“Lesona 26 Anomea mo le Sauniuniga o le Vasega: O Le Ekalesia i Sisifo,” Anomea a le Faiaoga O Faavae o le Toefuataiga (2019)
“Lesona 26 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Togitogiga o le Aai o Sate Leki i le 1853, saunia e Frederick Piercy
Lesona 26 Anomea mo le Sauniuniga o le Vasega
O Le Ekalesia i Sisifo
O le Au Paia o e na faapotopoto i le vanu o le Aai Tele Sate Leki ma nuu lata ane sa feagai ma ni luitau ina ua mavae lo latou taunuu mai. O nei mea e aofia ai le vevela o le tau, alisi na aia fualaau aina, lamala, ma le fiaai. Ae ui i lea, o Polika Iaga “a itiiti sona popole i le totoina o laau ma tupe nai lo le fesoasoani atu i ona tagata e avea ma malo paia.
Sa ia iloa mai le poto masani o le a latou tuputupu ae mai le galue malosi ma talia tiutetauave. ‘O se nofoaga lelei lenei e fai ai le Au Paia’ na ia taʻu atu i se faapotopotoga o tagata o le ekalesia i le Aai o Sate Leki i le 1856 (DNW [Deseret News Weekly], 10 Sept. 1856, 5)” (Aoaoga a Peresitene o le Ekalesia: Polika Iaga [1997], 9). O le toatele o le Au Paia na faaalia le tele o le faatuatua i le Alii i nei uluai tausaga, e ui i nei tofotofoga. O le mea e faanoanoa ai, o lenei vaitau i le talafaasolopito o le Ekalesia e aofia ai foi le faalavelave matautia o le Fasiotiga Tagata i Mountain Meadows, lea e mafai ona aoao mai ia i tatou lesona taua e mafai ona tatou faaaogaina i o tatou aso.
Vaega 1
O le a se mea e mafai ona ou aoao mai i uluai Au Paia e uiga i le auauna atu i le Alii ma le fausiaina o Lona malo i aso nei?
I le taumalulu o le 1848-49 ina ua malulu le tau ma e tau le maua meaai, o nisi o le Au Paia na mananao e siitia atu i Kalefonia ma galulue i maina auro. Na valoia e Peresitene Polika Iaga:
“O nisi na fesili mai ia te aʻu e uiga i le malaga atu [i Kalefonia]. Sa ou taʻu atu ia i latou ua tofia e le Atua lenei nofoaga [o le Faatanoa Tele] mo le faapotopotoina o lana Au Paia, ma o le a sili atu ona e manuia iinei nai lo o le agai atu e faigaluega i maina auro. … Ua faaali mai e le Atua ia te au o le nofoaga lenei e aumau ai Ona tagata, ma o iinei o le a latou manuia ai; … O le Atua o le a faatonuina le tau ma o le a tatou fausia se aai ma se malumalu i le Atua Silisiliese i lenei nofoaga. O le a tatou faalautele atu o tatou nofoaga i sasaʻe ma sisifo, i matu ma saute, ma o le a tatou fausia taulaga ma aai i le fiaselau, ma le faitau afe o le Au Paia o le a faapotopoto mai atunuu o le lalolagi.” (In James S. Brown, Life of a Pioneer: Being the Autobiography of James S. Brown [1900], 121–22)
E oo atu i le taimi o le maliu o Polika Iaga i le 1877, na vaai le Au Paia o Aso e Gata Ai i le faataunuuina faavavega o lenei valoaga. O lo latou faatuatua i le Alii ma Lana perofeta na musuia ai le Au Paia paionia e 60,000 i le 70,000 e malaga atu i le Vanu o Sate Leki, lea na latou faavaeina ai i le va o le 350 ma le 400 nuu i Utah, Arizona, Kalefonia, Idaho, Nevada, ma Wyoming.
O le Tupe Faaagaga mo Femalagaaiga na faavaeina e fesoasoani ai i tagata matitiva o le Au Paia o Aso e Gata Ai e faatupeina ai femalagaaiga a le 30,000 Au Paia mai Peretania, Scandinavia, Suitiselani, Siamani, ma Netherlands. Sa talai atu e faifeautalai le talalelei a Iesu Keriso i le lalolagi atoa. Na faapaiaina e le Au Paia o latou taimi e fausia ai malumalu i le Aai o Sate Leki, Logan, ma St. George. O le mea sili ona taua, na tuua e le Au Paia se talatuu o le faatuatua, ositaulaga, ma le tuuto faamaoni i le galuega a Iesu Keriso ma Lana talalelei toefuataiina. (Tagai “Brigham Young,” Newsroom Topics, newsroom.churchofjesuschrist.org.)
Filifili se tasi o tala o loo i lalo e uiga i le Au Paia faamaoni na faapotopoto i Iuta i uluai aso o le Ekalesia. Faitau le tala ma sau saunia i le vasega e faasoa atu lesona po o mataupu faavae ua e aoaoina mai ai e uiga i le auauna atu i le Alii ma le fausiaina o Lona malo i aso nei.
Lucy Meserve Smith
Faitau e uiga i le agalelei o Lucy Meserve Smith ma isi tamaitai o le Au Paia o Aso e Gata Ai o e na tuuina atu le toomaga i paionia o taavaletosolima, i le O Afafine i Lo’u Malo: O Le Talafaasolopito ma le Galuega a le Aualofa [2011], 36–37. Amata i le palakalafa lea e amata i le “Mo se faataitaiga, o Lucy Meserve Smith, na taitaia se vaega … ,” ma faitau seia oʻo i le faaiuga o le mataupu.
John Moyle
Faitau le tala musuia a John Moyle, o lē na malaga atu i Sate Leki e faigaluega i le malumalu i vaiaso taitasi e ui lava i le toesea o lona vae i se faalavelave, i le saunoaga a Dieter F. Uchtdorf “-Faamaualuga le Mea E Te Tu AI” (Ensign po o Liahona, Nov. 2008, 55–56). Faitau le vaega ua faaautuina “O le Faataitaiga a John Rowe Moyle.”
Pe matamata le vitio “Only a Stonecutter” (15:00).
Joseph Millett
Faitau e uiga i le naunautai o Joseph Millett e tuuina atu le falaoamata i se alii na taitaiina atu ia te ia e le Alii: Boyd K. Packer, “A Tribute to the Rank and File of the Church,” Ensign, May 1980, 63. Amata i le parakalafa lea e amata i le “Sei ou sii maia mai le api o talaaga o Iosefa Millett … ,” ma faaiu i le parakalafa e amata i le “Na silafia e le Alii ia Iosefa Millett.”
Pe matamata le vitio “The Joseph Millett Story” (6:14).
Charles Walker ma Charles Rich
Faitau e uiga i le faatuatua o ni alii se toalua ma o latou aiga o e na taliina le valaau e faatu ni nofoaga fou mo le Au Paia ua faapotopoto, i le O Lo Tatou Tupuaga: O Se Talafaasolopito Otooto O Le Ekalesia a Iesu Keriso o le Au Paia o Aso e Gata Ai (1996), 88–89. Faitau mai le itulau 88, amata i le parakalafa o loo amata i le “I le konafesi aoao, o Peresitene Iaga … ,” ae faagata i le parakalafa o loo i le itulau e 89 o loo amata i le “Na tele ni luitau …”
Vaega 2
O le a le mea na mafua ai le Fasiotiga Tagata i Mountain Meadows?
I le vaitaimi o le 1850, o feeseeseaiga ma le le lelei o fesootaiga na mafua ai le faatupuina o le feeseeseaiga i le va o le Au Paia o Aso e Gata Ai ma ofisa o le malo o le Iunaite Setete. I le talitonu sese ai o le Au Paia o le a fouvale, na auina atu ai e le Peresitene o le Iunaite Setete o Amerika o James Buchanan le 1,500 o le autau i le Aai o Sate Leki e taofi le tetee.
I lauga i le Au Paia, sa faamatalaina ai e Peresitene Iaga ma isi taitai o le Ekalesia ia fitafita na o atu o ni fili. Na latou fefefe nei tuliaese e le autau le Au Paia mai le Teritori o Iuta, e pei ona tulieseina ai i latou muamua mai Ohaio, Misuri, ma Ilinoi. Sa faatonuina e Peresitene Iaga le Au Paia ina ia faasaoina saito ina ia latou maua meaai e ai pe afai latou te manaomia e sosola mai le vaegaau. I le avea ai ma kovana o le Teritori o Iuta, sa ia faatonuina ai foi le autau a le teritori e sauniuni e puipui le teritori. Ina ia aloese mai le faamasa’a toto, o le vaega atoa o le Au Paia na saunia e o ese mai o latou fale ma fanua ma faaumatia pe a manaomia.
I lea taimi, o se solo a taavalesolosfanua na faimalaga i sisifo mai Arkansas i Kalefonia na ulufale atu i Iuta. Sa le fiafia nisi o tagata o le solo a taavale solofanua ona sa faigata ona latou faatauina mai ni saito sa latou manaomiaina tele mai le Au Paia.
Sa alia’e ni feeseeseaiga i le Aai o Cedar, o le nofoaga mulimuli lea i Iuta e ui atu ai i Kalefonia. Na taufaamata‘u ane nisi o tagata o le solo a taavale solofanua o le a au faatasi ma fitafita a le malo o loo agai mai e faasagatau i le Au Paia. Ina ua tuua e le vaega a taavale solofanua le taulaga, o nisi o tagata na nonofo ma taitai i Cedar City na mananao e tuliloa ma faasalaina alii na faamataʻuina ma faatiga ia i latou.
Sa talosagaina e Isaac Haight, o le pulenuu o le Aai o Cedar, taitai o le autau, ma o le peresitene o le siteki, le faatagaga mai le taitai o le autau a tagata o le aai, o le sa nofo i le pitonuu lata ane o Parowan, e valaau atu i le autau a tagata o le aai e faafetaiai le au faamatau a le solo o taavale solofanua. Ae ui i lea, na faafitia e Dame la latou talosaga ma faatonuina i latou ia aua nei ano i le taufaamatau a le au malaga.
Nai lo le mulimuli i lenei faʻatonuga, na fuafua e Isaako Haight ma isi taitai Cedar City e faatauanau tagata Initia Paiute i le lotoifale e osofaia le solo taavale solofanua, ave povi, ma fasiotia nisi po o alii uma. Sa fesili atu Haight ia John D. Lee, o se tagata o le Ekalesia i le lotoifale ma se taitai militeli, e taitaia Initia Paiute i lenei osofaiga. Na latou taupulepule e tuua’i i le au Paiute mo le osofaiga.
Na faailoa mai e Isaac Haight lana fuafuaga i se aufono a le Ekalesia i le lotoifale, nuu, ma taitai militeli. O nisi sui o le aufono na matua le ogatasi ma le fuafuaga a Haight ma fesili pe na ia talanoa ia Peresitene Polika Iaga. O le fai mai na te le’i logoina, na malie ai Haight e auina atu se avefeau i le Aai o Sate Leki ma se tusi e faamatala ai le tulaga ma fesili i ai i le mea e tatau ona fai. O le a manaomia ai e le avefeau pe a ma se vaiaso le alu atu ai i le Aai o Sate Leki ma toe foi mai ma faatonuga a Peresitene Iaga.
E le’i leva lava ona auina atu e Isaac Haight le avefeau, ae osofaia loa e John D. Lee ma se vaega o tagata Initia le tolauapiga a tagata malaga i se nofoaga na ta’ua o Mountain Meadows. Na taumafai Lee e faafoliga e peiseai na aofia ai na o le au Paiute mai le lotoifale i le osofaiga. O nisi o le au malaga sa fasiotia pe faamanualia, ae o e na totoe sa tau ma tuliesea ai tagata na osofaia i latou, ma faamalosia ai Lee ma tagata Initia e toe foi. Sa vave ona toso mai e tagata malaga a latou taavale solofanua i se li’o fufusi mo le puipuiga.
I se tasi taimi, sa iloa atu ai e ni alii se toalua o le au malaga le autau o le Aai o Cedar. Sa tafana atu i laua e tagata o le autau a le nuu, ma fasiotia ai le toatasi. O le isi alii na sola.
I se taumafaiga e taofia le tala mai le salalau atu e faapea sa aafia le Au Paia o Aso e Gata Ai i osofaiga o le solo o taavale solofanua, sa faia ai e Isaac Haight, John D. Lee, ma isi taitai o le Ekalesia i le lotoifale ma taitai o le autau a tagata o le nuu, se fuafuaga e fasioti tagata uma na totoe o le au malaga vagana ai tamaiti laiti. “Na latou toe sailia foi le faatagaga a Dame e valaau atu le militeli, ma toe faia foi e Dame se … fonotaga, lea na tonu ai e tatau ona auina atu alii e fesoasoani i le au malaga puapuagatia ia faaauau pea i latou i le filemu. Mulimuli ane, na lagona e Haight le faanoanoa, ‘Ou te avatua se lalolagi pe ana i ai ia te au, pe ana matou lagolagoina le faaiuga a le aufono’” (Richard E. Turley Jr., “Fasiotiga Tagata i Mountain Meadows,” Liahona, Se-t. 2007, 18).
Ina ua maea le fono a le aufono, na faamanuiaina Isaako Haight i le faatalitonuina o Dame e toe mafaufau i le faaiuga a le aufono, ma na tuua ai e Haight le fonotaga ma le mafaufau ua ia maua le faatagaga e faaaoga ai fitafita e faatino ai la latou fuafuaga. Na oo atu John D. Lee i le au malaga ma faapea atu, o le a puipui i latou e le autau a tagata o le nuu mai nisi osofaiga e ala i le taitai saogalemu atu o i latou e toe foi i le Aai o Cedar.
Ao savavali atu le aumalaga agai i Cedar City, na liliu atu alii o le militeri ma tafana i latou. O nisi Initia na aumaia e tagata o le nuu na feosofi mai nofoaga na lalafi ai ma auai i le osofaiga. Mai le pe a ma le 140 o le au malaga o e sa avea ma vaega o le solo o taavale solofanua, sa na o le 17 le fanau laiti sa faasaoina.
O le lua o aso talu ona uma le fasiotiga tagata, ae taunuu loa le tali a Peresitene Iaga, ua faatonuina ai taitai i le lotoifale e tuu le solo o taavale solofanua e o ma le filemu. “Ina ua faitau Haight i upu a Iaga, na ia tagi lotulotu e pei o se tamaitiiti ma na pau upu na ia mafaia, ‘Tuai tele, tuai tele’” (Richard E. Turley Jr., “Fasiotiga Tagata i Mountain Meadows,” Liahona, Se-t. 2007, 20).
O filifiliga a nisi o taitai o le Au Paia ma e na nonofo i le Teritori i Iuta i saute, na oo atu ai i le faalavelave matautia o le Fasiotiga Tagata i Mountain Meadows. I se faatusatusaga, sa foia e taitai o le Ekalesia ma taitai o le teritori i le Aai o Sate Leki le feteenaiga ma le malo o le Iunaite Setete e ala i talanoaga ma soalaupulega filemu i le 1858. I le taimi o lenei feteenaiga—lea na ta’ua mulimuli ane o le Taua a Iuta—sa auai fitafita a le Iunaite Setete ma autau a tagata o le nuu o Iuta i gaoioiga soonafai ae sa le’i tau lava.
I le lauga atu ai i le nofoaga faamanatu o le Fasiotiga Tagata i Mountain Meadows i le aso 11 Setema, 2007, na saunoa ai Peresitene Henry B. Eyring o le Au Peresitene Sili:
O le talalelei a Iesu Keriso ua tatou taliaina, e inoino ma e le fiafia i le fasiotia faalealofa o alii, tamaitai ma tamaiti. E moni lava, na te lagolagoina le filemu ma le faamagalo atu. O le mea na faia ii i le tele o tausaga ua mavae e tagata o le Ekalesia na faaalia ai le matautia ma le le maalofia o le le ola i aoaoga ma uiga faaKerisiano. … Matou te faaalia le faanoanoa tele mo le fasioti tagata na faia i lenei vanu … ma mo le le mafaamatalaina mafatiaga na oo i ai tagata na aafia i lena taimi ma o latou aiga e oo mai i le taimi nei. (Henry B. Eyring, “150th Anniversary of Mountain Meadows Massacre,” newsroom.ChurchofJesusChrist.org)
Mafaufau Loloto a o Sauniuni mo le Vasega
O a nisi o lesona e mafai ona tatou aʻoaʻoina mai i filifiliga leaga na taʻitaʻia ai le Fasiotiga Tagata i Mountain Meadows? Faitau le Faataoto 28:13 ma le 3 Nifae 12:24–25, 43–44, ma faailoa mataupu faavae pe afai e mulimuli ai e mafai ona taofia lenei faalavelave. Mafaufau pe faapefea e le ola ai i nei mataupu faavae ona taofia le loto tiga le fuafuaina po o se faʻalavelave i lou lava olaga.