“Lesona 3 Anomea mo le Sauniuniga o le Vasega: Mauaina o le Malamalama Faaleagaga,” Anomea a le Faiaoga O Faavae o le Toefuataiga (2019)
“Lesona 3 Anomea mo le Sauniuniga o le Vasega,” Anomea a le Faiaoga O Faavae o le Toefuataiga
Lesona 3: Anomea mo le Sauniuniga o le Vasega
Mauaina o le Malamalama Faaleagaga
O nisi taimi tatou te maua ai se faamatalaga fou tatou te tete’i ai pe faaosofia ai ni fesili e faatatau i le aoaoga faavae, faiga masani, po o le talafaasolopito o le Ekalesia. O le ala e te faaupua ai au fesili ma le mea e te liliu atu i ai mo ni tali, e mafai ona, a le o le faamalosia ai pe faavaivai ai lou faatuatua. A o e suesue i auala e maua ai le malamalama faaleagaga, vaavaai mo mataupu faavae ia e mafai ona fesoasoani i lou sailia o tali i le ala a le Alii.
Vaega 1
E afaina le i ai o ni fesili e uiga i le Ekalesia?
O loo uunaia pea lava pea i tatou e tusitusiga paia e fai atu [a tatou] fesili i le Atua (tagai Iakopo 1:5; Mataupu Faavae ma Feagaiga 88:63). A o auauna ai i le Au Peresitene Sili, na aoao mai ai Peresitene Dieter F. Uchtdorf:
A’u uo talavou pele, o i tatou o ni tagata e fai-fesili. O le mea lava lea tatou te faia e le aunoa, aua ua tatou iloa o le fesilisili e taitai atu ai i le mea moni. O le ala lena na amata ai le Ekalesia, mai se alii talavou na i ai ni ana fesili. O le mea moni, ou te le mautinoa pe mafai faapefea e se tagata ona iloa le upumoni e aunoa ma le faia o fesili. … O le fesili o le amataga lea o se molimau. … O le faia o fesili e le o se faailoga o le vaivai. O se ta’imua o le tuputupu ae. (“The Reflection in the Water,” faigalotu a le Ofisa o Aoga a le Ekalesia [Nov. 1, 2009], broadcasts.ChurchofJesusChrist.org)
E fiafia le Tama Faalelagi ma Iesu Keriso e tuu mai ia i tatou le poto ma le malamalama. Tatou te tuputupu ae faaleagaga pe a tatou fai atu ni fesili ma sue ia tali faatasi ma le faamaoni ma le faatuatua. Ia manatua a o fesoasoani mai le Alii ia i tatou ia aoao ia i ai le faatuatua ia te Ia, atonu Na te le tuuina mai tali uma i a tatou fesili uma o loo i ai i lenei olaga. O le mea moni, e le faapea e tatau lava ona tatou maua tali i fesili uma ina ia mafai ona maua ai se molimau ma tutu atu o se molimau o le upumoni. Ae o le fai atu o fesili faamaoni e mafai ona fesoasoani e faaauau ai ona tatou aʻoaʻo ma tuputupu ae.
Tusifaamaumau Ou Lagona Uunai
I le avanoa ua saunia, tusi ai ni au fesili se lua na e faalogo i ai pe o loo i ai e uiga i mea tau lotu, tulaga faaleagaga, o le talalelei, po o le Ekalesia.
Tagata aoga: Auina atu se tasi pe lua o fesili nei e ala i le tesi po o le imeli i lou faiaoga inisitituti. O le a ia le faailoaina le tagata e ana ia fesili, ae e mafai ona faaaoga i le vasega e faataitai ai le suega o tali i le ala a le Alii. O nei foi fesili o le a fesoasoani i lou faiaoga e malamalama lelei ai i ou atugaluga ma le ala e mafai ona latou talanoaina ai i le taimi o le kosi faaleaoaoga. A o e suesue pea, vaavaai mo mataupu faavae e mafai ona aoao ai oe i auala e saili ai tali i fesili luitauina.
Vaega 2
O a ni auala e finagalo le Alii ou te sailia ai tali i fesili ma maua ai le malamalama faaleagaga?
O mataupu faavae nei e mafai ona fesoasoani ia te oe e saili ai tali i fesili ma foia ai atugaluga i le ala a le Alii:
-
Faatino i le faatuatua.
-
Iloilo manatu ma fesili ma se vaaiga e faavavau.
-
Saili le malamalama atili e ala i punaoa mamana ua filifilia.
A o e suesue i nei mataupu faavae o loo i lalo o le mauaina o le malamalama, mafaufau e faailoga ia faamatalaga po o manatu aoga e sili atu ona taua ia te oe ina ia mafai ona e faasoa atu i le vasega ma toe tagai i ai i se taimi mulimuli mai.
Faatino i le Faatuatua
O le faatuatua e amata i le talitonuga o loo soifua le Atua, e silafia [e Ia] mea uma, ma o le punavai o upumoni uma. Tatou te faatino le faatuatua pe a tatou filifili e talitonu i le Atua ma liliu atu ia te Ia e ala i le tatalo faamaoni, suesue i Ana aoaoga, ma le usiusitai i Ana poloaiga. Ua valaaulia i tatou e le Alii “aua le masalosalo, ae ia talitonu” (Mamona 9:27). A tatou faavae se mamanu o le faatino le faatuatua i o tatou olaga i aso taitasi, ua tatou fausia se faavae mautu ia Iesu Keriso lea e mautinoa o le a tatou tutumau mausali ai, e tusa lava pe tatou te faafesagai ma ni fesili po o ni luitau faigata (tagai Helamana 5:12).
Pe a e tau i ni faamatalaga po o ni tautinoga e te le malamalama ai pe luitauina ai ou talitonuga, e le tatau ona e masalosalo i lau molimau po o aafiaga faaleagaga ua mavae. I taimi faapena, na fautua mai ai Elder Jeffrey R. Holland, “Aua ne’i atuatuvale ma solomuli. Aua ne’i aluese lou talitonuga. Aua ne’i galo le faalogona sa e lagonaina muamua. Aua ne’i e le talitonu i [le] aafiaga [faaleagaga] na [ua] e maua” (“Remember How You Felt,” New Era, Aug. 2004, 6). Nai lo o lena, “ia taofi mau i mea ua uma ona outou iloa ma tutu malolosi seia oo mai se isi malamalama” (Jeffrey R. Holland, “Le Alii e, Ua Ou Faatuatua,” Ensign po o le Liahona, Me 2013, 94).
A o e “taofi mau i mea ua uma ona e iloa,” ia manatua o le uiga faaalia ma le faamoemoe e te faia ai fesili ma sailia ai tali, o le a aafia ai i se vaega tele lava lou mafai ona aoao mai i le Agaga Paia. O lenei faagasologa e manaomia ai le lotomaulalo, faamaoni, ma le naunautai moni e faatino [pe galue] i le upumoni tatou te maua mai i le Alii.
I le taimi na fetaiai ai Iosefa Samita ma se vaitaimi faalelotu na faatumulia i le “faanunununu ma le fefinauai i totonu o lotu eseese” (Iosefa Samita—Talafaasolopito 1:8), sa ono faigofie lava ona oo ia te ia le lotovaivai, ma faataga le masalosalo e faatumulia lona loto ma “tumau [ai] pea i le pogisa ma le fenumiai” (fuaiupu e 13). Nai lo o lena, sa suesue o ia i tusitusiga paia ma sa faagaeetia loloto e ala i le savali na maua i le Iakopo 1:5 ia “ole atu i le Atua.” O le faatino ai i le faatuatua, na alu ai o ia i le togavao ma “[tootuli] i lalo ma amata ona tuu atu manaoga o [lona] loto i le Atua” (Iosefa Samita—Talafaasolopito 1:15). O lana tatalo faamaoni sa taliina i se faaaliga vaaia faalelagi. Sa ia tuua le togavao ua “iloa nei mo [ia] lava” tali o ana fesili (fuaiupu e 20).
Mafaufau Loloto a o Sauniuni mo le Vasega
Mafaufau e uiga i se tasi o fesili na e tusifaamaumauina muamua atu. E faapefea e oe po o se isi tagata o i ai lenei fesili ona faatino le faatuatua a o sailia tali ma le taitaiga faaopoopo?
Filifili Manatu ma Fesili ma se Vaaiga e Faavavau
Ina ia iloiloina manatu faaleaoaoga faavae, fesili, ma tulaga faaagafesootai ma se vaaiga e faavavau, tatou te mafaufau i ai o ni tusiga o le fuafuaga o le faaolataga ma aoaoga a le Faaola. Tatou te saili le fesoasoani a le Agaga Paia ina ia vaai ai i mea e pei ona silasila i ai le Alii (tagai 1 Korinito 2:5, 9–11). O lenei faiga e fesoasoani tatou te vaai ai i mea mai i le silafiaga a le Alii nai lo le mai i se vaaiga a le lalolagi. E mafai ona tatou faia lenei mea i le faia o fesili e pei “O a mea ua uma ona ou iloa e uiga i le Tama Faalelagi, Lana fuafuaga, ma le ala Na te taulimaina ai Lana fanau?” ma “O a aoaoga o le talalelei e fesootai pe faamaninoina lenei manatu po o le tulaga?”
O fesili na e fesootai i mea e tutupu i le talafaasolopito e tatau foi ona iloiloina ma se vaaiga e faavavau. E mafai foi ona fesoasoani e iloilo ai fesili faaletalafaasolopito i le tusiga sao o le talafaasolopito e ala i le mafaufau i le aganuu ma amioga o le vaitau o le periota nai lo le faamamafaina o vaaiga ma uiga faaalia o aso nei. Mo se faataitaiga, afai e te iloa se tuaa mai i le vaitaimi o le 1800 sa faaipoipo i le 14 po o le 15 o ona tausaga, atonu e te vaai i ai o se faaipoipoga na matuai laitiiti tele, sei vagana ua e malamalama, i lena vaitau o le periota, sa le o se mea sa le masani ai.
E taua le manatua o faamatalaga o le talafaasolopito e le tauaveina le mana faaola o sauniga, feagaiga, ma aoaoga faavae. Ina ia tosina ese e faamatalaga e itiiti le taua ae misi ai le vavega ua faaalia mai e le Toefuataiga e pei o le faaaluina o le taimi e faavasega ai se atigipusa o le meaalofa ae le amanaia ai le ofoofogia o le meaalofa lava ia.
Tusifaamaumau Ou Lagona Uunai
Saili le Malamalama Atili e ala i Punavai Paia ua Atofaina
Vaai faalemafaufau e faapea, ua tuuaia e se tagata ese ia se tagata e pele ia te oe i le faiga o se mea sese. E faapefea ona e iloa pe o latou ta’uina le mea moni pe na taufaaseseina i latou? O le a le mea e leaga ai le talitonu i le tagata ese e aunoa ma le suesuea atili o le mataupu?
E ala i le initoneti, ua tatou maua ai nai lo o se isi lava taimi muamua ia faamatalaga lelei. Ae o le taimi lava foi lea, o loo faaaliali atu ai e le initoneti i tatou i se osofaiga o faamatalaga e le faatuatuaina. Ona e le otometi ona faamamā ese e le initoneti ia faamatalaga taufaasese, taufaavalea, pe sese, mo i tatou, o lea e tatau ai ona tatou faamamaina e i tatou lava. Na lapatai mai Peresitene Dallin H. Oaks o le Au Peresitene Sili, “E tatau ona tatou faaeteete ao tatou saili i le upumoni ma filifili ni punavai” (“Upumoni ma le Fuafuaga,” Ensign po o le Liahona, Nov. 2018, 25).
I le avea ai ma se vaega o le faagasologa filifilia a le Alii mo le mauaina o le malamalama faaleagaga, ua Ia faatuina punaoa e ala mai ai Lona faalia mai o le upumoni ma le taialaina o Lana fanau. O nei punavai ua atofaina mai le lagi, ua aofia ai le Malamalama o Keriso, le Agaga Paia, tusitusiga paia, taitai o le Ekalesia, ma tagata faamaoni o aiga. O le Au Peresitene Sili ma le Korama a Aposetolo e Toasefululua—o perofeta a le Alii i le lalolagi i aso nei—o punaoa taua ia o le upumoni. Ua filifilia e le Alii ma faauuina nei tagata e saunoa atu mo Ia.
E mafai foi ona tatou aoao le upumoni e ala i isi punaoa faatuatuaina. Ae ui i lea, o tagata e saili ma le faamaoni i le upumoni e tatau ona faaeteete i punaoa e le mautinoa o faamatalaga. O le aoao ia iloa ma aloese mai punaoa e le faatuatuaina e mafai ona puipuia i tatou mai faamatalaga sese ma mai ia i latou o e saili e faatamaia le faatuatua. E mafai ona fesoasoani fesili ma taiala nei a o e iloiloina le talitonuina o punavai:
Fesili mo le Iloiloga o Punavai
-
O a agavaa, faamoemoega, ma ni faapitoau o ono i ai o le tusitala?
Na aoao mai Peresitene Dallin H. Oaks o le Au Peresitene Sili e tatau ona tatou “faaeteete e uiga i uunaiga a le tagata o loo aumaia le faamatalaga. … O a tatou faaiuga faaletagata lava ia e tatau ona fua i faamatalaga mai punavai ua agavaa i le mataupu ma saoloto mai mea sese e mafai ona tupu mai uunaiga faaloloto” (Dallin H. Oaks, “Upumoni ma le Fuafuaga,” Ensign po o le Liahona, Nov. 2018, 25).
-
O Ie a le vavalalata o le tusitala i mea na tutupu o loo faamatalaina?
A faamatala e se punavai se mea mai le talafaasolopito o le Ekalsia, ia fesili ia te oe lava, o le a le mamao o le aluese mai o le punavai mai le mea na tupu o loo talanoaina. O tala e faavae i faamatalaga a tagata na faalogo i faamatalaga a isi tagata e masani lava ona tau le faatuatuaina.
-
Pe o ‘alo ma le loto i ai le tusitala i faamaoniga o loo i ai ina ia taufaasese ai?
O ni isi o tusitala latou te aveesea ma le loto i ai ia mea moni taua ma le amanaia faamaoniga taua e lagolago ai o latou manatu faaalia faapitoa
-
Pe o tuuina mai aoaoga ma mea na tutupu o loo tautalagia i lenei punavai i le anotusi talafeagai o o latou taimi, nofoaga, ma tulaga?
O ni isi o aoaoga ma mea na tutupu o le talafaasolopito e mafai ona fenumia’i pe a aveesea mai i le anotusi o o latou taimi ma nofoaga. O anotusi faaletalafaasolopito e aofia ai foi isi mea na tutupu na tupu i lena taimi (e pei o taua, faafitauli o le tamaoaiga, ma faiga faaagafesootai ma faaleupufai), ma le aganuu ma faamatalaga faafuainumera o le faitauaofai o tagata i se taimi ma se nofoaga faapitoa.
-
Pe o lagolagoina aoaoga ma mea na tutupu e ni punavai faaopoopo faatuatuaina?
O le lagolago mai i isi punavai faatuatuaina e fesoasoani e faatulaga ai le sa’o o aoaoga faavae ma mea na tutupu faaletalafaasolopito.
Fesili mo le Iloiloga o Punavai
Mafaufau Loloto a o Sauniuni mo le Vasega
Faaalu ni nai minute e suesue ai le uepisaite a le Ekalesia, le Gospel Library, po o tusitusiga paia mo punaoa e ono fesoasoani ia te oe po o se tasi e te iloa o loo sailia le malamalama faaopoopo e uiga i fesili na e tusifaamaumauina muamua atu. Mafaufau loloto i le matafaioi na faia e le Agaga Paia i lou lava olaga a o e iloiloina ia punavai ma suesueina mo le upumoni.