Lesona 9 Anomea a le Faiaoga

Iesu Keriso: O Lo Tatou Faaola Paia

I le avea ai o se vaega o le Toefuataiga, sa aoaoina sa’o lele ai Iosefa Samita ma le Au Paia e uiga i le natura ma le misiona a Iesu Keriso. I le lesona lenei o le a maua ai e tamaiti aoga ni avanoa e faaloloto ai o latou faatuatua i le Faaola ma Lana Togiola ma ia iloa le ala e valaaulia atoa atili ai Lona mana i o latou olaga.

Fautuaga mo le Aoaoina Atu

Ua aoao Iosefa Samita e uiga i le natura o Iesu Keriso.

O Le Uluai Faaaliga Vaaia, saunia e Walter Rane

Faaali atu se ata o loo faaalia ai le Uluai Faaaliaga Vaaia. Faamanatu atu i tamaiti aoga, o se tasi o faamoemoega mo le tatalo a Iosefa Samita i le tulaga lea, o le fesili atu i le Atua po o le fea le lotu e tatau ona auai (tagai Iosefa Samita—Talafaasolopito 1:13–19). Ae peitai, i lana faamatalaga i le 1832 e uiga i le faaaliga vaaia, sa ta’ua ai e Iosefa se isi mafuaaga sa alu ai i le togavao e tatalo i lena aso.

Valaaulia se tagata aoga e faitau leotele le parakalafa muamua o le vaega 1 i le anomea mo sauniuniga.

Tuu atu i tamaiti aoga se minute e mafaufau ai i ni taimi i o latou olaga na latou lagonaina ai le faanoanoa ona o a latou agasala ma vaivaiga. Ona fai atu lea i tamaiti aoga e faitau leleoa ia parakalafa lona lua ma le tolu i le vaega 1 o anomea mo sauniuniga.

• O le a le mea sa iloa e Iosefa e uiga i le natura o le Tama Faalelagi ma Iesu Keriso? (O le Tama Faalelagi ma Iesu Keriso e alolofa mutimutivale ma loto faamagalo.)

Faamalamalama atu, sa faaauau pea ona aoao Iosefa ma le Au Paia e uiga i le natura o Iesu Keriso e ala mai i Ana faaaliga. Faaali atu pe tusi i luga o le laupapa ia mau nei: Mataupu Faavae ma Feagaiga 3:10; 38:14; 58:42; 61:2; 62:1; 64:2–4. Tuu atu i tamaiti aoga se taimi e faitau ai ni nai fuaitau, ona fai atu lea i ai e faitau e pei sa fetalai sa’o mai le Alii ia i latou. Fai atu ia i latou e mafaufau pe faapefea ona faalolotoina e fetalaiga a le Faaola ia o loo i ai i nei fuaiupu o latou malamalamaaga e uiga i Lona natura o le alofa mutimutivale ma le loto faamagalo. A uma ona latou faitau, valaaulia ni tamaiti aoga e faasoa mai se mea na latou aoaoina.

• Aisea e te manatu e taua ai ona tatou malamalama o le Tama Faalelagi ma Iesu Keriso e alolofa mutimutivale ma loto faamagalo?

Faamalamalama atu o le Uluai Faaaliga Vaaia a Iosefa Samita, o se tasi lea o le tele o aafiaga na saunia ai Iosefa e tu atu o se molimau malosi o Iesu Keriso. Faamanatu atu i tamaiti aoga e faapea, e tusa ai ma le [saunoaga] a Elder D. Todd Christofferson o le Korama a Aposetolo e Toasefululua, o Iosefa Samita “o le talifaaaliga aupito tulaga ese a Iesu Keriso i Lona natura moni o le Togiola paia” (D. Todd Christofferson, “Born Again,” Ensign po o le Liahona, Me 2008, 79; ua faaopoopo le faatusilima).

• Ua faapefea ona faatosinaina e Iosefa Samita ma le Toefuataiga lou malamalamaaga e uiga, ma lagona e uiga ia Iesu Keriso?

O le Togiola a Iesu Keriso e le iu ma e patino.

Faamalamalama atu i tamaiti aoga e faapea, o le oo mai o le Tusi a Mamona e ala mai i le Perofeta o Iosefa Samita, na mafai ai ona malamalama le lalolagi ia Iesu Keriso ma Lana Togiola i se auala sa le’i mafai ai mo le tele o seneturi. Faatasi ai ma le tele o fuaitau ua aoao ai i tatou e uiga i le taulaga a le Faaola mo tagata, ia aoaoga a Alema ma Amoleka. Fai atu i tamaiti aoga e faitau leleoa le Alema 34:10, 12, ma le 14 , ma vaavaai mo auala na faamatalaina ai e Amoleka le taulaga togiola a le Faaola. Fai i ai e faasoa mai mea ua latou maua.

Tusi se ata pe faaali atu le ata lenei.

ata, Togiola a Iesu Keriso vaega 1

• O a ni auala e “le i’u ai ma faavavau” le Togiola a le Faaola? (Faamalosiau i tamaiti aoga e tusi se ata o le mea na latou aoaoina mai i le vaega 2 o anomea mo sauniuniga.)

Valaaulia se tamaitiiti aoga e faitau leotele le saunoaga lea a Elder Cecil O. Samuelson Jr., o lē sa auauna i le Au Peresitene o Fitugafulu, ma fai i le vasega e faalogologo mo ni upu sa ia faaaogaina e faamatala ai le Togiola a le Alii:

Elder Cecil O. Samuelson Jr.

E moni lava o Lana Togiola e aofia ai le lalolagi ma tagata uma mai lava i le amataga e oo i le gataaga. Ae peitai, aua nei galo ia i tatou, o lona loloto ma le atoatoa e faapena foi ona matuā patino ma tulagaese le mamanuina ina ia fetaui lelei ma faailoa lelei ai o tatou lava tulaga taitoatasi. E sili atu le silafia lelei e le Tama ma le Alo o i tatou taitoatasi nai lo lo tatou iloaina o i tatou lava, ma ua saunia ai se Togiola mo i tatou lea e fetaui tonu lava ma o tatou manaoga, luitau, ma gafatia.

Ia siia’e le faafetai i le Atua mo le meaalofa o Lona Alo, ma ia faafetaia le Faaola mo Lana Togiola. E moni ma o loo galueaiina nei ma o le a taitaiina ai i tatou i mea e tatau ma moomia ona tatou i ai. (Cecil O. Samuelson Jr., “What Does the Atonement Mean to You?” Ensign, Apr. 2009, 51).

• O a upu na faaaoga e Elder Samuelson e faamatala ai le Togiola a le Faaola?

Faaopoopo atu i le ata ia le upu patino ma isi upu e faailoa mai e tamaiti aoga:

ata, Togiola a Iesu Keriso vaega 2

• Aisea e te manatu ai e taua ona manatua, e ui ina faasafua mai le taulaga togiola a le Faaola i se aofaiga e lemafaitauina o tagata ma lalolagi, ae e faapea foi ona matuai patino lava?

Faamanatu atu i tamaiti aoga, i le vaega 2 o anomea mo sauniuniga, sa valaaulia ai i latou e faailoga ni upumoni na tulaga ese ia i latou. Afai e manaomia, tuu atu i tamaiti aoga se taimi e toe faamanatu ai fuaitau o mau ma aoaoga faaperofeta na latou faailogaina i le vaega lenei.

• O a ni upmoni na tulaga ese ia te oe, ma aisea? (Faaali atu upumoni nei, pe tusi i le laupapa.)

A uma ona tali mai tamaiti aoga, mafaufau e fai atu ia i latou e toe tau mai (ma toe tusi) ia mataupu faavae i se auala patino, e faaaoga ai le tagata muamua e pei o muanauna e pei o le A’u/Ou, lo’u/la’u, ma le o’u/a’u. Atonu e talitutusa ia upumoni ma lenei: Sa tauave e Iesu Keriso i Ona lava luga a’u agasala, puapuaga, tiga, ma faaosoosoga ina ia mafai ona Ia silafia le ala e laveai ai a’u. O le taua o lo’u agaga e tele naua, o lea na puapuagatia ma maliu ai Iesu Keriso ina ia mafai ona ou salamo. Sa puapuagatia Iesu Keriso mo a’u agasala ina ia mafai ona ou salamo ma ia le puapuagatia e pei ona sa Ia puapuagatia ai.

• E mafai faʻapefea e le malamalama ma le talitonu i nei upumoni ona fesoasoani e te maua ai se faatuatua malosi atu ia Iesu Keriso?

• O a ni manatu ma ni lagona e oo atu ia te oe ao e mafaufau i mea na tigaina ai le Faaola mo oe ma le pogai na Ia faia ai?

Faaali atu le fesili lenei: O le a se mea o le a ou faia e valaaulia atoatoa atili ai le mana o Iesu Keriso i lo’u olaga?

Tuu atu se taimi mo tamaiti aoga e mafaufau loloto ai ma le agaga tatalo i lenei fesili ma tusi se tali i a latou apitalaaga po o tamaiapi. A o latou mafaufau loloto, mafaufau e faaali atu le saunoaga lenei a Peresitene Russell M. Nelson. Valaaulia tamaiti aoga e vaavaai mo fautuaga e mafai ona fesoasoani ia i latou e valaaulia ai le mana o le Faaola i o latou olaga:

Peresitene Russell M. Nelson

Tatou te amata e ala i le aoao e uiga ia [Iesu Keriso]. “E lē mafai lava ona faaolaina[i tatou] i le lē iloa” [Mataupu Faavae ma Feagaiga 131:6]. O le faateleina o lo tatou iloa e uiga i le galuega ma le misiona a le Faaola [tagai Mataupu Faavae ma Feagaiga 76:40–41]—o le faateleina lea o lo tatou malamalama i Lana aoaoga faavae [tagai 2 Nifae 31:2–21] ma le mea na Ia faia mo i tatou—o le faateleina foi lena o lo tatou iloaina e mafai ona Ia auina mai le mana lea tatou te manaomiaina mo o tatou olaga. …

A tatou faaalu aoga le taimi e aoao ai e uiga i le Faaola ma Lana taulaga togiola, tatou te tosina atu e auai i se isi elemene autu o le mauaina o Lona mana: tatou te filifili ia maua le faatuatua ia te Ia ma mulimuli ia te Ia. …

Tatou te faateleina foi le mana o le Faaola i o tatou olaga pe a tatou osia feagaiga paia ma tausia na feagaiga i le saolele. O a tatou feagaiga e fusia ai i tatou ia te Ia ma tatou maua ai le mana faaleatua. …

A silafia e le Faaola e te fia manao moni lava e aapa atu ia te Ia—pe a mafai ona Ia lagonaina le manao silisili o lou loto o le fia mauaina o Lona mana i lou olaga—o le a taitaia oe e le Agaga Paia ia iloa tonu le mea e tatau ona e faia [tagai Mataupu Faavae ma Feagaiga 88:63]. (Russell M. Nelson, “Mauaina o le Mana o Iesu Keriso i o Tatou Olaga,” Ensign po o le Liahona, Me 2017, 39–42)

Faaiu i le molimau atu, ona o Lana Togiola, ua i ai ia Iesu Keriso le mana e faamalosi, faamafanafana, faamalolo ma faasafua mai ai le alofa mutimutivale ma le faamagaloga ia i tatou.

Mo Le Isi Taimi

Valaaulia tamaiti aoga e mafaufau pe o le a faapefea ona ese o latou olaga pe a aunoa ma perofeta soifua. Fai atu i tamaiti aoga e suesue i anomea mo sauniuniga mo le lesona e sosoo ai, ma ia o mai saunia e soalaupule i faamanuiaga o le taitaiina e perofeta soifua.