le faamaoniga e au i ai ma tetee foi i ai. … Ae ina ua ou faalogo i le faamatalaga faalauaitele a Matini Harisi e faapea, e le’i vaai lava ona mata faaletino i papatusi, ae sa na’o i le faaaliga po o le vaaiga faalemafaufau, sa le’i vaai foi i ai Oliva po o Tavita … na pau ese [pe faafiti] le vae [molimau] mulimuli. (Stephen Burnett, i le Richard Lloyd Anderson, Investigating the Book of Mormon Witnesses [1981], 155)

• O a ni laasaga e mafai ona e uia ae [e te] le’i filifili pe talia pe leai le faamatalaga a Stephen Burnett e uiga ia Matini Harisi?

Fai atu i tamaiti aoga e lipoti atu mea na latou aoaoina e uiga i le iloiloina o punavai mai i le vaega o anomea mo le sauniuniga ua ta’ua o “Fesili mo le Iloiloina o Punavai.”

Faatasi ai ma nei taiala mo le iloiloga o punavai e mafaufau i ai, tuu atu i tamaiti aoga le pepa e tufa atu “Talaaga Moni o le Faamatalaga a Stephen Burnett,” ma fai atu i tamaiti aoga (e fai o se vasega po o ni vaega toalaiti) e vaavaai mo faamatalaga o le a fesoasoani ia i latou i le iloiloga o le moni o le tuuaiga a Stephen Burnett e faapea e le’i vaai Matini Harisi i papatusi auro.

Talaaga Moni o le Faamatalaga a Stephen Burnett

Sa auai Stephen Burnett i le Ekalesia i le 1830 ma sa faauuina o se toeaina i le 1831. Sa auauna atu i ni misiona i le Iunaite Setete i Sasae i le va o le 1832 ma le 1834 (tagai “Burnett, Stephen,” The Joseph Smith Papers, interim content). E oo ane i le 1838 ua ia tuua le Ekalesia ma manatu e faapea o se “vaaiga atoa o le pepelo ma le taufaasese.”

E ui ina iloa lelei e Burnett ia Matini Harisi, sa le o ia o se tasi o Molimau e Toatolu pe Toavalu.

I le 1838, sa tusi ai e Burnett se tusi lea sa ia faapea mai ai sa fai atu Matini Harisi, “e le’i vaai lava ona mata faaletino i papatusi, ae sa na’o i le faaaliga po o le vaaiga faalemafaufau.” Sa tusia e Burnett e faapea, e toatolu isi tagata “na ioeina” lana faamatalaga. O nei tagata e toatolu na o ese foi ma le Ekalesia.

Sa teena malosi e Matini Harisi le ala na faamatala ai e Burnett lana molimau ma faaauau lava ona molimau i le moni o le Tusi a Mamona i lona olaga atoa.

E ese mai i le faamatalaga a Burnett, o le “ogatasi ai o le tele o faatalatalanoaga ma Matini Harisi ua faamaonia ai o le matuai malosi o lona [Harisi] mautinoa sa le’i ese mai lana faaaliga vaaia o le agelu ma papatusi i le 1829 e oo mai lava i le taimi o lona maliu i le 1875.” I se tusi patino na tusia i le 1871, sa tautino ai e Harisi, “E leai se tagata na faalogo o o’u teenaina i soo se ala lava le moni o le Tusi a Mamona, le taitaiga a le agelu lea na faaalia mai ia te a’u ia papatusi, po o le faatulagaga o le Ekalesia a Iesu Keriso o le Au Paia o Aso e Gata Ai” (Richard Lloyd Anderson, Investigating the Book of Mormon Witnesses [1981], 107–20, 155–57).

Talaaga Moni o le Faamatalaga a Stephen Burnett

tufaaga a le faiaoga

A ua lava loa se taimi e faitau ma talanoaina ai e tamaiti aoga le tufaaga, ia fai atu fesili nei:

• O le a se faamatalaga mai i lenei tufaaga e fesiligia ai le faatuatuaina o le faamatalaga a Stephen Burnett?

• E faaopoopo atu i le suesueina o le moni o punavai, o le a se isi mea e mafai ona e iloa ai pe moni le mau a Molimau e Toatolu?

Valaaulia tagata aoga e faasoa mai mea na latou aoaoina mai lenei aafiaga. Mafaufau e faauma le vasega i le faaali atu o le vaega o loo totoe o le vitio “Divinely Appointed Sources” (time codes 4:20 to 9:16) ma faasoa atu lau molimau i le taua o le faaaoga o mataupu faavae o le mauaina o le malamalama faaleagaga.

Mo Le Isi Taimi

Fai atu i tamaiti aoga pe na i ai se taimi sa latou tauivi ai ia iloa le taimi na fetalai mai ai le Alii ia i latou pe, na i ai se taimi na latou mananao ai e iloa pe faapefea ona faaleleia le mauaina o faaaliga patino ma le taitaiga i o latou olaga. Valaaulia i latou e suesue ma le toto’a anomea mo sauniuniga mo le lesona e sosoo ai i le aoaoga faavae o faaaliga, ma ia o mai saunia e faasoa mai i le vasega mea na latou mauaina.