O Leo o Le Au Paia o Aso e Gata Ai
Sa Toe Valaau Mai le Atua ia te Au
Ata na tusia e Carolyn Vibbert
Ina ua maea lau aoga i le kolisi, sa avea au ma se saienitisi suesue. I le aoaoina i metotia faasaienitisi, sa ou taliaina ai na o mea e mafai ona lagonaina ma faamaonia. Sa ou ola e aunoa ma le faatosinaga a le Atua i lo’u olaga; O a’u moni lava o se tagata e le talitonu i le Atua.
Ona oo lea i se tasi taeao sa ou maua ai se valaau faapea o lo’u atalii sa aafia i se faalavelave tau taavale matautia. I le agai atu i le falemai, sa ou lagonaina le musuia e fai le tatalo a le Alii, lea sa ou aoaoina a o laitiiti. Ou te lei manatuaina, ae sa ou lagonaina e tatau ona ou tatalo pea.
E ui lava ina sa valaau mai le Atua ia te a’u, ina ua mavae le faalavelave ma toe manuia mai lo’u atalii, sa ou faaauau pea ona ola e aunoa ma Ia i lo’u olaga.
I ni tausaga mulimuli ane, sa amata ona ma tafafao faamasani ma se tamaitai e igoa ia Rubí. O ia o se tagata o Le Ekalesia a Iesu Keriso o le Au Paia o Aso e Gata Ai, e ui e le’i toaga o ia. Sa ma faatasi mo le tolu tausaga ina ua ia amata ona lagonaina le manao e alu i le lotu. Na te fai mai ma te o faatasi ma ia, ae sa ou musu lava i taimi uma.
I se tasi aso na oo mai ai faifeautalai i lo matou faitotoa. Sa la tuuina mai ia te a’u se Tusi a Mamona ma tuua ai au ma ni galuega atofaina e faitau. Sa ou faitauina mea na la talosagaina au e faitau ae sa leai se mea na ou lagonaina. Sa ou auai atu foi i le lotu ae sa ou le talitonu pea i taimi uma. E ui i lea, sa ou lagonaina e tatau ona faaauau pea ona ou faitauina le Tusi a Mamona. Sa toe valaau mai le Atua ia te au.
A o faaauau ona ou faitau, sa amata ona ou lagonaina e moni le tusi. Na faateleina lo‘u faatuatua. Ina ua ou oo atu i le 3 Nifae 13:9–13 ma faitau i le tatalo a le Alii, sa faatumulia au i le Agaga. Sa ou tagi masusu. Sa toe valaau mai le Atua ia te au mo le taimi lona tolu. O le taimi lea sa ou faalogo.
Na tuputupu ae lou faatuatua i le Atua. Sa ou fia iloa atili. I se taimi puupuu lava, sa ou faitauina uma ai tusitusiga faavae. Sa faaauau pea ona ou auai i le lotu, ma ina ua uma ona ma faaipoipo ma Rubí, sa ou papatiso loa. O le a le galo lava ia te a’u le olioli na ou lagonaina a o faamauina au o se tagata o le Ekalesia.
I le taimi nei o loo avea pea au o se saienitisi suesue. Ae ua ou vaai nei i le aao o le Atua i mea uma. Ou te ioe faatasi ma Alema, lea na faapea mai, “Ua faailoa mai i mea uma o loo i ai se Atua; ioe, e oo i le lalolagi, ma mea uma ua i ona luga, ioe, ma lona faataamilosaga, ioe, ma paneta uma foi o loo i o latou ala masani ai ua molimau mai o loo i ai se Foafoa Silisiliese” (Alema 30:44).