O Le Filifiligaina Ia Faatuatua

Saunia e Elder Enrique R. Falabella

O Le Fitugafulu

Filifiliga e fa e mafai ona suia ai lou olaga.

O se tasi o luitau sili lava na ou feagai ai a o tuputupu o se tamaitiiti i Kuatemala o le mativa—o le mativa faaleagaga ona sa matou le iloa le talalelei ma le mativa faaletino ona o le leai o ni tupe. Na maliu lou tina ina ua lima ou tausaga, lea na tuua ai lou tama ina ia tausia se fanau laiti e toafa na o ia lava. Aua sa manao lou tama ia i matou ia nonofo faatasi uma, na tatau ai ona ia faasafua atu ai nisi tiutetauave a le aiga ia i matou le fanau.

O au o le tamaitiiti ulumatua ma sa tofia i le galuega o le saunia o aiga o le aoauli ma le afiafi mo le aiga i aso uma. Sa faigata i le amataga, ae sa ou aoaoina ni nai auala e kuka ai. O aso taitasi e tuua ai e lou tama ia te au se 25 sene e faatau ai le meaai. Ou te faatauina se pauna o pi mo le 6 sene ma se pauna o araisa mo le 7 sene. Ona ou faataua lea o malala i le 5 sene lea sa ou faaaogaina e kuka ai mea uma, 2 sene o fasilaau, ma le 5 sene o totila. Sa ou faia lenei mea i aso uma, ma i aso uma sa matou aai i araisa ma pi ma totila. E oo lava i lena taimi sa le tele ni tai 25 sene, ae o le ala lea sa matou ola ai.

O le luitau o le, pe faapefea ona o ese mai lenei taamilosaga o le mativa. Ma e oo uma lava i lalo i filifiliga fai—o le filifiliga e faia se mea ina ia faaleleia lou olaga. O i tatou o tagata taitoatasi o loo faia pea filifiliga mo i tatou lava, e tusa lava pe tatou te le manatu o loo tatou faia. Mo se faataitaiga, tatou te filifili e talitonu. O nisi taimi e mafai ona tatou lagona le le mautonu, pe a feagai ma mea ua aoao mai e le lalolagi ma mea ua aoao mai e Iesu Keriso. Ae o le puna sili ona lelei e taialaina o tatou olaga o le aoaoga faavae a Iesu Keriso. A o ou faia filifiliga e faavae i lenei aoaoga faavae, sa ou lagonaina le aao o le Alii i lou olaga.

Ou te fia faasoa atu ia te outou ni filifiliga se fa na i ai se aafiaga maoae i lou olaga. Afai e te faia nei lava filifiliga ma piimau i ai, o le a avea ma se faamanuiaga foi ia te oe: (1) o le filifiliga ina ia papatiso, (2) o le filifiliga e talitonu ia Iesu Keriso ma tumau le toaga i le Ekalesia, (3) o le filifiliga e faalagolago i folafolaga a le Alii, ma le (4) o le filifiliga e tumau i le faatuatua ma mulimuli i fautuaga a perofeta.

O Le Filifiliga Ina Ia Papatiso

Ina ua 12 ou tausaga, na amata e faifeautalai ona aoaoina au ma nai ou tei. I le taimi muamua na lei auai ai lou tama. Sa na o na ia nofonofo i se potu i tua atu o se pupuni ma faalogologo. Ae ona ia faitau lea i se tamaitusi o le Ekalesia lea na faamatala mai ai e faapefea o se alii ma se tamaitai e faaipoipoina e le pule sao e mafai ona nonofo faatasi e faavavau. O lenei mea na ia matauina aua e ui lava ina ua maliu lona faletua, e mafai ona ia toe faatasi ma ia. O le taimi lava na ia aoao ai i lenei mea, sa ia filifili loa e papatiso. Ma na papatiso uma i matou o se aiga.

O le vaaiga fou na maua mai le talalelei na fesoasoani ia te au e iloa ai sa mafai lava ona ausia ni mea e sili atu ona lelei i le olaga pe a ou faaaogaina e au lava ia, ma usiusitai. Sa ou faia le filifiliga patino o le a ou faia soo se mea e moomia ina ia tumau ai i le ala a le Alii.

O le Filifiliga e Talitonu ia Keriso, ma Tumau le Toaga i le Ekalesia

Ou te manatuaina faapitoa lava lou faia o lenei folafolaga i se tasi aso a o ou saofai i se falesa e faatalitali mo se sauniga papatisoga e amata. A o ou nofonofo ma mafaufau loloto i le aoaoga faavae a Keriso, sa amata ona ou maua se lagona malosi o le olioli ua fai mai ia te au o mea uma na ou aoaoina mai faifeautalai e moni. I lena taimi sa ou tautino le leoa atu i le Atua o le a faalagolago i taimi uma ia te Ia ma o le a ou tumau i le toaga i Lana Ekalesia i lou olaga atoa pe afai o le a mafai ai ona faaauau pea ona ou maua le olioli lea e sau mai le Agaga Paia. Ia te au o lenei folafolaga e aofia ai e le gata ina auai i le lotu i vaiaso uma ae o le faalagolago foi i aoaoga faavae a le Alii, i tusitusiga paia, perofeta soifua, ma aemaise lava lou Faaola, o Iesu Keriso.

O le Filifiliga e Faalagolago i Folafolaga a le Alii

Sa fai si talavou o loʼu olaga i le taimi na ou faia ai lenei filifiliga taua e faalagolago i folafolaga a le Alii. Talu mai lena taimi o lau filifiliga ua faamaonia le aoga tele ia te au. Soo se taimi lava e oo mai ai le masalosalo po o se fesili, sa mafai ona ou mafaufau i tua i le tautinoga sa ou faia ma sa faavae filifiliga o lou olaga i lena tautinoga. O le filifilia vave i tulaga faatonuina o le a e ola ai o le a fesoasoani e te faia ai ni filifiliga sao pe a oo mai masalosaloga po o ni faafitauli.

E i ai so’u aafiaga e le galo i lenei mataupu faavae a o aoga. Sa ou galue malosi i le aoga i taimi uma e taumafai e aoao saunia mo le lumanai. Sa ou iloa, ina ia mafai ona tuuese le mativa, sa manaomia le sue o se galuega o le a tatala ai faitotoa i avanoa fou i le olaga. Sa ou iloa foi ina ia mafai ona maua lenei ituaiga o galuega, e tatau ona ou taulai atu i lau aoga.

E ui lava i le taua o le aoga ia te au, sa ou faia le filifiliga patino e faataatia ese meaaoga i Aso Sa. I le avea ai ma se tagata o le Ekalesia, sa ou iloa na fetalai mai le Alii o le Sapati o Lona aso, e le o sa tatou aso. Sa ou taumafai e faia ni filifiliga ma se faamoemoega e uiga i mea ou te faia i lenei aso faapitoa. Ae ui i lea, e oo lava ina ua uma ona ou faia o lenei filifiliga, e i ai taimi sa faaosoosoina au e lolou au lava tulafono, aemaise lava pe afai e i ai sau suega e fai. Ou te mafaufau, “E le leaga tele; ua na o se suesuega. Ou te mafai lava ona alu i le lotu i le taeao ae suesue i le aoauli ma le afiafi.”

Ae a ou manatua le folafolaga na ou faia o le a ou tumau ona toaga ma faamaoni i fautuaga a perofeta a le Alii, sa sili atu ona faigofie le pipiimau i lau filifiliga e aua le suesue i Aso Sa ma nai lo lena ia faaaogaina le aso o le Alii mo le auauna atu ma le tapuai. Ua uma ona ou filifili e tumau i le faatuatua, ma o lea, ia te au ua na o se mataupu tau i le faamatalaina o mea na fetalai mai ai le Alii e uiga i le aso Sapati ma faaaogaina Lana fautuaga i le mea sili ou te mafaia i lou olaga.

Sa ou iu ina matua iloga i au meaaoga ma mauaina se galuega lelei e fesoasoani ia te au e tausi ai lou aiga. Ou te iloa ona sa ou tausia lau folafolaga i le Alii, ua Ia faamanuiaina au ina ia mafai ona fausia ai se olaga sili atu.

O le filifiliga e Tumau i le Faatuatua ma Mulimuli i Fautuaga a Perofeta

Mo i tatou taitoatasi, o le tumau i le faatuatua i le Alii o se mataupu o le faatulagaina i le mea e sili lo tatou talitonu patino faapea o Iesu o le Keriso, o i latou o e na tusia tusitusiga paia na musuia e le Atua, ma le Au Peresitene Sili ma le Korama a Aposetolo e Toasefululua e moni lava o ni auauna a le Atua. O le iloaina o loo i ai faaaliga i o tatou aso ma o perofeta na valaauina e le Atua e faigofie atu ai le tumau i le faamaoni i le talalelei pe a e oo i tulaga faigata.

Afai e mafai ona e atiina ae lenei ituaiga o lototele, ona le mafai ai lea ona faalavelave ia te oe fesili po o a amioga po o gaoioiga e talafeagai pe leai. O le a taliina uma nei popolega a o e sailia tali i le faatuatua e ala i tusitusiga paia, le Agaga, ma perofeta—o auauna tofia a le Atua.