Lesona 12 Anomea a le Faiaoga

Faatuina o le Faamoemoe o Siona

Ina ua uma ona poloaiina e le Alii e faavae le faamoemoe o Siona, na amata loa e le Au Paia ona fausia se nofoaga e faapotopoto i ai i le Itumalo o Siakisone, Misuri. O lenei lesona ua fuafuaina e fesoasoani i tagata aoga e faailoa ai auala e mafai ona latou fesoasoani e atiina ae ai Siona i o tatou aso.

Fautuaga mo le Aoaoina Atu

Ua poloai mai le Alii i Lona nuu e faavae le faamoemoe o Siona.

Fai atu i tagata aoga e mafaufau pe e fia ni taimi na latou tatalo ai i le Tama Faalelagi ma ole atu mo se fesoasoani ina ia iloa po o le a se mea ua finagalo o Ia latou te faia i o latou olaga.

Faamalamalama atu, i le tautotogo o le 1829, e ui lava ina sa le’i faatulagaina le Ekalesia i lea taimi, ae na maua e Iosefa Samita ni faaaliga e fai ai ma sui o Oliva Kaotui, Ailama Samita, ma Iosefa Knight. Sa mananao nei alii taitoatasi ia iloa po o le a se mea ua finagalo le Alii latou te faia. Tusi le mau faasino nei i luga o le laupapa: Mataupu Faavae ma Feagaiga 6:6; 11:6; 12:6.

Valaaulia tagata aoga e faitau filemu ia fuaiupu, ma vaavaai mo mea na ta’u atu e le Alii i nei alii taitoatasi.

• O le a lou manatu o le uiga o le “aumai i luma ma faatu le faamoemoe o Siona”? (Mataupu Faavae ma Feagaiga 6:6).

Valaaulia se tagata aoga e faitau leotele le saunoaga a Iosefa Samita i le vaega 1 o anomea mo sauniuniga. Pe e mafai foi ona e faaalia le vitio “Teachings of Joseph Smith: Preparing for Zion” (1:42). Fai atu i le vasega e vaavaai mo le mea na aoao mai e Iosefa Samita e uiga ia Siona.

• Aisea e te manatu ai, o Siona o le faamoemoe lea sa fiafia i ai tagata o le Atua i augatupulaga uma? (Valaaulia tagata aoga e mafaufau i mea na latou aoaoina i a latou anomea mo sauniuniga.)

Tusi le faamatalaga le mae’a lenei i luga o le laupapa: E mafai ona tatou atiina ae Siona e ala i le …

Faamalamalama atu e faapea, ia Novema ma Tesema o le 1830, a o galue Iosefa Samita i lana faaliliuga musuia o le Tusi Paia, sa ia maua ni faaaliga e uiga i le perofeta anamua o Enoka ma lona nuu. Valaaulia se tagata aoga se toatasi e faitau le Mose 7:18–19, 21 ae o le isi tagata aoga e faitau le Mataupu Faavae ma Feagaiga 97:21. Fai i le vasega e faalogologo mo faamatalaga a le Alii o Siona.

• O le a se mea o mafai ona tatou aoao mai i faamatalaga a le Alii o Siona e fesoasoani tatou te iloa ai le ala e atiina ae ai Siona i o tatou aso? (Lisi tali a tagata aoga i le laupapa i lalo o le fuaitau e le mae’a. O le a eseese tali a tagata aoga, ae e mafai ona aofia ai faataitaiga e pei o lenei: E mafai ona tatou atiina ae Siona e ala i le tasi o le loto ma le mafaufau, e ala i le ola amiotonu, e ala i le tausia o e matitiva ma e le tagolima, ma ia taumafai ia loto mama.)

• O le a se eseesega e mafai ona faia i totonu o se aiga, uarota, po o le paranesi pe a “tasi le loto ma tasi le mafaufau” o tagata uma?

Valaaulia tagata aoga e toe iloilo le saunoaga lenei a Elder D. Todd Christofferson o le Korama Aposetolo e Toasefululua i le vaega 1 o anomea mo sauniuniga. Fai i tagata aoga e vaavaai pe mafai faapefea ona tasi o tatou loto ma tasi le mafaufau. A uma ona latou lipoti mai, e te ono faaopoopo atu i ai o le tuu o le Faaola i le ogatotonu o o tatou olaga ma le mulimuli i taitai o le Ekalesia i le lisi o loo i luga o le laupapa.

• O le a sou manatu, e mafai faapefea ona fesoasoani le tuu o le Faaola i le ogatotonu o o tatou olaga ma le mulimuli i taitai o le Ekalesia, ia tatou avea ai ia pei o le aai o Siona?

Sa taumafai le Au Paia e atiina ae le aai o Siona i le Itumalo o Siakisone, Misuri.

Faamalamalama atu e faapea, sa aoao e le Au Paia mai i le Mose 7 a o le’i oo i le Afio Mai Faalua o le Faaola, o le a toe faapotopoto faatasi ai le nuu o le Alii ma o le a fausia se isi aai o Siona (tagai Mose 7:62). O ni nai masina talu ona maua mai le faaaliga ua faamaumauina i le Mose 7, na maua ai e le Perofeta o Iosefa Samita le isi faaaliga i le taimi o se konafesi a le Ekalesia, na faapea ona faaali mai ai isi faatonuga e faatatau i lenei aai o Siona i le lumanai (tagai Mataupu Faavae ma Feagaiga 45).

Valaaulia le vasega e faitau faatasi le Mataupu Faavae ma Feagaiga 45:66-71 ma vaavaai mo faamatalaga o le aai o Siona.

• O le a se aafiaga e te manatu na faia e lenei faaaliga i luga o le Au Paia anamua?

Faamanatu atu i tagata aoga, sa iloa mulimuli ane e Iosefa Samita e ala i le faaaliga, “o le nofoaga tutotonu” mo le aai o Siona e tatau ona i ai i Initipene, Itumalo o Siakisone, Misuri (Mataupu Faavae ma Feagaiga 57:3).

• O a ni luitau na taofia ai le Au Paia mai le atiaeina o le aai o Siona i le Itumalo o Siakisone? (Faamalosiau i tagata aoga e mafaufau i mea na latou aoaoina mai le vaega 2 o anomea mo sauniuniga.)

• O a ni fesili atonu na fesili ai le Au Paia ina ua mavae le tutulieseina o i latou mai le Itumalo o Siakisone?

E na’o luga lava o mataupu faavae o le amiotonu e mafai ona atiina ae ai Siona.

Faamalamalama atu e faapea, i masina na sosoo ma le faateaga sauaina o le Au Paia mai le Itumalo o Siakisone e tagata faatupu vevesi o Misuri, sa tauivi Iosefa Samita ma fesili pe “aisea na faataga ai e le Atua lenei mala tele e oo mai i luga o Siona” ma “po o le a le ala o le a ia toe faafoi atu ai [Siona] i [lona] tofi” (“Letter to Edward Partridge and Others, 10 December 1833,” josephsmithpapers.org). Sa iu ina tuuina mai e le Alii ia Iosefa se malamalamaaga loloto i le pogai na sauaina ma faateaeseina ai le Au Paia.

Valaaulia le afa o le vasega e toe iloilo le Mataupu Faavae ma Feagaiga 101:2–3, 6–8 ae o le isi afa e iloiloina le Mataupu Faavae ma Feagaiga 105:3–6, o fuaitau nei sa latou suesueina i le vaega 3 o anomea mo sauniuniga. Fai atu i tagata aoga e faasoa mai o latou manatu e uiga i fesili nei sa valaaulia i latou e mafaufau loloto i ai:

• O le a le mea na taofia ai le Au Paia mai le faatuina o le faamoemoe o Siona i le Itumalo o Siakisone, Misuri?

• O a amioga ma uiga faaalia e manaomia e le Atua mai ia i latou i aso e gata ai o ē mananao e atiina ae Siona? (Faaopoopo tali a tagata aoga i le lisi o loo i luga o le laupapa i lalo o le fuaitau E mafai ona tatou atiina ae Siona e ala i le …)

Faamalamalama atu faapea, e ui o Initipene, Misuri o le “nofoaga tutotonu” o Siona (Mataupu Faavae ma Feagaiga 57:3), na aoao mai le Perofeta o Iosefa Samita e faapea, “o soo se nofoaga lava e faapotopoto ai le Au Paia o Siona lea” (Aoaoga a Peresitene o le Ekalesia: Iosefa Samita [2007], 186). O aso nei, o lenei mea e aofia ai siteki uma o le Ekalesia i le lalolagi atoa.

Faaali atu le upusii lenei mai ia Iosefa Samita:

“E tatau ona avea le atiina ae o Siona ma o tatou faamoemoe sili” (Teachings: Joseph Smith, 186).

• E faavae i mea sa outou aoaoina e uiga ia Siona, aisea e te manatu ai o le atiina ae o Siona e tatau ona avea ma se tasi o a tatou faamoemoega silisili?

Tuu atu i tagata aoga se taimi e toe iloilo ai mea sa latou aoaoina mai aafiaga o le Au Paia anamua ma faaaliga e uiga i le atiina ae o Siona. Valaaulia i latou e mafaufau loloto i mea e mafai ona latou faia i le taimi nei e fesoasoani e atiina ae ai Siona i o latou aiga, uarota, ma paranesi. Atonu e te uunaia i latou e tusi faamaumau mafaufauga ma lagona uunai latou te maua. Atonu foi e te fai atu i nisi o tagata aoga e faasoa mai ni mea o le a latou faia. Faamanatu i ai e aua nei faasoa maia ni mea e patino a’ia’i.

Mo Le Isi Taimi

Faamalamalama atu faapea, ina ia fesoasoani i Lana Au Paia e atiina ae Siona, na faaali mai ai e le Alii ni tulafono o le faapaiaga, ola mama, soifua maloloina ma le Sapati, faatasi ai ma isi. Faamamafa atu, o le a maua e tagata aoga le avanoa e suesue ai se tasi pe sili atu o nei autu a o latou sauniuni mo le isi vasega e sosoo ai. Faamalosiau ia i latou ia o mai i le vasega i le isi taimi e sosoo ai ua saunia e faasoa mai se mea tulaga ese na latou tau i ai e uiga i se tulafono se tasi pe sili atu.