Lesona 8 Anomea a le Faiaoga

O Le Faatulagaga o le Ekalesia a Iesu Keriso

E ala mai i le Perofeta o Iosefa Samita, na toe faatulagaina ai e le Alii Lana Ekalesia i le lalolagi. O le a fesoasoani le lesona lenei i tamaiti aoga e faamalamalama le mea ua avea ai le Ekalesia a Iesu Keriso o le Au Paia o Aso e Gata Ai ma ”Ekalesia moni ma ola e tasi” (Mataupu Faavae ma Feagaiga 1:30). O le a iloilo ai foi e tamaiti aoga le ala e mafai ona latou auai atoatoa atili ai i le Ekalesia toefuataiina a le Alii.

Fautuaga mo le Aoaoina Atu

Na toefuatai mai e le Alii Lana Ekalesia e ala i le Perofeta o Iosefa Samita.

Fai atu i tamaiti aoga e vaaifaalemafaufau e faapea, ina ua latou valaauliaina se uo ia auai i le lotu, sa ia tali mai: “E lelei lava le Lotu, ae ou te manatu e mafai ona avea au ma se tagata lelei e aunoa ma se tapuaiga faatulagaina. E tofu uma lava i tatou ma o tatou auala taitoatasi i le Atua a ea?

• O a nisi o manatu sese e ono taofia ai lau uo mai le malamalama i le taua o le Ekalesia a le Alii?

Faataga tamaiti aoga e talanoa mo ni nai minute i vaega toalaiti i auala latou te ono faamalamalama atu ai i lenei uo le mafuaaga na faatuina ai e le Alii se ekalesia i le lalolagi. (Faamalosiau i tamaiti aoga e faaaoga mea ua latou aoaoina mai le suesueina o anomea mo sauniuniga.)

Faaali atu ata o loo avatu [i le lesona] o le fale o Pita Uitimera le Matua, i Faiete, Niu Ioka. Valaaulia tamaiti aoga e manatua mea na latou aoaoina i le vaega 1 o anomea mo sauniuniga, e faamatala ai le mea na tupu i le fale o Uitimera i le aso na faatulagaina ai le Ekalesia.

I le avea ai o se vasega, faitau le Mataupu Faavae o le Faatuatua 1:6, ma vaavaai mo le mea sa tusia i se tasi o taimi e Iosefa Samita e uiga i le faatulagaga o le Ekalesia a Iesu Keriso. Afai e manaomia, atonu e te faailoa atu o “tagata folafola le talalelei [faievagelia]” e mafai ona faatatau i peteriaka ae o “epikopo [faifeau]” i taitai pulefaamalumalu, e pei o epikopo.

• O a ni upumoni e mafai ona tatou aoao mai i lenei faamatalaga? (O se tasi o upumoni e mafai ona tatou aoao mai ai e faapea, o le Ekalesia a le Alii i aso e gata ai ua faatulagaina e pei ona sa i ai i aso o Iesu.)

Valaaulia se tamaitiiti aoga e faitau leotele le parakalafa lona lua o le saunoaga a Brother Tad R. Callister i le vaega 2 o anomea mo sauniuniga, lea e amata i upu “Afai e faafetaui e se tagata le mamanu …”

Faaali atu mau nei o tusitusiga paia. Fai atu i tamaiti aoga e filifili se tasi pe sili atu o ia mau e faitau leleoa, ma vaavaai mo mea ua faaalia mai e uiga i le faatulagaga, faiga masani, ma aoaoga a le Ekalesia o le Feagaiga Fou a le Faaola.

• Mataio 16:18–19

• Mataio 28:16–19

• Luka 9:1–25; 10:1–2

• Galuega 8:14–17

• Efeso 2:19–20

• Efeso 4:11–15

• Iakopo 5:14–15

• 1 Korinito 15:29

Faamatalaga: E le faapea e tatau ona faia atoa e alu ai se taimi umi i lenei gaoioiga. Ua na ona fesoasoani ai i tamaiti aoga ia iloa le ala ua mamanuina ai le Ekalesia toefuataiina a le Alii i Lana Ekalesia anamua.

• O a ni mea e tutusa ai o loo e vaaia i le va o le uluai Ekalesia a Keriso ma le Ekalesia i o tatou taimi? Aisea e taua ai le iloa na faatulagaina le Ekalesia a le Alii i aso nei e tusa ai ma le mamanu o Lana Ekalesia anamua?

Faamalamalama atu, e tusa ma le tasi ma le afa tausaga talu na uma ona faatulagaina le Ekalesia, na aoao mai ai le Alii e uiga i le tulaga ese o Lana Ekalesia toefuataiina. Valaaulia tagata o le vasega e faitau leleoa le Mataupu Faavae ma Feagaiga 1:30 , ma vaavaai mo le mea na tautino mai e le Alii.

• Na faapefea ona faamatala e le Alii Lana Ekalesia i le fuaiupu 30? (Fesoasoani i tamaiti aoga e faailoa mai le faamatalaga o le aoaoga faavae lea: O Le Ekalesia a Iesu Keriso o le Au Paia o Aso e Gata Ai, o le ekalesia moni ma ola e tasi i luga o le lalolagi.

Ina ia fesoasoani e faaloloto le malamalama o tamaiti aoga i lenei upumoni, atonu e te fai atu i le vasega e talanoa i nisi o fesili nei. Faamalosiau i tamaiti aoga e toe faamanatu ma mafaufau i mea na latou aoaoina mai i le vaega 2 o anomea mo sauniuniga i le taimi o le talanoaga.

• O le a faapefea ona e faamalamalama atu ma le magafagafa ae ia lototele i se tagata le uiga e faapea, o lenei Ekalesia “o le ekalesia moni ma ola e tasi i luga o le lalolagi atoa”?

• O le a le mea ua avea ai lenei ekalesia o le ekalesia “ola”? (Atonu e fesoasoani le faaali atu o se mea o loo ola, e pei o se tamai laau, ma fai atu i tamaiti aoga e faamatala ia foliga o se mea o loo ola e faatusatusa i se mea e le ola pe ua mate.)

• Aisea e te manatu e taua ai ona malamalama e faapea, e ui ina e le fesuisuiai ia upumoni faavavau o le talalelei a le Faaola, o loo faaauau pea ona tuputupu ae le Ekalesia ma fetuunai e ala i faaaliga mai le Alii?

• O a ni aafiaga ua fesoasoani ia te oe ua iloa ai o Le Ekalesia a Iesu Keriso o le Au Paia o Aso e Gata Ai o le Ekalesia moni ma ola a le Faaola?

O le Ekalesia a le Alii ua mafai ai ona avanoa faamanuiaga o le talalelei i tagata uma.

Faaali atu le saunoaga lenei a Elder D. Todd Christofferson o le Korama a Aposetolo e Toasefululua: Valaaulia se tamaitiiti aoga e faitau leotele:

E aoga le mapu ane ae mafaufau pe aisea ua filifili ai Iesu Keriso e faaaoga se ekalesia, Lana Ekalesia, … e faatino Lana galuega ma le galuega a Lona Tama. (“E Manaomia i Se A Le Ekalesia,” Ensign po o le Liahona, Nov. 2015, 108)

• Aisea e te manatu ua filifili ai Iesu Keriso e faaaoga se ekalesia, Lana Ekalesia, e faataunuu ai Lana galuega ma le galuega a Lona Tama.

I le avea o se vasega, faitau le Moronae 6:3–6 ma le Mataupu Faavae ma Feagaiga 43:8–9, ma vaavaai mo nisi o faamoemoega e oo mai e ala i le auai ma le auauna ai i le Ekalesia a le Alii. Fai i tamaiti aoga e faasoa mai mea na latou aoaoina mai nei fuaitau.

Tuu atu i tamaiti aoga se minute e toe faamanatu puupuu ai ia saunoaga mai ia Elder Christofferson ma Sister Bonnie L. Oscarson mai le vaega 3 o anomea mo sauniuniga.

• O le fea o aoaoga o loo i nei saunoaga na faapitoa le anoa ia te oe? (A uma ona tali mai tamaiti aoga, faaali atu le upumoni lenei: Ua faatulagaina e le Alii Lana Ekalesia e fesoasoani ai ia i tatou ia o mai ia te Ia, maua faamanuiaga uma lava o Lana talalelei, ma maua avanoa e auauna atu ai i isi.)

Fai atu i tagata aoga e mafaufau e uiga i elemene taitasi o lenei upumoni. Valaaulia tagata aoga e faasoa mai pe na faapefea ona latou vaaia le faataunuuina o lenei upumoni i o latou lava olaga. E te ono fai atua nisi o fesili tulitatao e pei o nei:

• O a “faamanuiaga uma lava” o le talalelei a le Alii?

• O le a le matafaioi ua faia e le Ekalesia e fesoasoani ai ia te oe ia avea atili e pei o lou Tama Faalelagi?

Tuu atu i tamaiti aoga se taimi e tomanatu ai ma tusifaamaumau o latou mafaufauga e uiga i le fesili lenei:

• O a auala e mafai ona ou auai malosi atili ai i le Ekalesia ma i le fesoasoani ia ausia ona faamoemoega?

A ua lava loa le taimi, atonu e te fesili atu i tamaiti aoga i mea na latou aoaoina i le aso, e mafai ona fesoasoani ia i latou e tali ai fesili a se uo e pei o le fesili na folasia atu i le vaaiga faataitai na faamatalaina i le amataga o le lesona. E mafai ona e faaiuina i le molimau atu e uiga i upumoni na aoaoina i le lesona.

Mo Le Isi Taimi

Faamatala atu ona o le Toefuataiga o le talalelei, e mafai ona tatou malamalama atili ai i uiga ma le taulaga togiola a le Faaola, nai lo o le mea na mafai [ona malamalama ai] se tagata mo le toeitiiti 2,000 tausaga. Fai i tagata o le vasega e mafaufau e uiga i faamanuiaga o le o mai latalata atili i lo latou Faaola o Iesu Keriso. Valaaulia i latou e faaloloto o latou malamalamaaga ma faatuatua ia te Ia e ala i le suesue ma le toto’a i anomea mo sauniuniga mo le vasega e sosoo ai.