Seia Tatou Toe Feiloai
Faamolemole Toe Foi Mai!
Mai le “O se Tofi e le Mafaatauina,” Liahona, Ian. 1993, 105.
Matou te tatala atu o matou lima ia te outou. Matou te manaomia la outou fesoasoani.
Ia i latou o e ua ponatia loto pe ua leai foi se naunau [i le Ekalesia], pe o e ua liliu ese mo soo se mafuaaga, matou te valaaulia outou uma ina ia auai i le faaaumeaga atoatoa faatasi ma i matou. O tagata faamaoni o le Ekalesia, atoa foi ma o latou sese uma ma vaivaiga, o loo taumafai i latou ma le lotomaualalo e fai le galuega paia a le Atua i le lalolagi. Matou te manaomia la outou fesoasoani i le tauiviga maoae e tetee atu i malosi o le pogisa ua salalau i le lalolagi i aso nei. I le avea ma se vaega o lenei galuega, o le a mafai e outou uma ona faamalieina manaoga loloto o o outou agaga. O le a outou iloa le mafana patino lena e mafai ona maua i le sailia o mea paia ma faasaina e le Atua. E mafai ona outou olioli i faamanuiaga ma feagaiga o faia i malumalu paia. E mafai ona outou maua uiga maoae ma le faamoemoega i o outou olaga, i le lalolagi upuvale o tatou soifua ai. E mafai ona outou maua le malosi o le amio e mafai ai ona outou filifili mo outou lava ae le o le galueaiina. (Tagai i le 2 Nifae 2:26.)
I ni nai tausaga ua mavae, na tuuina mai ai e le Au Peresitene Sili o le Ekalesia [lenei] valaaulia:
“Ua matou iloaina nisi ua le toaaga mai, o isi o e ua faitio ma ua matele i le saili masei, ma i latou o e ua taofia pe tineia igoa ona o solitulafono matuia.
“Ia i latou uma na matou te aapa atu i ai i le alofa. Ua matou naunau e faamagalo atu i le agaga o Ia o le na fetalai mai: ‘O A’u, o le Alii, Ou te faamagalo i lē o le a Ou faamagaloina, ae o outou ua poloaiina ia faamagalo atu i tagata uma (MFF 64:10).’
“Matou te fautuaina tagata o le Ekalesia ia faamagalo i latou o e atonu ua sese mai ia te i latou. “Ia i latou ua le toe toaaga mai ma i latou ua avea ma e faitio, matou te fai atu, ‘Foi mai. Foi mai ma taumamafa i le laoai a le Alii, ma toe tofo i fua suamalie faamalieloto o le faaaumea faatasi ma le au paia.’
“Ua matou mautinoa e toatele ua [mananao] e toe foi mai, ae ua ia i latou se lagona vasivasi i le faia o lena mea. Matou te tautino atu ia te outou o le a outou maua ni lima e tatala atu e talia outou ma le naunautai e fesoasoani atu ia te outou.” (Church News, Tes. 22 1985, 3).
… Ou te toe fai atu lena talosaga i le lotomaualalo ma le faamaoni. Ma e tatala atu o matou lima ia te outou.