Lesona 13 Anomea a le Faiaoga

O Tulafono a le Atua

Ua toe faaali mai e le Alii Ana tulafono ma poloaiga i lenei tisipenisione e ala mai ia Iosefa Samita ma isi perofeta na sosoo ai. O le lesona lenei o le a saunia ai tagata aoga e faamalamalama atu faamoemoega e faavavau a le Atua mo le tuuina mai o poloaiga i Ana fanau. O le a valaaulia foi tagata aoga e iloilo po o a mea e mafai ona latou faia ia atili tausia faamaoni ai poloaiga a le Alii.

Fautuaga mo le Aoaoina Atu

Ua tuuina mai e le Alii ia i tatou ia tulafono ma poloaiga mo lo tatou faaolataga.

Faaali atu i tagata aoga le vitio “Why Does God Give Us Commandments?” (0:39), ma fai atu ia i latou e vaavaai mo le mea o loo faaalia mai ai e uiga i le ala e ono manatu ai isi tagata i poloaiga a le Atua.

• O faapefea ona faaalia i lenei vitio ni uiga faaalia o ono i ai i nisi o le autalavou matutua e faatatau i tulafono ma poloaiga a le Atua?

• O a ni mea atonu e le o malamalama ai nisi o tagata o e manatu o tulafono a le Atua o ni faasāsāaga?

Faamalamalama atu, o loo i ai ni faamoemoega e sili atu le taua mo tulafono a le Atua nai lo na’o le puipuiga faaletino po o le tofotofoina faaletino. I Ana faaaliga i le Perofeta o Iosefa Samita, na aoao mai ai e le Alii le Au Paia i nisi o mafuaaga maualuluga atu ua tuuina mai ai e le Atua tulafono ma poloaiga i Lana fanau. Tofi le afa o le vasega e faitau filemu le Mataupu Faavae ma Feagaiga 93:19–20 ae o le isi afa e faitau filemu le Mataupu Faavae ma Feagaiga 130:20–21 . Fai atu i tagata aoga e vaavaai mo folafolaga a le Alii ia i latou o e tausia tulafono ma poloaiga a le Atua. Tuu atu i tagata aoga e lipoti mai mea na latou maua.

Faailoa atu, o le “atoatoa” o loo faatatau i ai le Mataupu Faavae ma Feagaiga 93:19–20 o le folafolaga o le ola e faavavau—ia ulu atu i le afioaga o le Atua ma ia avea e pei o le Tama ma le Alo (tagai Mataupu Faavae ma Feagaiga 76:94).

• O le a faapefea ona e aoteleina se upumoni mai nei mau fuaitau e uiga i le pogai ua tuuina mai ai e le Tama Faalelagi poloaiga i Lana fanau? (I le faaaogaina o upu a tagata aoga, tusi i luga o le laupapa pe faaali atu se faamatalaga o se aoaoga faavae e talitutusa i lenei: E tuuina mai e le Tama Faalelagi poloaiga i Lana fanau ina ia mafai ona Ia faamanuia i latou ma fesoasoani ia latou avea e pei o Ia.)

Ina ia faaloloto le malamalama o tagata aoga i lenei upumoni, faaali atu le saunoaga lenei a Elder Dale G. Renlund o le Korama a Aposetolo e Toasefululua, ma valaaulia se tagata aoga e faitau leotele:

O le fuafuaga a le Atua e aofia ai faatonuga mo i tatou, o loo faatatau i ai tusitusiga paia o ni poloaiga. O nei poloaiga e le o ni tulafono e faafiafia ai pe o se faaputuga o faasalaga o tulafono ua faamalosia mai ia ua faamoemoe e na o le aoaoina ai o i tatou ia usiusitai. Latou te fesootai ma lo tatou atiinaeina o uiga paia faaleatua, toe foi atu i lo tatou Tama Faalelagi, ma le mauaina o le olioli tumau. (“Ina Filifili Ia Outou i le Aso Nei,” Ensign po o le Liahona, Nov. 2018, 105)

• E faapefea ona avea poloaiga o se faailoaga o le alolofa o lo tatou Tama Faalelagi ma le Faaola mo i tatou?

• O le a se eseesega e mafai ona faia ai i o tatou olaga i le vaai atu i poloaiga o ni faatonuga alofa o le a fesoasoani tatou te maua ai uiga paia o le faaleatua ma maua ai le olioli?

E tuuina mai e le Alii Ana tulafono i le Au Paia.

Faamanatu atu i tagata aoga, e le’i leva ona siitia atu le Perofeta o Iosefa Samita i Katelani, Ohaio, ae ona maua se faaaliga o loo i ai le tulafono a le Alii mo Lana Ekalesia (tagai Mataupu Faavae ma Feagaiga 42). I tausaga sa sosoo ai, sa aoao mai ai e le Alii le Au Paia i isi Ana tulafono.

• O a nisi o tulafono ma poloaiga anamua ua toe faamausaliina mai e le Alii i lo tatou tisipenisione?

Faamanatu i tagata aoga e uiga i le tofiga na tuuina atu ia i latou i anomea mo sauniuniga. Tuu atu i tagata aoga ni nai minute e toe faamanatu ai le tulafono po o tulafono na latou suesueina. Valaaulia tagata aoga o e atonu na suesueina se tasi o tulafono na otooto atu i anomea mo sauniuniga ina ia fai loa i le taimi lenei.

FAALELEIA O LO TATOU AOAO ATU MA LE AOAOINA

O talanoaga i vaega toalaiti ma tofiga e mafai ona fesoasoani i tagata aoga e faaloloto atili ai le aoao. O le vaevae o le vasega i ni paga po o ni vaega toalaiti e mafai ai e nisi o tagata aoga ona faailoa atu o latou mafaufauga ma lagona ma aoao e le tasi le isi. Ina ia fesoasoani i tagata aoga ia maua faatasi se aafiaga anoa, ia mautinoa latou te malamalama i le faamoemoega ma le talafeagai o mea o loo latou talanoaina ae latou te le’i amata. Atonu foi e te tofia se taitai o le talanoaga pe filifili se tagata aoga e toatasi e faasoa muamua.

A mavae loa se taimi talafeagai, vaevae le vasega i ni vaega toalaiti (toalua i le toalima tagata aoga i le vaega) e tusa ai ma le tulafono na latou filifilia e suesue i ai. Mo se faataitaiga, o tagata aoga e toalua i le toalima o e na filifili e suesuea le tulafono o le faapaiaga o le a maua ai se vaega. Atonu o le a manaomia nisi vaega e talanoaina le tulafono lava e tasi pe afai e sili atu i le toalima tagata aoga na filifili e suesue le tulafono lava e tasi. (Afai e toalaiti lau vasega pe afai foi na’o le toatasi se tagata aoga na filifili e suesue se tulafono faapitoa, ona fetuunai lea o le gaoioiga lenei e faafetaui ma manaoga o lau vasega. Mo se faataitaiga, atonu e te valaaulia le tagata aoga e toatasi e faasoa mai le mea sa ia aoaoina ia te oe, pe faatasi ma se vaega o e na suesueina se autu ese.)

Fai atu i tagata aoga e filifili se sui se toatasi o le vaega e fai ma o latou taitai. Tuu atu i taitai o vaega taitasi se kopi o le tufaaga o loo avatu faatasi ai’ O Tulafono a le Atua.”

O Tulafono a le Atua

Faatonuga mo le taitai o le vaega: Faamolemole taitai lau vaega i se talanoaga anoa e uiga i fesili nei. Ia mautinoa ia aofia ai sui taitoatasi o le vaega i tou talanoaga.

1. O le a se upumoni po o ni upumoni na e aoaoina mai au suesuega?

2. O a ni luitau e o faatasi ma le usitaia o lenei tulafono i aso nei, ma e ono mafai faapefea ona foia i latou?

3. O a ni faamanuiaga ua maua e oe po o lou aiga i le tausia o lenei tulafono?

4. E mafai faapefea e le usitaia o lenei tulafono ona fesoasoani ia te oe ia avea atili ai e pei o lou Tama Faalelagi?

A o faaiuina, faailoa atu se tagata o le a faasoa mai i le vasega ni nai vaega ua faatauaina mai le talanoaga a le tou vaega.

O Tulafono a le Atua

Tuu atu i vaega ni minute se 10, pe ia lava se taimi e faia ai se talanoaga anoa. A ua lava loa le taimi, valaaulia sui mai vaega taitasi e faasoa mai i le vasega atoa ni nai mea ua faatauaina mai a latou talanoaga. Mafaufau e faamalosiau i sui taitoatasi e faasoa mai pe mafai faapefea e le usitaia o le tulafono sa ia suesueina ona fesoasoani ia tatou avea atili ai e pei o lo tatou Tama Faalelagi.

Faasoa atu lau molimau ma aafiaga o le ala ua faamanuiaina ai lou olaga e tulafono ma poloaiga a le Atua, ma fesoasoani ia te oe ia avea atili ai e pei o le Tama Faalelagi.

Faaali atu fesili nei. Tuu atu i tagata aoga se taimi e mafaufau loloto ai i fesili, tusi i lalo o latou lagona, ma faailoa mai ni faatinoga na latou lagona le musuia e fai. Uunaia tagata aoga e saili ma le agaga tatalo le fesoasoani ma le taitaiga a le Tama Faalelagi e faatino ai uunaiga latou te mauaina. Atonu foi e te valaaulia i latou e fuafua se taimi e tulitatao ai mea ua latou tautino e fai.

• O le fea o poloaiga a le Atua na talanoaina i le asō e mafai ona ou faamaoni atili e tausi?

• O le a tonu le mea e tatau ona ou suia, amata ona fai, pe taofi le faiga ina ia atili atoatoa ai le tausiga o lenei poloaiga?

• O a ni faamanuiaga, uiga paia o le faaleatua, ma le olioli o le a oo mai i lo’u olaga e ala i le mulimuli tonu ma le faamaoni tele i lenei poloaiga?

Mo Le Isi Taimi

Faamalamalama atu, o se tasi o talitonuga tulaga ese o Le Ekalesia a Iesu Keriso o le Au Paia o Aso e Gata Ai o le, o loo faaauau pea ona taiala e le Atua Ana fanau e ala i le tuuina mai o tusitusiga paia faaopoopo. Valaaulia tagata aoga e suesue i anomea mo sauniuniga mo le lesona e sosoo ai ma ia o mai saunia e talanoa pe o faapefea ona faamanino ma faaloloto e tusitusiga paia faaopoopo lo tatou malamalamaaga o le talalelei a le Faaola.