Lesona 1 Anomea a le Faiaoga

Ta’imuaga i le Toefuataiga

Na faamutaina e le Alii o Iesu Keriso le Liliuese Tele ina ua Ia toefuataiina mai Lana talalelei ma toe faatulagaina Lana Ekalesia i luga o le fogaeleele. A uma ona auai i le lesona lenei, ua tatau i tamaiti aoga ona mafai ona iloa le aao o le Alii i mea na tutupu muamua atu i le Toefuataiga ma faamalamalama le manaomia o le toe tuuina mai o le upumoni i fanau a le Atua i o tatou aso.

Faamatalaga: Afai e mafai, ia faafesootai tamaiti aoga o e ua lesitala mo le kosi lenei a o le’i oo i le latou aso muamua o le vasega ma valaaulia i latou e faitau anomea mo sauniuniga mo le lesona 1 a o le’i o mai i le vasega. Afai o le a e aoaoina atu faatasi le lesona 1 ma le 2 , ia valaaulia foi tamaiti aoga e suesue anomea mo le lesona 2.

Fautuaga mo le Aoaoina Atu

Faaali atu i tamaiti aoga e le o masani i anomea mo sauniuniga le ala e maua ai i le faaeletonika. Atonu foi e te tuuina atu ni kopi pepa i tamaiti aoga o e e leai ni masini faaeletonika.

FAALELEIA O LO TATOU AOAO ATU MA LE AOAOINA

Saunia a o mafaufau i tamaiti aoga. A o e sauniuni e aoao atu, mafaufau i mea e te faamoemoe o le a lagona ma fai e tamaiti aoga ma le auala e te faamoemoe o le a suia ai o latou olaga o se taunuuga o le lesona ma le kosi. Mafaufau ma le agaga tatalo i manaoga o au tamaiti aoga ma faalogo i le taitaiga a le Agaga a o e sauniuni. Na aoaoina e Elder Jeffrey R. Holland o le Korama a Aposetolo e Toasefululua ia faiaoga e faapea, “o se tamaitiiti aoga e le o se koneteina ia faatumuina; o se tamaitiiti aoga o se afi ia faamumuina” (“Angels and Astonishment,” Church Educational System training broadcast, June 12, 2019).

O le Liliuese Tele na alagatatau ai le Toefuataiga o le Talalelei.

Valaaulia se tagata aoga e faitau leotele le faatomuaga o anomea mo sauniuniga o le lesona 1 .

Faaali atu se laau totō o loo ola ma se laau totō ua pe po o le a pe (po o se lalā ua pe i totonu o ni palapala). Pe faaali atu ata o loo i ai i le lesona pe afai e le maua ni laau totō mo’i.

• Aisea e te manatu ai ua eseese ai foliga o nei laau mai le tasi ma le isi? O le a le ituaiga tala faatusa e uiga i o tatou lava tulaga faaleagaga e mafai ona tatou faia e faaaoga ai nei laau totō?

Faamalamalama atu faapea, sa lapataia e se perofeta o le Feagaiga Tuai na igoa ia Amosa ia tagata amioleaga o Isaraelu, o le a latou oo i se oge. Valaaulia tamaiti aoga e faitau le Amosa 8:11--12, ma vaavaai po o le a le ituaiga oge na lapatai atu ai Amosa.

Fai atu i tamaiti aoga e sue i le vaega 1 o anomea mo sauniuniga, ma vaavaai mo le mea na leiloa i le taimi o le Liliuese Tele. Tuu atu i tamaiti aoga e lipoti mai le mea na latou maua.

Faaali atu i tamaiti aoga le vitio “Dispensations: The Pattern of Apostasy and Restoration” (6:52). Valaaulia tamaiti aoga e mafaufau a o latou matamata e uiga i le mamanu o le liliuese ma le toefuataiga na faaalia i le vitio ua aoao ai i tatou e uiga i le Tama Faalelagi.

• Aisea e te manatu ai, o lenei mamanu o le liliuese ma le toefuataiga ua aoao mai ai i tatou e uiga i le Tama Faalelagi?

• Aisea ua ese ai le tisipenisione o le atoatoaga o taimi nai lo se isi lava tisipenisione? O a ni ou manatu po o lagona e uiga i le ola ai i lenei vaitaimi?

Na saunia e le Alii le ala mo le Toefuataiga o le talalelei.

Faaali atu le upumoni lenei: Na saunia e le Alii le ala mo le Toefuataiga o le talalelei.

Fai atu i tagata aoga e fai ni vaega toalaiti ona auauai lea e faitau mai le vaega 2 o anomea mo sauniuniga, ma vaavaai po o a mea na tutupu na saunia ai le ala mo le Toefuataiga o le talalelei. (Afai na mafai e le toatele o au tamaiti aoga ona faitau anomea mo sauniuniga a o le’i oo i le vasega, atonu e te valaaulia i latou e aotele le anotusi i le vaega 2.) Faaali atu fesili nei, ma tuu atu se taimi mo vaega taitasi e talanoa faatasi ai:

• Na faapefea ona saunia e le Alii le ala ina ia tupu ai le Toefuataiga?

• O le a se mea e mafai ona tatou aoao mai e uiga i le auala na saunia ai e le Alii se ala mo Iosefa Samita ma le Toefuataiga?

E mafai ona fai e tamaiti aoga se matafaioi malosi i lo latou aoaoina o le talalelei.

Faaali atu se lisi o autu o lesona mo le kosi (e mafai ona e maua i latou i le faasologa o anotusi). Faamalamalama atu, o lenei kosi o le a taulai atu i mea faavae na tutupu, aoaoga faavae, ma mau o le Toefuataiga, faapea foi ma le talanoaina o autu faigata ia e tulioso mai i nisi o taimi i le talafaasolopito o le Ekalesia. Mafaufau e valaaulia tamaiti aoga e faitau i le lisi o lesona i le lumanai ma faasoa mai i le vasega po o le fea o autu o le a aupito sili ona latou aoao e uiga i ai. Ia faamaumau a latou tali ina ia e iloa ai po o le fea o lesona e te ono faamamafaina teisi i le taimi o le kosi.

Faamalamalama atu o anomea mo sauniuniga, o se vaega taua lea o lenei kosi, ma e mafai ona faaleleia ai le aoaoina patino o tamaiti aoga o le talalelei ma fesoasoani e saunia ai i latou ia faia ni saofaga anoa i le taimi o le vasega.

Ina ia fesoasoani i tamaiti aoga ia malamalama i faamanuiaga e mafai ona oo mai mai le saunia mo aafiaga o vasega taitasi, faaali atu le saunoaga lenei mai ia Elder Kim B. Clark o le Fitugafulu:

Afai e te manao moni lava e aoao i ai, afai o lou loto ma lou mafaufau ua matala i le aoaoina, ma afai e te galue ai i lena manao, o le a faamanuiaina oe e le Alii. Pe a e faia lau vaega—tatalo ma le faatuatua, saunia, suesue, auai ma le naunautai, ma faia le mea sili—o le a aoaoina oe e le Agaga Paia, faalauteleina lou malosi e faatino ai mea ua e aoaoina, ma fesoasoani ia te oe e avea ma tagata e finagalo le Alii ia avea ai oe. (Kim B. Clark, “O Le Aoaoina mo le Agaga Atoa,” Ensign, Aug. 2017, 27)

Valaaulia tamaiti aoga ia mafaufau loloto pe o le a faapefea ona latou taliina fesili lenei:

• O le a faapefea ona fesoasoani le auai faamaoni i lenei kosi i lo’u tuputupu ae faaleagaga?

• Pe ua ou naunau e totogi le tau o le suesue na’o a’u lava a o le’i amataina vasega taitasi ina ia mafai ona ou sau saunia e aoao ma le loloto faateleina? O le a le taimi i la’u fuafuaga faatulagaina o le a ou tautino ai e avea a’u suesuega patino ma a’u sauniuniga o se mea e ave i ai le faamuamua?

Mafaufau e faamalosiau i tamaiti aoga e tusifaamaumau a latou sini e faatatau i nei fesili. Atonu foi tou te talanoaina o se vasega auala e mafai ona latou fesoasoani ai i le tasi ma le isi ia o mai saunia e aoao ma le loloto faateleina. (O manatu e ono aofia ai le seti o ni vaega o le vasega o le au fai tesi, vaega fai meaaoga, auala e faamanatu ai i le tasi ma le isi a latou sini, po o fono mo soalaupulega lea e mafai ona latou fefaasoaai ai i malamalamaaga loloto mai a latou suesuega.)

Mo Le Isi Taimi

Faamatala atu i tamaiti aoga, o anomea mo sauniuniga mo le isi vasega e sosoo ai, ua aofia ai vaega o faamatalaga a le Perofeta o Iosefa Samita lava ia e uiga i lana Uluai Faaaliga Vaaia. Fai atu i tamaiti aoga e mafaufau po o a mea e mafai ona latou aoao mai i faamatalaga eseese faapea foi ma le tāua o le i ai o a tatou lava molimau i le moni o le Uluai Faaaliga Vaaia.