O Le Aoaoina mo le Agaga Atoa

Saunia e Elder Kim B. Clark

O Le Fitugafulu

Komesina o Ofisa o Aoga a le Ekalesia

O loo galue le Alii ma le malosi i Lana Ekalesia mo oe ia maua le a’otauina ua Ia finagalo ia e maua.

O lenei savali e mo le autalavou ma talavou matutua i le Ekalesia a le Alii. I le tele o tausaga ua mavae, sa ou maua ai se uunaiga malosi na oo mai ia te au e uiga ia te outou ma e uiga i lenei aso. Sa peiseai o ou vaai atu i tamaiti i le Peraimeri i le salafa atoa o le lalolagi. Sa ou iloaina o le a latou osia ma tausia feagaiga ma le Alii. Ma sa ou iloaina o le a faamanuiaina i latou e le Alii i avanoa mo aoaoga loloto, faaleagaga ma le faaletino, ma faatuina i latou e avea ma se autau malosi i le fausiaina o Lona malo ma saunia le lalolagi mo Lona toe foi mai.

O outou o na fanau, ma o lo outou taimi lenei.

O se aso sili i le malo o le Atua, o se aso ua tumu i avanoa mo outou e aoao ma tutupu ae ai ma maua le olioli ma le fiafia. E i ai luitau taua, e mautinoa lava. Ae e ala i le mana togiola ma le faamalolosia o le Togiola a Iesu Keriso, e ala i Lana talalelei mamalu ma Lana Ekalesia moni ma le ola, o loo faaauau pea e le Alii ona tatala faitotoa ma saunia le ala mo outou e salamo, aoao loloto, tutupu ae faaleagaga, ma ia sili atu ona liua ia te Ia. Ua saunia e le Alii Lona malo ma Lona nuu mo Lona toe foi mai, ma o outou o le tupulaga faiae o loo faia se matafaioi autu i lena galuega maoae.

O se aso lenei o vavega. O tekinolosi fou ua faigofie ai ona faamanuiaina le aotauina ma le aoaoina. E moni lena mea mo le malamalama faaletino faapea foi ma le faaleagaga. O loo galue le Alii ma le mana i Lana Ekalesia mo outou ina ia maua le aoaoga ua Ia finagalo ia outou maua.

O se vaega atoa lea o le poloaiga na tuuina mai e le Alii i le Perofeta o Joseph Smith (1805–44) i le amataga o le Toefuataiga: “O lou loto, ia faataalise ona outou faaliliu o au tusitusiga paia, ma maua se malamalama o talafaasolopito, ma o atunuu, ma o malo, o tulafono a le Atua ma tagata, ma nei mea uma mo le faaolataga o Siona. Amene.” (MF&F 93:53).

O lenei poloaiga ua i ai i se tulaga faanatinati i o tatou aso ao faanatinatiina e le Alii Lana galuega. O le taimi lenei mo outou e faaaogaina ai avanoa mo aoaoga o loo i o outou luma, ma le gafatia mo le aoaoina ma le tuputupu ae o loo ia te outou.

O nei upu a Peresitene Thomas S. Monson e tatau ona tatagi pea i o outou taliga i aso uma:

“Ou te uunaia outou ia outou aooga.”¹

“O le a faalauteleina au taleni a o e suesue ma aoao.”²

“O outou taitoatasi … ua i ai le avanoa e aoao ai ma tuputupu ae. Ia faalautele lou malamalama, faaleatamai ma faaleagaga, i le tulaga atoatoa o lou gafatia faalelagi.”³

Loloto o le Aoaoina

O le aoaoina lea e mafai ai e outou taitoatasi ona tulai ae “i le tulaga atoatoa o lou gafatia faalelagi” o se mea o le a ou taua o le loloto o le aoaoina: aoaoina o le agaga atoa—le mafaufau, o le loto, o le tino, ma le agaga e ola pea. O le loloto o le aoaoina e faatatau i ituaiga uma o le malamalama, pe faaleagaga pe faaletino. O le aoaoina e loloto pe a faateleina ai lou malosi e fai ni mea se tolu: (1) ia iloa ma malamalama; (2) ia faia se gaoioiga aoga, ma le amiotonu; ma le (3) ia avea atili e faapei o lo tatou Tama Faalelagi.⁴

E pei ona aoao mai e le Alii le Perofeta o Iosefa Samita, o le loloto o le aoaoina e tatau ona faia i le ala a le Alii, e ala i faaaliga ma musumusuga i le Malamalama o Keriso ma e ala i le mana o le Agaga Paia ma e ala i le suesue malosi, ma le maelega ma le aoao atu o le tasi ma le isi, i le faatasi ai o le alofa tunoa o Iesu Keriso. E moni lenei mea mo soo se ituaiga o malamalama. O poloaiga nei a le Alii e uiga i le loloto o le aoaoina:

“Ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto; saili i le aoaoina, e ala lava lea i le suesue ma le faatuatua foi” (MFF 88:118).

“Ia outou aoao atu ma le filifiliga ma o le a i ai lo’u alofa tunoa ia te outou, ina ia mafai ona aoaoina atoatoa atili outou i teori, i mataupu autu, i mataupu faavae, i le tulafono o le talalelei, i mea uma tau i le malo o le Atua, ua tatau mo outou ona malamalama i ai” (MFF 88:78).

O le Malamalama Faaleagaga ua i ai le Faamuamua

O le loloto o le aoaoina, i soo se vaega o suesuega, e masani lava o se aafiaga faaleagaga, e taula i se faavae o le faatuatua ia Iesu Keriso, salamo, ma le usiusitai i Ana poloaiga, ina ia mafai ona aoaoina ai oe e le Agaga Paia. O le loloto o le aoaoina e le faigofie, ae e tauia ia taumafaiga! Afai e te manao moni lava e aoao i ai, afai o lou loto ma lou mafaufau ua matala i le aoaoina, ma afai e te galue ai i lena manao, o le a faamanuiaina oe e le Alii. Pe a e faia lau vaega—tatalo ma le faatuatua, saunia, suesue, auai ma le naunautai, ma faia le mea sili—o le Agaga Paia o le a aoaoina oe, faalauteleina lou malosi e faatino ai mea ua e aoaoina, ma fesoasoani ia te oe e avea ma tagata e finagalo le Alii ia avea ai oe. “O le faaolataga lava ia,” na aoao mai ai Peresitene Iosefa F. Samita (1838–1918), “i lalo o le Togiola a Keriso, o se faagasologa o aoaoga. … O le malamalama o le alualu i luma e faavavau.”⁵

O lenei faagasologa e faatatau i soo se nofoaga e mafai ona e i ai ma i soo se ituaiga o malamalama. Ae ui i lea, o le poto silisili ona taua e tatau ona e mauaina o le malamalama i mea a le Atua. O le malamalama faaleagaga, o le mea lea, e tatau ona faamuamua i lou loto ma au mea e faamuamua. Na faamamafa mai e le Perofeta o Iosefa Samita le taua o le malamalama faaleagaga i nei upu: “O le tagata e faasaoina e le sili atu lona saoasaoa i lo lona mauaina o le atamai, aua afai na te le mauaina le atamai, o le a aumaia o ia i le noanoataga e se isi malosi o le tiapolo i le isi lalolagi, ona o agaga leaga o le a tele atu le atamai, ma faapea foi ona tele le malosi i lo o le toatele o tagata o loo i ai i luga o le fogaeleele. O le mea lea e manaomia ai faaaliga e fesoasoani ia i tatou, ma aumai ia i tatou le atamai o mea a le Atua.”⁶

E moni o le talalelei e aofia ai upumoni uma,⁷ ae o le poto ma le malamalama o upumoni manino ma le faigofie o le talalelei a Iesu Keriso e tatau ona avea ma o outou faavae mo aoaoga loloto uma lava. O le tuuina faamuamua o le malamalama faaleagaga i lou mafaufau ma lou loto e faamautinoaina faapea o le a e faalagolago i le Alii ma le Agaga Paia i lau aoaoga, o le a e vaai i mea uma e te suesue i ai i le malamalama o Lana talalelei, ma o le a e faaauau pea ona aoao loloto i o outou olaga atoa.

Loloto o le Aoaoina mo le Olaga Atoa

O le loloto o le aoaoina o le malamalama faaleagaga ma le faalelalolagi o se poloaiga a le Alii. Vaai faalemafaufau i le mea semanu e tupu pe ana e taofi le aoaoina. Ae faapefea pe ana faapea ou te taofia le aoaoina ina ua ou faauu mai le kolisi i le ogatotonu o le 1970? Semanu e leai ni ou manatu fou po o faaaliga mai perofeta soifua, o tusitusiga paia, po o le Agaga Paia; Semanu ou te le iloaina se mea i le faaauauina o atinae i tekinolosi, tausiga faalesoifua maloloina, mataupu faalelalolagi, tulafono faalemalo, po o le aoaoina. Semanu e leai se tuputupu ae faaletagata lava ia po o le tuputupu ae faaleagaga e ala i le salamo ma le aoaoina mai aafiaga.

A o avea au o se peresitene o le Iunivesite o Brigham Young–Idaho, na tele lava ina fesiligia Sister Clark, “na faapefea ona e feiloai ia Peresitene Clark?” O lana tali e masani lava ona amata i ai, “Sa lei Peresitene Clark ina ua ou feiloai ia te ia.” Ana faapea ou te lei faaauau ona aoao, semanu ou te faasolo ina matua atu, ae semanu o le a avea pea au ma le 25 tausaga le matua na masani ai Sister Clark ina ua ou faauu mai le kolisi—o se vaaiga le lelei lea mo Sisiter Clark po o lo matou aiga!

Afai e taofi lou aoaoina, e le mafai ona avea oe ma se tagata e sili atu le malamalama, sili atu ona lelei, sili atu le aoga, sili atu ona faamaoni, po o le sili atu ona pei o lo outou Tama o i le lagi.

O lou aafiaga i le aoaoina i lou talavou ma tausaga o le talavou matua ua faataatiaina se faavae mo se olaga atoa o le aoaoina. Afai e te atiina ae le tomai e aoao loloto i le ala a le Alii—e ala i le Agaga ma i le suesue ma le filiga, ma le mataalia—o le a avea o se faamanuiaga sili ia te oe.

O se ki i le seleseleina o lena faamanuiaga o le faatumauina o lou loto ma lou mafaufau ia matala i le aoaoina. O mea nei e tolu e mafai ona e faia ia saunia ai e aoao:

1. Ole atu i le Alii e faamanuia oe i le naunau ia loloto le aoao.

   Afai ua i ai ia te oe le naunautaiga ina ia loloto le aoaoina, manaia tele. Afai e leai, ole atu i le Alii mo lena meaalofa. O le a aoaoina e le Alii ou manaoga ina ia e manao e aoao po o le a ma pe faapefea Lona finagalo ia te outou ina ia aoao mea uma i o outou olaga. I le fuafuaga a le Alii, pe faapefea Lona finagalo ia te oe e aoao ai—e ala i le Agaga, i le suesue ma le filiga—e tutusa lava le taua e pei o le po o le a le mea e finagalo o Ia ia te oe e aoao.

2. Ia avea le salamo o se vaega totonugalemu o lou olaga.

   O le salamo o se faagasologa paia. O le auala tatou te suia ai, tuputupu ae, ma ia sili atu ona lelei e ala i le mana togiola ma le faamalosiau o le Togiola a Iesu Keriso. Afai e avea le salamo ma totonugalemu i lou olaga, o le a e tootuli i ou tulivae i taimi uma lava, faamaualaloina oe lava i luma o le Alii, ma sailia Lana fesoasoani i le auala e faaaoga ai lou taimi ma le auala e auauna atu ai ia te Ia.

3. Tapuai atu i le malumalu i le tele o taimi e mafai ona e faia.

   O le malumalu o le maota o le Alii o faaaliga ma le aoaoina. Afai e te alu soo i ai, pe a e aveina i ai au fesili ma ou manao e aoao ai, o le a aoaoina oe e le Alii lava Ia.

Foiaina o Tulaga Faigata i le Loloto o le Aoaoina

O le loloto o le aoaoina nei o le a saunia oe mo se olaga atoa o le aoaoina. Ae ui i lea, ou te iloa e te feagai ma faalavefau ma e oo lava i mea faafeagai e tuusao lava i le aoaoina e finagalo le Alii ia te oe ina ia maua. O le fefe, lotovaivai, paie, faigata ona faitau, le lava le lagolagosua po o avanoa, aganuu po o tu ma aga faaleaiga, popolega e uiga i le tau, o faaosoosoga o le lalolagi, o manatu sese e uiga i le aotauina, ma le tele lava o isi mea e mafai ona faalavelave i lou ala.⁸

Ou te iloa o nisi o outou e feagai ma nisi o nei mea, ma latou te lagona e pei o ni papupuni e le mafai ona faatoilaloina i le aoaoina.

Ou te tuuina atu lau molimau faapea e tusa lava po o fea tou te nonofo ai, e tusa lava po o a o outou tulaga o i ai, e tulai lava le Alii o Iesu Keriso faatasi ma outou e tetee atu i lenei papupuni faatasi ai ma Lona alofa faaola ma Lona mana silisiliese. E ala i Lana taulaga togiola, na oo lava o Ia ma manumalo i mea uma ia e mafai ona ono taofia ai lou alualu i luma agai i le ola e faavavau. I Lona malosi ma faatasi ai ma Lona mana, e mafai ona e faatoilaloina soo se mea lava o loo tu i le va o oe ma le aoaoina lena e finagalo le Alii ia te oe ina ia mauaina.

O Lana folafolaga lenei ia te oe, ma e moni Ana folafolaga: “Faalatalata mai ia te Au ma o le a ou faalatalata atu ai ia te outou; saili mai ia te au ma le filiga o le a outou maua ai aʼu; ole mai, ma o le a outou maua ai; tuʼituʼi mai, ma o le a tatala atu ai ia te outou” (MF&F 88:63; tagai foi i le Mataio 7:7).

Faaiuga

O se aso sili moni lava lenei i le malo o le Atua. Ua faanatinatiina e le Alii Lana galuega, ma ua tatou vaaia vavega ina ua mavae ni vavega a o galue le Alii i le mana e tatala avanoa matagofie mo outou ia loloto ai le aoaoina.

O loo galue le Alii i o outou olaga e faamanuia ma saunia outou. Ou te tatalo ina ia outou galulue i le faatuatua ia Iesu Keriso ina ia faaaoga avanoa uma e loloto ai le aoaoina, tuputupu ae ai i le poto ma le malamalama, ma faataunuu ai Ona faamoemoega amiotonu, ma avea ma tagata na outou fananau mai ia avea ai.

Mo nisi faamatalaga i avanoa o aoga o le Ekalesia, asiasi i le education.lds.org. Ina ia aoao atili e uiga i le seminare mo le autalavou, tagai i le itulau e 50 i le lomiga lenei. Ina ia aoao atili e uiga i le inisitituti mo le autalavou matutua, tagai i itulau 44 ma le 46 i le lomiga lenei.

Faamatalaga

1. Thomas S. Monson, “Afai Ua Outou Saunia o le a Outou Le Matatau Lava,” Liahona, Nov. 2004, 116.

2. Thomas S. Monson, “O Sini e Tolu e Taialaina ai Oe,” Liahona, Nov. 2007, 118.

3. Thomas S. Monson, “O le Malosiaga Maoae o le Aualofa,” Liahona, Ian 1998, 112.

4. O le mamanu o le “iloa, faia, ma avea ma” na faaaogaina lautele e avea o se auivi mo le atiina ae o le a taitaiga ma talanoaga e uiga i le fuafuaga a le Alii mo le tuputupu ae faaleagaga o Lana fanau. Tagai i le Thomas S. Monson, “Ia aoao, ia faia, ia avea,” Liahona, Nov. 2008, 60–68; ma le Dallin H. Oaks, “O le Luitau ia Avea,” Liahona, Nov. 2000, 32–34. Mo se togafitiga o le loloto o elemene taitasi o lenei mamanu, tagai i le faasologa o tusi e tolu a David A. Bednar, Increase in Learning (2011); Act in Doctrine (2012); ma le Power to Become (2014).

5. Aoaoga a Peresitene o le Ekalesia: Iosefa F. Samita (1998), 252.

6. Aoaoga a Peresitene o le Ekalesia: Iosefa Samita (2007), 480.

7. O lenei upusii mai ia Brigham Young e maua lelei ai le manatu: “E le gata ina faamasani foi e le ekalesia a Iesu Keriso tagata i mea a le Atua, ma atinaeina ia i latou ni uiga lelei ma le mama, ae saunia foi mo i latou soo se uunaiga ma ni faatosinaga e talafeagai ai, mo i latou ina ia faateleina ai lo latou malamalama ma le atamai, i soo se vaega tau inisinia po o tomai eseese ma faasaienisi, mo le poto uma, ma o tomai eseese ma faasaienisi uma o i le lalolagi e mai le Atua, ma ua fuafuaina mo le lelei o ona tagata” (Aoaoga a Peresitene o le Ekalesia: Polika Iaga [1997], 193).

8. O se faataitaiga lenei o se manatu sese na mafua mai i tu ma aga faaleaganuu e mafai ona aafia ai le autalavou matutua: I se augatupulaga talu ai, e mafai ona e maua se tagata na soifua i se lalolagi ua atiina ae se galuega lelei, ma se totogi lelei lava ma se tupe maua e tausi ai se aiga i se aoaoga mai le aoga maualuga po o le, sili atu ona lelei, na faauu mai i le aoga maualuga. O lena manatu o loo i ai pea lava e ui lava i le mea moni faapea mo le toatele o tagata, i atunuu e aupito sili ona atiae, ma e oo lava i le lalolagi ua atiina ae, ua mavae atu na aso. O le aoaoga ma le aoaoina i tua atu o le aoga maualuga i matata o loo manaomia tele, pe e ala i le mauaina o tusi faamaonia i tomai faatekinolosi po o le mauaina o se faailoga i le kolisi (ma i nisi matata o se tikeri e maualuga atu), ua manaomia mo le tausia o se aiga, saunia mo tausaga o le litaea ma le faavaeina o se faavae faaletino mo le auaunaga i le Ekalesia.

• BYU–Pathway i le Lalolagi Atoa

  Saunia e Elder Kim B. Clark