“Lesona 19 Anomea mo le Sauniuniga o le Vasega: Faaolataga o e ua Maliliu,” Anomea a le Faiaoga O Faavae o le Toefuataiga (2019)
“Lesona 19 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 19 Anomea mo le Sauniuniga o le Vasega
Faaolataga o e ua Maliliu
Mafaufau i se taimi na faia ai e se tagata se mea mo oe lea e le mafai ona e faia na’o oe. O le a sou lagona na i ai i lenei tagata? A o e suesue, mafaufau pe o a ni manatu o tagata o lou aiga ua maliliu e ono i ai ia te oe pe a e faia mo i latou mea e le mafai ona latou faia mo i latou lava—faia sauniga e tatau ai mo lo latou faaolataga.
Vaega 1
O le a le mea e tupu ia i latou o e maliliu e aunoa ma se malamalama e uiga i le talalelei?
Faamatalaga: Nai lo o le faitau o le vaega muamua lenei o le lesona lenei e mafai ona e filifili e matamata le vitio lenei ona mafaufau loloto lea i fesili i le faaiuga o le vaega.
I le 17 o tausaga, sa nutimomoia ai le loto o Iosefa Samita i le maliu faafuasei o lona uso matua o Alavini, o le sa ia matuai alofa ma faamemelo i ai. Na talosagaina e le aiga o Samita “se faifeau Peresipeteriane i Palamaira, Niu Ioka, na te taitaia lona falelauasiga. Talu ai o Alavini e lei avea ma se tasi o le aulotu a le faifeau, na ta’u mai ai e le faifeau i lana lauga o Alavini e le mafai ona faaolaina. Na ta’ua e Viliamu Samita, le uso laitiiti o Iosefa: ‘Na matua ta’u mai ma le malosi e [le faifeau] … o [Alavini] ua alu i seoli’” ona sa le’i papatisoina Alavini (Aoaoga a Peresitene o le Ekalesia: Iosefa Samita [2007], 401).
O le tali a le faifeau i le maliu o Alavini atonu na fai si faalealofa. Ae peitai, o lana aoaoga sa faavae i luga o le upumoni e faapea, e ao i tagata uma ona talia Keriso ma ia papatisoina ina ia faaolaina (tagai Ioane 3:5).
Ia Ianuari 1836, e silia ma le 12 tausaga talu ona mavae le maliu o Alavini, sa faapotopoto ai le Perofeta o Iosefa Samita ma lona tama ma isi taitai o le Ekalesia i se afeafe i luga o le Malumalu o Katelani na toeitiiti mae’a. I le taimi o le fonotaga, na maua ai e le Perofeta o Iosefa Samita se faaaliga vaaia e uiga i le lumanai, lea ua tusia nei i le Mataupu Faavae ma Feagaiga 137.
Suesue e Sauniuni ai mo le Vasega
Faitau le Mataupu Faavae ma Feagaiga 137:1, 5–8.
Sa “ofo” Iosefa i le vaaia o lona uso o Alavini i le malo selesitila ona sa le’i papatisoina Alavini. I le fa tausaga mulimuli ane, ia Aokuso 1840, sa amata ai ona aoao e le Perofeta le Au Paia i le aoaoga faavae o le papatisoga mo e ua maliliu. Sa aoao mai e le Aposetolo o Paulo lenei aoaoga faavae i le Feagaiga Fou a’o le’i toefuataiina mai e le Alii i o tatou aso (tagai 1 Korinito 15:29).
I se tusi i lona toalua, sa tusi ai Vilate Kimball e uiga i le fiafia o le Au Paia i lenei aoaoga faavae fou ua toefuataiina mai:
Ua tatala mai e Peresitene Samita se mataupu fou ofoofogia. … Na ia fai mai o se faamanuiaga lea mo lenei ekalesia le papatisoina mo tagata uma o o latou aiga o e na maliliu a o lei oo mai lenei talalelei. … I le faia o lea mea, ua avea ai tatou ma o latou sui, ma tuu atu ia i latou le avanoa e o mai ai i le uluai toetutu. Fai mai o ia o le a talaiina atu le Talalelei ia i latou i le Falepuipui. … Talu lava ona talaia mai lenei avea’i iinei, ua faaauau ai lava ona gaepuina le vai. I le taimi o le konafesi, sa i ai i nisi o taimi se toavalu i le toasefulu ia toeaiina i totonu o le vai i le taimi e tasi i le faia o papatisoga. … Pe le o se aoaoga faavae ofoofogia ea lenei? (Vilate Kimball, i le Janiece Johnson and Jennifer Reeder, The Witness of Women: Firsthand Experiences and Testimonies from the Restoration [2016], 181)
E le masalomia lava sa lagona e le aiga o Samita le olioli tele ina ua papatisoina Ailama mo lona uso o Alavini.
Mafaufau Loloto a o Sauniuni mo le Vasega
O le a le mea e te manatu na avea ai le faaolaina o e ua maliliu “o se aoaoga faavae ofoofogia”? O a mea ua aoao mai e lenei aoaoga faavae ia te oe e faatatau i uiga ma finagalo o le Tama Faalelagi ma Lona Alo o Iesu Keriso?
O le tausaga na sosoo ai, i le 1841, na tautino mai ai e le Alii e faapea, “o lenei sauniga e ā loʼu fale” ma ina ua saunia le faatanoa o le malumalu, sa tatau loa i le Au Paia ona taofi le faia o papatisoga mo e ua maliliu i le vaitafe (tagai Mataupu Faavae ma Feagaiga 124:29–34). Sa tuuina mai e Iosefa Samita nisi faatonuga e uiga i le faaolataga o e ua maliliu i ni tusi se lua sa ia tusia i le Au Paia a o lafilafi o ia ona o tuuaiga pepelo. O anotusi o nei tusi ua maua nei i le Mataupu Faavae ma Feagaiga 127 ma le 128. Na aoao mai le Perofeta, seiiloga e faatinoina se sauniga o le talalelei, e pei o le papatisoga mo e ua maliliu, e ala i le pule o le perisitua ma tausia se faamaumauga lelei, ona fusifusia lea o le sauniga i le lalolagi ma i le lagi (tagai Mataupu Faavae ma Feagaiga 127:5–7; 128:1–9).
Vaega 2
O le a le mea na faaalia atili mai e le Alii e uiga i le faaolataga o e ua maliliu i le faaaliga vaaia sa ia tuuina mai ia Peresitene Iosefa F. Samita?
Ina ua maliu le Perofeta o Iosefa Samita, sa faaauau ona faaali mai e le Alii upumoni e uiga i Lana fuafuaga e faaola ai e ua maliliu i “lea fasifuaitau ma lea fasifuaitau” (Mataupu Faavae ma Feagaiga 98:12). I le 1918, na maua ai e Peresitene Iosefa F. Samita se faaaliga vaaia na faaali mai ai nisi upumoni e uiga i le faaolaina o e ua maliliu. O lenei faaaliga vaaia o loo tusia i le Mataupu Faavae ma Feagaiga 138.
Na faamalamalama mai e Peresitene M. Russell Ballard o le Korama a Aposetolo e Toasefululua, le ala na saunia ai Peresitene Iosefa F. Samita e maua lenei faaaliga vaaia matagofie:
I lona soifuaga atoa, na maliu le tamā o Peresitene Samita [i le 5 o ona tausaga], lona tina [i le 13 o ona tausaga], tasi le uso, lua tuafafine, lua avā, ma le fanau e toa sefulutolu. Sa masani lelei o ia ma faanoanoaga ma le maliliu o ē pele. …
[O le tausaga 1918] sa matua patino le tiga mo ia. Sa lotofaavauvau o ia i le maliliu o le anoano i le Taua Tele a le Lalolagi lea na faaauau ona oo atu i le silia ma le 20 miliona tagata na fasiotia ai. Ma le isi, sa pepesi foi le faama’i o le fulū i le lalolagi atoa na ma’umau ai ola o le toatele pe 100 miliona tagata.
I le gasologa o le tausaga, sa maliliu ai foi isi tagata faapelepele … e toatolu o le aiga. O Elder Ailama Maki Samita o le Korama a Aposetolo e Toasefululua, o lona atalii ulumatua lea ma o lo’u tamamatua lea, sa maliu faafuasei ona ua afaina le pitogaau.
Sa tusia e Peresitene Samita: “Ua ou lē magagana—[gūgū] i le lotofaavauvau! … Ua nutimomoia lo’u fatu; ma tau manuō ai i le fiaola! … E! Ou te alofa ia te Ia! … Mai le ta’ele o lo’u agaga ou te faafetai ai i le Atua mo ia! Ae … Oka! Sa ou manaomia o ia! Tatou te manaomia uma o ia! Sa sili ona aogā o ia i le Ekalesia. … Ae o lenei … E! o le a se mea e mafai ona ou faia! … E! Le Atua e, fesoasoani mai ia te a’u! …”
Ma o lea la, i le aso 3 o Oketopa, 1918, i le lagonaina ai o le faanoanoa tele i le faitau miliona na maliliu i le lalolagi e ala i taua ma faama’i faapea ai foi ma le maliliu o tagata o lona lava aiga, sa maua ai e Peresitene Samita le faaaliga faalelagi ua lauiloa “o le faaaliga o le togiolaina o ē ua maliliu.” (M. Russell Ballard, “O Le Faaaliga Vaaia o le Faaolaina o e Ua Maliliu,” Ensign po o le Liahona, Nov. 2018, 72)
Sa maua e Iosefa F. Samita lana faaaliga vaaia paia ao mafaufau loloto i le taulaga togiola a le Faaola ma le faitauina o le faamatalaga a le Aposetolo o Peteru o le galuega a Iesu i le lalolagi o agaga ina ua mavae Lona Faasatauroga (tagai Mataupu Faavae ma Feagaiga 138:1–11).
O Peresitene Iosefa F. Samita ma lona atalii o Ailama ma le atalii o lona atalii o Iosefa.
Suesue e Sauniuni ai mo le Vasega
Faitau le Mataupu Faavae ma Feagaiga 138:30, 33–34, 57, ma vaavaai e makaina po o le a le mea na aoao atu e Iesu ia Peresitene Samita pe faapefea ona folafola atu le talalelei i le lalolagi o agaga.
I se isi tulaga, na aoao mai Peresitene Samita o tamaitai faamaoni e valaauina foi e talai le talalelei i le lalolagi o agaga (tagai Gospel Doctrine, 5th ed. [1939], 461).
Vaega 3
E mafai faapefea e le auai i le galuega e faaola ai e ua maliliu ona fesoasoani ou te latalata atili atu ai i le Faaola?
Na aoao mai Elder D. Todd Christofferson o le Korama a Aposetolo e Toasefululua:
Na faailoa mai e Peresitene Gordon B. Hinckley: “Ou te manatu o le galuega sui mo e ua maliliu ua toeitiiti lava latalata atu i le taulaga sui a le Faaola Lava Ia nai lo o se isi lava galuega ua ou iloa. …” [“Excerpts from Recent Addresses of President Gordon B. Hinckley,” Ensign, Jan. 1998, 73]
O lo tatou naunau ina ia faaolaina e ua maliliu faapea ma le taimi ma punaoa o loo tatou faaaogaina mo lena tautinoga, i mea uma, o se faaalia o a tatou molimau e uiga ia Iesu Keriso. E faaalia ai se faamatalaga e sili ona mamana e mafai ona tatou faia e uiga i Lona tagata ma Lana misiona paia. …
O le sailia o o tatou augatuaa ma faia mo i latou o sauniga faaola ia latou te le mafai ona faia mo i latou lava, tatou te molimauina ai e le gata le Togiola a Iesu Keriso. (D. Todd Christofferson, “O Le Togiolaina o E Oti ma le Molimau ia Iesu,” Ensign, Nov. 2000, 10)
Mafaufau Loloto ma Soalaupule a o Sauniuni mo le Vasega
E faapefea e le auai i le galuega e faaola ai e ua maliliu ona avea o se faailoaga o lau molimau ia Iesu Keriso ma Lana Togiola?
Afai e te mafaia, fai i se tagata o le aiga po o se uo e faasoa atu lona aafiaga i le faiga o talafaasolopito o aiga. Fai atu i ai ni fesili i le auala e amata ai pe faapefea ona e faia ma le mataalia talafaasolopito o aiga. Sau sauni i le vasega e faasoa mai ni mea sa e aoaoina.