O Leo o Le Au Paia o Aso e Gata Ai
“Ou Te Iloa o Loo Soifua le Atua”
Ata na tusia e Allen Garns
Ou te sau mai Nigeria, o se atunuu e tautatala faa-Peretania, o lea ina ua valaauina a’u e auauna atu i le misiona a Benin Cotonou ma iloa ai o le a ou tautala faaFarani, sa ou popole lava. O le a faapefea ona ou aoao atu le talalelei? E pei ona ou faamoemoeina, sa ou tauivi e aoao le faaFarani ao i ai i le nofoaga autu mo le aoaoina o faifeautalai i Kana. O le tele o taimi ou te lagona ai le toetoe lava a leai se faamoemoe.
Ona oo lea, i la’u eria muamua, sa talosagaina a’u e tuuina atu la’u molimau i le paranesi i le faaFarani! Sa nonofo tagata uma i le filemu a o o’u savali lemu atu i le pulelaa. Sa ou tagoifo i la’u taga mo le molimau puupuu na ou tusia i lalo. Ae ou te lei mauaina! Na lofituina a’u i le fefe i lena lava taimi!
Ina ua ou tilotilo atu i foliga aulelei i oʼu luma, sa faatumulia o’u mata i loimata. Sa matuai tele naua mea na ou manao e faasoa atu, ae ou te lei iloa pe faapefea ona fai atu. Sa ou fai atu na o le mea lava na ou mafaia i le faaFarani: “Ou te iloa o loo soifua le Atua.”
Sa ou saofai ifo i lalo ma i le taimi atoa o le sauniga na totoe, sa ou tatalo ai i lou loto. Sa ou tau atu i le Tama Faalelagi na ou manao moni lava e tautala i le faa-Farani, ma afai o le a ia fesoasoani mai ia te au, o le a ou auauna atu ia te Ia ma lou loto atoa.
I le tolu masina mulimuli ane na asia ai e se ulugalii faamisiona fou mai i le Iunaite Setete le paranesi. Sa talosagaina foi i la’ua e fai a la molimau. Sa savali atu le tamaitai i le pulelaa, na fai atu ni nai upu i le faaFarani, ona tu lea. Na tafe ifo loimata i ona mata. Sa leai se pisa i le falesa. Sa ou savali atu ia te ia ma fesili atu pe mafai ona ou faaliliu mo ia.
“Oi, o le a matagofie tele lena mea, Elder,” o lana tala lea. Sa ou lagonaina le Agaga a o ia tautala faa-Peretania, ma sa ou faamatalaupu i lana molimau, upu i le upu, i le gagana Farani.
Ina ua maea le sauniga sa fai mai le faletua o le peresitene o le paranesi ia te au, “Ou te manatua le umi o le taimi na e faapea mai ai, ‘Ua ou iloa o loo soifua le Atua’ ina ua faatoa e taunuu mai. Ioe, o loo soifua moni lava le Atua ma na Ia pai atu i lou laulaufaiva.”
Ou te iloa e malamalama le Atua i gagana uma ma soo se faafitauli tatou te fetaiai. O loo i ai o Ia iina e fesoasoani pe a tatou tuu atu lo tatou faatuatuaga ia te Ia, ma Na te faamanuiaina a tatou taumafaiga pe a tatou taumafai. Ona sa Ia taliina la’u tatalo, ua mafai ona ou aoaoina atu le talalelei i le faaFarani ma ua faamanuiaina ai lo’u olaga.