Lesona 19 Anomea a le Faiaoga

Faaolataga o e ua Maliliu

Sa aoao mai le Perofeta o Iosefa Samita, o se tasi o tiutetauave aupito maoae ua tuuina mai e le Atua i le Au Paia o Aso e Gata Ai o le fesoasoani lea e faaola e ua maliliu (tagai Aoaoga a Peresitene o le Ekalesia: Iosefa Samita [2007], 475). O lenei lesona ua mamanuina ia fesoasoani i tagata aoga ia malamalama ma faasoa mai le pogai ua avea ai le faaolataga o e ua maliliu o se vaega taua o le fuafuaga a le Atua ma ia faateleina lo latou naunau e auai atoatoa atili i talafaasolopito o aiga ma auaunaga i le malumalu.

Fautuaga mo le Aoaoina Atu

Ua faaali mai e le Alii le aoaoga faavae o le faaolataga o e ua maliliu e ala mai i le Perofeta o Iosefa Samita.

Faaali atu le ata o loo i le lesona, ma faamalamalama atu, o loo faaalia ai Alavini Samita o loo siiina lona uso laitiiti o Iosefa, ina ua uma le taotoga o le vae o Iosefa. Valaaulia tagata aoga e faamatala mai a latou sauniuniga o le vasega mea ua latou iloa e uiga i lagona o Iosefa mo lona uso o Alavini ma le mea na tupu ia Alavini.

• O le a le mea na fautua atu e se faifeau Peresipeteriana i le aiga o Samita i le falelauasiga o Alavini?

• Faamata o a ni ou lagona i le faalogo atu i nei upu pe ana faapea o oe o se tasi o le aiga o Iosefa?

Faamanatu i tagata aoga o upu a le faifeau na atagia ai le talitonuga, e pei ona aoaoina i le Feagaiga Fou, e faapea, e manaomia le papatisoga mo le faaolataga (tagai Ioane 3:5). Fai atu i tagata aoga e toe faamanatu le faaaliga vaaia a Iosefa Samita i le 1836 e uiga i le malo selesitila e pei ona faamaumauina i le Mataupu Faavae ma Feagaiga 137:1, 5–8, ma vaavaai mo le mea na aoaoina e Iosefa Samita e uiga i lona uso o Alavini. Valaaulia tagata aoga e lipoti mai mea ua latou mauaina.

• O a upumoni e uiga i le ata o le faaolataga ua fesoasoani lenei faaaliga e toefuatai mai pe faamanino mai? Faamata o a ni manatu ma lagona atonu na oo ia Iosefa a o ia aoaoina nei upumoni?

Faamalamalama atu, e fa ma le afa tausaga talu ona mavae le vaaiga o le faaaliga vaaia e uiga ia Alavini i le mamalu selesitila, ona aoao atu lea e Iosefa o le Au Paia i Navu e faatatau i auala e mafai ona laveaiina ai i le malo o le Atua se tagata e pei o Alavini, o le sa le’i papatisoina i lenei olaga. Na faalauiloa atu e le Perofeta le aoaoga faavae o le papatisoga mo e ua oti i le taimi o se saunoaga i se maliu i le aso 15 o Aokuso, 1840 (tagai Church History Topics, “Baptism for the Dead,” ChurchofJesusChrist.org).

Valaaulia tagata aoga e faitau taitoalua po o i ni vaega toalaiti le faamatalaga mai le tusi a Vilate Kimball o loo maua i le vaega 1 o anomea mo sauniuniga. Ona faaali atu lea o fesili nei (o loo maua foi i le vaega 1 o anomea mo sauniuniga), ma valaaulia tagata aoga e latou te talanoaina:

• O le a le mea e te manatu na avea ai le faaolaina o e ua maliliu “o se aoaoga faavae ofoofogia”?

• O a mea e mafai e lenei aoaoga faavae ona aoao ai se tasi e faatatau i uiga ma finagalo o le Tama Faalelagi ma Lona Alo o Iesu Keriso?

Valaaulia se tagata aoga e faitau leotele aoaoga a le Perofeta o Iosefa Samita ua faamaumauina i le Mataupu Faavae ma Feagaiga 128:15. Fai i le vasega e mulimuli i le faitauga, ma vaavaai pe aisea e matuai taua ai mo i tatou le auai i galuega o le faaolataga o e ua maliliu.

• E tusa ai ma lenei fuaiupu, aisea e taua ai ona tatou faia sauniga faaola mo e ua maliliu? (Atonu e faailoa mai e tagata aoga ni nai upumoni, e aofia ai mea nei: A aunoa ma sauniga faaola o le talalelei, e le mafai e o tatou tuaa ua maliliu e aunoa ma le talalelei ona agai atu i luma i le faaeaga. O le faaolataga o o tatou tuaa ua maliliu e taua i lo tatou lava faaolataga.)

• O a ni auala e te manatu o le faaolataga o o tatou tuaa e “tatau ma taua” i lo tatou lava faaolataga?

E avea o se vaega o lau talanoaga, faaali atu le saunoaga lenei mai ia Peresitene Russell M. Nelson, ma valaaulia se tagata aoga e faitauina leotele:

Ao i ai i galuega o le malumalu ma talafaasolopito o aiga le mana e faamanuia ai i latou o i tua atu o le veli, o loo i ai foi le mana lava lea e faamanuia ai e o soifua. O loo i ai se uunaiga faamama ia i latou o loo faia lea galuega. O loo latou fesoasoani moni lava e faaeaina o latou aiga.

E faaeaina i tatou pe afai e mafai ona tatou nonofo faatasi ma o tatou aiga lautele i le afioaga o le Atua Silisili Ese. (Russell M. Nelson, “O Tupulaga e Sosoo i le Alofa,” Ensign po o le Liahona, Me 2010, 91–94; ua faaopoopo le faatusilima).

Ua vaai Iosefa F. Samita i se faaaliga vaaia e uiga i le faaolaina o e ua maliliu.

Faamalamalama atu, e ui ina na maliu le Perofeta o Iosefa Samita, sa faaauau pea ona faaali mai e le Alii upumoni i “lea fasifuaitau ma lea fasifuaitau” (Mataupu Faavae ma Feagaiga 98:12) e uiga i lana fuafuaga e faaola ai e ua maliliu. I le 1918, na maua ai e Peresitene Iosefa F. Samita se faaaliga vaaia e uiga i le faaolaina o e ua maliliu.

• O a aafiaga a Peresitene Iosefa F. Samita ma mea na tutupu i le lalolagi na matuai fetaui tonu [ma le maua mai] o lenei faaaliga vaaia? (Faamalosiau i tagata aoga e tusi i luga mea na latou aoaoina mai i le vaega 2 o anomea mo sauniuniga.)

Faamanatu atu i tagata aoga, o le taimi ao mafaufau loloto Peresitene Samita i le taulaga togiola a Iesu Keriso ma aoaoga a le Aposetolo o Peteru e faatatau i le asiasiga a le Faaola i le lalolagi o agaga, na ia maua ai lana faaaliga vaaia (tagai Mataupu Faavae ma Feagaiga 138:1–11). Valaaulia tagata aoga e faitau filemu le Mataupu Faavae ma Feagaiga 138:28–34, 57 ma vaavaai mo mea na fai e le Faaola i le taimi o Lana asiasiga puupuu i le lalolagi o agaga ma le aafiaga na faia ai.

• E mafai faapefea e upumoni o loo i lenei fuaitau o le mau ona fesoasoani ia tatou malamalama lelei i le fuafuaga a le Tama Faalelagi mo Ana fanau?

Faailoa atu le fasifuaitau o le “sui papatisoga” (fuaiupu 33). Faamalamalama atu, o le sui o lona uiga o le galue o se suimomo’e mo se isi tagata.

Valaaulia se tagata aoga e faitau leotele le saunoaga a Elder D. Todd Christofferson o loo maua i le vaega 3 o anomea mo sauniuniga. Fai i le vasega e vaavaai mo mea na aoao mai e Elder Christofferson e uiga i galuega faaola sui tatou te faia i totonu o le malumalu mo tagata o o tatou aiga ua maliliu.

• E faapefea ona e aoteleina se mataupu faavae e mafai ona tatou aoao mai i aoaoga a Elder Christofferson? (Atonu e faailoa mai e tagata aoga se upumoni e talitutusa ma lenei: Tatou te molimau e uiga ia Iesu Keriso ma Lana Togiola a o tatou auai i le galuega e fesoasoani e faaola ai tagata o o tatou aiga ua maliliu.)

• E faapefea ona avea le auai i le galuega e faaola ai o tatou aiga ua maliliu, o se faailoaga o le tatou molimau ia Iesu Keriso ma Lana Togiola?

• O a ni auala e fesoasoani ai le auai i talafaasolopito o aiga ma auaunaga i le malumalu, ia tatou avea atili ai e pei o le Faaola?

Ua folafola mai e perofeta a le Alii ni faamanuiaga mamana ia i latou o e fesoasoani e faaola e ua maliliu.

Tusi le mataupu faavae e le’i mae’a lenei i luga o le laupapa: Pe a ou auai i talafaasolopito o aiga ma auaunaga i le malumalu …

Faaali le vitio “The Promised Blessings of Family History” (3:22). Valaaulia tagata aoga e faalogologo mo faamanuiaga ua faatalitali mai mo i latou o e faia talafaasolopito o aiga ma auaunaga i le malumalu. Mafaufau e tusi ia faamanuiaga e faailoa mai e tagata aoga i lalo o le faamatalaga o loo i luga o le laupapa.

• O le fea o faamanuiaga folafolaina e tulaga ese ia te oe ma aisea?

• O a nisi o auala ua tou auai ai ma lou aiga i talafaasolopito o aiga ma auaunaga i le malumalu? O a ni faamanuiaga ua e mauaina mo le faia o na mea?

Atonu e te valaaulia ni tagata aoga e mafaufau i se tasi e mafai ona latou fai i ai e avea ma faufautua ia i latou i le faia o talafaasolopito o aiga. Afai ua i ai nisi o tagata aoga ua i ai tomai i le faiga o talafaasolopito o aiga, valaaulia i latou e avea ma se faufautua i se isi tagata o le vasega. Afai e lava le taimi, atonu foi e te faaali atu i tagata aoga le upega tafailagi o le talafaasolopito o aiga i le ChurchofJesusChrist.org/family-history ma uunaia i latou e vaavaai solo i le saite lenei mo ni manatu faaopoopo i ni auala ia aafia atili ai i talafaasolopito o aiga.

FAALELEIA O LO TATOU AOAO ATU MA LE AOAOINA

Faatino uunaiga faaleagaga. Afai e aoaoina se aoaoga faavae po o se mataupu faavae o le talalelei ae le faaaogaina, e le o atoatoa le aoaoina. Tatou te faaaoga aoaoga o le talalelei pe a tatou talia se upumoni i o tatou loto ona galue lea e tusa ai ma lena upumoni. Valaaulia tagata aoga e faatino uunaiga faaleagaga latou te maua e faaaoga ai upumoni o le talalelei latou te aoaoina.

Faasoa atu le saunoaga lenei a Peresitene Russell M. Nelson:

Ou te valaaulia outou ina ia mafaufau ma le agaga tatalo po o le a le ituaiga ositaulaga, ma e talosia o se ositaulaga o le taimi, e mafai ona e faia ina ia faia ai nisi galuega o talafaasolopito ma galuega o le malumalu i lenei tausaga. (Russell M. Nelson, RootsTech Family Discovery Day—Opening Session 2017, ChurchofJesusChrist.org)

Faaiu i le valaaulia o tagata aoga e mafaufau loloto ma le agaga tatalo ona tusi lea i lalo o ni ositaulaga maoti o le a latou faia po o ni laasaga maoti o le a latou uia e auai atoatoa atili ai i le talafaasolopito o aiga ma auaunaga i le malumalu.

Mo Le Isi Taimi

Faaali atu se ata o se malumalu. Faamalamalama atu, talu mai taimi anamua, ua poloaiina e le Alii Lona nuu e fau malumalu. Ua aoao mai e perofeta o aso e gata ai e faapea, o faamanuiaga aupito silisili o le talalelei o loo maua i totonu o malumalu o le Alii. Valaaulia tagata aoga e suesue i anomea mo sauniuniga mo le lesona e sosoo ai ma ia o mai saunia e talanoa pe o faapefea ona faamanuia i tatou e le Alii e ala mai i sauniga o le malumalu ma le tapuai i le malumalu.