“Lesona 18 Anomea mo le Sauniuniga o le Vasega: Tamaitai o le Au Paia o Aso e Gata Ai ma le Aualofa,” Anomea a le Faiaoga O Faavae o le Toefuataiga (2019)
“Lesona 18 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 18 Anomea mo le Sauniuniga o le Vasega
Tamaitai o le Au Paia o Aso e Gata Ai ma le Aualofa
Ina ua saunoa e uiga i le Aualofa, na folafola mai e le Perofeta o Iosefa Samita, “E lei atoatoa lava ona faatulagaina le Ekalesia seia muai faatulagaina tamaitai” (Aoaoga a Peresitene o le Ekalesia: Iosefa Samita [2007], 451). Mafaufau i le savali o loo auina atu e lenei faamatalaga i le lalolagi e uiga i le nofoaga o tamaitai i totonu o le Ekalesia a le Alii. A o e suesue i nei anomea, mafaufau pe taua tele faapefea le galuega a tamaitai o le Au Paia o Aso e Gata Ai ma le Aualofa i le Ekalesia toefuataiina a Iesu Keriso.
Vaega 1
E faapefea ona fausia e tamaitai o le Au Paia o Aso e Gata Ai le malo o le Atua?
Na saunoa Elder James E. Talmage o le Korama a Aposetolo e Toasefululua i se tasi o taimi, “O le siamupini sili lava o tamaitai ma le tulaga faatamaitai i le lalolagi o Iesu Keriso” (i le O Afafine i Lo’u Malo [2011], 3).
Na aoao mai Peresitene M. Russell Ballard o le Korama a Aposetolo e Toasefululua:
Sa taua lava ma faapitoa o tatou tuafafine i taimi uma i le galuega a le Alii. Sa galulue ma le totoa o tatou tamaitai faamaoni i le faamoemoe o le upumoni ma le amiotonu mai lava i le taimi a o le’i faavaeina lenei lalolagi. … O lo tatou tisipenisione ua le aunoa ma ona tamaitai totoa. (M. Russell Ballard, “Women of Righteousness,” Ensign, Ape. 2002, 69)
O Ema Samita, le faletua o le Perofeta o Iosefa Samita, ua fai ma se faataitaiga o se tamaitai o le Au Paia o Aso e Gata Ai o lē na faataunuuina se matafaioi taua i le Toefuataiga. I se faaaliga ia Iosefa Samita, sa faatatau atu ai le Alii ia Ema o “se tamaitai filifilia” (Mataupu Faavae ma Feagaiga 25:3). A o e faitau i ni vaega o lenei faaaliga, mafaufau e faailoga ia tiutetauave ma le fautuaga na tuuina atu e le Alii ia Ema. Ia maitau i le fuaiupu 16 na tautino mai ai e le Alii e faapea, o Lana fautuaga ua tuuina mai ia Ema e faatatau foi ia i tatou taitoatasi.
Suesue e Sauniuni ai mo le Vasega
Faitau le Mataupu Faavae ma Feagaiga 25:5–7, 10–11, 13, 15–16.
Sa puapuagatia Ema ma Iosefa i tofotofoga e tele i le aluga o o latou taimi na faatasi ai. Sa laua aumaia foi i le tasi ma le isi le mafanafana ma le fiafia tele. I le faamaoni i lona valaauga, sa avea Ema ma se faamafanafanaga tele ia Iosefa, i le faamalosiauga ma le faamafanafanaga o ia a o i ai i sauaga ma faalavelave faigata. O le tomanatu ai i se taimi sa asiasi atu ai Ema ia te ia a’o lafi mai le lamatiaina, sa tusia ai e le Perofeta, “Ua toe i ai o ia iinei, e oo lava i le puapuaga e fitu, o Ema e le fefe, e mausali, ma e le maluelue, e le masuia, ma e alofa” (“Journal, December 1841–December 1842,” 135, josephsmithpapers.org).
Sa tautua Ema mo se taimi o se tusiupu a Iosefa, na fesoasoani i le faaliliuga o le Tusi a Mamona. I lona olaga atoa sa molimau o ia ma le toa e uiga i le Tusi a Mamona. I se taimi e le’i mamao ona maliu lea o ia, sa ia fai atu ai i lana tama tama: “O lo’u talitonuga, o le Tusi a Mamona e faalelagi lona moni—e leai ma so’u masalosalo laitiiti i ai” (Emma Smith, in “Last Testimony of Sister Emma,” Saints’ Herald, Oct. 1, 1879, 290). I le usiusitai ai i le poloaiga a le Alii, sa tuufaatasia ai e Ema le uluai tusi o viiga a le Ekalesia.
Sa aoao atu Ema e ala i faataitaiga: “I Niu Ioka, sa ia su’iina ai lavalava mo … faifeautalai na valaauliaina e talai atu le talalelei. … I Katelani, sa galulue ai i latou ma isi tamaitai e ao ni palanikeke, meaai, ma lavalava mo le au savavali o le Tolauapiga a Siona e ave atu i le Au Paia pagatia i Misuri. Sa fesoasoani o ia e saunia ni taumafataga ma su’i [lavalava] mo alii sa galulue i le fausiaina o le Malumalu o Katelani. Sa ia taliaina le toatele o alii sa galulue i le malumalu o ni tagata nofototogi i [lo laua fale] ae momoe i laua ma Iosefa i luga o le fola. I aso popofou o Navu, sa ia tuuto atu ai le tele o lona taimi ma le taulaiga i le tausiga o le toatele o e na gasegase i le malaria na tolauapi i fafo o lona fale i luga o auvai o le Vaitafe o le Misisipi. I nei ma isi auala, sa ia faataitaia ai auaunaga na faia e le toatele o uso i ona aso” (Teachings: Joseph Smith, 450).
Mafaufau Loloto a o Sauniuni mo le Vasega
Mafaufau e uiga i se tamaitai o faataitaiga e te iloa e faaaoga lana faatosinaga, leo, ma tomai e faia ai ni saofaga anoa i le fausiaina o le malo o le Atua. O a ni auala o loo ia fausia ai le malo o le Atua i o tatou aso?
Vaega 2
O le a se mea tulaga ese e uiga i le faalapotoptoga o le Aualofa?
I le tautotogo o le 1842, sa tauivi ai le Au Paia i lo latou matitiva e fau le Malumalu o Navu. E toatele tuafafine sa mananao e faia ni mea se tele e fesoasoani ai. Na taitaia ai e Sarah Kimball ma Margaret Cook, sa faapotopoto ai se vaega o tuafafine e tusia se faavae ma tulafono mo se sosaiete fou a tamaitai e su’i lavalava mo le au galulue i le malumalu. Ina ua latou logoina le Perofeta o Iosefa Samita, sa saunoa atu o ia ia i latou, o le latou faavae sa “o le mea sili lea ua ia vaai i ai” (Teachings: Joseph Smith, 450). “Ae,” sa ia saunoa atu, “e le o le mea lea tou te mananao i ai. Ta’u atu i tuafafine ua talia e le Alii la latou taulaga, ma ua ia te ia se mea e sili atu mo i latou. … Ou te valaaulia i latou uma ia matou feiloai faatasi ma nisi o le usoga … ma o le a ou faatulagaina ai tamaitai i lalo o le perisitua e pei o le mamanu o le perisitua” (i le O Afafine i Lo’u Malo, 12). Sa faamatalaina e Eliza R. Snow, sa aoao e Iosefa Samita le Aualofa e faapea “sa i ai lea lava faalapotopotoga i le ekalesia anamua” (i le O Afafine i Lo’u Malo, 7).
Na aoao mai Sister Julie B. Beck, o lē sa avea ma Peresitene Aoao o le Aualofa, le uiga o le, ia faatulagaina e pei o le mamanu o le perisitua:
E tulaga ese le Aualofa ona sa faatulagaina e pei o le, “mamanu o le perisitua” [Joseph Smith, quoted in Sarah M. Kimball, “Auto-biography,” Woman’s Exponent, Sept. 1, 1883, 51]. … Tatou te faagaioia e pei o le perisitua—o lona uiga, tatou te saili, maua, ma faatino le faaaliga; fai faaiuga i aufono; ma faaaafia i tatou lava i le tausiga o tagata taitasi. E a tatou le faamoemoega o le perisitua ina ia saunia i tatou lava mo faamanuiaga o le ola faavavau e ala i le osia ma le tausia o feagaiga. O le mea lea, e pei o o tatou uso o e umia le perisitua, e a tatou se galuega o le faaolataga, auaunaga, ma le avea o se nuu paia. (Julie B. Beck, “O Le Aualofa: O Se Galuega Paia,” Ensign po o le Liahona, Nov. 2009, 110)
Na faamamafa atili mai e Peresitene Dallin H. Oaks e faapea, o le galuega o le Aualofa e faia i le pule o le perisitua:
I se saunoaga i le Aualofa, sa saunoa ai Peresitene Iosefa Filitia Samita, o le taimi lena o loo avea ma Peresitene o le Korama a Aposetolo e Toasefululua e faapea: ‘E ui e le’i [faauuina] tuafafine i le Perisitua, … e le faapea ai la e le’i tuuina atu e le Alii ia i latou le pule. … E mafai ona outou tautatala atu i le pule, ona ua tuu atu e le Alii le pule ia te outou.” Sa ia tau atu foi e faapea, “ua tuu atu i le Aualofa le mana ma le pule e faia ai le tele o mea silisili.” O le galuega o loo latou faia o loo faia i le pule faalelagi” [“Relief Society—an Aid to the Priesthood,” Relief Society Magazine, Jan. 1959, 4–5]. …
… Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina. (Dallin H. Oaks, “O Ki ma le Pule o le Perisitua,” Ensign po o le Liahona, Me 2014, 49–50)
Vaega 3
E faapefea ona fesoasoani tamaitai ma le Aualofa ia ausia faamoemoega o le Atua ma Lana Ekalesia?
O le uluai fonotaga a le Aualofa sa faia i le aso 17 o Mati, 1842, i totonu o le potu pito i luga o le Faleoloa Piliki Lanumumu a Iosefa Samita i Navu, Ilinoi. Sa filifilia ma lagolagoina Ema e avea ma peresitene o le faalapotopotoga fou. Sa tulai Iosefa ma faamalamalama atu, sa o se faataunuuga lenei o le fetalaiga a le Alii e faapea, o Ema “o se tamaitai filifilia, o lē ua Ou valaaulia” (Mataupu Faavae ma Feagaiga 25:3). O se taimi puupuu mulimuli ane sa saunoa ai le Perofeta: “O lenei Sosaiete e tatau ona maua mai faatonuga e ala i le faatulagaga ua faapea ona faavaeina e le Atua—e ala i le auala o fesootaiga o i latou na tofiaina e taitai—ma o lenei ou te avatu ai le ki ia te oe i le suafa o le Atua, ma o lenei sosaiete o le a olioli ma o le a tafe ifo le malamalama ma le atamai mai i lenei taimi” (i le O Tamaitai o Lo’u Malo, 14–15).
Sa tautino atu e Sister Ema Samita e faapea, o le tutu faatasi o le a faia ai e tamaitai o le Ekalesia “se mea maoae” (“Aoaoga a Iosefa Samita e uiga i le Perisitua, Malumalu ma Tamaitai,” Gospel Topics, topics.ChurchofJesusChrist.org). A o e suesue i faamatalaga o loo i lalo, mafaufau e faailoga mea e matilatila ia te oe e uiga i faamoemoega ma le misiona a le Aualofa.
Na faamatala e Zina D. H. Young, o le sa avea ma Peresitene Aoao o le Aualofa:
O le Aualofa … na uluai faatulagaina … e faasafua atu faamanuiaga faaletino i e matitiva ma e le tagolima: ma tuuina atu le faamalosiauga i e vaivai, ma fesoasoani i e ua sese, ma mo le atiina ae sili atu ona lelei, ma le faaaogaina o le tigaalofa o tamaitai, ma le auaunaga alofa, ina ia ona maua avanoa e maua le malosi faaleagaga, ma le mana mo le faataunuuina o le lelei sili atu i le galuega o le togiolaina o le aiga o tagata. (“First General Conference of the Relief Society,” Women’s Exponent, Apr. 15, 1889, 172)
Na aoao mai Sister Beck:
Sa saunoa Iosefa Samita, ua faatulagaina tamaitai o lenei Ekalesia e tuuina atu mo “le toomaga o e matitiva, o e le tagolima, o le fafine ua oti lana tane ma e matuaoti, ma mo le faatinoina o faamoemoega agalelei uma” [i le History of the Church, 4:567] ma “e le na’o le toomaga o e matitiva, ae ia laveai agaga” [i le History of the Church, 5:25]. O lena taumafaiga o se toomaga sa faauiga faalauteleina e Elder John A. Widtsoe o se “toomaga mai le matitiva, toomaga i e mama’i, toomaga i e faaletonu, toomaga mai le valea—toomaga mai mea uma e faalavelavea … i le olioli ma le alualu i luma. …” [Evidences and Reconciliations, arr. G. Homer Durham, 3 vols. in 1 (1960), 308]
… E ala mai i le Aualofa tatou te faataitaia ai le avea ma ni soo o Keriso. Tatou te aoaoina ai mea semanu Na te tuuina mai tatou te aoaoina, tatou te faia mea semanu Na te tuuina mai tatou te faia, ma avea i tatou ma ē e finagalo o Ia tatou te faapei ai. (Julie B. Beck, “O Le Mea Sili e Faia e Tamaitai o le Au Paia o Aso e Gata Ai: Tutu Malosi ma le Mausali,” Ensign ma le Liahona, Nov. 2007, 111, 109)
Na faamalamalama mai e Peresitene Spencer W. Kimball le pogai e ao ai ona malamalama uma alii ma tamaitai i faamoemoega ma le malosi o le Aualofa:
O loo i ai se mana i lenei faalapotopotoga [a le Aualofa] e lei atoatoa ona faaaoga e faamalolosia ai aiga o Siona ma fausia ai le Malo o le Atua—ma o le a le atoatoa lava vagana ai ua maua e tuafafine ma le au perisitua [usoga] le vaaiga mamao i le Aualofa. (Spencer W. Kimball, i le O Afafine i Lo’u Malo, 142; ua faaopoopo le faatusilima)
Mafaufau Loloto a o Sauniuni mo le Vasega
O a ni mea e mafai ona faia uma e tamaitai ma alii ia maua ai le vaaiga mamao a le Aualofa ma galulue faatasi ai e fesoasoani ia ausia ona faamoemoega?