Lesona 6 Anomea a le Faiaoga

O Le Tusi a Mamona O Le Maa’au’au o la Tatou Tapuaiga

Na folafola mai e le Perofeta o Iosefa Samita e faapea, “o le Tusi a Mamona o le maa‘au‘au lea o la tatou tapuaiga” (faatomuaga i le Tusi a Mamona). O lenei lesona ua mamanuina ia fesoasoani i tagata aoga e faamatala mai le mafuaaga ua avea ai le Tusi a Mamona ma maa’au’au o la tatou tapuaiga ma ia faamalosia lo latou gafatia e tali atu ai i faitioga e faasaga i ai.

Fautuaga mo le Aoaoina Atu

FAALELEIA O LO TATOU AOAO ATU MA LE AOAOINA

Taulai atu i tamaiti aoga. A o e aoao atu, ia manatua e taulai atu i manaoga taitoatasi o tamaiti aoga. Ia faaeteete ina ia aua ne’i sili atu le taua o anomea o le lesona nai lo o tagata aoga i totonu o le potuaoga. Ia faaauau pea ona iloilo le gauaiga o tagata aoga ma ia lava ni fetuunaiga e faataga i soalaupulega e taulima ai o latou manaoga.

E taua le Tusi a Mamona i le Ekalesia a le Atua ma i a tatou molimau.

Atonu e te amatalia le vasega i le uuina i luga o se kopi o le Tusi a Mamona ma faia se talanoaga puupuu i le faamatalaga ma le fesili lenei:

O le tele lava o osofaiga e sau mai i tagata e faitio i le Ekalesia e tulitulimatagauina le Tusi a Mamona. Aisea e te manatu ua faapena ai?

Valaaulia tamaiti aoga e sue i le itulau tomua o le Tusi a Mamona. I le Aso Sa, 28 o Novema, 1841, na faaalu ai e le Perofeta o Iosefa Samita le aso i fonotaga faatasi ma Aposetolo e Toasefululua i le maota o Peresitene Polika Iaga, o le peresitene o lena korama (tagai History, 1838–1856 [Manuscript History of the Church], volume C-1, 1255, josephsmithpapers.org). Fai atu i se tamaitiiti aoga e faitau leotele le parakalafa lona ono i le faatomuaga i le Tusi a Mamona e iloa ai po o le a le mea na ta’u atu e Iosefa i le Au Aposetolo. Valaaulia tamaiti aoga e mafaufau e maka ia upumoni na aoao atu e Iosefa.

• Mata e i ai se tasi e manao e faasoa atu o latou manatu po o le molimau i soo se tasi o nei aoaoga? (Faamatalaga: A o tali mai tamaiti aoga, mafaufau e faaaoga ia manatu e aoao atu o loo i lalo e fesoasoani ia latou malamalama ai i upumoni na aoao atu e Iosefa i le Toasefululua.)

O le Tusi a Mamona o le tusi aupito sili ona saʼo i soo se isi lava tusi i luga o le lalolagi.

Pe a manaomia, fesoasoani i tamaiti aoga ia malamalama i le fuaitau “o le Tusi a Mamona o le tusi aupito sili ona saʼo i soo se isi lava tusi i luga o le lalolagi” i le faaaoga lea o faamatalaga o loo maua i le vaega 2 o anomea e sauniuni ai.

E mafai foi ona e faamalamalama atu i tamaiti aoga, o le saunoaga a Iosefa Samita e le faapea, o lomiga ua lomiaina o le Tusi a Mamona sa sao mai i mea sese. Na faia faasa’oga i lomiga taitasi o le Tusi a Mamona talu mai le 1829. O faasa’oga sa taulima ai suiga laiti i le faaupuga po o suiga i sipelaga, faailoga, po o le faamataitusi lapopoaga. O le faaaogaaga o le upu sa’o i le faamatalaga lenei, ua faatatau i upumoni mamana o loo i ai i le Tusi a Mamona ae e le faapea o le anotusi ua lolomiina ua saoloto mai i mea sese.

O le Tusi a Mamona o le maa‘au‘au o la tatou tapuaiga.

A o ta’ua e tamaiti aoga le Tusi a Mamona “o le maa’au’au o la tatou tapuaiga,” atonu e te manao e faaali atu se ata o se maa’au’au, e pei o le ata o loo i anomea mo sauniuniga. Valaaulia tamaiti aoga e faamatala atu pe aisea latou te manatu ai, o se maa’au’au o se faatatauga lelei lea mo le Tusi a Mamona.

Valaaulia se tamaitiiti aoga e faitau pe aotele le saunoaga a Peresitene Ezra Taft Benson i le vaega 3 o anomea e sauniuni ai. (O le faamatalaga lenei o loo faamalamalama atu ai ni auala se tolu ua avea ai le Tusi a Mamona o le maa‘au‘au o la tatou tapuaiga.) Mafaufau e fai atu nisi po o fesili uma nei e fesoasoani i tagata aoga e faalolotoina ai o latou malamalama i aoaoga a Peresitene Benson e uiga i le avea o le Tusi a Mamona ma maa’au’au.

• Na faapefea ona faamalosia e le Tusi a Mamona lau molimau i le Faaola o Iesu Keriso?

• O a ni auala e tumau pe talaloa ai le Ekalesia faatasi ai ma le moni o le Tusi a Mamona?

• E faapefea ona faamalosia e lau molimau o le Tusi a Mamona ia lau molimau o isi aoaoga ma mataupu faavae o le Ekalesia?

• Pe o avea le Tusi a Mamona ma se maa‘au‘au o lau molimau patino? Afai o lea, e faapefea?

E mafai ona tatou latalata atili atu i le Atua e ala i le mulimuli i aoaoga o loo i le Tusi a Mamona.

Vaevae tagata aoga i ni vaega toalaiti, ma valaau i latou e faasoa ma faamalamalama ni fuaitau o le Tusi a Mamona ua fesoasoani ia i latou e latalata atili atu ai i le Atua. (O tagata aoga na suesueina ia anomea e sauniuni ai, e mafai ona faatatau ai i mea na latou tusia i le faaiuga o le vaega 4.) E mafai foi ona e valaaulia tamaiti aoga e soalaupule ma a latou vaega auala ua fesoasoani ai le ola i aoaoga ua tusia i fuaitau na latou filifilia, ia i latou e avea atili ai e pei o Iesu Keriso.

E taumafai fili o le Ekalesia e ta’uleaga le Tusi a Mamona.

Faaali atu le faamatalaga lenei mai ia Brother Tad R. Callister, sa avea ma Peresitene Aoao o le Aoga Sa, ma fai atu i se tamaitiiti aoga e faitau leotele:

Elder Tad R. Callister

[O le Tusi a Mamona] o le uamea mamafa lea e tasi i luga o fua o le upumoni e sili atu le mamafa nai lo o le mamafa tuufaatasi o faitioga uma a le au faitio. Aisea? Aua afai e moni, o lona uiga o Iosefa Samita o se perofeta ma o le Ekalesia toefuataiina lenei a Iesu Keriso, tusa lava pe o a nisi finauga iloga e tetee ai. Ona o lenei le mafuaaga, ua faamoemoe ai le au faitio ia le faamaonia le Tusi a Mamona, ae o faafitauli o loo latou fetaiai e le mafai ona faatoilaloina aua e moni le tusi lenei.. (“OLe Molimau Mamana a le Atua: O Le Tusi a Mamona,” Ensign po o le Liahona, Nov. 2017, 107)

Fesoasoani i tamaiti aoga e agai atu i punaoa faaeletonika faatuatuaina o loo i lalo, pe tuu atu mo i latou ni kopi pepa pe a manaomia. Vaevae punaoa i tamaiti aoga, ma fai atu i ai e mafaufau e uiga, ma vaavaai mo nisi o faitioga na faia e le au faitio e faasaga i le Tusi a Mamona, ma ia mafaufau pe faapefea ona tatou faaaogaina ia punaoa o loo i lalo e tali atu ai i faitioga faapena, a o tatou saili ia maua le malamalama faaleagaga ma faatupu molimau. Fai atu i tagata aoga e lipoti mai nisi o mea na latou maua. E mafai ona latou faia lenei mea i vaega toalaiti pe o le vasega atoa.

• Mamona 8:14–22. Ua faauma e Moronae le faamaumauga a lona tamā o Mamona i se lapataiga ia i latou o e faitio i le Tusi a Mamona i aso amuli.

• Eteru 12:23–29. Ua faaalia e Moronae le popole ina ne’i faitio nisi i le vaivai o lana tusitusi ae misia ai le mana o le savali o le Tusi a Mamona.

• Tad R. Callister, “O Le Molimau Mamana a le Atua: O Le Tusi a Mamona,” Ensign po o le Liahona, Nov. 2017, 107–9. (E mafai ona e faaaogaina na’o le afa muamua o le lauga a Brother Callister.) Pe e mafai foi ona matamata e tamaiti aoga le vitio “Compelling Witness” (7:46).

• “Critics of the Book of Mormon,” Church History Topics, history.ChurchofJesusChrist.org.

• “Book of Mormon and DNA Studies,”Gospel Topics, topics.ChurchofJesusChrist.org. (Atonu foi e te faaaogaina na’o vaega “The Ancestors of the American Indians” ma le “Faaiuga”.)

• Jeffrey R. Holland, “Saogalemu mo le Agaga,” Ensign po o le Liahona, Nov. 2009, 88–90. (E mafai ona e suesuea na’o le afa lona lua o le lauga a Elder Holland.)

A uma ona soalaupule tamaiti aoga i mea na latou mauaina, ia fai atu i se toatasi pe sili atu o i latou ia fesili nei:

• Aisea e te manatu ai, e le tuuina mai ai e le Atua na’o se faamaoniga atoa faaletino e moni le Tusi a Mamona?

• O le a se fautuaga e te tuuina atu i se uo po o se tagata o le aiga e talanoa atu ia te oe e faapea, o loo tauivi o ia ma faitioga e uiga i le Tusi a Mamona? O le a se isi mea e ono mafai ona e faia e fesoasoani atu ai?

• O le a se mea e te faia (po o le a se mea e mafai ona e faia) pe afai e foliga mai e le’i i ai se tali lelei mo se faitioga e te faalogo i ai?

Tuu atu ni nai minute i tamaiti aoga e mafaufau ai i le manuia o a latou lava suesuega patino o le Tusi a Mamona, ma ia fai ni fuafuaga mo suiga e pei ona uunaia ai e le Agaga. Faamalosiau i tamaiti aoga ia aofia i a latou fuafuaga ia se sini e suesue ma tatalo e pei ona manaomia ai e mautinoa ai o le Tusi a Mamona o le maa’au’au o a latou molimau. A o latou mafaufau loloto, atonu e te faaali atu le faamatalaga lenei mai ia Elder Kevin W. Pearson o le Fitugafulu:

Elder Kevin W. Pearson

Afai o e tauivi, fenumiai, pe ua leiloa faaleagaga, ou te uunaia oe e fai le mea e tasi lea ou te iloa o le a toe faafoi ai oe i luga o le ala. Toe amata ona suesue ma le agaga tatalo le Tusi a Mamona ma ola ai i ona aoaoga i aso uma, i aso uma, i aso uma! Ou te molimau atu i le maoae o le mana o le Tusi a Mamona o le a suia ai lou olaga ma faamalosia ai lau faaiuga e mulimuli ia Keriso. O le a suia e le Agaga Paia lou olaga ma fesoasoani e te iloa ai “mea e pei ona i ai moni” [Iakopo 4:13]. O le a Ia faaali atu ia te oe le isi mea e sosoo e tatau ona e faia. (Kevin W. Pearson, “Tumau i le Laau,” Ensign po o le Liahona, Me 2015, 116)

Fai atu i ni tamaiti aoga se toalua o e fia faasoa mai se molimau puupuu e uiga i le Tusi a Mamona e fai o lea. E mafai foi ona faasoa atu lau molimau.

Mo Le Isi Taimi

Fai atu i tamaiti aoga e mafaufau pe faafia ona latou maua ni aafiaga o faamanuiaga i le pule o le perisitua ma ki o le perisitua i vaiaso taitasi. Faamalosiau ia i latou e suesue i anomea mo sauniuniga mo le lesona e sosoo ai i le toefuataiga o le perisitua, ma vaavaai mo ni auala e mafai e le perisitua ona tuuina atu ai ni avanoa i mana faaola o Iesu Keriso.