Anomea a le Faiaoga Faatomuaga i le O Faavae o le Toefuataiga (Mataupu Faalelotu 225)
“Anomea a le Faiaoga Faatomuaga i le O Faavae o le Toefuataiga (Mataupu Faalelotu 225),” Anomea a le Faiaoga O Faavae o le Toefuataiga (2019)
“Anomea a le Faiaoga Faatomuaga i le O Faavae o le Toefuataiga (Mataupu Faalelotu 225),” Anomea a le Faiaoga O Faavae o le Toefuataiga
Anomea a le Faiaoga Faatomuaga i le O Faavae o le Toefuataiga (Mataupu Faalelotu 225)
Anomea a le Faiaoga Faatomuaga i le O Faavae o le Toefuataiga (Mataupu Faalelotu 225)
Faafeiloai atu i le O Faavae o le Toefuataiga! Faafetai atu mo le taliaina o le avanoa e fesoasoani ai i au tamaiti aoga e faateleina ai lo tatou liua ia Iesu Keriso ma Lana talalelei toefuataiina.
O loo faapea mai le Sini Faamoemoeina o Seminare ma Inisitituti o Mataupu Faalelotu:
O lo tatou faamoemoega o le fesoasoani lea i le autalavou ma talavou matutua ia malamalama ma faalagolago i aoaoga ma le Togiola a Iesu Keriso, ia agavaa mo faamanuiaga o le malumalu, ma ia saunia i latou lava, o latou aiga, ma isi mo le ola e faavavau faatasi ma lo latou Tama oi le Lagi. (Aoao Atu ma le Aoao Mai o le Talalalelei: O Se Tusitaulima mo Faiaoga ma Taitai i le Seminare ma Inisitituti o Mataupu Faalelotu [2012], 1)
O a ni faamoemoega o lenei kosi?
Ua mamanuina lenei kosi ia fesoasoani i tamaiti aoga:
E faamalosia a latou molimau ia Iesu Keriso ma Lana talalelei toefuataiina.
Faateleina lo latou naunau ma taumafaiga ia ola i mataupu ma aoaoga faavae o le talalelei ma avea atili e pei o le Tama Faalelagi ma Iesu Keriso.
Faaaoga mataupu faavae o le mauaina o le malamalama faaleagaga ma maua aafiaga i le iloiloina o punavai o faamatalaga.
Faailoa ma faamalamalama aoaoga faavae, faaaliga, mea na tutupu i le talafaasolopito o le Toefuataiga.
O faapefea ona faatulaga le tusi lesona lenei?
O anomea o le tusi lesona lenei ua mamanuina ia fesoasoani ai i tamaiti aoga ia maua ni aafiaga anoa ma malamalama i fafo ma totonu o le potuaoga. O lesona taitasi ua i ai lea e faaaoga mo sauniuniga ma anomea a le faiaoga.
Anomea mo Sauniuniga
O anomea mo sauniuniga ua faamoemoe ia suesue e oe ma au tamaiti aoga i sauniuniga mo le vasega. O loo aofia ai anomea ma ata talafeagai o le talafaasolopito, aoao mai tusitusiga paia ma taitai o le Ekalesia, ma se vaega “Manao Pea i Nisi Mea” o loo faailoa ai ni punaoa faaopoopo e faatatau i le lesona.
O anomea mo sauniuniga o loo i ai foi ni fesili ma gaoioiga ua faamoemoe ia fesoasoani e faaloloto ai aafiaga faaleaoaoga o tamaiti aoga i totonu o le vasega. Mo se faataitaiga, i anomea mo sauniuniga mo le lesona 6, “O Le Tusi a Mamona—o le Maa’au’au o la Tatou Tapuaiga,” ua tuuina atu ai ia te oe ma au tamaiti aoga le avanoa e suesue ai aoaoga mai taitai o le Ekalesia e faatatau i le ala e fesoasoani ai le Tusi a Mamona ia tatou faalatalata atili atu i le Atua ma faamanuia ai o tatou olaga i ni auala faaopoopo:
Ua faapefea ona fesoasoani ia te oe le suesue ma le ola ai i aoaoga o loo maua i le Tusi a Mamona, e te latalata atili atu ai i le Atua? O a ni fuaitau o mau mai le Tusi a Mamona ua fesoasoani ia te oe e avea atili ai e pei o Ia? Tusi au tali i fesili nei i le avanoa ua tuuina atu. Sau saunia i le vasega e faasoa atu ou manatu.
Na aoao mai Elder Kim B. Clark o le Fitugafulu e uiga i sauniuniga ma taumafaiga faamaoni e manaomia e aoao loloto ai:
Ata
Elder Kim B. Clark
Afai e te manao moni lava e aoao loloto i ai, afai o lou loto ma lou mafaufau ua matala i le aoaoina, ma afai e te galue ai i lena manao, o le a faamanuiaina oe e le Alii. Pe a e faia lau vaega—tatalo ma le faatuatua, saunia, suesue, auai ma le naunautai, ma faia le mea sili—o le Agaga Paia o le a aoaoina oe, faalauteleina lou malosi e faatino ai mea ua e aoaoina, ma fesoasoani ia te oe e avea ma tagata e finagalo le Alii ia avea ai oe.. (“OLe Aoaoina ma le Agaga Atoa,” Ensign po o le Liahona, Aok. 2017, 27)
Anomea a le Faiaoga
O anomea a le faiaoga ua mamanuina e fesoasoani i faiaoga e valaaulia tamaiti aoga e talanoa i mea na latou aoaoina i a latou sauniuniga ma fesoasoani i tamaiti aoga e faaloloto o latou malamalama ma molimau i le Alii ma Lana talalelei toefuataiina. I le faatomuaga o lesona taitasi o le a e maua ai se faamatalaga o taunuuga faamoemoeina o le lesona. O loo sosoo ma lenei mea ia manatu fautuaina mo aoaoga lea ua tuuina atu ai le fausaga o le lesona, anomea, fesoasoaniga mo talanoaga, ma manatu mo le faaaogaaga.
O le vaega o loo i lalo o se faataitaiga o le ala e utuvai mai ai anomea a le faiaoga i sauniuniga a tamaiti aoga, e mai foi i le lesona 6:
Vaevae tamaiti aoga i ni vaega toalaiti, ma valaaulia i latou e faasoa pe faamalamalama mai ni fuaitau o le Tusi a Mamona na fesoasoani ia i latou e faalatalata atili atu ai i le Atua. (O tamaiti aoga sa suesueina mea e faaaaoga mo sauniuniga, e mafai ona tagai atu i mea na latou tusia i le faaiuga o le vaega 4.) Atonu foi e te valaaulia tamaiti aoga e soalaupule i a latou vaega, auala na fesoasoani ai le ola i aoaoga o loo tusifaamaumauina i fuaitau na latou filifilia, ia latou avea atili ai e pei o Iesu Keriso.
A o e faitau i lesona o loo i le tusi lesona lenei, ia nofouta i auala o loo utuvai soo mai ai anomea a le faiaoga i sauniuniga a tamaiti aoga. O le masani ona faalagolago i sauniuniga a tamaiti aoga, o le a fesoasoani latou te lagona ai le taua o le saunia mo vasega uma lava.
O mea foi e faaaoga a le faiaoga e faataitai ai foi mea taua o le aoao atu ma le aoaoina o le talalelei (tagai Gospel Teaching and Learning, 10, 23–31, 38–41). O nei mea e aofia ai le fesoasoani i tamaiti aoga ia iloa malamalama, ma lagona le moni ma le taua o aoaoga ma mataupu faavae o le talalelei a Iesu Keriso, faapea foi ma le valaaulia o i latou e faamalamalama, faasoa, ma molimau atu.
Ata
aikona, mafaufau loloto
Mafaufau Loloto a o Sauniuni e Aoao Atu le Kosi Lenei
Faaalu se minute e autilo ai i se lesona se tasi pe lua e faamasani ai i i le ala o loo mamanuina ai anomea mo sauniuniga ma anomea a le faiaoga, ina ia faaaogaina faatasi a o e sauni e aoao atu. O a nisi o auala e te ono fesoasoani ai i tamaiti aoga ia saunia ina ia mafai ona latou maua se aafiaga faatamaoaigaina i le vasega?
E mafai faapefea ona ou taulai atu i tamaiti aoga ma fesoasoani ia latou maua se aafiaga anoa i lenei kosi?
O le a e faamanuiaina au tamaiti aoga e ala i le faamoemoeina ma le faamalosiauina o i latou e faataunuu o latou matafaioi o ni tagata aoao i fafo ma totonu o le potu aoga. O nisi o auala e mafai ona e faia ai lenei mea o le faalagolago lea i sauniuniga a tamaiti aoga, valaaulia i latou e fai ni fesili e uiga i anomea mo sauniuniga po o le autu o le lesona, tuu atu ia i latou ni avanoa e faamalamalama ai aoaoga faavae ma mataupu faavae i a latou lava upu, ma ia faasoa atu ni aafiaga talafeagai ma ni molimau ma valaaulia i latou ia ola atoatoa atili i upumoni o le talalelei toefuataiina.
Na aoao mai Elder Jeffrey R. Holland o le Korama a Aposetolo e Toasefululua:
Ata
Elder Jeffrey R. Holland
E mafai ona avea i tatou ma ni faiaoga e sili atu le malolosi nai lo nisi o taimi. I le faia ai o se galuega faigata faapena, faamolemole … ia manatua o le tagata aoga e le o se koneteina e faatumuina; o le tagata aoga o se afi e faamumuina. (Jeffrey R. Holland, “Angels and Astonishment” [Church Educational System Training Broadcast, June 12, 2019], ChurchofJesusChrist.org/broadcasts/article/article/2019/06/14holland)
O le fausaga o le lesona na fautuaina atu i le anomea a le faiaoga, e tatau ona fesoasoani e te tuuina atu ai ia lava se taimi i le vasega mo tamaiti aoga ia iloa ma mulimuli ai i uunaiga faaleagaga. E tatau foi ona fesoasoani anomea ia te oe e valaaulia ai tamaiti aoga e faaaoga mea ua latou aoaoina ma ia avea atili e pei o lo tatou Tama Faalelagi ma Iesu Keriso. Mafaufau i le faataitaiga lenei mai i le lesona 19, “Togiolaina o e ua Maliliu”:
Atonu e te valaaulia ni tamaiti aoga e mafaufau i se tasi e mafai ona latou fai i ai e avea ma faufautua ia i latou i le faia o talafaasolopito o aiga. Afai ua i ai nisi o tamaiti ua i ai tomai i le faiga o talafaasolopito o aiga, valaaulia i latou e avea ma se faufautua i se isi tagata o le vasega. Afai e lava le taimi, atonu foi e te faaalia atu i tamaiti aoga le uepisaite o le talafaasolopito o aiga i le ChurchofJesusChrist.org/family-history ma uunaia i latou e vaavaai solo i le saite lenei mo ni manatu faaopoopo i ni auala ia aafia atili ai i talafaasolopito o aiga.
Faasoa atu le saunoaga lenei a Peresitene Russell M. Nelson:
Ata
Peresitene Russell M. Nelson
Ou te valaaulia outou ina ia mafaufau ma le agaga tatalo po o le a le ituaiga ositaulaga, ma e talosia o se ositaulaga o le taimi, e mafai ona e faia ina ia faia ai nisi galuega o talafaasolopito ma le malumalu i lenei tausaga. (Russell M. Nelson, RootsTech Family Discovery Day—Opening Session 2017, ChurchofJesusChrist.org)
Faaiu i le valaaulia o tamaiti aoga e mafaufau loloto ma le agaga tatalo ona tusi lea i lalo o ni ositaulaga maoti o le a latou faia po o ni laasaga maoti o le a latou uia e auai atoatoa atili ai i le talafaasolopito o aiga ma auaunaga i le malumalu.
O lenei kosi ua mamanuina le umi i le kuata atoa ma lesona e 28 ua tusia mo le 50-minute i le vasega e tasi. Afai e feiloai lau vasega na o le faa-tasi i le vaiaso mo le 90 i le 100 minute, tuufaatasi ma aoao atu lesona e lua i le vasega e tasi. Nai lo o le popole i le kavaina uma o anotusi i anomea a le faiaoga, ia taulai atu i le fesoasoani i tamaiti aoga ia faaloloto o latou malamalama i aoaoga po o mataupu faavae ia e faapitoa le talafeagai ia i latou ma ia fesoasoani ia i latou ia ola atoatoa atili i na upumoni.
Ata
aikona, mafaufau loloto
Mafaufau Loloto a o Sauniuni e Aoao Atu le Kosi Lenei
O a nisi o auala e mafai ona e faamalosiaua ai tamaiti aoga e faasoa mai i le vasega mea latou te aoaoina mai a latou sauniuniga. O a ni mea e mafai ona e faia e faaaofia ai tamaiti aoga o e le’i suesuea anomea mo sauniuniga?
E mafai faapefea ona ou saunia lelei e aoao atu?
O le a fesoasoani le Alii ia te oe ao e saunia ma e aoao i Ana fanau. O au taumafaiga ia ola ma le maelega i le talalelei o le a fesoasoani e te agavaa ai mo le Agaga i au sauniuniga e aoao atu.
A o e sauni, mafaufau i auala e mafai ona e fetuunaia lelei ai anomea a le faiaoga e taulima ai manaoga ma tulaga o au tamaiti aoga. Mulimuli i le fautuaga lenei mai ia Peresitene Dallin H. Oaks o le Au Peresitene Sili i le faiga o faafetauiga:
Ata
Peresitene Dallin H. Oaks
Sa masani ona aoao mai Peresitene [Boyd K.] Packer, i la’u faalogo e faapea, e muamua ona tatou taliaina, ona tatou faafetauia ai lea. Afai tatou te masani lelei ma le lesona o le a tatou tuuina atu, ona mafai lea ona tatou mulimuli i le Agaga e faafetauiina. Ae e i ai le faaosoosoga, a tatou talanoa e uiga i lenei fetuunaiga, e amata muamua i le faafetauiina nai lo le taliaina. O se fua. O se luitau e faaauau pea. Ae o le faaaogaina o le talia muamua ona faafetaui ai lea o se auala lelei e tumau ai i luga o le laueleele mautu. (Dallin H. Oaks, “A Panel Discussion with Elder Dallin H. Oaks” [Seminaries and Institutes of Religion satellite broadcast, Aug. 7, 2012], broadcasts.ChurchofJesusChrist.org)
Atonu e aoga le fesili ifo ia te oe lava ia fesili nei o se vaega o au sauniuniga e aoao atu:
Pe na ou tatalo ina ia ou mauaina le taitaiga a le Agaga Paia?
Pe ua ou suesueina anomea mo sauniuniga?
Pe o o’u lagona le mausali lelei i anomea a le faiaoga? O i ai se isi mea e tatau ona ou fetuunaia e taulima ai manaoga o a’u tamaiti aoga?
E mafai faapefea ona tatou aoao mataalia mai tusitusiga paia i le vasega?
E mafai faapefea ona ou fesoasoani i tamaiti aoga ia taulai atu i le Faaola ma aoao mai i le Agaga Paia i lenei lesona?
E mafai faapefea ona ou fesoasoani atu ma le mataalia i a’u tamaiti aoga ia aoao, malamalama, ma ola i a latou molimau e uiga i mataupu faavae e faatatau i nei vaega o le talalelei?
O le a se mea e mafai ona ou faia e faaofi ai ma le anoa mea ua aoaoina e tamaiti aoga mai a latou sauniuniga mo le vasega ma o latou aafiaga o le olaga?
E mafai faapefea ona ou fesoasoani i au tamaiti aoga taitoatasi ia auai atoatoa i le lesona?
E mafai faapefea ona ou faaeseesea gaoioiga e aoao ai ma faiga ou te faaaogaina i vasega taitasi?
E mafai faapefea ona tatou fatuina se siosiomaga e aoao ai, lea e valaauina ai le Agaga ma tuu atu ai i tamaiti aoga le faamanuiaga ma le tiutetauave e aoao atu ma aoao mai le tasi i le isi? (Tagai Mataupu Faavae ma Feagaiga 88:78, 122.)
E mafai faapefea ona ou faafetauia lesona mo i latou e i ai manaoga faapitoa?
A o e saunia e aoao atu, ia manatua tamaiti aoga e i ai manaoga faapitoa. Fetuunai gaoioiga ma faamoemoega ia aofia ai i latou ma fesoasoani ia latou manuia (tagai i le itulau o Disability Resources i le disabilities.ChurchofJesusChrist.org).
Ata
aikona, tusifaamaumau
Tusifaamaumau Ou Lagona Uunai
Mafaufau i le ituaiga o aafiaga e te faamoemoe ia maua e au tamaiti aoga i le kosi lenei. Lisi ni nai ou manatu e uiga i le ala ua e fuafua ai e fesoasoani ia i latou ia maua se aafiaga anoa o le aoaoina.
O le a se mea ua faamoemoeina mai i tamaiti aoga ia maua ai ni togi?
Ina ia maua ni togi mo le faauuga o le inisitituti, o tamaiti aoga e manaomia ona:
Suesue i anomea mo sauniuniga ia le itiiti ifo ma le 75 pasene o lesona.
Auai i le 75 pasene o vasega e faia.
Faamaea se tasi o aafiaga e tolu e aoao ai: tausia se api talaaga o suesuega, tusi tali i fesili e tolu o le tala, pe mamanu ma faauma sa latou lava galuega faatino e aoao ai (faatasi ai ma le faamaoniga a le faiaoga) e faatatau i le anomea o le kosi. E maua nisi faamatalaga iinei: ChurchofJesusChrist.org/si/institute/learning-experiences.
Afai e tusi e tamaiti aoga ni tali i fesili uma ma gaoioiga i le anomea mo sauniuniga, o lenei mea o le a faamalieina ai foi mea e manaomia o le aafiaga e aoao ai. E le manaomia ona auina atu e tamaiti aoga a latou tali ia te oe. I le faaiuga o le semesa, e tau lava o le latou faaali atu ia te oe o mea ua latou faamaeaina.