O Le Ala e Mafai ai Ona E Fesoasoani i le Galuega o leMalumalu
E alaala le tusitala i Iuta, ISA.
O galuega o le malumalu e aumaia le olioli ia te oe ma i latou e te alofa i ai.
Na i ai se taimi na e matuai fiafia ai lava i se mea sa le mafai ona e faatalitali e amata? Atonu na e fiafia lava i le o atu ma lou tuagane e matamata i le taaloga a lau ‘au e sili ona e fiafia i ai, pe masalo na valaauliaina oe e lau uo mamae i se konaseti ofoofogia.
I le vaitau o le 1840, na toefuatai mai ai e le Atua se upumoni o le talalelei lea na matua fiafia ma faagaeetia ai Iosefa Samita. Sa ia aoaoina e faapea e ala i le pule tatau o le perisitua, e mafai ona papatisoina tagata e ala i le fai ma sui mo e pele ia i latou o e sa lei papatisoina i lenei olaga.
Sa faapitoa lava le mataina ia Iosefa o le aoaoga faavae o le papatisoga mo e ua maliliu aua na maliu lona uso matua o Alavini i le 25 o ona tausaga e aunoa ma le papatisoina. Sa popole Iosefa e faapea sa faasalaina Alavini i le pagatia e faavavau ona sa lei papatisoina o ia i lenei olaga.
Ae e ala mai i faaaliga o le faaolataga mo e ua maliliu, sa aoaoina ai e Iosefa e mafai ona papatisoina Alavini e ala i le fai ma sui ma faaolaina i le malo selesitila (tagai i le MF&F 137).
Faasoaina atu o le Upumoni o le Papatisoga mo e ua Maliliu i Isi
E le gata ina sa avea lenei tala o se mea fiafia i le aiga o Samita, ae sa avea foi ma se tala fiafia i isi au paia i Navu, Ilinoi. I le aso 15 o Aokuso, 1840, na aoao atu ai e Iosefa Samita e uiga i le sauniga o le papatisoga mo o latou tuaa i se sauniga o le maliu mo Seymour Brunson. Sa tau atu e Iosefa ua oo i le taimi e faataunuu ai ma toefuatai ai lena aoaoga, lea na faatinoina e le Au Paia i aso anamua (tagai i le 1 Korinito 15:29).1
Ina ua faalogo le Au Paia i Navu e mafai ona latou papatiso mo tagata o o latou aiga ua maliliu, na matuai faagaeetia i latou. “O le taimi na ou faalogo ai i ai na faaosofia lou agaga i le olioli,” o le saunoaga lea a Peresitene Wilford Woodruff (1807–98).2
O le taimi lava na iloa ai e le Au Paia e mafai ona latou faia papatisoga mo e ua maliliu, sa latou mananao loa e fai galuega a o latou aiga i le taimi lava latou te mafai ai ona faia. O le toatele na tusi atu i tagata o aiga ina ia mafai ona latou aoina mai igoa o aiga ua maliliu. Talu ai ona sa leai se malumalu i lena taimi, na faitau selau tagata na o atu i lalo i le Vaitafe o le Misisipi e faatino ai sauniga.
Papatisoga mo E ua Maliliu ma Oe
O loo faaauau pea le fiafia i galuega o le malumalu ma le papatisoga mo e ua maliliu i le taimi nei. O loo i ai malumalu i le salafa o le lalolagi, ma o galuega o le malumalu e tatalaina ai le faitotoa mo tagata uma ia maua le faaolataga. O se meaalofa maoae!
E pei lava o le Au Paia i Navu, e mafai ona e faatasitasi ma au uo ma aiga ma fai papatisoga sui mo e ua maliliu. E mafai ona e aveina lou aiga i le malumalu. O lona uiga e le gata i le aveina o lou aiga o soifua i le malumalu, ae faapea foi e pele ia te oe ua maliliu. Afai e le mafai ona o lou aiga i le malumalu, e mafai ona e fai atu i uo, taitai, po o tagata o le korama ma vasega tou te o faatasi.
O le o i le malumalu faatasi ma e pele e aumaia ai le olioli. E fesootai ai aiga, aumai le filemu, ma faamanatu mai ai ia i tatou e alofa le Atua ia i tatou uma ma ua Ia ofoina mai le faaolataga i Ana fanau uma lava.
Ma o se mea lena e mafai ona tatou fiafia uma lava i ai.