Lesona 23 Anomea a le Faiaoga

O Le Misiona Faaperofeta ma le Maliu Faamaturo o Iosefa Samita

I le aso 27 o Iuni, 1844, sa maliliu fasia ai Iosefa ma Ailama Samita i Karefasi, Ilinoi. O o la maliu na faaopoopoina ai se faamau faailoga mamana ia laua molimau o le talalelei toefuataiina a Iesu Keriso (tagai Mataupu Faavae ma Feagaiga 135:1, 3). O lenei lesona ua mamanuina ia fesoasoani e faamalosia ai molimau a tagata aoga i le misiona faaperofeta a Iosefa Samita.

Fautuaga mo le Aoaoina Atu

FAALELEIA O LO TATOU AOAO ATU MA LE AOAOINA

Faaaoga viiga. O musika paia, aemaise lava o viiga a le Ekalesia, e mafai ona fesoasoani i tagata aoga e lagona ai le faatosinaga a le Agaga Paia pe a o latou suesue i le talalelei. Ina ia fesoasoani ia tuuina atu ni malamalamaaga faaopoopo i le taimi o se lesona, e mafai ona e filifilia se viiga e usu i le amataga o le vasega e faatatau i anomea o le lesona.

Ua faamaturoina Iosefa ma Ailama Samita i le Falepuipui i Karefasi.

Mafaufau e usu ni nai fuaiupu (e aofia ai le fuaiupu e 7) o le viiga “Se Tagata Mativa Faanoanoa.” Faamalamalama atu o lenei viiga ma lana savali e uiga i le tautuaina o le Faaola sa o se [viiga] sa fiafia tele i ai Iosefa Samita. Sa talosaga atu le Perofeta ia Ioane Teila e usuina i totonu o le Falepuipui o Karefasi a o le’i osofai atu tagata leaga.

Fai atu i tagata aoga e faamatala mai se mea o latou iloa e uiga i mea na tutupu lea na taitai atu ai i le pueina ma le faafalepuipuiina o Iosefa ma Ailama Samita i le Falepuipui o Karefasi. (Faamalosiau i tagata aoga e utuvai mai i mea na latou aoaoina mai anomea mo sauniuniga.)

• O le a sou manatu na faapefea e upu o le “Se Tagata Mativa Faanoanoa” ona atagiaina ai le tautinoga o Iosefa i le Faaola? (Pe a manaomia, atonu e te tuu atu i tagata aoga se minute e toe faamanatu ai upu o le viiga a o latou tali mai i le fesili lenei.)

Faamalamalama atu, na iloa e Iosefa e mautinoa lava lona fetaiai ma le oti pe afai e alu atu i Karefasi e tulai ai i le faamasinoga. Sa faamatala e Dan Jones, o se tagata o le Ekalesia o lē sa i ai faatasi ma le Perofeta i Navu a o sauni o ia e malaga atu i Karefasi:

“O le a ou matuā lē faagaloina lena vaaiga a’o tulai ai [le Perofeta] … , ma vaavaai faataamilo i le mea sa i ai, ona vaai atu lea i le aai ma ona tagatā nu’u o e sa pele ia te ia, ma ia faapea mai, “Afai ou te lē alu [i Karefasi], o le iuga o le faatafunaga o lenei aai ma i latou o nonofo ai; ma e le mafai ona ou mafaufau i o’u uso ma tuafafine pele ma a latou fanau o mafatia e pei o vaaiga i Misuri o toe tutupu foi i Navu; leai, e sili atu i lo outou uso/tuagane, o Iosefa, ona oti mo ona uso ma tuafafine, auā ua ou malie e oti mo i latou. Ua uma la’u galuega.” (Dan Jones, i le Ronald D. Dennis, trans., “The Martyrdom of Joseph Smith and His Brother, Hyrum,” BYU Studies, vol. 24, no. 1 [1984], 85)

• O a ni mea e faailoa mai e upu ma faatinoga a le Perofeta e faatatau i lona tagata?

Atonu e te faailoa atu e faapea, sa mulimuli Iosefa Samita i le faataitaiga a le Faaola o le alofa e ala i lona malie e tuuina atu lona ola e puipui ai le Au Paia (tagai Ioane 15:13).

Faaali atu se ata o le Falepuipui o Karefasi. Valaaulia tagata aoga e faamatala se mea o latou iloa e uiga i mea na tutupu i le Falepuipui o Karefasi i le aso 27 o Iuni, 1844, ina ua fasiotia Iosefa ma Ailama. (Faamalosiau i tagata aoga ia mafaufau i mea na latou aoaoina mai anomea mo sauniuniga.)

Faamalamalama atu e faapea, o le faasilasilaga o le maliu o le Perofeta, lea ua aofia nei i le Mataupu Faaave ma Feagaiga 135, sa aumaia mai i tala a molimau vaaitino a Elder Ioane Teila ma Uiliata Risati.

Faitau faatasi ma le vasega le Mataupu Faavae ma Feagaiga 135:1–2, 4–6 .

• O a ni ou manatu ma lagona a o e manatunatu i le osigataulaga na malilie Iosefa ma Ailama Samita e faia mo a laua molimau o le talalelei toefuataiina?

Valaaulia tagata aoga e faitau fuaiupu mulimuli e lua o le Mataupu Faavae ma Feagaiga 135:3 (amata i le “Sa soifua maualuga o ia …”) ma le Mataupu Faavae ma Feagaiga 136:39, ma vaavaai mo mea ua tatou iloa e uiga i le maliliu o Iosefa ma Ailama.

• O a mea ua aoao mai e nei fuaiupu ia i tatou e uiga i le taua o le maliliu o Iosefa ma Ailama? (Atonu e faailoa mai e tagata aoga se upumoni e talitutusa ma lenei: Sa faamauina e Iosefa ma Ailama Samita a laua molimau i le moni o le talalelei toefuataiina i o laua toto.)

Faamalamalama atu, o lenei faatinoga o le faamauina o a laua molimau i o laua toto, ua tamau ai faavaeina o a laua molimau ma a laua misiona paia e faatatau i le Toefuataiga o le talalelei.

Ina ia fesoasoani i tagata aoga ia malamalama lelei i lenei upumoni, mafaufau e faaali atu le vitio “Testimony of the Book of Mormon” (4:39) mai ia Elder Jeffrey R. Holland, o le Korama a Aposetolo e Toasefululua. Valaaulia tagata aoga e mafaufau e uiga i se tautinoga le maluelue sa faaalia e Iosefa ma Ailama i a laua molimau o le talalelei toefuataiina e tusa lava pe feagai ai ma le oti.

• E faapefea e le malie o Iosefa Samita e tuuina atu lona ola mo le talalelei toefuataiina, ona faamalosia ai lau molimau e uiga ia te ia o se Perofeta a le Alii?

Ua faapea ona avanoa faamanuiaga faalelagi i fanau a le Tama Faalelagi e ala mai i le auaunaga faaperofeta a Iosefa Samita.

Valaaulia tagata aoga e faitau le fuaiupu muamua o le Mataupu Faavae ma Feagaiga 135:3, lea o loo aoao mai e faapea, ua sili atu mea ua faia e Iosefa Samita mo le faaolataga o tagata i lenei lalolagi nai lo se isi lava tagata sei vagana ai Iesu Keriso. (Atonu e te manao e uunaia tagata aoga e faailoga lenei upumoni i totonu o a latou tusitusiga paia.)

Mafaufau e fai atu i tagata aoga e faasoa mai pe o le a faapefea ona latou faamatala atu lenei upumoni i se uo o se isi tapuaiga Kerisiano.

Valaaulia tagata aoga e faitau le vaega atoa o loo totoe o le Mataupu Faavae ma Feagaiga 135:3, ma vaavaai mo saofaga na faia e le Perofeta o Iosefa Samita e fesoasoani ai ia maua e fanau a le Tama Faalelagi le faaolataga. Tuu atu i tagata aoga e lipoti mai le mea na latou maua. Atonu e te lisiina a latou tali i luga o le laupapa.

• O le a se isi mea e mafai ona e faia i le lisi o saofaga ua faia e le Perofeta o Iosefa Samita mo le faaolataga o le lalolagi?

Valaaulia tagata aoga e filifili se tasi o fesili nei e tali. Tuu atu i tagata aoga se taimi e tusifaamaumau ai o latou manatu.

• O a ni aafiaga na e maua ua fesoasoani e te maua ai se molimau i le Perofeta o Iosefa Samita?

• Na faapefea ona tosinaina lou olaga ma faamanuiaina ona sa faataunuuina e Iosefa Samita lana misiona faaperofeta?

A uma ua lava se taimi, valaaulia ni nai tagata aoga e faasoa mai i le vasega mea sa latou tusia. Faaiu e ala i le faasoa atu o lau molimau e uiga i le Perofeta o Iosefa Samita.

Mo Le Isi Taimi

Fai i tagata aoga e vaai faalemafaufau pe mata o le a faapeī le valaauina e taitai i le Ekalesia faatasi ai ma le itiiti o se potomasani ae anoanoai vaivaiga. Valaaulia i latou e mafaufau loloto pe mata o le a i ai so latou faatuatua pe leai ma pe talitonu o le a fesoasoani le Alii ia i latou i se valaauga faapena. Faamalosiau i tagata aoga e suesue anomea mo sauniuniga mo le lesona e sosoo ai, ma mafaufau i le fesili lenei.