Lesona 20 Anomea a le Faiaoga

O Sauniga o le Malumalu ma Tapuaiga

Ao fausia le Malumalu o Navu, na aoao mai le Perofeta o Iosefa Samita, “E lei atoatoa lava ona faatulagaina le Ekalesia … sei maea ona fausia le Malumalu” (Aoaoga a Peresitene o le Ekalesia: Iosefa Samita [2007],416). O le faamoemoega o lenei lesona o le faalolotoina lea o le malamalama o tagata aoga i le taua o sauniga o le malumalu ma valaaulia i latou e faaleleia le tele (pe a talafeagai ai tulaga) ma le lelei o la latou tapuaiga i le malumalu.

Fautuaga mo le Aoaoina Atu

Na toefuatai mai e le Alii sauniga laveai o le malumalu e ala mai ia Iosefa Samita.

Faaali atu se ata o se malumalu e iloa e tagata aoga. Valaaulia ni nai tagata aoga ua fiafia e tapuai i le malumalu e faasoa mai o latou lagona ao latou ulu atu i le maota o le Alii. E mafai foi ona e fesili pe o le a so latou lagona pe a latou tuua le malumalu.

FAALELEIA O LO TATOU AOAO ATU MA LE AOAOINA

Fai fesili e uunaia ai le faaaogaina. Valaaulia tagata aoga e tali mai i fesili e uunaia ai le faaaogaina. O nei ituaiga fesili e mafai ona faia se matafaioi taua i le fesoasoani i tagata aoga ia iloa auala e faaaoga ai upumoni na talanoaina i o latou tulaga o loo i ai nei ma mafaufau ai i auala e mafai ona faaaoga ai i le lumanai. (tagai Gospel Teaching and Learning [2012], 5.1.4).

Faamatala atu ina ua uma ona faatuina e le Au Paia i latou lava i Navu, Ilinoi, na maua e le Perofeta o Iosefa Samita se poloaiga e fausia se malumalu. E pei o le malumalu i Katelani, o lenei galuega e manaomia ai osigataulaga maoae mai le Au Paia. Ao fausia le Malumalu o Navu, na aoao mai le Perofeta o Iosefa Samita, “E lei atoatoa lava ona faatulagaina le Ekalesia … sei maea ona fausia le Malumalu” (Aoaoga: Iosefa Samita,416).

• Aisea e te manatu ai e lei maeʻa le Toefuataiga o le Ekalesia a le Faaola e aunoa ma se malumalu? (Faamalosiau i tagata aoga e faasoa nisi o mea na latou aoaoina mai le suesueina o anomea mo sauniuniga.)

Faamalamalama atu i se faaaliga na poloaiina ai le Au Paia e fausia le Malumalu o Navu, na faaali mai ai e le Alii le mafuaaga e taua tele ai le malumalu i le Au Paia. Sa ia faamatala mai o le mulumuluga, faauuga, papatisoga mo e ua maliliu, ma isi sauniga e faia i totonu o Lona maota paia. Ia valaaulia tagata aoga e faaalu ni nai minute e suesue ai le Mataupu Faavae ma Feagaiga 124: 31, 34, 40-41, 55, saili pe na faapefea ona folafola mai e le Alii e faamanuia Ona tagata i totonu o malumalu.

Fai atu i tagata aoga e lipoti mai mea na latou mauaina. Faaaoga upu a tagata o le vasega, faaali pe tusi se upu moni i luga o le laupapa e talitutusa ma mea nei: I totonu o le malumalu, e faamanuia ai i tatou e le Alii i sauniga taua ina ia faapaleina i tatou i le mamalu, tino ola pea, ma le ola e faavavau.

• O a ni auala e te manatu o sauniga o le malumalu e saunia ai i tatou mo le mamalu, tino ola pea, ma le ola e faavavau?

Faaali atu se ata o le Faleoloa Piliki Mumu a Iosefa i Navu, ma fai atu i tagata aoga e faamatala mai mea ua latou iloa e uiga i le toefuataiga o le sauniga o faaeega paia o le malumalu. Valaaulia i latou e iloilo le vaega 2 o anomea mo sauniuniga pe a manaomia.

• O le a se mea na e aoaoina e uiga i faamanuiaga o le faaeega paia mai le vaega 3 o le anomea mo sauniuniga?

Ao e talanoaina le faaeega paia, mafaufau e fai atu nisi o fesili tuliloa o loo lisi atu i lalo. Faamanino atu na aoao mai e Elder Bednar ao tatou talanoa e uiga i le malumalu e le tatau ona tatou “ta’u atu pe faamatala foi faatusa faapitoa e fesootai ma feagaiga tatou te maua i totonu o sauniga paia o le malumalu,” ae tatou te “talanoaina faamoemoega autu ma aoaoga faavae ma mataupu faavae e fesootai ma sauniga ma feagaiga o le malumalu” (“Saunia e Maua Mea Manaomia Uma,” Ensign po o le Liahona, Me 2019, 103).

• O le a le mea o aofia i le meaalofa o le faaeega paia? (Tagai vaega 3 o anomea mo sauniuniga.)

• O le a le sootaga i le va o sauniga ma feagaiga?

• Ao e suesue i anomea mo sauniuniga, o le a se mea na e aoaoina e uiga i feagaiga tatou te osia i le taimi o le sauniga o le faaeega paia?

• Aisea e te manatu ai e finagalo le Alii i Ona tagata ina ia maua faaeega paia i totonu o le malumalu?

Mafaufau e tuu atu i tagata aoga se minute pe lua e fefaasoaai ai ma se isi tagata aoga o loʻo nofo latalata ane o latou manatu e uiga i fesili nei o loo maua i le faaiuga o le anomea mo sauniuniga:

• O le a se mea e te fautua atu i se tasi e fai ina ia saunia e maua ona faaeega paia? Aisea e taua tele ai ia te oe le malumalu ma ona sauniga?

O tapuaiga i le malumalu e valaaulia ai le mana o le Alii ma faamanuiaga i o tatou olaga.

Faamanatu atu i tagata aoga o le Malumalu o Katelani o le uluai malumalu lea ua maeʻa i la tatou tisipenisione. O lona faamoemoega na ese mai malumalu na sosoo ai—na saunia ai se nofoaga mo le Alii e toefuatai ai le malamalama ma ki o le perisitua mo tapuaiga i malumalu i le lumanai. I le taimi o le tatalo o le faapaiaga o lena malumalu, na ole atu ai Iosefa Samita i le Alii e tuuina atu ni faamanuiaga faapitoa ia i latou o e tapuai i le malumalu. Valaaulia tagata aoga e iloilo le Mataupu Faavae ma Feagaiga 109:13, 22--26 ma vaavaai mo faamanuiaga e mafai ona latou maua e ala mai i tapuaiga i le malumalu.

• E faatatau i nei fuaiupu, o a faamanuiaga e mafai ona tatou maua ao tatou tapuai i totonu o le malumalu? (Mafaufau e lisi tali a tagata aoga i luga o le laupapa ma fai atu ia i latou e faamatala pe aisea e taua ai nei faamanuiaga ia i latou. E mafai ona e fesoasoani i tamaiti ia iloa se mataupu faavae e pei o nei: A o tatou tapuai atu i le malumalu a le Alii, o le a Ia faaauupegaina i tatou i Lona mana ma le puipuiga.)

Ia talanoaina ma tagata aoga mafuaaga tatou te manaomia ai le mana ma le puipuiga a le Alii i o tatou aso. Valaaulia tagata aoga na fesiligia se tagata o le latou aiga po o se uo po o a ni faamanuiaga patino na ia lagonaina e ala i sauniga o le malumalu ma tapuaiga e faasoa atu mea sa latou aoaoina (tagai i le faaiuga o le vaega 1 i le anomea o le sauniuniga). E mafai foi ona e valaaulia tagata aoga e molimau atu i faamanuiaga na latou lagonaina e ala i a latou lava tapuaiga i le malumalu.

Faaali atu ma faitau le saunoaga lenei a Peresitene Russell M. Nelson:

Ou te aioi atu ia te outou ia tagai ma le agaga tatalo pe faapefea ona faaalu lou taimi. … Afai e te latalata i se malumalu, ou te uunaia oe ia saili se auala e fai ai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli. Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu. (Russell M. Nelson, “Avea ma Faataitaiga Lelei o le Au Paia o Aso e Gata Ai,” Ensign po o le Liahona, Nov. 2018, 114)

Ina ia fesoasoani i tagata aoga ia mafaufau loloto e uiga i la latou tautinoga i le Alii ma o latou lava aafiaga i le malumalu, ia faaali atu fesili nei, ma valaaulia tagata aoga e mafaufau loloto i fesili e faatatau i o latou tulaga o i ai nei. Tuʻu atu i tagata aoga le taimi e mafaufau ai ma masalo e faamaumauina o latou lagona.

1. Pe o i ai ni mea o faʻalavelave po o ni tulaga o le le agavaa e taofia ai aʻu mai le malumalu? O le a se mea e tatau ona ou faia e faʻaitiitia ai nei faʻalavelave?

2. O a ituaiga osigataulaga e finagalo le Alii ou te faia e maua ai le tele o faamanuiaga o loo maua e ala i le tapuai i le malumalu?

3. E mafai faapefea ona ou faia laʻu tapuaiga i le malumalu ia sili atu ona anoa?

4. O a ni auala atonu e finagalo le Alii ou te fesoasoani ai i isi ia maua faamanuiaga o le malumalu?

Mo Le Isi Taimi

Faamanino atu i le isi vasega o le a sosoo ai, o le a maua e tagata aoga le avanoa e talanoaina ai le faapaleina o sauniga o le malumalu o le faaipoipoga e faavavau. Uunaia tagata aoga e faitau ma le faaeteete le anomea mo le sauniuniga mo le lesona 21 ma mafaufau pe aisea e matuai totonugalemu ai le faaipoipoga ma le aiga i le fuafuaga o le fiafia a le Tama Faalelagi.