O Le Ata Leaga
“O le a ou auauna. Ou te tau mo le mea tonu. O lou Alii Iesu” (Tusipese a Tamaiti, 85).
“Ei, vaai i lenei mea.” Sa toso mai e Jack se fasi pepa sa gaugau mai lana taga. “Sa ou mauaina i se mekasini i lenei taeao.” Sa ia talatalaina ma tuu atu ia Taran.
Ae na iloa vave lava e Taran e le o se mea sa ia manao e vaai i ai. Sa ia liliu ese ma fai atu, “Ou te le manao e vaai i ai.”
Sa faamimigi tauau o Jack ma toe tuu le pepa i totonu o lana taga. “Pepe.”
E lei popole tele i ai Taran.
Ina ua taunuu Taran i le fale, sa ia fesoasoani ia Tina i le faiga o falaoa mo le taumafataga o le afiafi. Sa ia tosoina atu se nofoa i le laulau, ma nonoaina e Tina lona talieleele.
“Tina,” sa ia fai atu ai, “ao ou i ai i le fale o Ian, sa taumafai lana uo e faaali mai ia te au se ata o se tagata e leai ni lavalava. Sa ou liliu ese ma savali ese.”
Sa tuu i lalo e Tina le apa o le paluga ma fusi mai Taran. “O se filifiliga lelei tele lena. Faafetai mo le tauina mai ia te au e uiga i ai.”
“I le afiafi o aiga o le mea lena na e fai mai e fai,” na fai atu ai Taran ao ia popoa ona lima i falaoamata ma sii le paluga i luga o le laulau.
“Ou te fiafia na e manatuaina! Pe o le taimi muamua lena ua faaali atu ai e se tasi ia te oe se ata leaga?”
Na lue atu le ulu o Taran.
“Ia, ou te matua fiafia lava ua e tau maia ia te au. E te iloa e mafai ona e fesili mai ia te au e uiga i soo se mea pe tau mai ia te au soo se mea, a ea? E tusa lava pe na e faia se filifiliga le lelei, ou te manao lava ia ou iloa ina ia mafai ai ona ou fesoasoani atu. Ou te le ita.” Sa ia faapaiina atu sina vaega itiiti o le falaoamata i luga o lona isu.
Sa ataata Taran ma faamaanuminumi lona isu ua falaoamatā. “Ioe. Ou te iloa.”
Ina ua maea le taumafataga o lena po, na fai atu Tama, “I le aso sa taumafai se tasi e faaali atu ia Taran se ata leaga, le ituaiga lea na tatou talanoa i ai i le afiafi o aiga.”
Na lele i luga le lima o Reena i le ea. “Ou te manatua le talanoa e uiga i lena mea!” Sa le lava le matua o Dhara e manatua ai le tele o mea, ae sa luelue mai foi lona ulu.
“O le a la lau mea na fai?” Na fesili atu ai Sonia ia Taran.
“Ou te lei vaai i ai, ma sa ou savali ese,” o le tala lea a Taran.
Sa luelue atu le ulu o Tina. “Ma te matua fiafia lava na fai e Taran se filifiliga lelei. Ma ua ma matuai mitamita lava ia te ia mo le tauina mai ia te au o le mea na tupu.”
Sa aapa atu Tama i le isi itu o le laulau e pa se la lima ma Taran. “Lelei tele, uo.” Na patipati Reena ma Dhara, ma sa tuuina atu e Sonia ia Taran se ataata tele lava.
“O lea la, ina ia faaalia le fiafia ua i ai sa tatou meaai mama faapitoa!” na fai mai ai Tama. Na fiafia tagata uma i lena mea.
Sa tu i luga Tina e toso mai le aisa kulimi i fafo mai le pusaaisa, ae taufetuli atu Taran ma Sonia e aumai ia ipu ma sipuni.
“Ua lelei, uo,” o le tala lea a Tama, ma faasino atu le aisa kulimi ua asu ia Taran. “O le a le lanu e te manao ai?”
A o latou faō ia latou aisa kulimi, na fai atu Tina, “Pau le mea ma te mananao ma Tama ia te outou tamaiti e manatua, afai e te popole pe o i ai ni au fesili, e mafai ona e sau i taimi uma lava ma talanoa mai ia i maua, e tusa lava po o le a se mea e tupu. E faafiafiaina ai i ma’ua.”
“Ma maua ai a matou aisa kulimi?” Na fesili atu ai Sonia ao siiina i luga se sipuni ua tumu i le [aisa kulimi] sukalati.
Na ata leotele Tina. “O nisi taimi. Ae o le mea sili lava ma te maua ai le fiafia. Ma ua lava lena mea.”
Na luelue atu le ulu o Taran a o ia faamaeaina lana u mulimuli o le aisa kulimi. O le tau atu ia Tina na ia maua ai foi le fiafia.