“Lesona 2 Anomea a le Faiaoga: O Le Uluai Faaaliga Vaaia,” Anomea a le Faiaoga O Faavae o le Toefuataiga (2019)
“Lesona 2 Anomea a le Faiaoga,” Anomea a le Faiaoga O Faavae o le Toefuataiga
Lesona 2 Anomea a le Faiaoga
O Le Uluai Faaaliga Vaaia
Na faaali mai le Atua le Tamā ma Lona Alo, o Iesu Keriso, ia Iosefa Samita i le 1820. O le lesona lenei ua fuafuaina ia fesoasoani i tamaiti aoga ia masani i faamatalaga a Iosefa e uiga i lana Uluai Faaaliga Vaaia, iloa aoaoga faavae ma mataupu faavae e mafai ona latou aoao mai i lana faaaliga vaaia, ma faamalosia a latou molimau na vaai Iosefa Samita i le Tama ma le Alo.
Faamatalaga: O le sailiga a Iosefa Samita mo le upumoni e pei ona toefaamatalaina i le Iosefa Samita—Talafaasolopito 1:5–13 o le a talanoaina auiliili atu i le lesona 3 o le kosi lenei.
Fautuaga mo le Aoaoina Atu
Na faaali mai le Tama Faalelagi ma Iesu Keriso ia Iosefa Samita.
Faaali atu le faamatalaga lenei mai i le Iosefa Samita—Talafaasolopito 1:21:
“Ua lē [o] toe i ai ni mea faapea o faaaliga vaaia po o faaaliga i ona po nei.”
-
O a ni ou lagona e uiga i lenei faamatalaga?
-
O le a faape’i ona ese lou olaga pe a e talitonu i lenei faamatalaga?
Faamalamalama atu o lenei faamatalaga sa faia e se faifeau Metotisi ina ua ta’u atu i ai e le taulealea o Iosefa Samita e uiga i lana Uluai Faaaliga Vaaia. Valaaulia tamaiti aoga e faitau le Iosefa Samita—Talafaasolopito 1:15–19, ma fai atu i ai e mafaufau i le ala ua faamaonia ai e le faamatalaga e Iosefa o lona aafiaga le sese o le faamatalaga a lenei faifeau. A uma ona latou faitau, valaaulia tamaiti aoga e faasoa mai mea o loo mafaufau i ai.
FAALELEIA O LO TATOU AOAO ATU MA LE AOAOINA
Valaaulia tamaiti aoga e faitau i totonu o le vasega. O le faitau i totonu o le vasega e mafai ona faia i ni auala eseese, e pei o le faitau leleoa o tamaiti aoga mai i a latou lava tusitusiga paia, faitau leotele e se tamaitiiti aoga se toatasi, auauai tamaiti aoga e faitau leotele ia fuaiupu, faitau leotele faatasi ia tamaiti aoga, ma isi mea faapena.
Tusi le upumoni lenei i le laupapa: Na faaali mai le Atua le Tama ma Iesu Keriso ia Iosefa Samita ma sa talanoa ma ia.
Valaaulia ni nai tamaiti aoga o e fia tuuina atu a latou molimau i le Uluai Faaaliga Vaaia a Iosefa e tali ai le fesili lenei:
-
Na faapefea ona o’o atu ia te oe lau molimau i le Uluai Faaaliga Vaaia?
Tatou te aoaoa ni upumoni taua mai faamatalaga o le Uluai Faaaliga Vaaia.
Faamanatu i tamaiti aoga, sa tuuina mai e Iosefa Samita ni faamatalaga eseese se fa o le Uluai Faaaliga Vaaia o loo tatou iloaina. O loo i ai foi ni faamatalaga faaopoopo se lima o lenei faaaliga vaaia na tusifaamaumauina e i latou o e na faalogo o talanoa Iosefa e uiga i ai. E pei lava ona i ai eseesega i faamatalaga o le soifuaga o le Faaola na tusifaamaumauina e Mataio, Mareko Luka, ma Ioane, ae o faamatalaga taitasi o le Uluai Faaaliga Vaaia a Iosefa o loo faamamafa ai vaega eseese o lona aafiaga. Ae o loo tutusa i latou uma ma ni elemene taua o le mea na vaai ma faalogo i ai Iosefa. E taumafai ni isi o tagata e aveese le Uluai Faaaliga Vaaia ona o eseesega i faamatalaga eseese. (Mo se faataitaiga, o le faamatalaga i le 1832 o loo faamamafa ai sa saili e Iosefa le faamagaloga o ana agasala ma faaaoga ai foi le faalagiga “o le Alii” nai lo o le ta’u eseese o le Tama Faalelagi ma Iesu Keriso. O le faamatalaga i le 1835 o loo faamatala ai o le Tama Faalelagi na faaali muamua mai, sosoo mai ai ma le Faaola.)
Ina ia fesoasoani e faamalamalama le pogai ua i ai ni eseesega i nei faamatalaga, ia fai atu i tamaiti aoga e mafaufau i se aafiaga taua pe anoa na latou maua i o latou olaga.
-
E ono mafai faapefea ona ese lau faamatalaina o lena aafiaga e faalagolago i le po o ai lau aufaalogologo? E ono mafai faapefea ona suia e faalagolago i le taimi po o le mafuaaga sa e faamatalaina ai le aafiaga?
-
E faapefea ona e tali atu i se tasi e finau mai e faapea, o eseesega i faamatalaga eseese o le Uluai Faaaliga Vaaia e fesiligia ai le moni o le aafiaga a Iosefa? (Afai e manaomia, faamalosiau i tamaiti aoga e mafaufau i mea na latou aoaoina mai le vaega 2 o anomea mo sauniuniga.)
Faaali atu le faamatalaga le uma lenei: Ua tatou iloa mai i le Ulluai Faaaliga Vaaia e faapea …
Faamalamalama atu, e mafai ona tatou aoaoina ni upumoni matagofie mai faamatalaga uma a Iosefa o le Uluai Faaaliga Vaaia. Faamanatu atu i tamaiti aoga, sa valaaulia i latou e saunia mo le vasega lenei e ala i le faia o se lisi o upumoni na latou faailoaina mai i nei faamatalaga o le Uluai Faaaliga Vaaia. Afai e manaomia, tuu atu i tamaiti aoga se taimi e toe faamanatu ai mea na latou faailogaina ma upumoni na latou maitauina. (Atonu e manaomia ona e tuuina atu ni taimi mo tamaiti aoga e suesue ai faamatalaga i totonu o le vasega pe afai o loo e tuufaatasia ia lesona muamua e lua ma e le’i mafai ona sauni tamaiti aoga mo le vasega.)
Valaaulia tamaiti aoga e faasoa mai nisi o upumoni na latou maua faapea foi ma le fuaiupu, ma fuaiupu, po o vaega o le faamatalaga o loo aoao mai ai na upumoni. Tusi tali a tamaiti aoga i lalo o le faamatalaga e le’i uma na faatoa e faaalia atu.
Faamatalaga: Mo faataitaiga o upumoni e mafai ona tatou aoao mai i le Uluai Faaaliga Vaaia a Iosefa Samita, tagai i le lauga “O Le Uluai Faaaliga: O le Ki i le Upumoni” (Ensign, June 2017, 60–65) mai ia Elder Richard J. Maynes o le Fitugafulu, na ta’ua i le vaega “Manao Pea i Nisi Mea?” o anomea mo sauniuniga.
A o faasoa tamaiti aoga i upumoni na latou maua, mafaufau e fai atu ia i latou se tasi pe sili atu o fesili tulitatao nei:
-
Aisea e te manatu e taua ai le iloa ma malamalama i lenei upumoni?
-
O faapefea ona faamanuiaina oe i le iloa o le upumoni?
-
O le a se mea ua e iloa e uiga i le Tama Faalelagi ma Iesu Keriso mai mea ua e suesueina e uiga i le Uluai Faaaliga Vaaia?
E mafai ona tatou faalolotoina a tatou molimau e uiga i le Uluai Faaaliga Vaaia.
Faamalamalama atu, e toatele tagata i le lotoifale o Iosefa sa teenaina lana molimau o le mea sa ia vaaia ma faalogoina, ma e toatele na sauaina o ia ona o lena mea (tagai Iosefa Samita—Talafaasolopito 1:21–23).
Valaaulia tamaiti aoga e faitau le Iosefa Samita—Talafaasolopito 1:24–25, ma vaavaai mo le ala na tali atu ai le Perofeta o Iosefa Samita ia i latou o e na ulagiaina lana molimau e uiga i le faaaliga vaaia.
-
O a ni fasifuaitau mai i le molimau a Iosefa Samita ua tulaga ese ia te oe? Aisea?
-
E mafai faapefea ona fesoasoani le faataitaiga a Iosefa Samita ia te oe, pe afai e ulagia pe luitauina lau molimau o le Uluai Faaaliga Vaaia ma le talalelei toefuataiina a Iesu Keriso?
Faaali pe tufa atu le faamatalaga lenei mai ia Peresitene Gordon B. Hinckley, ma valaaulia se tagata aoga e faitau leotele:
Mo le silia i se seneturi ma le afa, ua faaaluina ai e fili, aufaitio, ma nisi o tagata fia atamamai, o latou olaga i le taumafai e faasese le moni o lena faaaliga. Ioe, e le mafai ona latou malamalama i ai. O mea a le Atua e malamalama i ai e ala i le Agaga o le Atua. E leai se mea e faatusalia le taua talu mai ona femaliuai i le lalolagi le Alo o le Atua i le olaga nei. A aunoa ma lea, i le avea ai o se maa faavae mo lo tatou faatuatuaga ma le faalapotopotoga, e aunoa i tatou ma se mea. O le i ai o lea mea, ua tatou maua ai mea uma.
E tele mea ua tusia, e tele mea o le a tusia, i se taumafaiga e aveesea ai e ala i faamatalaga. … Ae o le molimau a le Agaga Paia, na maua e tagata e le faitaulia i tausaga talu mai ona tupu, ua molimau mai e moni, e faapea na tupu e pei ona fai mai Iosefa Samita na tupu. (Gordon B. Hinckley, “O Maatulimanu e Fa o le Faatuatua,” Ensign, Feb. 2004, 5)
Faamalosiau i tamaiti aoga o e mananao i se molimau loloto atu e uiga ia Iosefa Samita ma le Uluai Faaaliga Vaaia, e mulimuli i le faataitaiga a Iosefa o le sailia o le upumoni e ala i le faaauau pea ona suesue i nei faamatalaga ma ole atu i le Atua e faamautu mai le moni o le Uluai Faaaliga Vaaia ia i latou e ala i le Agaga Paia. Atonu e te faaiuina le vasega i le faasoa atu o lau molimau o le Uluai Faaaliga Vaaia ma le Toefuataiga o le talalelei e ala mai i le Perofeta o Iosefa Samita.
Mo Le Isi Taimi
Fai atu i tamaiti aoga e mafaufau i ni fesili luitauina o loo ia i latou pe o i ai i nisi e uiga i aoaoga, faiga masani, po o le talafaasolopito o le Ekalesia. Faamalamalama atu, i le isi vasega e sosoo ai, o le a latou aoao ai i le mea e fai pe a tulai mai ni fesili po o ni faafitauli faigata. Faamalosiau i tamaiti aoga e suesue i anomea mo sauniuniga mo le lesona 3 ina ia mafai ona latou o mai saunia e soalaupule i mataupu faavae o le a fesoasoani latou te maua ai le malamalama faaleagaga faateleina.