Lesona 17 Anomea a le Faiaoga

Tumau i le Faamaoni i le totonugalemu o Feteenaiga ma Puapuaga

I le vaitaimi o le periota o le va o le 1837 i le 1839, na oo ai le Au Paia i se agaga taufaamatau o le liliuese i Katelani, Ohaio, ma le vevesi o sauaga i Misuri. O lenei lesona o le a fesoasoani i tagata aoga e iloilo i le ala e mafai ona latou liliu atu ai, faatuatua ai, ma faalagolago atoatoa atili ai i le Tama Faalelagi ma Iesu Keriso i taimi o faigata ma sauaga.

Fautuaga mo le Aoaoina Atu

Na tuua e nisi o le au paia i Katelani, Ohaio, le Ekalesia, ae o isi sa tumau faamaoni pea.

Amata le vasega i le fai atu i tagata aoga e faamatala pe na faapefea ona tali atu tagata latou te iloa i tofotofoga faigata i o latou olaga. Atonu foi e te fesili i ai po o a ni mea ua latou aoao mai mai na faataitaiga.

Valaaulia tagata aoga e mafaufau loloto i tofotofoga o loo feagai i le taimi nei ma i latou po o e pele ia i latou, ma ia mafaufau po o le a se mea atonu e aoao mai e le Alii ia i latou i le aso e uiga i le tali atu i tofotofoga faapena.

• O a nisi o luitau ma tofotofoga na oo i le Au Paia anamua i Ohaio? (Atonu e te faasino atu tagata aoga i a latou anomea mo sauniuniga e fesoasoani latou te manatua ai.) O a ni mea e mafai ona tatou aoao mai ia i latou na aafia i tofotofoga i Ohaio?

Faamanatu i tagata aoga, i le taumafanafana o le 1837, na malaga mai ai Tomasi B. Marsh, le Peresitene o le Korama a Aposetolo e Toasefululua, mai Misuri i Katelani e feiloai ma sui o lena korama ma le Perofeta o Iosefa Samita.

• O a nisi o luitau ma atugaluga sa fetaiai ma Tomasi B. Marsh a’o le’i taunuu i Katelani?

Faamalamalama atu, ina ua uma ona feiloai faatasi Tomasi B. Marsh ma Iosefa Samita ma faaleleia o laua feeseeseaiga, na maua e le Perofeta se faaaliga mai le Alii na faamoemoe mo Tomasi. Valaaulia tagata aoga e faitau pe toe faamanatu filemu le Mataupu Faavae ma Feagaiga 112:10–15 ma vaavaai mo le fautuaga ma mataupu faavae na aoao ai e le Alii ia Tomasi B. Marsh ma isi sui o le Korama e Toasefululua. Valaaulia tagata aoga e faasoa mai ma talanoa i mea na latou maua.

Afai e manaomia, fesoasoani i tagata aoga e faailoa ma talanoa i se mataupu mai le fuaiupu 13 e ala i le fai atu o nisi o fesili nei:

• O le a le mea na folafola mai e le Alii o le a Ia faia mo i latou o le Toasefululua o e na filifili e le faamaaa o latou loto ina ia tofotofoina o latou faatuatua? (A uma ona tali mai tagata aoga, faaali le mataupu faavae lea pe tusi i luga o le laupapa: Afai e le faamaaaina o tatou loto pe a tofotofoina o tatou faatuatua, o le a faatasi le Alii ma i tatou ma fesoasoani e faaloloto lo tatou liuaina.)

• E faapefea ona faamaaa e nisi o tagata o latou loto pe a tofotofoina o latou faatuatua? O a tulaga lamatia o le faia o lena mea?

• O anafea na e vaai ai i se tasi o tali atu i le tofotofoga o le faatuatua ma se loto agavaivai ma se mafaufau matala? O le a se mea na e maitauina o tupu i se tagata a o tali atu o ia i lenei ala?

Sa faamanuiaina le Perofeta o Iosefa Samita mo lona faamaoni i le taimi o ona tofotofoga i le Falepuipui o Liperate.

Faaali atu le fesili lenei: Aisea e faataga ai e le Atua mea leaga ia tupu i tagata lelei?

Fai atu i tagata aoga pe sa latou manatunatu e uiga, pe na fesili foi i lenei fesili. Faamalamalama atu, sa fesili foi Iosefa Samita i se fesili faapena ina ua faafalepuipuiina ma le le tonu o ia i Liperate, Misuri. A o talanoa tagata aoga i le aafiaga o Iosefa, valaaulia i latou e mafaufau pe o le a faapefea ona latou tali atu pe a fesili atu se uo ia i latou i lena fesili.

Faaali atu ata nei o le Falepuipui o Liperate:

Fai atu i tagata aoga e faamatala mea na tutupu na taitai atu ai i le faafalepuipuiina o Iosefa Samita i le Falepuipui o Liperate. (Afai e manaomia, faasino atu tagata aoga e toe iloilo le vaega 3 o anomea mo sauniuniga.)

• Na faapeī tulaga mo Iosefa Samita ma isi i totonu o le Falepuipui o Liperate?

Faamanatu i tagata aoga, na faaalu e le Perofeta o Iosefa Samita le silia ma le fa masina i le Falepuipui i Liperate i le taimi o le maatiati o le malulu o le taumalulu. Valaaulia se tagata aoga e faitau leotele le Mataupu Faavae ma Feagaiga 121:1–3 . Fai i le vasega e mulimuli i le faitauga, ma vaavaai mo fesili na fesili ai le Perofeta i totonu o lenei tusi agaga tatalo.

• O a ni mea ua faaalia mai e nei fesili e uiga i lagona atonu na i ai ia Iosefa Samita i lena taimi?

• Na ono faapefea ona avea lenei periota o se tofotofoga o le faatuatua o Iosefa?

Faamanatu atu i tagata aoga, a o i ai i le falepuipui, na auina atu e Iosefa Samita ni tusi se lua i le Ekalesia. Vaevae tagata aoga i ni vaega toalaiti. Valaaulia i latou e iloilo pe faamanatu le Mataupu Faavae ma Feagaiga 121:7–10; 122:7–9 ona faasoa mai lea o fuaitau ma mataupu faavae e tulaga ese ia i latou.

A maea se taimi talafeagai, valaaulia ni nai tagata aoga e faasoa mai se fuaitau po o se mataupu faavae na latou talanoaina ma a latou vaega. Mafaufau e faaali atu nei mataupu faavae po o fuaitau pe tusi i luga o le laupapa. O nisi o mataupu faavae e faailoa mai e tagata aoga e mafai ona faailoaina pe aoteleina i auala nei: Pe a tatou liliu atu i le Alii ma faalagolago ia te Ia i taimi o o tatou tofotofoga, o le a Ia faamanuia i tatou i faaaliga, faamafanafanaga, ma faamalosiauga. Afai e tumau ona tatou faamaoni, e mafai e puapuaga ma faigata ona tatou maua ai le potomasani ma e mo lo tatou manuia.

• E mafai faapefea e mataupu faavae ma fuaitau na e faailoaina mai ona fesoasoani i se tagata o loo feagai ma puapuaga po o se tofotofoga o le faatuatua?

O se vaega o lau talanoaga, atonu e te faaali atu le saunoaga lenei a Elder Jeffrey R.Holland o le Korama a Aposetolo e Toasefululua, ma valaaulia se tagata aoga e faitauina leotele.

E mafai ona e maua se aafiaga paia, faafaaaliga, ma loloto le aoaoga faatasi ma le Alii i aafiaga aupito sili ona faanoanoa o lou olaga—i nofoaga sili ona leaga, a o onosaia faamasinoga le sa’o aupito sili ona tiga, a’o feagai ma mea e sili ona matautia le faigata ma le tetee ua e oo i ai. …

… Peitai o lesona o le taumalulu o le 1838--39 ua aoao mai ai i tatou e faapea, o aafiaga uma lava e mafai ona avea ma aafiaga laveai pe afai tatou te tumau faamaoni i lo tatou Tama i le Lagi i na faafitauli. O nei lesona faigata e aoao ai i tatou, o le mea e gata ai le malosi o le tagata, o le avanoa lena o le Atua, ma afai tatou te lotomaulalo ma faamaoni, afai o le a tatou talitonu ma tatou le fetuuina le Atua ona o o tatou faafitauli, e mafai ona Ia faaliliuina falepuipui le tonu ma leai se alofa ma faalotovaivai o o tatou olaga i ni malumalu---po o se tulaga e mafai ona aumaia ai le mafanafana ma faaaliga, mafutaga paia ma le filemu. (Jeffrey R. Holland, “Lessons from Liberty Jail,” Ensign, Sept. 2009, 28)

• O le a sou manatu o le a le uiga o le, o tofotofoga e mafai ona avea ma aafiaga “laveai”?

• E mafai faapefea e le onosaia faamaoni o tofotofoga o le olaga ona fesoasoani ia tatou avea atili e pei o lo tatou Tama Faalelagi ma lo tatou Faaola o Iesu Keriso?

• O a nisi o auala na e liliu atu ai i le, ma faalagolago atoatoa atili atu ai i le Tama Faalelagi ma Iesu Keriso i le taimi o tofotofoga na tofotofoina ai lou faatuatua? O a ni mea ua e aoaoina mai i le faia o lena mea?

Valaaulia tagata aoga e faasoa atu i se tagata o le vasega pe o le a faapefea ona latou tali i le fesili na e faaalia atu i le taimi ua te’a i le pe aisea e faataga ai e le Atua ia mea leaga e tupu i Lana fanau.

Ona valaaulia lea o tagata aoga e mafaufau e faaali upu ma fuaitau na latou filifilia mai fuaitau o mau na talanoaina muamua atu i nofoaga e mafai ona latou iloa soo atu ai pe ia tauloto pe faasoa atu i luga o faasalalauga faaagafesootai. Molimau atu ao tatou liliu atu i le Faaola i o tatou tofotofoga, o le a Ia tuuina mai ia i tatou le filemu, faamafanafana i tatou, ma faaloloto lo tatou liuaina.

Mo Le Isi Taimi

A o e faaumaina le vasega, mafaufau e faamalamalama atu, o se tasi o faalapotopotoga aupito toatele o tamaitai i le lalolagi i aso nei, o le Aualofa, sa faavaeina i le 1842 e le Perofeta o Iosefa Samita. Faailoa atu i tagata aoga a o latou sauniuni mo le isi vasega e sosoo ai, o le a latou maua le avanoa e aoao atili ai e uiga i le ala ma le pogai na fatuina ai lenei faalapotopotoga i le lalolagi atoa. Faamalosiau i tagata aoga e o mai saunia e faasoa mai mea na latou aoaoina.