Lesona 20 Anomea mo le Sauniuniga o le Vasega: O Sauniga o le Malumalu ma Tapuaiga
“Lesona 20 Anomea mo le Sauniuniga o le Vasega: O Sauniga o le Malumalu ma Tapuaiga,” Anomea a le Faiaoga O Faavae o le Toefuataiga (2019)
“Lesona 20 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Ata
tamaitai i luma o le malumalu
Lesona 20 Anomea mo le Sauniuniga o le Vasega
O Sauniga o le Malumalu ma Tapuaiga
Sa aoao mai Peresitene Thomas S. Monson, “O i tatou o ni tagata fau malumalu ma ni tagata e o i malumalu” (“Susu Maia i le Konafesi,” Ensign po o le Liahona, Me 2014, 5). Ao e suesue i lenei anomea, mafaufau pe aisea e avea ai sauniga o le malumalu o se vaega taua o le Toefuataiga o le talalelei a Iesu Keriso i aso e gata ai. Filifili po o le a se mea e mafai ona e faia e avea ai le tapuai i le malumalu ma se vaega taua o lou lava olaga.
Vaega 1
E mafai faapefea ona faamanuiaina lo’u olaga i le tapuai i le malumalu?
I le 2019, na faasoa mai ai le Au Peresitene Sili:
Soo se taimi lava e i ai tagata o le Alii i luga o le fogaeleele o e o le a usitai i Lana afioga, ua poloaiina i latou e fausia malumalu. O tusitusiga paia o mamanu o tapuaiga i le malumalu mai taimi o Atamu ma Eva, Mose, Solomona, Nifae, ma isi.
Faatasi ai ma le toefuataiga o le talalelei i nei aso e gata ai, ua toefuataiina ai foi tapuaiga i le malumalu e faamanuia ai olaga o tagata i le salafa o le lalolagi ma i le isi foi itu o le veli. … O se malumalu faapaiaina e sili ona paia i soo se nofoaga o tapuaiga i luga o le fogaeleele. (“Faamatalaga a le Au Peresitene Sili i Malumalu,” Jan. 2, 2019, newsroom.ChurchofJesusChrist.org)
O le uluai malumalu lava na fausia i lenei tisipenisione o le Malumalu o Katelani i le 1836. O le faapaiaina o lena malumalu na amataina ai se vaitau ofoofogia o faaaliga faaleagaga. Na lagona e le au faatuatua le Agaga Paia, ma o nisi sa tautatala i gagana eseese, sa i ai faaaliga vaaia, pe na vaai i agelu. O le mea na tupu i lenei taimi o le faaali atu lea o le Faaola ia Iosefa Samita ma Oliva Kaotui i le Malumalu o Katelani i se taimi puupuu talu ona faapaiaina. I lena taimi na fetalai mai ai le Faaola, “ua Ou talia lenei fale” (Mataupu Faavae ma Feagaiga 110:7).
Mafaufau i nisi o lagona na e maua pe e te manao foi e maua ao e ulu atu i le malumalu o le Alii.
I le aso 27 o Mati, 1836, na ofoina atu ai e Iosefa Samita se tatalo o le faapaiaga (o upu na ia mauaina e ala i faaaliga mai le Alii) mo le Malumalu i Katelani. O lenei tatalo o le faapaiaga o loo faamaumauina o le Mataupu Faavae ma Feagaiga 109. I lenei tatalo, na ole atu ai Iosefa i le Alii e tuuina atu ni faamanuiaga faapitoa ia i latou o e tapuai i le malumalu.
O Sister Jean A. Stevens, o le sa avea muamua ma Fesoasoani Muamua i le Au Peresitene Aoao o le Peraimeri, na saunoa mai e uiga i faamanuiaga tatou te maua i totonu o le malumalu:
Ata
Sister Jean A. Stevens
Afai e ao ona matou maua ia faamanuiaga uma ua tuuina mai ma le agaalofa e le Atua, e tatau ona taitai atu lo matou auala faalelalolagi i le malumalu. O malumalu o se faailoga lea o le alofa o le Atua. Ua Ia valaaulia i tatou uma ia o mai, aoao ia te Ia, lagona Lona alofa, ma maua sauniga talafeagai o le perisitua mo le ola e faavavau faatasi ma Ia. O feagaiga taitasi e osia taitasi. O suiga tetele uma o le loto e taua lea i le Alii. Ma o le suiga o lou lava loto o le a faia ai se eseesega atoa ia te oe. Aua ao tatou o atu i Lona maota paia, e mafai ona “faaauupegaina [i tatou] i [Lona] mana, … O [Lona] suafa … i luga o i [tatou], … O [Lona] mamalu … e siosiomia i [tatou], ma i ai i [Ana] agelu le tausiga i o [tatou] luga” [Mataupu Faavae ma Feagaiga 109:22].
… O Lona Alo Pele, o Iesu Keriso, ua faataunuu ai faamoemoega uma, folafolaga uma, ma faamanuiaga uma o le malumalu. (Jean A. Stevens, “Afafine o le Feagaiga a le Atua,” Ensign po o le Liahona, Nov. 2014, 117)
Ata
aikona, talanoa
Talanoa ma Isi
Fesili i se tagata o le aiga po o se uo poo a ni faamanuiaga patino na ia lagonaina i lona olaga e ala i le mauaina o sauniga o le malumalu ma auai i tapuaiga i le malumalu. O a ni auala na lagona ai e lenei tagata le alofa o le Atua e ala i le auai i le malumalu?
Vaega 2
Aisea ua poloaiina ai e le Alii Ona tagata ina ia fausia malumalu?
E oo lava i le taimi na poloaiina ai e le Alii le Au Paia e fausia se malumalu i Katelani, na faapaiaina e le Au Paia i Misuri se nofoaga e fausia ai se malumalu i Initipene, Misuri. Mulimuli ane, na latou faataatia maatulimanu mo se malumalu i Fa Uesi, Misuri. E le’i maea ona fausiaina nei maota e lua ona o le Au Paia na tuliesea mai o latou fale ma meatotino. I le konafesi ia Oketopa 1840, na taliaina ai e le Au Paia le valaau a le Perofeta e fausia se malumalu i Navu. Ma le isi, faatasi ai ma se agaga o le ositaulaga, na amata ona foai atu e le Au Paia galuega fai fua, tupe, ma isi risosi e fesoasoani i le fausiaina. Ia Ianuari 1841, na maua ai e Iosefa Samita se faaaliga lea na tuuina mai ai isi mafuaaga na mafua ai ona manaomia e le Alii lenei malumalu ina ia fausia. O lenei fautuaga o loʻo tusia i totonu o le Mataupu Faavae ma Feagaiga 124. Ao e suesue i fuaiupu nei, mafaufau i nisi o mafuaaga na poloaiina ai i tatou e le Alii e fausia malumalu i aso e gata ai.
I totonu o le malumalu, na maua ai e le Au Paia sauniga taua na faaalia mai e le Alii i le Perofeta, e aofia ai le sauniga o le faaeega paia.
I nei sauniga [malumalu] sa i ai se sauniga e taʻua o le faaeega paia, lea na faalauteleina i sauniga o le mulumuluga ma le faauuina, ia na tuuina atu e Iosefa i le Malumalu o Katelani i le 1836. O le fefe ai ne’i aveesea lona ola ao le i maea le malumalu, na valaauina ai e Iosefa Samita ni nai alii i le aso 3 o Me, 1842, e faatulaga le potu pito i luga o lona Faleoloa Piliki Mumu e fai ma sui o “totonu o se malumalu e tusa ai ma tulaga e ono faatagaina.” O le aso na sosoo ai, na faia ai e Iosefa le faaeega paia mo le taimi muamua i se vaega o alii e toaiva. (“Faaeega Paia o le Malumalu,” Church History Topics, ChurchofJesusChrist.org/study/church-history)
O lenei sauniga o le faaeega paia “na aoao mai ai upumoni faaeaina. E faatatau i tala faatusi paia o le Foafoaga ma le Faatoaga o Etena, … e taialaina alii mai lea laasaga i lea laasaga i le fuafuaga o le faaolataga. E pei o Aperaamo ma isi perofeta anamua, na latou maua le malamalama lena o le a mafai ai ona latou toe foi atu i le afioaga o le Atua. I le aluga o le ala, sa osia ai e alii ni feagaiga e ola amiotonu, ola mama ma tuu atu i latou lava e auauna atu i le Alii” (Au Paia: O Le Tala o le Ekalesia a Iesu Keriso o le Au Paia i Aso e Gata Ai, vol. 1, O Le Tagavai o le Upumoni, 1815–1846 [2018], 453).
I le aso [po o luma atu] o le aso 28 o Setema, 1843, na avea ai Ema Samita ma uluai tamaitai e mauaina le faaeega paia. O le folafolaga a Iosefa e faapea o tagata o le Aualofa o le a vaaia “faamanuiaga o le faaeega paia o agai i luma” na faamautuina ao amata ona fesoasoani Ema i le faatautaia o le sauniga i isi tamaitai. (Jill Mulvay Derr and others, eds., The First Fifty Years of Relief Society: Key Documents in Latter-day Saint Women’s History [2016], 10)
E ui ina sa valaaulia muamua e Iosefa ni nai tagata e auai i le faaeega paia, ae na ia fuafua manino e tatala sauniga o le malumalu lautele i le Au Paia o Aso e Gata Ai agavaa. … Na faamalamalama mai e Willard Richards, “E leai se mea na faailoa mai ia i [matou], ae o le a faailoa atu i le Au Paia uma i aso e gata ai, i le taimi lava latou te saunia ai e talia, ma ua saunia se [malumalu] e fesootai atu ai.” (“Anointed Quorum (‘Holy Older’),” Church History Topics, ChurchofJesusChrist.org/study/church-history)
Ata
aikona, mafaufau loloto
Mafaufau Loloto a o Sauniuni mo le Vasega
O le a se mea e mafai ona tatou aoaoina e uiga i le Alii mai Ana poloaiga i le Au Paia e fausia malumalu? Aisea e finagalo ai le Alii i Ona tagata ina ia maua faaeega paia i totonu o le malumalu?
Vaega 3
E mafai faapefea ona faamanuiaina a’u ma i latou ou te alofa i ai e ala i le faaeega paia o le malumalu?
I le konafesi aoao ia Aperila 2019, na valaaulia ai e Elder David A. Bednar o le Korama a Aposetolo e Toasefululua ia tagata uma o le Ekalesia ia faamasani i punaoa o loo maua i temples.ChurchofJesusChrist.org (tagai “Saunia e Maua Mea Manaomia Uma,” Ensign po o le Liahona, Me 2019, 103–4). Mai lenei upega tafailagi, tatou te iloa ai mea nei e uiga i le faaeega paia o le malumalu:
O le upu faaeega paia o lona uiga o “se meaalofa.” I lenei tulaga, o le faaeega paia i le malumalu o se meaalofa moni mai le Atua e mafai ai ona Ia tuuina atu faamanuiaga paia i ou luga [e ala i le Togiola a Iesu Keriso]. O le faaeega paia e mafai ona maua i Lona ala ma Lana malumalu paia. O nisi o meaalofa e te maua e ala i le faaeega paia o le malumalu e aofia ai:
Malamalama sili atu i faamoemoega ma aoaoga a le Alii.
Malosiaga e faia mea uma e finagalo le Atua tatou te faia.
Taitaiga faaleatua ma le puipuiga a o tatou auauna atu i le Alii, o tatou aiga, ma isi.
Faateleina le faamoemoe, mafanafana, ma le filemu.
Faamanuiaga folafolaina i le taimi nei ma le faavavau. …
Faatasi ai ma nei sauniga, o le a valaaulia oe e osi ni feagaiga faapitoa ma le Alii. O nei feagaiga ua aofia ai:
Tulafono o le Usiusitai
Tulafono o le Taulaga
Tulafono o le Talalelei
Tulafono o le Ola Mamā
Tulafono o le Faapaiaga
Ae ua folafola mai ai e le Atua, ia faamanuiaga ofoofogia i lenei olaga ma le avanoa e toe foi atu ai ma ola faatasi ma Ia e faavavau. (“About the Temple Endowment,” temples.ChurchofJesusChrist.org)
Na aoao mai e Peresitene Russell M. Nelson lenei mea e uiga i le taua faaleagaga o le faaeega paia:
Ata
Peresitene Russell M. Nelson
O le faaeega paia o le malumalu sa tuuina mai e ala i faaaliga. O le mea lea, e sili ai lava le malamalama i ai e ala i faaaliga, saili ma le agaga tatalo faapea ma se loto faamaoni. Na saunoa Peresitene Polika Iaga e faapea, “o lou faaeega paia o le, mauaina lea o na sauniga uma i totonu o le maota o le Alii, lea e tatau ai mo outou, pe a mavae atu ma lenei olaga, e mafai ai ona outou savavali atu i le afioaga o le Tama, pasia agelu o tutu o ni fitafita, … ma maua ai lou faaeaga e faavavau” [Discourses of Brigham Young, sel. John A. Widtsoe (1954), 416]. (Russell M. Nelson, “Ia Saunia mo Faamanuiaga o le Malumalu,” Liahona, Oke. 2010, 42)
Ata
aikona, tusifaamaumau
Tusifaamaumau Ou Lagona Uunai
O le a se mea e te fautua atu i se tasi e fai ina ia saunia e maua ona faaeega paia? Aisea e taua tele ai ia te oe le malumalu ma ona sauniga? Tusi ou manatu i lau apitalaaga po o le avanoa ua saunia.
