Lesona 4 Anomea a le Faiaoga

O Le Aoaoga Faavae o Faaaliga

Na faaali mai e le Alii ni upumoni taua e uiga i le aoaoga faavae o faaaliga ia Iosefa Samita ma isi i aso popofou o le Toefuataiga. O le lesona lenei ua mamanuina ia fesoasoani i tamaiti aoga ia faateleina lo latou gafatia e maua ai faaaliga ma iloa lelei ai le taimi e talanoa mai ai le Agaga Paia ia i latou.

Fautuaga mo le Aoaoina Atu

Ua faaali mai e le Alii ia mataupu faavae o faaaliga ia Iosefa Samita ma Oliva Kaotui.

FAALELEIA O LO TATOU AOAO ATU MA LE AOAOINA

Atiina ae se siosiomaga e aoao ai le alofa, faaaloalo, ma le faamoemoega. A iloa e tagata aoga e faatauaina ma faaaloalogia i latou e lo latou faiaoga ma isi tagata aoga, o le a sili atu ona latou o mai i le vasega ua sauni e aoao. O le taliaina lea e lagona e tagata aoga mai le tasi ma le isi e mafai ona faamaluluina ai loto, tuuitiitia ai le fefe, ma valaaulia ai le faasoa atu o aafiaga ma lagona i le vasega.

Faaali atu le fesili lenei: O le a se tulaga, filifiliga, po o se fesili o loo i ai nei e te fia maua ai le taitaiga ma faaaliga mai lou Tama Faalelagi?

Valaaulia tamaiti aoga e mafaufau i le fesili lenei ma tusi i lalo o latou manatu: A ua lava loa se taimi, atonu e te fai atu i ni nai tamaiti aoga e faasoa mai i le vasega ni mea na latou tusia pe afai e le patino tele.

Ina ia fesoasoani i tagata o le vasega ia malamalama i le talafeagai o lenei lesona i o latou olaga, faamalamalama atu ia taunuuga manaomia o loo faamatala mai i le faatomuaga o le lesona lenei.

Faaali atu le ata lenei, ma fesili atu:

• O a ni tulaga na taitai atu ai Oliva Kaotui e fesoasoani ia Iosefa Samita i le faaliliuga o le Tusi a Mamona? (Fai atu i tamaiti aoga e utuvai mai i mea na latou aoaoina mai le vaega 1 o anomea mo sauniuniga pe a manaomia ai.)

• Na faapefea ona faatosina e faaaliga le faaiuga a Oliva e fesoasoani atu ia Iosefa?

Faamanatu atu i tamaiti aoga e faapea, i le tali atu i le manao o Oliva e fesoasoani e faaliliu le Tusi a Mamona, sa aoao ai o ia e le Alii e uiga i le mauaina o faaaliga. Valaaulia se tagata aoga e faitau leotele le Mataupu Faavae ma Feagaiga 8:1–3 . Fai atu i le vasega e mulimuli i le faitauga, ma vaavaai mo upumoni na manaomia ona malamalama i ai Oliva ina ia mafai ona maua le faaaliga e faaliliu.

FAALELEIA O LO TATOU AOAO ATU MA LE AOAOINA

Faailoa atu mataupu ma aoaoga faavae. O le faailoa manino atu o mataupu faavae ma le aoaoga faavae e fesoasoani i tamaiti aoga ia iloa upumoni i se auala e faigofie ma talafeagai. Pe a mafai, ia uunaia tamaiti aoga ia iloa ma faasoa atu mataupu faavae ma aoaoga faavae mai mea o loo latou suesueina. O le tusia po o le faaali atu o mataupu faavae, po o le tuu atu i tamaiti aoga e faailoga upumoni i totonu o a latou tusitusiga paia, o le a fesoasoani i tamaiti aoga e mafaufau loloto atili i ai, ma maua faaaliga i auala e ono mafai ona latou faaaogaina ai.

• O a ni upumoni e mafai ona tatou aoao mai nei fuaiupu e uiga i le sailia ma le mauaina o faaaliga? (E mafai ona faailoa mai e tamaiti aoga ni nai upumoni, e aofia ai lenei: E talanoa mai le Alii i o tatou mafaufau ma loto e ala i le mana o le Agaga Paia.)

• E faavae i lau suesuega patino ma aafiaga, o a nisi o auala e talanoa mai ai le Alii i o tatou mafaufau? i o tatou loto? (Lisi tali a tagata o le vasega i luga o le laupapa. Afai e manaomia, fai atu i tamaiti aoga e toe faamanatu fuaitau o mau ma faamatalaga na latou suesueina i le vaega 1 o anomea mo sauniuniga.)

• Aisea e te manatu ua filifili ai le Alii e fesootai mai ia i tatou e ala mai i o tatou mafaufau ma o tatou loto? (Faamalosiau i tamaiti aoga ia utuvai mai i mea na latou aoaoina ma mafaufau loloto i ai i le taimi o a latou suesuega ma sauniuniga patino.)

Faamalamalama atu e faapea, ina ua taumafai Oliva e faaliliu, sa tauivi o ia ia maua le faaaliga sa ia manaomia e faaauau ai. Sa fesili atu Iosefa ma Oliva i le Alii i le mafuaaga sa tauivi ai Oliva [e faaliliu]. Valaaulia tagata o le vasega e faitau leleoa le Mataupu Faavae ma Feagaiga 9:7–9 , ma vaavaai mo se mamanu na aoao mai e le Alii o le ala e maua ai faaaliga.

• O le a le mamanu na faaali mai e le Alii ia Oliva lea e mafai ona fesoasoani ia i tatou ia maua ma iloa ai faaaliga? (O faaaliga e masani ona oo mai pe a uma ona suesueina fesili ma mataupu i o tatou mafaufau, taunuu i se faaiuga, ona ole atu lea ile Alii pe o sa’o la tatou faaiuga.)

Faamalamalama atu e faapea, na saunoa mai Peresitene Dallin H. Oaks o le Au Peresitene Sili, o le “mu o le loto” e mafai ona faaalia ai “se lagona o le mafanafana ma le toafimalie” (“Teaching and Learning by the Spirit,” Ensign, Mar. 1997, 13).

Valaaulia tamaiti aoga e faasoa mai o latou mafaufauga e uiga i fesili nei ma le valaaulia mai a latou anomea mo sauniuniga:

• Aisea e te manatu ua faamoemoe mai le Alii ia tatou suesue i o tatou mafaufau o se vaega o le sailia o faaaliga?

• O le a se mea na aoao atu e se uo po o se tagata o le aiga ia te oe e uiga i le valaaulia ma le mauaina o faaaliga? O le a se mea ua e aoaoina mai i ou lava aafiaga e uiga i le valaaulia ma le mauaina o faaaliga?

Faamatalaga: O le gaoioiga lenei ua fuafuaina ia lava se taimi e tuu atu i tamaiti aoga e mafaufau ai ma faatino mea o loo latou aoaoina. Fetuunai le lesona pe a manaomia ia lava ai se taimi e tuu atu i tamaiti aoga e mafaufau loloto, tusitusi, faitau, pe tatalo ai.

Fai atu i tamaiti aoga e mafaufau loloto ma tusitusi mo ni nai minute e uiga i mea na latou aoaoina, e uiga i faaaliga ma le ala e fesootai ai i manatu na latou tusia i lalo i le amataga o le vasega. Pe e mafai ona latou tatalo leleoa mo le taitaiga i mea na latou tusiaina. Atonu foi e te faaalia atu le saunoaga lenei mai ia Peresitene Russell M. Nelson ma valaaulia tamaiti aoga e faitau leleoa, ma vaavaai mo ni auala faaopoopo e mafai ona latou valaaulia ai faaaliga.

Tatalo atu i le suafa o Iesu Keriso e uiga i ou atuatuvalega, ou popolega, ou vaivaiga—ioe, o faanaunauga o lou loto. Ona faalogo lea! Tusi i lalo manatu e oo mai i lou mafaufau . Faamaumau i lalo ou lagona ma tulitatao i faatinoga e uunaia oe e fai. A e faisooa lenei faagasologa i lea aso ma lea aso, masina ma lea masina, tausaga ma lea tausaga, o le a e ‘ola ai i le mataupu faavae o faaaliga” (Aoaoga a Peresitene o le Ekalesia: Iosefa Samita [2007], 132). …

Ou te uunaia outou ina ia faateleina lou tomai faaleagaga o i ai nei e maua ai faaaliga faaletagata lava ia. …

E leai se mea na te tatalaina le lagi e pei o le tuufaatasiga o le mama a’ia’i faateleina, usiusitai sa’olele, sailiga ma le naunautai, taumafa i aso taitasi i afioga a Keriso i le Tusi a Mamona, ma taimi faisoo e tuuto atu i le galuega o malumalu ma talafaasolopito o aiga. (Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95)

O le Toefuataiga o le talalelei ua tuuina mai ai se mamanu mo le mauaina o faaaliga.

Ia faailoa atu e faapea, o le mataupu faavae o faaaliga sa aoaoina e Iosefa Samita ma Oliva Kaotu, sa faaalia mai ia i laua i le aluga o taimi e tusa ai ma tulaga na alia’e ma fesili na la faia. Ua faaalia i lenei mea se upumoni taua na aoao mai e le Faaola i ni nai faaaliga.

Valaaulia ni tamaiti aoga se toatolu e auauai i le faitauina leotele o le Mataupu Faavae ma Feagaiga 42:61; 50:24; 98:12. Fai i le vasega e mulimuli i le faitauga, ma vaavaai mo mea ua aoao mai e nei fuaitau i le ala e faaali mai ai e le Alii Ana upumoni ma [Lona] finagalo ia i tatou.

• E faapefea ona e otootoina se upumoni o loo aoao mai e nei fuaiupu e uiga i le mauaina o faaaliga mai le Alii? (I le faaaoga ai o upu a tamaiti aoga, faaali atu pe tusi se upumoni i le laupapa e talitutusa ma lenei: E faaali mai e le Alii upumoni ia i tatou “lea fasifuaitau ma lea fasifuaitau, o le mataupu i lea mataupu.”)

Faamanatu i tamaiti aoga o le vaega 3 o anomea mo sauniuniga, sa latou aoao ai e uiga i mamanu o le mauaina o faaaliga mai ia Elder David A. Bednar o le Korama a Aposetolo e Toasefululua. Fai atu i le autalavou e faasoa mai mea na tulaga ese ia i latou mai lana aoaoga. Atonu foi e te fesili atu ia i latou pe mafai faapefea ona fesoasoani ana faatatauga e uiga i le faaaliga, ia tatou malamalama lelei ai i upumoni na faaalia pe o tusia i le laupapa.

• E mafai faapefea e le malamalama i lenei upumoni ona fesoasoani i se tasi o lagonaina na te le o maua ni tali po o le taitaiga mai i le Alii?

• O le a sou aafiaga na i ai i le oo malie mai o tali po o le taitaiga i le aluga o taimi?

Faaiu i le molimau atu pe valaaulia soo se tagata aoga e fia molimau atu i upumoni e faatatau i faaaliga na aoaoina i le lesona.

Mo Le Isi Taimi

Fesili atu i tamaiti aoga po o le a so latou manatu, po o a ni vavega maoae o le Toefuataiga. Valaaulia i latou e suesue i anomea mo sauniuniga mo le lesona e sosoo ai e uiga i le oo mai o le Tusi a Mamona ma ia mafaufau i vavega na i ai faatasi ma le faasaosaoga, faaliliuga, ma le lolomiga o le Tusi a Mamona.