Seminare: Lea Tatou te Faia ai ni Fesootaiga

Saunia e David A. Edwards

Mekasini a le Ekalesia

I le tele o itu, o le seminare lea e o mai faatasi ai mea.

Pe e te lagonaina i nisi taimi le tuua toatasi a o e taumafai e malamalama i lou olaga, ou tofotofoga, ma tusitusiga paia? Afai o lea, o le auala la e tasi e sao ai mai lenei lagona o le faia o ni fesootaiga.

O se tasi o nofoaga sili ona lelei e faia ai lenei mea o totonu o le seminare. O nisi nei o fesootaiga e mafai ona e faia iina.

Fesootai ma Isi Tagata

O le seminare o se faamanatu tele lea e le o tuua na o oe. Ma o se nofoaga sili e fesootai ai ma isi i se siosiomaga e saogalemu ma lagolagoina.

Pe tou te feiloai i aso uma i totonu o se potuaoga po o le faia o suesuega i le fale po o le initoneti, o le seminare e faafesootai ai oe ma isi talavou faapea foi ma se faiaoga agaalofa. O tagata nei e mafai ai ona avea lou lava tagata ma tagata silisili. E mafai ona outou sailiili i tusitusiga paia, fai atu fesili, vaavaai mo ni tali, faasoa atu manatu ma lagona ma aafiaga. E mafai ona outou talie, fetagisi, ma pepese faatasi—ma atonu foi e aai faatasi (fesili i lou faiaoga; afai o le tali e leai, aua le popole).

Fesootai ma Tusitusiga Paia

E ui atonu na tusia tusitusiga paia i aso ua leva ma le mamao ese, o le seminare e fesoasoani ia te oe ia oo atu ai i le atulaulau ma le taimi ina ia matuai fesootai lava ma i latou. E fesoasoani ia te oe e te malamalama ai i mea e tutusa ai ma eseesega i le va o le lalolagi o ananafi ma le lalolagi i aso nei. Ma e fesoasoani e te iloa ai le tumau pea o le savali a le Atua i Ona tagata ma le lalolagi. I lenei auala, e mafai ona fesoasoani le seminare ia te oe e iloa ai le auala e mafai ai ona fetalai mai le Atua ia te oe e ala mai i tusitusiga paia ma le Agaga e tuuina atu ia te oe le taitaiga talafeagai. E fesoasoani foi ia liliu ai tusitusiga paia e avea o se uo mo le olaga atoa—o se puna tumau o le mafanafana, fautuaga, ma le fesoasoani.

Fesootai Tusitusiga Paia I Le Tasi ma le Isi

O le a se mea e fesootai ai aoaoga a Alema ma Mataio? Pe i ai se mea e tutusa ai Isaia ma le Mataupu Faavae ma Feagaiga? O le seminare e fesoasoani e te iloa ai le fesootaiga e noatia ai uma aoaoga o le talalelei faatasi i tusitusiga paia uma. O le taimi lava e te amata ai le faia o nei fesootaiga, ua mafai loa ona avea tusitusiga paia o se vaega aoga ma le manaia, e faapea foi le faauo ma le masani. O lenei mea o le a faaosofia lou fiafia i le faia atili o nei sootaga i le va o tusitusiga paia. Ma o iina tonu lava i le seminare e fesoasoani ia te oe e faia lena mea.

Faafesootai Lou Taimi Nei ma Lou Lumanai

Taimi nei-Oe atonu ua faalogo i a Oe-Lumanai, ae e manaia pe a latou mafai ona faamasani lelei. E ala mai i le seminare e mafai ona e maua ai se manatu lelei po o ai lenei Oe-Lumanai tagata. Mo se faataitaiga, e mafai ona tatou vaai pe faapefea ona faaaoga Faifeautalai-Lumanai-Oe tusitusiga paia e aoao ai tagata i le talalelei, foia o latou atugaluga, ma fesoasoani ia i latou e suia o latou olaga. Po o le a mafai ona e maua se vaaiga pe faapefea ona totoina e Matua-Lumanai-Oe se fiafia i tusitusiga paia i loto o fanau. Po o le a mafai ona e amata ona malamalama pe mafai faapefea ona fesoasoani le taulai atu i upumoni faatusitusiga paia i Auaunaga-Ekalesia-Lumanai-Oe e auauna atu, aoao atu, ma musuia isi. Ma e moni lava, o le a e vaaia pe faapefea Lumanai-Oe aafia i le olioli patino, filemu, ma musumusuga mai se mausa o le suesueina o tusitusiga paia i aso taitasi.

Fesootai ma Lou Tagata Moni Lava

O lou tagata moni o le vaega lea o oe e iloa le ituaiga o tagata e i ai oe, po o fea e te sau ai, ma po o ai ou Matua Faalelagi. O lou tagata moni lava e iloa foi lou gafatia moni, o le a le ituaiga mana o loo ua ia te oe, ma le mana tele e mafai ona e mauaina ai le avanoa pe afai e faia filifiliga sao.

A o e mauaina le atamai i aoaoga faavae i tusitusiga paia i le seminare ma lagona ai le Agaga Paia ua faamautu mai le moni o i latou i lou loto, ua e faalolotoina ai lenei malamalama. O le a e lagonaina foi le uunaiga a le Agaga e faatino—ia salamo, auauna atu, tatalo, aoao, ma faia mea uma i lou malosi e fesootai ai ma lou tagata e silisili ona lelei e silafia e lou Tama Faalelagi ma Iesu Keriso e mafai ona avea ai oe.

Fesootai ma le Tama Faalelagi

E te faamalosia lau fesootaiga i le Tama Faalelagi a o e tatalo ia te Ia, aoao e uiga ia te Ia ma le Faaola, ma ola e pei ona La finagalo ia te oe ia ola ai. I le seminare e te aoao ai pe faapefea ona fetalai mai le Tama Faalelagi ia te oe e ala i tusitusiga paia ma le Agaga Paia, lea e oo mai ia te oe pe a e suesue ma le faamaoni i tusitusiga paia. E masani foi ona tuuina atu ia te oe e le seminare ni avanoa e tatalo ai, mafaufau loloto, molimau atu, ma faia ai le tele o isi fesootaiga i le Tama Faalelagi.

Tagai i le auala na faia ai e nei autalavou fesootaiga.

O taimi uma lava ou te i ai i le seminare, ou te iloa e alofa le Tama Faalelagi ia te au ma e popole mo au! O le auai i le seminare ua faamanuiaina ai au i se malamalama e sili atu le manino po o ai au ma pe aisea ua ou i ai iinei. O mataupu ma aoaoga faavae sa ou aoaoina i le seminare ua fesoasoani ia te au e fai ai filifiliga amiotonu. Ua sili atu nei ona ou naunau e auauna atu i se misiona talai ma ua fiafia e faasoa atu le talalelei i isi.

Marlou T., 20 tausaga, Sorsogon, Filipaina.

A o tuputupu ae, sa ou le toaga tele i le Ekalesia. Ou te lei maua se molimau maumaututu. Ae a o ou auai i le seminare i aso taitasi, sa ou aoaoina faapea e mafai ona e tatalo ma maua ai le faamafanafanaga ma tali. Sa mafai ona ou fesootai i tala o tusitusiga paia. Ou te manatu ou te lei faitauina lava e oo i se mataupu e au lava ia ae ou te lei auai i le seminare. Sa ou aoaoina mataupu faavae autu o le talalelei aua sa ou lesitala i le seminare. E mafai lava ona ou maua le filemu i taimi uma i le seminare. E le mafai ona lava lou faailoa atu faapea o le seminare o loo taialaina e le Alii.

Brynn W., 17 tausaga, Idaho, ISA

E ala mai i ou tausaga i le seminare, sa ou aoaoina ni mea se tele e uiga i le mea na ou sau ai, pe aisea ua ou i ai iinei, ma o le a le mea e tatau ona ou faia. Sa aoao mai e le seminare ia te au pe faapefea ona fai atu fesili ma maua tali. I le taimi muamua, sa faigata ia te au ona faaaoga tusitusiga paia ia te au lava ia. Ae i lesona taitasi, sa matou faatusatusaina i o matou olaga, sa le gata ina ou aoao i tala i tusitusiga paia ae na iloaina foi o lou olaga o se vaega o lena tala ma ua tuua e perofeta ni faatonuga mo au. Ona o lena mea, ua faigofie ai ia te au ona sue le ala sao ma fai ni filifiliga sao.

Anastasia V., 18 tausaga, Moscow, Rusia

Ua matuai faateleina lava lou fiafia i tusitusiga faavae i tausaga taitasi o le seminare. O lenei fiafia sa fesoasoani ou te lagona ai se manao faateleina e faataunuu le mea e finagalo le Tama Faalelagi ia i tatou e fai. Sa ia fesoasoani mai ia te au ia lagona se alofa faamaoni mo lou tuaoi. Sa ou maua le avanoa e faasoa atu ai le talalelei i tagata taitoatasi o loo siomia au. E ala mai i le seminare, o se polokalama musuia a le Atua, sa mafai ai ona ou aloese mai i faigata na tuuina mai ia te au e le lalolagi. Na fesoasoani mai le Tama Faalelagi ia te au ia iloa po o le a le ituaiga o afafine e finagalo o Ia ia avea ai au, po o a mea e tatau ona ou taulai atu i ai ma le ala e tatau ona ou amio ai.

Mirian C., 18 tausaga, o Kuatemala, Kuatemala

I nai tausaga ua mavae, sa ou tauivi ai ma le atuatuvale faalemafaufau ma le popole tele. O le tausaga ua mavae sa sili atu ona leaga mo au. Sa mou atu lau molimau, ma na o le seminare le mea e tasi na fesoasoani ia te au e taulimaina ai le faafitauli. Sa ou feiloai i ni nai tamaitai na vave ona avea ma au uo mamae. Na amata ona i ai se uiga loloto o tusitusiga paia ia te au. Ma na aoao mai lo matou faiaoga i se auala na avea ai tala o le Feagaiga Fou ia Iesu Keriso mai i aso la ua leva ia talafeagai i o tatou olaga talavou. Sa amata ona ou iloaina lou Faaola ma lou Tama Faalelagi. Na faifailemu lava e le gata na toefuatai mai lau molimau ae na amata foi ona sili atu le malosi ma le mausali. O lau tauiviga i lou ola maloloina faalemafaufau e lei tuua lava au, ae ona o le seminare, o le faamoemoe lea sa leiloa o lenei ua faateleina. E i ai sau molimau ia Iesu Keriso; Ou te iloa o loo soifua o Ia, e alofa o Ia ia i tatou, ma e mafai ona Ia tauaveina a tatou avega pe afai tatou te o mai ia te Ia. Ana leai le seminare semanu ou te le mauaina lena faamanuiaga.

Jalee D., 16 tausaga, Colorado, ISA

A o lumanai lou tausaga muamua i le seminare, sa ou le malamalama pe aisea e tatau ai ona tatou suesueina tusitusiga paia. Sa ou manatu na i ai na oni tala e le mananaia. Ae faafetai i le seminare, sa ou aoaoina ai, o tala taitasi o loo i ai se lesona taua ma ou te mafai ona faaaogaina i lou olaga i le taimi nei lava. Ua i ai lou manao e faaauau le aoaoina o tusitusiga paia.

Oscar B., 15 tausaga, Limón, Costa Rica

Sa ou papatiso ia Me 2016. Sa amata lou tausaga muamua o le seminare mulimuli ane i lena tausaga. Sa ou le talitonu i le taimi muamua, ma ou te lei saunia e ala vave i luga, ae sa uunaia au e alu. Sa fai si ou le mautinoa e uiga i le iloaina o le leo o le Agaga, ae o le i ai i le seminare na fesoasoani ia te au ia iloa lena leo. E ala i le Agaga, ua mafai ai ona ou iloa e moni tusitusiga paia. Ou te iloa e uunaia e le Agaga au ia faailoga ni mau faatasi ai ma faauigaga ma e i ai lava i taimi uma se mafuaaga. O tusitusiga paia e taialaina au pe a ou se, ma latou te aoao mai ia te au. Soo se taimi lava ua i ai sou aso leaga, e mafai ona ou susueina ma avea ai lou aso ia sili atu ona lelei

Shelby L., 16 tausaga, Montana, ISA