Lesona 21 Anomea a le Faiaoga

O Le Aoaoga Faavae o Faaipoipoga ma Aiga e Faavavau

O se vaega o le Toefuataiga, na faaali mai ai e le Alii Lona finagalo e uiga i faaipoipoga ma aiga e faavavau. O lenei lesona ua mamanuina ia fesoasoani i tagata aoga ia mafai ona faamatala mai le aoaoga faavae o faaipoipoga ma aiga e faavavau ma ia iloilo mea e mafai ona latou faia ia maua ai nei faamanuiaga.

Fautuaga mo le Aoaoina Atu

O le faaipoipoga i le va o se alii ma se tamaitai e i ai se faamoemoega i le fuafuaga a le Atua.

Amata le vasega i le fai atu o fesili nei (faamanatu i tagata aoga e aloese mai le faia o faamatalaga faamasino e uiga i tagata):

• O a nisi o manatu ma uiga faaalia o loo i ai nei ua e vaaia i le lalolagi e uiga i faaipoipoga?

Faamalamalama atu, e pei lava foi o o tatou aso, sa i ai ni tagata i le vaitaimi o Iosefa Samita sa ese ni o latou manatu e uiga i faaipoipoga. Valaaulia ni tagata aoga e toe faamanatu mai le vaega 1 o anomea mo le sauniuniga, mea na latou aoaoina e uiga i talitonuga o le Au Saaluu e faatatau i le faaipoipoga.

Valaaulia se tagata aoga e faitau leotele le Mataupu Faavae ma Feagaiga 49:15–17 . Fai atu i le vasega e vaavaai mo le aoaoga faavae na faaali mai e le Alii e uiga i le faaipoipoga.

• O le a le mea na aoao mai e le Alii e uiga i le faaipoipoga i lenei fuaitau? (E mafai ona faailoa mai e tagata aoga nisi o upumoni, e aofia ai mea nei: O le faaipoipoga ua faauuina e le Atua. Ua poloaiina tane ma avā ia fanafanau. A faaipoipo alii ma tamaitai ma maua ni fanau, ua latou fesoasoani e faataunuu faamoemoega a le Atua i le foafoaina o le lalolagi. Mafaufau e faaali pe tusi i luga o le laupapa nisi o manatu po o manatu uma nei.)

Mafaufau e faamalamalama atu o le fuaitau “fuataga o le tagata” i le fuaiupu 17 e faasino i fanau agaga a le Atua ua Ia saunia e faaainā ai le lalolagi. Faamalamalama atu foi o le fuaitau “o le faaipoipoga ua faauuina e le Atua” i le fuaiupu 15 o lona uiga, o le faaipoipoga ua poloaiina ma faavaeina e le Atua. I le 1995 na toe faamamafa mai ai e le Alii e ala mai i Ana perofeta i le “O Le Aiga: O Se Folafolaga i le Lalolagi” (ChurchofJesusChrist.org) e faapea “o le faaipoipoga i le va o se alii ma se tamaitai ua faauuina e le Atua.”

Valaaulia tagata aoga e faamanatu puupuu le saunoaga a Elder David A. Bednar mai le vaega 1 o anomea mo sauniuniga. Fai atu i le vasega e vaavaai mo ni mafuaaga e taua ai le faaipoipoga i le va o se alii ma se tamaitai i le fuafuaga a le Tama Faalelagi.

• E faapefea ona faaloloto e aoaoga a Elder Bednar lou malamalama i le pogai e taua ai le faaipoipoga i le va o se alii ma se tamaitai i le fuafuaga a le Tama Faalelagi?

Sa aoao le Au Paia anamua i faamanuiaga o le faaipoipoga e faavavau.

Afai e i ai sau tagata aoga ua faaipoipo i le malumalu, mafaufau e fesili atu i ai po o le a le uiga ia te ia o le faaipoipoina mo le faavavau. Faamalamalama atu, a o le’i faamaeaina le Malumalu o Navu, sa aoao atu e Iosefa le aoaoga faavae o le faaipoipoga e faavavau i ni nai tagata faamaoni o le Ekalesia ma faamauina faatasi i latou. Valaaulia se tagata aoga e faitau leotele le Mataupu Faavae ma Feagaiga 131:1–4 . Fai atu i le vasega e mulimuli i le faitauga, ma vaavaai mo le mea na aoao mai e le Perofeta.

• O a ni upumoni e mafai ona tatou aoaoina e uiga i le faaipoipoga e faavavau mai nei fuaiupu? (A uma ona tali mai tagata aoga, faaali atu le mataupu faavae lenei: Ina ia mafai ona maua le tikeri aupito maualuga o le malo selesitila, e tatau ona tatou ulu atu i le feagaiga fou ma faavavau o le faaipoipoga. Atonu e te faailoa atua e na’o le tikeri aupito maualuga o le malo selesitila tatou te maua ai le faaeaga.)

Faailoa atu i tagata aoga e faapea, i le Mataupu Faavae ma Feagaiga 132:19, na aoao atili mai ai e le Alii e tatau ona tatou “ola … i [Lana] feagaiga” ina ia mafai ona maua le faamanuiaga o le faaeaga.

• O le a le uiga ia te oe o le ia “ola … i [Lana] feagaiga” ona e faatatau i le faaipoipoga e faavavau?

Atonu e te manao e faamamafa atu, e le lava na’o le tau lava ia faamauina i le malumalu. E tatau i ulugalii ona maelega i a latou taumafaiga e tausi a latou feagaiga o le malumalu ma ia fausia se mafutaga malosi ma tumau.

Faaopoopo le “ma ola i” i le mataupu faavae na faaalia ina ia faitauina, “… e tatau ona tatou ulu atu ma ola i le feagaiga fou e faavavau o le faaipoipoga.”

Fai atu i tagata o le vasega e lisi i luga o le laupapa nisi faamanuiaga o le faaipoipoga e faavavau. (Valaaulia tagata aoga e utuvai mai i mea na latou aoaoina mai le vaega 2 o anomea mo sauniuniga.)

• O fea o nei poloaiga e sili ona taua ia te oe? Aisea?

FAALELEIA O LO TATOU AOAO ATU MA LE AOAOINA

Fesoasoani i tagata o le vasega e sauni mo le vasega. O tagata aoga o e sauniuni i latou lava mo le vasega o loo faaalia o latou faatuatua i le Alii ma Lona mafai ona fesoasoani ia i latou ia maua se aafiaga loloto atu o le aoaoina. Faamanatu i tagata aoga e mafai ona latou faataunuu la latou matafaioi i le faagasologa o le aoaoina, e ala i le suesue i anomea mo sauniuniga ma le faamaeaina o gaoioiga e aoao ai. Atonu e te vaavaai i le lesona po o lesona e sosoo ai e faailoa atu ai i tagata aoga mea e mafai ona latou faia e sauniuni ai mo le isi vasega e sosoo ai.

Faamanatu i tagata aoga sa ta’u atu ia i latou anomea mo sauniuniga e talanoa i se ulugalii ua faaipoipoina latou te iloa o e o loo i ai se faaipoipoga malosi ma agaalofa. Sa valaaulia i latou e talanoa po o a ni mea na fai e le ulugalii e atinae ai se faaipoipoga e faavavau ma ni auala ua faatamaoaigaina ai e le la faaipoipoga o laua olaga. Valaaulia ni nai tagata aoga e faasoa mai ni mea na latou aoaoina mai a latou talanoaga.

Valaaulia tagata aoga e mafaufau loloto ma le agaga tatalo po o a ni uiga faaalia, uiga faaletagata, po o faatinoga o le a fesoasoani latou te ola ai i le feagaiga o le faaipoipoga ma fatu ai ni faaipoipoga alofa ma amiotonu. Tuu atu se taimi mo tagata aoga e faamaumau ai ma fai ai se fuafuaga e faatino ai uunaiga latou te maua.

E finagalo le Atua ia tatou puipuia le aoaoga faavae o le faaipoipoga ma le aiga.

Fai atu fesili nei:

• Aisea e taua ai mo i tatou ona puipui le aoaoga faavae o le faaipoipoga ma le aiga? (E mafai e tagata aoga ona toe iloilo le vaega 3 i anomea mo sauniuniga e fesoasoani latou te taliina ai le fesili lenei.)

• Pe na i ai se taimi na e puipuia ai le aoaoga faavae o le faaipoipoga po o le aiga? Afai o lea, na faapeī lou aafiaga?

Faaali atu le anotusi lenei mo tagata aoga, ma fai atu ia i latou e mafaufau pe na i ai se taimi na latou faalogo ai i se mea e atagia mai ai le mafaufau lenei:

“Aisea ua e fia faaipoipo ai nei? O loo i ai lou olaga atoa i ou luma. Aisea e te le faaaoga ai le taimi lenei e fai ai ni mea faafiafia ma faaalualu i luma lou olaga?”

Faamanatu i tagata aoga, o se tasi o mataupu faavae o le mauaina o le malamalama faaleagaga o le iloilo lea o manatu faavae ma fesili ma se vaaiga e faavavau. O le gaoioiga lenei e mafai ona fesoasoani ai i tagata aoga e faataitai ai lenei mataupu faavae ona e faatatau i fesili e uiga i le faaipoipoga.

Vaevae tagata aoga i ni vaega toalaiti, ma valaaulia i latou e talanoa pe o le a faapefea ona latou tali atu i se tasi o i ai lenei vaaiga. Tufa i tagata aoga se kopi o fesili nei (pe faaali atu) e fesoasoani e taiala ai le latou talanoaga:

• O a ni talitonuga o ono i ai i lenei tagata e mafai ona faatapulaaina ai ona manatu i le taua o le faaipoipoga ma le aiga?

• E mafai faapefea e le malamalama i le faaipoipoga ma le aiga mai le vaaiga o le ata o le faaolataga a le Atua, ona fesoasoani e talanoa ai i le manatu faaalia o lenei tagata?

• O a ni aoaoga faavae, mau, po o aoaoga faaperofeta e te ono faasoa atu e fesoasoani ai i lenei tagata, ia vaai atu i le faaipoipoga ma le aiga mai se vaaiga e faavavau?

A maea se taimi talafeagai, valaaulia ni nai tagata aoga e faasoa mai mea na talanoaina e le latou vaega.

Faaiu le vasega i le faasoa atu o lau molimau i upumoni sa faailoa mai i lenei lesona.

Mo Le Isi Taimi

A o e faaumaina le vasega, faamanatu atu i tagata aoga e faapea, na faaalia mai foi e le Alii le aoaoga faavae o faaipoipoga autaunonofo i le Perofeta o Iosefa Samita. Ia uunaia tagata aoga e faitau ma le faaeteete i a latou anomea mo sauniuniga mo le lesona 22 ma o mai saunia e talanoa pe aisea na faia ai e le Au Paia anamua ia faaipoipoga autaunonofo.