Lesona 25 Anomea a le Faiaoga

Faasologa i le Au Peresitene ma le Solo Atu i Sisifo

Ina ua maeʻa le faamaturoina o Iosefa ma Ailama Samita, e toatele le Au Paia na mauaina se molimau paia o Polika Iaga ma le Au Aposetolo e Toasefululua o le a taitaia le Ekalesia a le Alii. I lalo o la latou taitaiga musuia, na malaga ai le Au Paia i le Vanu o Sate Leki. O lenei lesona ua mamanuina e faalolotoina ai le faatuatua o tamaiti o le Au Peresitene Sili ma Aposetolo e Toasefululua o loo umiaina ki uma o le perisitua i lenei tisipenisione mulimuli. O lenei lesona o le a fesoasoani foi i tagata aoga ia talitonu o le a taitaiina e le Alii o latou olaga taitoatasi ao latou faamamaluina a latou feagaiga.

Fautuaga mo le Aoaoina Atu

O Aposetolo o loo umia ki o le malo.

Faaali atu le ata lenei o Iosefa ma Ailama Samita.

Faamatala atu na maliliu faamaturo le auuso i le afiafi o Iuni 27, 1844. O le taeao na sosoo ai, na tietie ai le uo a le Perofeta o Porter Rockwell i lana solofanua i Navu, ma alaga, “Ua fasiotia Iosefa! Ua fasiotia Iosefa! Ua latou fasiotia o ia!” (Anson Call, Autobiography and journal, circa 1856–1889, 12, Church History Library, Salt Lake City, Utah).

• O le a sou manatu o le a le lagona o le Au Paia ina ua uma ona latou faalogo i lenei talafou?

E mafai ona e fesiligia tagata aoga pe na latou faʻalogoina i le talafou le maliu o se perofeta ma le lagona na latou faalogoina.

• O a fesili ma popolega e te manatu na i ai i uluai Au Paia ina ua latou faalogo i le maliu o Iosefa Samita?

• Na faapefea ona tali atu Polika Iaga i le talafou ia Iosefa ma Ailama Samita ua maliliu? (Afai e manaomia, valaaulia tamaiti e iloilo le tali a Polika Iaga i le vaega 1 o anomea mo sauniuniga.)

• E ui i lona faanoanoa i le maliu o le Perofeta, ae o le a le mea na faamafanafanaina ai Polika?

Faaali atu ata o Polika Iaga ma Sini Rikitone.

Faamanatu atu i tamaiti o Polika Iaga o le Aposetolo sinia i le taimi o le maliu o le Perofeta. Sa avea Sini Rikitone o se fesoasoani a Iosefa Samita i le Au Peresitene Sili ma sa ia lagona e tatau ona ia taitaia le Ekalesia e avea ma ona leoleo. Sa taloina e Sini se fonotaga faapitoa, faatasi ai ma le faamoemoe o le a faamaonia e tagata o le Ekalesia lana aia i le taitaiga. Sa lauga atu Sini ma Polika i le Au Paia.

Valaaulia se tagata aoga e faitau leotele le saunoaga a Peresitene Polika Iaga o loo maua i le vaega 1 o anomea mo sauniuniga.

• O le a le upumoni e mafai ona tatou aoaoina mai le saunoaga a Polika Iaga e uiga i le pule a i latou ua faauuina e avea ma Aposetolo? (A uma ona tali mai tagata aoga, tusi le upumoni lenei i luga o le laupapa: O le au Aposetolo e umia ki uma o le perisitua e manaomia e pulefaamalumalu ai i le Ekalesia. [Tagai i le Mataupu Faavae ma Feagaiga 27:12–13; 112:30–32.])

Faamanino atu e faapea i o tatou aso, pe a faauuina Aposetolo taitasi, ua tuuina atu ia te ia ki uma o le perisitua ua toefuatai mai e le Alii i le lalolagi e ala mai ia Iosefa Samita. Peitai, na o le Peresitene o le Ekalesia ua faatagaina e faaaoga nei ki uma. Ua faaaoga e uso o le Korama a Aposetolo e Toasefululua a latou ki o le perisitua i lalo o le taitaiga a le peresitene o le Ekalesia.

• O le a le mea e tupu i le taimi nei pe a maliu le Peresitene o le Ekalesia?

Afai e manaʻomia, ia faʻaalia le faʻamatalaga lea ma valaaulia se tagata aoga e faitau leotele:

Pe a maliu le Peresitene o le Ekalesia, e otometi lava ona faataapeina le Au Peresitene Sili. O tamalii ia na auauna talu ai o ni fesoasoani e toe foi atu i o laua tulaga i le Korama a Aposetolo e Toasefululua, ma e tauaveina e lena korama le taitaiga o le Ekalesia, faatasi ai ma le Aposetolo sinia e avea ma ulu. … I le faasologa o lo tatou talafaasolopito, o le Aposetolo sinia e avea lava ma se e suitalaga i le Peresitene o le Ekalesia. (“A Message from the First Presidency,” Jan. 16, 2018, ChurchofJesusChrist.org)

Toe foi atu i ata o Polika ma Sini, ma fesili atu:

• O le a le aafiaga na maua e le toatele o le Au Paia ao latou matamata ma faalogologo ia Polika Iaga o lauga? Na faapefea ona aafia i latou i lena mea? (Faamalosiau i tagata aoga ia manatua mea na latou suesueina i le vaega 1 o anomea mo sauniuniga.)

Faitau le saunoaga lenei a Elder Neil L. Andersen o le Korama a Aposetolo e Toasefululua. Faamalamalama atu na saunoa Elder Andersen i nei upu i le aso na lagolagoina ai Peresitene Russell M. Nelson o le Peresitene fou o le Ekalesia:

Ua tatou maua le avanoa o ni Au Paia o Aso e Gata Ai e maua ai se molimau patino o le valaauga o [le perofeta] e mai le Atua. (“O Le Perofeta a le Atua,” Ensign po o le Liahona, Me 2018, 25–26)

Valaaulia ni nai tagata aoga e faasoa mai a latou molimau o le perofeta o loo i ai nei ua valaauina e le Atua ma atonu foi na latou mauaina lena molimau. Uunaia tagata aoga e saili a latou lava molimau e valaauina taitai o le Ekalesia e ala i musumusuga.

O Polika Iaga ma le Toasefululua na taitaia le Au Paia i le Vanu o Sate Leki.

Faaali atu se ata o le Malumalu o Navu, ma fesili atu i tagata aoga pe aisea na galulue malosi ai le Au Paia e faamaea le malumalu ae latou te lei tuua o latou fale ma agai atu i sisifo. (E mafai ona e valaauliaina tagata aoga e faitau le faamatalaga a Sarah Rich i le vaega 2 o anomea mo sauniuniga.)

Faamalamalama atu, ina ua tuua e le Au Paia ia Navu e malaga atu i sisifo, sa itiiti lo latou malamalama i mea o taooto i luma o i latou. Valaaulia se tagata aoga e faitau le saunoaga lenei mai ia Elder Erastus Snow, o se paionia anamua ma mulimuli ane avea ma uso o le Korama a Aposetolo e Toasefululua:

Ina ua tuua e paionia [mo Sisifo] … sa matou sailia se atunuu lea na taua e le Perofeta o Iosefa Samita i totonugalemu o Mauga Papa. … O lena vaega o paionia na o atu, e aunoa ma le iloa po o fea latou te o i ai, na o le …na poloaiina ai i latou e le Atua latou te o atu i se laueleele o le a ia faaali atu ia i latou. Ma o soo se taimi e fesiligia ai le Perofeta o Polika Iaga … “O fea e te alu i ai?” na o le pau lava le tali e mafai ona ia tuuina atu o le—“O le a ou faaali atu ia te oe pe a tatou oo atu i ai.” O tatalo a lena vaega o paionia, na ofoina atu i le ao ma le po, e le aunoa i le Atua, o le taitaiina lea o i tatou, e pei ona ia folafola mai, i se laueleele … na ia tautino mai o le a ia tuuina mai ia i tatou. (Journal of Discourses, 16:207)

• O le a se mea e te matauina mai lenei faamatalaga e uiga i le faatuatua o paionia?

Fai atu i tagata aoga e mafaufau mo se minute i le faigamalaga o le olaga o loo i o latou luma ma po o le a le taitaiga mai le lagi latou te faamoemoe e maua.

• O a nisi o luitau na feagai ma le Au Paia ao latou tuua Navu ma amata la latou faigamalaga agai i sisifo? (Afai e manaomia, faasino atu tagata aoga i le vaega 2 o anomea mo sauniuniga.)

Faamanatu atu i tagata aoga i le taimi o le taumalulu faigata o le 1846-47 ao faapotopoto le Au Paia i se nofoaga faanatinati i Winter Quarters, Nebraska, na maua ai e Polika Iaga le faaaliga o loo faamaumauina i le Mataupu Faavae ma Feagaiga 136. Valaaulia tagata aoga e faitau le Mataupu Faavae ma Feagaiga 136:22, saili mo le folafolaga a le Alii i le Au Paia e mafai ona aumaia ia i tatou le mafanafana ao tatou taumafai e saili ma mulimuli i le finagalo o le Atua mo i tatou i o tatou olaga.

E mafai ona e faailoa atu o le fuaitau “ua faaloaloa atu loʻu lima i aso e gata ai” e faatusa i le mana o le Alii ma le taitaiga ua tuuina atu i Ona tagata.

• O le a se mea e mafai ona tatou aoaoina mai i lenei fuaiupu e uiga i mea o loo finagalo le Alii e fai mo Ona tagata? (A uma ona tali mai tagata aoga, tusi le upumoni lenei i luga o le laupapa: E finagalo le Alii e taitaiina ma fesoasoani ia i tatou i o tatou olaga.)

• O a nisi o auala e taialaina ai i tatou e le Alii i o tatou olaga? O le a le mea e tatau ona tatou faia e maua ai sea taitaiga? (Iloilo ma tagata aoga le faamatalaga a Peresitene Oaks i le vaega 2 o le anomea mo sauniuniga.)

Tusi le faamatalaga lenei i luga o le laupapa: E mafai ona ou maua le taitaiga ma le fesoasoani mai le Alii a’o ou …

Valaaulia tagata aoga e faitau le Mataupu Faavae ma Feagaiga 136:2–4, 7–11, 19–24, vaavaai po o a ituaiga tagata na manaomia ona avea ai le Au Paia ina ia maua le taitaiga a le Alii. Mafaufau e valaaulia tagata aoga e lisi a latou tali i luga o le laupapa e faamaea ai le mataupu faavae.

• Aisea e te manatu ai o le taumafai e avea ma ituaiga tagata o loo faamatalaina i nei fuaiupu e fesoasoani tatou te maua ai le taitaiga ma le fesoasoani a le Alii?

Valaaulia tagata aoga e mafaufau i le mea na fai mai ai Polika Iaga ina ua faatoa vaai o ia i le Vanu o Sate Leki (tagai vaega 2 o le anomea mo sauniuniga). Fesili atu i tagata aoga pe na i ai se taimi i o latou olaga na faamautuina e le Alii ia i latou o loo latou faia le mea sa’o pe sa i ai i le nofoaga sa’o. Fuafua e valaaulia ni nai tagata aoga e faasoa mai o latou aafiaga.

Tuu atu i tagata aoga ni nai minute e mafaufau loloto ai ma le agaga tatalo i fesili nei ma faamaumau soo se manatu ma se lagona atonu latou te mauaina:

• O le a se mea e te lagona e tatau ona e taulai i ai ina ia maua ai le taitaiga mai le Alii o loʻo e faʻamoemoe i ai?

Faaiu i le uunaia o tagata aoga e faatino uunaiga na latou maua ma faasoa atu lau molimau i upumoni o loo aoaoina i le lesona.

Mo Le Isi Taimi

Faamalamalama atu i tamaiti o le vasega, i le sauniuniga mo le isi vasega e sosoo ai, o le a latou suesueina se tasi o mea aupito sili ona matautia i le talafaasolopito o le Ekalesia, le Fasiotiga Tagata i Mountain Meadows. Valaaulia i latou e o mai saunia i le vasega e talanoaina lesona e mafai ona tatou aoaoina mai lenei aafiaga.