O Leo o Le Au Paia o Aso e Gata Ai
Pe Na Ou Manaomia le Faamanatuga?
Ata na tusia e Joshua Dennis
Ua toe lima minute fai le sauniga faamanatuga, ae o lenei ua ma aafia i se tauiviga ma se tamaitiiti, faalua na malolo mo le faletaele, o se suiga o le napekini, ma le tele o le feei mai “ua ou fiaai!”
I le avea ai ma se tina o se fanau e toalima e i lalo ifo o le valu tausaga, faatasi ai ma se tane e faatoa faatagaina e lana galuega o ia e sau i le fale i faaiuga o vaiaso, e masani lava ona ou lagonaina le vaivai pe a oo mai le Aso Sa. A o savavali atu lo matou aiga i totonu o le falesa i Aso Sa, ma te saunia ma lou toalua mo se itula o le mea ma te fia ta’ua o le “talitiga.”
E faatoa sefululima minute i se tasi o sauniga, ae amata ona ee le ma pepe e iva masina le matua. Sa ou taumafai e faanana ma faafilemu o ia. I le toilalo, sa iu lava ina ou aveina o ia i fafo o le falesa e faatoafilemu ai o ia. A o ou nofo i lalo, sa amata ona taulai atu lou mafaufau i lou vaivai ma manaoga o le aluga o le vaiaso fou. Sa ou lagonaina le lofituina.
Na faafuasei lava, ona faateia au i se alii talavou o loo uuina se fata o le faamanatuga. “Pe te manaomia lenei mea?” sa ia fesili ai. Sa o se fesili faigofie, ae na ootia ai lou agaga. Na vave lava ona faatumulia au e le Agaga, ma na oo mai loimata i ou mata. Sa ou mafaufau ia te au lava: “E sili atu nai lo le mea e te iloaina.”
O manaoga ma tiutetauave o aso taitasi e mafai ona faavaivaia i tatou i le vaiaso atoa, ae o le faamanatuga e mafai ona toe faatumuina i tatou. A o ou ai ma inu i le faamanatuga, sa ou lagonaina le filemu ma le faamalologa ua tafe i totonu ia te au. I lena lava taimi sa ou iloaina ai na ou manaomia le faamanatuga e sili atu nai lo se isi lava mea ona ou te manaomia le Agaga e faatasi ma au.
Na taulai atu lau vaai i se ata vali i le potu malolo o le Faaola o loo faaloaloa mai Ona aao. Sa faatumulia lou loto i le agaga faafetai a o ou mafaufau loloto i Lona saunia i taimi uma e faamalolo ma faamalosia i tatou. E faamanatu mai ia te au lenei mea i Aso Sa taitasi a o ou ai ma inu i le faamanatuga. Ou te faafetai ona o le Agaga na aoaoina au e ala mai i se fesili faigofie e faapea i le lotolotoi o luitau o le olaga, o le Faaola o lo tatou punavai o le malosi ma le filemu.