“Lesona 24 Anomea mo le Sauniuniga o le Vasega: O Le Perofeta o Iosefa Samita—O Se Tagatavaai Filifilia,” Anomea a le Faiaoga O Faavae o le Toefuataiga (2019)
“Lesona 24 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 24 Anomea mo le Sauniuniga o le Vasega
O Le Perofeta o Iosefa Samita—O Se Tagatavaai Filifilia
Na faamatalaina e le Alii le Perofeta o Iosefa Samita o se “tagatavaai filifilia” o le a aumaia tagata i se malamalama i feagaiga a le Alii (2 Nifae 3:7--8). Ae mai lava i le amataga o le Toefuataiga, na faailoa mai ai e Iosefa Samita ona lagona o le le atoatoa. Aʻo e suʻesuʻeina lenei anomea, mafaufau pe faʻapefea ona e tali atu ma le faʻatuatua i valaʻauga mai le Alii, e ui i ou vaivaiga. Mafaufau foi pe mafai faapefea ona e tali atu ia i latou o le a faitioina Iosefa Samita ona o lona vaivai.
Vaega 1
O le a se mea e mafai ona ou aoao mai ia Iosefa Samita e uiga i loʻu lava gafatia e auauna atu i le Alii?
A o talavou o ia, sa lagona e Iosefa Samita le lofituina i lona valaauga mai le Alii. Sa Ia faapea mai e uiga ia te ia:
Na ou tu na o au, o se talavou e lei aoaoina, e tetee i le atamai faalelalolagi … ma se faaaliga fou. (Aoaoga a Peresitene o le Ekalesia: Iosefa Samita [2007], 60)
O aʼu o se tama lē lauiloa, … ma o oʼu tulaga i le olaga o le ituaiga e faia ai se tama e lē taulia i le lalolagi … o le na faʻaumatia i le tatau ai ona maua sina tausiga lelei e [laʻu] galuega i aso uma. (Iosefa Samita—Talafaasolopito 1:22–23)
Na manatu Iosefa o se “mea ese” le faapea “o tagata maualuga o le a latou iloa lelei e faaosofia ai le mafaufau lautele e faasaga ia te au, ma faia se sauaga matuia” (Iosefa Samita—Talafaasolopito 1:22–23).
Vaai faalemafaufau i lagona na ono maua e Iosefa ao ia faaliliuina le 2 Nifae 3 i le Tusi a Mamona ma aoao mai ia Liae na valoia e Iosefa o Aikupito se “tagata vaai filifilia” i aso e gata ai.
Suesue e Sauniuni ai mo le Vasega
Faitau le 2 Nifae 3:7, 11, 13.
I se faaaliga mulimuli ane, na faamalamalama mai ai e le Alii se tasi mafuaaga na Ia filifilia ai ma valaauina Iosefa e avea ma perofeta o le Toefuataiga:
E moni, ua faapea ona fetalai mai o le Alii ia te oe, laʼu auauna o Iosefa Samita, ua Ou fiafia lava i lau taulaga ma au tautinoga … ; ona o le faamoemoe lea na Ou faatu mai ai oe, ina ia Ou faailoa atu loʼu poto e ala i mea vaivai o le lalolagi. (Mataupu Faavae ma Feagaiga 124:1)
I le faamatalaina o mau mai le 2 Nifae 3, na aoao mai ai e Elder Marcus B. Nash o le Fitugafulu:
Atonu e foliga mai e le talafeagai le faapea o le a valaaulia e le Alii tagata vaivai e faataunuu ai se galuega tele. Ae peitai o i latou e iloaina o latou vaivaiga e mafai ona uunaia e lena lava vaivaiga e saili le malosi o le Alii. O i latou e faapena ona faalotomaualaloina i latou lava i le faatuatua o le a faamalosia e Ia o le e i ai le malosi uma i le lagi ma le lalolagi (tagai Mataio 28:18; Mosaea 4:9).
Mai le taimi o lona talavou, na alu atu ai Iosefa Samita i le Alii i nei tulaga. …
Na faamatalaina e Iosefa o ia lava “o se tama le lauiloa … o se sa faamalosia i le tatau ai ona maua o ni nai mea iti e ola ai i ana galuega i aso taitasi” (Iosefa Samita—Talafaasolopito 1:23). Na fanau mai o ia i se tulaga maualalo o le olaga ma le faatapulaaina o aoaoga aloaia. …
Na lagona tele e Iosefa le le lava o le aoga lea na ia aue ai i se taimi i le maileia ai i totonu “o le tamai falepuipui vaapiapi e toetoe lava a atoatoa le [sic] pogisa o le pepa peni ma le vaitusi ma se gagana afaafa e salalau ma le le atoatoa.” E ui lava i lea, na valaaulia o ia e le Alii e faaliliu le Tusi a Mamona—o laupepa uma e 588 o le tusi e pei ona uluai lolomiina—lea na ia faia i le itiiti ifo ma le 90 aso! …
Ioe, o se autu o le Tusi a Mamona—ma le olaga o le Perofeta o Iosefa—e faapea o le vaivai e sailia ma le lotomaualalo le Alii i le faatuatua e faia ia malolosi, e oo lava i le malolosi tele, i le galuega a le Alii. O lenei faamalosia o le a tupu e oo lava i mea e foliga mai e laiti. …
… O loo i ai se isi lesona, e sili atu le patino: pe afai o i tatou, e pei o Iosefa, o le a iloaina o tatou vaivaiga ma liliu atu i le faatuatua i le Alii ma o tatou loto atoa, ma naunau e faia Lona finagalo, o i tatou foi o le a faia ia malolosi mai i vaivaiga. E le faapea la e aveesea le vaivaiga i le faaletino—ae o lona uiga e faapea o le a faamalosia e le Atua sea ituaiga o tagata. (“Iosefa Samita: Malosiaga Mai i Vaivaiga,” Ensign, Dec. 2017, 55–56, 58)
Mafaufau Loloto a o Sauniuni mo le Vasega
O le a se mea e mafai ona e aoaoina mai le valaauina e le Alii o Iosefa Samita, o se tagata faaletino ma vaivaiga, ona faamalosia lea o Iosefa e fai Lana galuega?
Vaega 2
O le a le mea na fai mai ai i latou na masani lelei ia Iosefa Samita e uiga ia te ia ma lona tagata?
Na folafola atu e le Alii ia Iosefa o Aikupito o ana fanau o le a sili ona taua le Perofeta o le Toefuataiga (tagai 2 Nifae 3:7). Sa folafola mai Peresitene Dallin H. Oaks o le Au Peresitene Sili:
O tagata na latou iloa lelei Iosefa na tutu latalata atu ia te ia i le taitaiga o le Ekalesia ma alolofa ma lagolagoina o ia o se perofeta. O lona uso o Ailama na filifili e oti i ona tafatafa. O Ioane Teila, o le sa faatasi foi ma ia ina ua tagatavaleina, sa faapea mai: ‘Ou te molimau atu i luma o le Atua, agelu, ma tagata uma, o ia o se tagata lelei, mamalu ma mama …—ma o lona tagata mamalu ma aloaia sa sili atu mea na ia faia—ma sa ia ola ma oti o se tagata o le Atua’ (The Gospel Kingdom [1987], 355; tagai foi MF&F 135:3). Na folafola mai Polika Iaga: “Ou te manatu e leai se tagata e soifua i le lalolagi e sili atu lona iloa o [Iosefa Samita] nai lo a’u; ma ou te fia faamamafaina atu e faapea, sei vagana ai lava Iesu Keriso, e leai se isi tagata na soifua pe o le a soifua mai i lenei lalolagi e pei o ia” ( i le Journal of Discourses, 9:332). (Dallin H. Oaks, “Iosefa, Le Tagata ma le Perofeta,” Ensign, May 1996, 71)
Na taʻua e Jane Snyder Richards e uiga i uiga ma amio a Iosefa:
O [Iosefa Samita] o se tasi o tagata aupito sili ona faamasani na avea ma oʻu faamanuiaga le feiloai i ai. … I le avea ma Tagatavaai ma Talifaaaliga sa lototoa ma lē fefe e tautala atu, ae na lotomaualalo, ma e lei mafaufau o ia e sili atu nai lo o le fofoga, o le na fetalai i ai le Atua. I le avea ai ma Taitai o ona tagata, o ia o se tagata malosi ma alualu i luma ae e tauagafau i taimi uma ma mafaufau ia i latou ma o latou tulaga faigata. (Jane Snyder Richards, i le “Joseph Smith, the Prophet,” Young Woman’s Journal, Dec. 1905, 550)
Na toe manatua e Edwin Holden na faatumulia le Perofeta i le alofa o le Atua, ma naunau e siitia ma faamanuia isi:
I le 1838, o Iosefa ma nisi o alii talavou sa taaalo i taaloga eseese i fafo, o se tasi o taaloga o se taaloga e faaaoga ai le polo. Na amata ona latou vaivai. Na ia vaai i ai, ma valaau faatasi i latou sa ia fai mai: “Sei o tatou fausia se fale laau.” O lea na latou o ai, Iosefa ma alii talavou, e fausia se fale laau mo se fafine ua oti lana tane. Na faapena le auala a Iosefa, e fesoasoani i soo se mea na te mafaia. (The Juvenile Instructor, Mar. 1, 1892, 153)
Na tusi Eliza R. Snow e uiga i le lotomaualalo ma le faamaoni o le Perofeta:
Sa ou nofo i le aiga o Iosefa Samita, ma sa ou aoaoina le a’oga a lona aiga, ma sa ou maua le tele o avanoa e maka ai lana “savali i aso uma ma talanoaga,” o se perofeta a le Atua; ma o le tele lava o lo’u masani ia te ia, o le tele foi lea o lo’u talisapaia o ia. … I ana tapuaiga sa ia lotomaualalo e pei o se tamaitiiti. (Eliza R. Snow, “Sketch of My Life,” Relief Society Magazine, Mar. 1944, 136)
O Mary Frost Adams sa manatua se tasi o mea lelei na faia e Iosefa:
Aʻo avea Iosefa ma pulenuu o Navu, na puʻeina ai se tagata uliuli o le Au Paia o Aso e Gata Ai, o Anthony, mo le faatauina atu o le ‘ava malosi i le Sapati, lea na tetee i le tulafono. Na faia e Anthony e sue ai le tupe e totogi ai le saolotoga o lona alo sa avea ma pologa i le itu i Saute. Sa ia faatauina le la saolotoga ma lana ava ma ua mananao nei e aumai la laua tama e faatasi ma i laua. E ui lava i le taua o le mafuaaga a Anthony, ae na faapea mai le Perofeta, “Faamalie atu Anthony, ae e tatau ona tausia le tulafono, ma o le a matou tuuina atu se sala tupe.” Ae peitai, “o le aso na sosoo ai sa tuuina atu ai e Uso Iosefa ia Anthony se solofanua lelei, faatonu o ia e faatau atu, ma faaaoga le tupe na maua mo le faatauina mai o le tamaitiiti.” (“Joseph Smith, the Prophet,” Young Woman’s Journal, Dec. 1906, 538)
Mafaufau Loloto a o Sauniuni mo le Vasega
O le a se mea ua e aoaoina e uiga i le amio a Iosefa Samita mai tala a i latou na iloaina o ia? O a ni ou lagona ma sau molimau e uiga i le Perofeta o Iosefa Samita?
Vaega 3
E faapefea ona ou tali atu pe a ou feagai ma faamatalaga le lelei e uiga i le Perofeta o Iosefa Samita?
E tusa lava pe na o le amataga o le galuega a Iosefa Samita e toefuatai le talalelei, na valoia o le toatele o le a tautatala faasaga ia te ia ma molia o ia i mea ma faamoemoega leaga . Na tusia e Iosefa Samita i lana talafaasolopito se valoaga na tuuina mai e le agelu o Moronae ina ua ia faaali atu ia Iosefa i le 1823. I lena taimi, na o le 17 tausaga o Iosefa.
Suesue e Sauniuni ai mo le Vasega
Suesue le Iosefa Samita—Talafaasolopito 1:33.
Na fautua mai e Elder Neil L. Andersen o le Korama a Aposetolo e Toasefululua auala e ono tali atu ai le Au Paia o Aso e Gata Ai i faitioga e faasaga i le Perofeta o Iosefa Samita:
Pe tatau ea ona tatou maofa i le leaga na tauina mai faasaga ia [Iosefa Samita]? Na taʻua le Aposetolo o Paulo o le vale ma le taufaasese [tagai Galuega 26:24]. O lo tatou Faaola Pele, le Alo o le Atua, sa faailogaina o se tagata faaloloto, inu uaina, ma ua i ai le temoni [tagai Mataio 11:19; Ioane 10:20]. …
O le toatele o i latou o e le amanaiaina le galuega o le Toefuataiga e le talitonu faapea o loo talanoa mai tagata faalelagi i tagata i le fogaeleele. Ua latou fai mai e le mafai ona auina mai e se agelu ni papatusi auro, ma faaliliuina i le mana o le Atua. Mai lena lē talitonu, sa vave ai lava ona latou teenaina le molimau a Iosefa, ma o le mea e leaga ai, o nisi sa latou tautino ai e faamaasiasi le Perofeta ma tauleagaina lona tagata. …
O fesili e uiga i le tulaga faaletagata o Iosefa, lea ou te fia faasoa atu ai ni upu a le faitau afe o e sa iloa patino o ia ma o e sa tuuina atu o latou ola mo le galuega lea sa ia fesoasoani e faatulaga. …
Atonu tatou te faamanatu atu i le tagata suesue faamaoni o faamatalaga o loo i le Initoneti e le o faamamaeseina ai ia faamatalaga le “sa’o”. O nisi faamatalaga, e tusa lava po o le a le faatalitonuina, e le moni lava. …
Atonu e mafai ona tatou faamanatu atu i le tagata suesue faamaoni e faapea o nisi o faamatalaga e uiga ia Iosefa, e ui e moni, ae atonu o loo ono matua ese lava le talaaga i lena taimi ma le tulaga. …
E manaomia e tagata talitonu taitasi se faamaoniga faaleagaga e uiga i le misiona paia ma le ituaiga tagata e i ai le Perofeta o Iosefa Samita. E moni lenei mea mo augatupulaga uma. O fesili faaleagaga e talafeagai ma tali faaleagaga mai le Atua. …
E mafai ona eseese tulaga e oo mai ai ia i tatou taitoatasi se molimau i le Perofeta o Iosefa Samita. Atonu e oo mai a o e tootuli e tatalo, ole atu i le Atua ina ia faamaonia mai o ia o se perofeta moni. E ono oo mai a o e faitau i le tala a le Perofeta e uiga i le Uluai Faaaliga. E mafai ona totoina se molimau i lou agaga a o e faitauina pea lava pea le Tusi a Mamona. … Faatasi ai ma le faatuatua ma le loto faamaoni, o le a faamalosia ai lau molimau i le Perofeta o Iosefa Samita. (Neil L. Andersen, “Iosefa Samita,” Ensign po o le Liahona, Nov. 2014, 28–30)
Mafaufau Loloto a o Sauniuni mo le Vasega
Aisea e te manatu ai e taua le aofia ai o se suʻesuʻega o punaoa faatuatuaina faatasi ai ma le tatalo pe a saili e tali fesili e uiga ia Iosefa Samita ma lana misiona faaperofeta? Aisea e te manatu ai o fesili e uiga ia Iosefa Samita ma lana misiona faaperofeta e talafeagai mo tali faaleagaga mai le Atua?