Lesona 16 Anomea a le Faiaoga

O Le Malumalu i Katelani ma Ki o le Perisitua

Na poloaiina e le Alii le Au Paia e fausia se malumalu i Katelani, Ohaio, ma folafola atu o le a Ia faaeeina i latou i le “mana mai luga” (Mataupu Faavae ma Feagaiga 95:8). O lenei lesona o le a fesoasoani i tagata aoga e mafaufau pe faapefea ona latou usitai ma le atoatoa atili i poloaiga a le Alii e faatatau i le malumalu. O le a fesoasoani foi ia i latou e faamatala le taua o ki o le perisitua na toefuataiina i totonu o le Malumalu o Katelani.

Fautuaga mo le Aoaoina Atu

Na fesoasoani le Alii i le Au Paia e faataunuu Lana poloaiga e fausia le Malumalu o Katelani.

Valaaulia tagata aoga e mafaufau e uiga i se mea na fesili mai ai le Alii, e ala mai i Ana auauna, i tagata o le Ekalesia e fai ae e foliga faigata pe telē. Fai atu i ni nai tagata aoga e faasoa mai se faataitaiga i le vasega.

Faaali atu se ata o le Malumalu o Katelani. Faamanatu atu i tagata aoga e faapea ia Tesema 1832, sa poloaiina ai e le Alii le Au Paia e fausia “se fale o le Atua” i Katelani (Mataupu Faavae ma Feagaiga 88:119).

Faamalamalama atu ina ua silia ma le lima masina talu le poloaiga a le Alii, e lei amataina lava e taitai ma tagata o le Ekalesia le fausiaina o le malumalu. Faitau le Mataupu Faavae ma Feagaiga 95:1-3 o se vasega, ma vaavaai mo le mea na fetalai mai ai le Alii e uiga i le faatuai ona fausia e le Au Paia le malumalu.

• Aisea e te manatu ai o le le fausiaina o le malumalu atonu o se “agasala mamafa tele”? (fuaiupu 3; tagai foi fuaiupu 6).

• O a auala e te manatu o le aoa’iina e le Alii o le Au Paia mo le le fausiaina o le malumalu o se faailoga o Lona alofa mo i latou? (tagai fuaiupu 1).

Valaaulia tagata aoga e faitau le Mataupu Faavae ma Feagaiga 95:8, ma vaavaai mo le mafuaaga e tasi na finagalo ai le Alii e fausia se malumalu i Katelani.

Faamalamalama atu e faapea, o le faaee o lona uiga o le tuuina atu i se tasi o se meaalofa. O le faaeega na ta’ua i totonu o le Mataupu Faavae ma Feagaiga 95 na aofia ai meaalofa o le atamai faaleagaga ma le mana. O le sauniga o le faaeega i le malumalu e pei ona faia i aso nei, e le i faaalia se’ia o’o i le tausaga e 1842 i Navu, Ilinoi.

Valaaulia se tagata aoga e faitau leotele le Mataupu Faavae ma Feagaiga 95:11–12 .

• O le a se mataupu faavae e mafai ona tatou aoao mai i le folafolaga a le Alii i le Au Paia i le fuaiupu 11? (E faaaogaina ai upu a tagata aoga, tusi se mataupu faavae i luga o le laupapa e talitutusa ma lenei: A o tatou taumafai e tausi poloaiga a le Alii, o le a Ia tuuina mai le pule e faataunuu ai Lona finagalo.)

• Na ono mafai faapefea ona avea le mauaina o le folafolaga mai le Alii o se faamafanafana i le Au Paia i Katelani? (Tagai i le faamatalaga a Eliza R. Snow i le vaega 1 o le anomea mo sauniuniga.) E mafai faapefea ona fesoasoani lenei mataupu faavae e faamafanafana ai oe i lou olaga i le asō?

• O a nisi o mea na ositaulaga ai le Au Paia ina ia usitaia le poloaiga a le Alii e fausia le Malumalu o Katelani? (Afai e manaomia, faamalosiau i tagata aoga e iloilo le vaega 1 o anomea mo sauniuniga.)

• Na faapefea ona tuu atu e le Alii le mana ma fesoasoani i le Au Paia e fausia le Malumalu o Katelani?

Valaaulia tagata aoga e iloilo le faamatalaga a Peresitene Thomas S. Monson i le vaega 1 o le anomea mo sauniuniga ma mafaufau i le vaega lea: E faapefea e le Au Paia i aso nei ona fesoasoani i le fausiaina o malumalu? O le a le ituaiga o osigataulaga o loo ou faia e faatatau i tapuaiga i le malumalu?

• Aisea e te manatu ai e masani ona fesootai le ositaulaga i faamanuiaga o le malumalu?

FAALELEIA O LO TATOU AOAO ATU MA LE AOAOINA

Tuu atu i tagata aoga se taimi e manatunatu ai. Pe a tuuina atu i tagata aoga se taimi e tomanatu ai i aafiaga o le ola ai e tusa ma le talalelei a Iesu Keriso, e mafai ona fesoasoani le Agaga Paia e aumai manatu i o latou mafaufau. E masani lava o le tuufaatasia o lenei vaega ma le valaauliaina o tagata aoga e faamaumau o latou manatu ao lei faasoaina atu e mafai ona taitai atu i ni tali e sili atu ona taua ma se naunautaiga tele e faasoa atu.

Tuu atu se taimi i tagata aoga e mafaufau ai (ma atonu e faamaumau) e faatatau i (1) osigataulaga na latou faia e faatatau i le malumalu, (2) o faamanuiaga ua latou mauaina mai le malumalu, ma (3) mea e mafai ona latou faia ina ia tausia atili ma le filiga poloaiga a le Alii e faatatau i le malumalu.

Na taliaina e le Alii le Malumalu o Katelani, ma na tuuina atu ki o le perisitua ia Iosefa Samita ma Oliva Kaotui.

Faamatalaga: O le a suesue e tagata aoga le Mataupu Faavae ma Feagaiga 109, le tatalo o le faapaiaga o le Malumalu o Katelani, i le lesona 20.

Faamatala atu ona o le ositaulaga a le Au Paia ma le fesoasoani a le Alii, na maea ai ona fausia le Malumalu o Katelani ona faapaiaina ai lea i le 27 Mati , 1836. O le faaeega o le mana o le Alii na oo mai o se taunuuga o le usiusitai o le Au Paia i le fausiaina o le malumalu.

• O a nisi o faaaliga vaaia faaleagaga na vaaia e le Au Paia ao faapaiaina le Malumalu o Katelani? (Faamalosiau i tagata aoga ia manatua mea na latou aoaoina i le vaega 2 o anomea mo sauniuniga.)

Faamatala atu ina ua mavae se vaiaso e tasi, na faaali atu le Faaola ma isi avefeau mai le lagi ia Iosefa Samita ma Oliva Kaotui i totonu o le malumalu. Valaaulia se tagata aoga e faitau leotele le ulutala o le Mataupu Faavae ma Feagaiga 110 .

Faaali atu le ata lenei:

Faitau le Mataupu Faavae ma Feagaiga 110:1-10 ma le vasega, ma vaavaai mo faamatalaga o le Faaola ma Lana feau ia Iosefa ma Oliva. Valaaulia tagata aoga e faasoa mai mea na tulagaese ia i latou. Ao faasoa mai tagata aoga, tuu atu se taimi mo i latou e talanoaina ai fesili e pei o nei:

• O le a le mea e mafai ona tatou aoaoina e uiga i le Alii mai Lona faaali mai ma aoaoga i totonu o Lona maota fou?

• O a mea tatou te aoaoina mai upu ma folafolaga a le Faaola i fuaiupu 7–8 e faatatau i le paia o Ona malumalu?

• O le a le aafiaga o le a i ai le malumalu i Katelani i malumalu uma o le lalolagi? (tagai fuaiupu 9–10).

Valaaulia tagata aoga e faasoa mea latou te iloa e uiga i isi avefeau faalelagi ia na faaali atu i totonu o le Malumalu o Katelani. Atonu e te faaalia le upumoni lenei: Na auina atu e le Alii aveafeau faalelagi i le Malumalu o Katelani e tuuina atu ki o le perisitua e taua mo le galuega o le faaolataga.

Fai atu foi i tagata aoga e faamatala ki na tuuina atu e nei avefeau ia Iosefa ma Oliva. Faasino atu tagata aoga i le vaega 2 o anomea mo sauniuniga pe a manaomia. Ao faasoa tagata aoga, mafaufau e faaali igoa nei Mose, Elia, ma Elaia ma ki talafeagai.

• O a ni auala ua faamanuiaina ai i tatou i aso nei i ki o le perisitua na tuuina atu i le Malumalu i Katelani?

Faaali atu le saunoaga lenei mai ia Peresitene Iosefa Filitia Samita, ma valaaulia se tagata aoga e faitau leotele:

O le Malumalu o Katelani o loo umia se tulaga uiga ese i talafaamaumau o le fauina o malumalu. E le pei o isi malumalu. Sa fauina ma le faamoemoe mo le toefuataiina mai o ki o le pule. (Iosefa Filitia Samita, Doctrines of Salvation,comp. Bruce R. McConkie [1955], 2:242)

Mafaufau e faasoa atu se faataitaiga e faatatau i se auala patino na faamanuiaina ai lou olaga ona o ki na tuuina atu i totonu o le Malumalu o Katelani. Faamalamalama atu o ki o le perisitua na tuuina atu i le Perofeta o Iosefa Samita ma Oliva Kaotui o loo umia ma faaaogaina i ona po nei e sui auai taitasi o le Au Peresitene Sili ma le Korama a Aposetolo e Toasefululua i lalo o le taitaiga a le Peresitene o le Ekalesia.

Mo Le Isi Taimi

Faamalamalama atu i le sauniuni ai mo le vasega e sosoo ai, o le a maua e tagata aoga le avanoa e suesue ai i se tasi o vaitaimi e sili ona pogisa i le talafaasolopito o le Ekalesia, lea na feagai ai le Au Paia ma tofotofoga, sauaga, ma le faalataina. Valaaulia tagata aoga e suesue le anomea mo sauniuniga ma o mai saunia i le vasega e faasoa mataupu faavae e mafai ona fesoasoani ia i latou e faasaga atu i e tetee ma faigata ma le faatuatua i le Atua.