Lesona 23 Anomea mo le Sauniuniga o le Vasega

O Le Misiona Faaperofeta ma le Maliu Faamaturo o Iosefa Samita

Mafaufau i tagata i tusitusiga paia o e sa naunau e ositaulaga o latou ola i le faia o le finagalo o le Alii. O a ni mea ua aoao atu ia te oe e osigataulaga faapea e uiga i molimau ma tautinoga a nei tagata? A o e suesue i le misiona ma le maliu faamaturo o le Perofeta o Iosefa Samita, mafaufau pe na faapefea ona aafia lou olaga i ana saofaga ma le talatuu.

Vaega 1

O a mea na tutupu na taitai atu ai i le faafalepuipuiina o le Perofeta o Iosefa Samita i le Falepuipui o Karefasi?

“Ua maliliu Iosefa ma Ailama. Ua lavea [Ioane] Teila. … O loo ou manuia.” O nei upu o se vaega o se savali na auina atu e Uiliata Risati ia Ema Samita ma isi o le Au Paia i Navu, i le mavae ai o ni itula na matua fasiotia ai i se ala saua ia Iosefa ma Ailama Samita i le Falepuipui o Karefasi i le afiafi o le aso 27 o Iuni, 1844 (Willard Richards letter, Carthage Jail, June 27, 1844, Church History Library, Salt Lake City). Vaai faalemafaufau i manatu ma lagona o Ema ma le Au Paia atonu na i ai a o latou faitauina nei upu.

O le tuputupu ae o faatosinaga faaupufai ma faaletamaoaiga o le Au Paia sa manatu nuu tuaoi o se taufaamatau. E oo ane i le taumafanafana o le 1844, ua matuai faateteleina le tetee faasaga ia Iosefa Samita ma le Ekalesia. O nisi o e na o ese ma le Ekalesia sa taupulepule e faatupu le tetee o manatu o tagata lautele e faasaga i le Perofeta. Sa talanoaina e nisi o tagatanuu o Ilinoi e tutuliese faamalosi le Au Paia mai le setete, a’o taupulepule e isi le fasiotiina o le Perofeta.

I le aso 10 o Iuni, 1844, sa faatonuina ai e Iosefa Samita, o le sa avea ma pulenuu o Navu, ma le aufono o le aai o Navu, e faatamaia le Nauvoo Expositor ma le tailolomi sa lolomiina ai. O le Nauvoo Expositor sa o se nusipepa e tetee i Mamona sa faapea ona taufaaleagaina le Perofeta ma isi o le Au Paia ma talosaga mo le faaleaogaina o le Nauvoo Charter. Sa fefefe taitai o le aai ina nei avea lenei faasalalauga ma mea o le a taitai atu ai i faiga a le au faatupu vevesi. O se taunuuga o le faatinoga e le pulenuu ma le aufono a le aai, na oo mai ai se moliaga le faavaea a le pulega o Ilinoi o fouvalega e faasaga i le Perofeta, o lona uso o Ailama, ma isi taitai o le aai o Navu. Na faatonuina e le kovana o Ilinoi, o Thomas Ford, ia alii e tulai i le faamasinoga i Karefasi, Ilinoi, lea na i ai le nofoaga o le pulega faalemalo o le itumalo, ma sa folafola atu ia i latou lo latou puipuiga. Na iloa lava e Iosefa afai e alu o ia i Karefasi, o le a matua lamatia lona ola mai tagata leaga o e na taufaamata’u ia te ia. …

… I le aso 24 o Iuni, na faamavae atu ai Iosefa ma Ailama i o la’ua aiga ma malaga atu ma isi taitai o le aai o Navu agai i Karefasi. (Aoaoga a Peresitene o le Ekalesia: Iosefa Samita [2007], 529–30)

Faauma se tasi po o gaoioiga uma e lua nei:

1. Matamata le vitio “Ministry of Joseph Smith: Sealed His Testimony with His Blood” (1:14).

2. Suesue le vaega uma o loo totoe o le vaega 1.

A o malaga atu le Perofeta faatasi ma isi i Karefasi, sa ia valoiaina lona maliu faamaturo.

Suesue e Sauniuni ai mo le Vasega

Suesue le Mataupu Faavae ma Feagaiga 135:4.

O le aso na sosoo ai, na “tuuina atu ma le lotofuatiaifo” e Iosefa ma Ailama i laua lava i taitai o le itumalo i Karefasi. Ina ua uma ona tatalaina i tua le auuso i le totogiina o le tupe mo le uluai moliaga, ae na toe molia sese i laua i le taufaalata i le setete o Ilinoi, taofia, ma faafalepuipuiina i le Falepuipui i Karefasi e faatali ai se faamasinoga. O Elder Ioane Teila ma Uiliata Risati, na pau ia o uso o le Toasefululua o e na le i o i ni misiona i le taimi lea, na ofo ane e auai faatasi ma i laua” (Teachings: Joseph Smith, 530).

Vaega 2

O le a le mea na tupu i le Falepuipui o Karefasi?

Faauma se tasi po o gaoioiga uma e lua nei:

1. Matamata i le vitio “Iosefa Samita—Perofeta o le Toefuataiga,” lea o loo faaalia ai le vaaiga o le maliliu o Iosefa ma Ailama, mai taimi faatulagaina o le 0:00 i le 3:20.

2. Faitau le tala faamatala lenei mai le Au Paia: O Le Tala e uiga i le Ekalesia a Iesu Keriso i Aso e Gata Ai:

Sa tuai le alu o le taimi i totonu o le falepuipui o Karefasi i lena aoauli. I le vevela o le taumafanafana, na talai ai e alii o latou peleue ma talai faamalama ia alu atu ai i totonu le savili. I fafo, e toavalu ni alii … na puipuia le falepuipui ae o isi fitafita uma sa le mamao atu le mea na tolauapi ai. Sa saofai tonu lava le isi leoleo i le isi itu o le faitotoa.

O Sitivi Markham, Tanu Sione, ma isi sa faia feau mo Iosefa. Mai i alii o e sa nonofo iina i le po na muamua atu, sa na’o Uiliata Risati ma Ioane Teila sa faatasi pea lava ma Iosefa ma Ailama. I se taimi na muamua atu o le aso, na nanā atu ai e tagata asiasi ni fana se lua i pagota—o se tamaifana e ono pulu ma se tamaifana e tasi le pulu—ina ne’i i ai se osofaiga. Sa tuua foi e Sitivi se tootoo malosi sa ia ta’ua o le “sasa tamaitiiti tautalaitiiti.”

Ina ia faato’afimalie le agaga [i le potu] ma faapasi le taimi, na usu ai e Ioane se viiga Peretania. …

[E le’i umi ona uma le usuina faalua e Ioane Teila o le viiga] ae faalogoina loa e pagota se gasē i le faitotoa ma le pā faatolu pe faafa o le fana. Na tepa atu Uiliata i fafo o le faamalama na matala ma vaaia ai le faitau selau o alii sa i lalo ifo, o o latou foliga sa valiuliuli i palapala ma pauta o fana, na laga mai i le faitotoa ulufale o le falepuipui. Na tago Iosefa i le tasi o tamaifana ae mau Ailama i le isi. … Sa oomi atu e alii uma e toafa i latou lava agai i le faitotoa a o laga mai tagata leaga i luga o faasitepu ma taumafai e faamalosi mai lo latou o mai i totonu.

Na faalogoina le pa o le fana i luga o le faasitepu a o fana e tagata leaga le faitotoa. … Na ati mai [se] pulufana i le laupapa. Na lavea ai foliga o Ailama ma sa liliu o ia, ma tautevateva ese mai le faitotoa. Na toe tau le isi pulu i lona gaugatua. …

“Uso Ailama!” Na alaga ai Iosefa. Sa uumau lana fana gutuono, ma tatala faavaiti le faitotoa ma faapa tasi le fana. Sa felelei mai nisi pulufana i totonu o le potu, ma sa fana faasauea atu Iosefa i tagata leaga a o faaaoga e Ioane [Teila] se tootoo e tasasa ai i lalo gutu o fana ma mata o naifi sa monoti mai i le ava o le faitotoa.

Ina ua pe a ma le faalua pe faatolu ona misi le fana a Iosefa, sa tamoe atu loa Ioane i le faamalama ma taumafai e pe’a i le faavaa lautele o le faamalama. Na lele atu se pulufana lapotopoto i totonu o le potu ma tau i lona ogavae, ma na le paleni ai lana tu. Na pe atoa lona tino ma na pau atu o ia i le faamalama, ma nuti ai lana uati tuutaga i le sefuluono minute na te’a ai le lima.

Sa alaga o ia, “Ua ou lavea!”.

Sa toso e Ioane ia lava i le isi itu o le fola ma taavale i lalo o le moega a o tafana mai pea lava pea tagata leaga. Na tau se pulu lapotopoto i lona suilapalapa, ma na sasae ese ai se vaega o le aano. Na tau isi pulu lapotopoto e lua i lona tapulima ma le ivi o luga a’e tonu o lona tulivae.

I le isi itu o le potu, sa taumafai malosi ai lava Iosefa ma Uiliata e tuu o laua mamafa atoa agai i le faitotoa a o ta ese e Uiliata ia gutu o fana ma naifi uumi sa i ona luma. Sa faafuasei ona faapalasi e Iosefa lana tamaifana i le fola ma oso atu mo le faamalama. A o taupe o ia i le faamalama, na tau ni pulu lapotopoto se lua i lona papatua. Na masau mai se isi pulu lapotopoto mai i le faamalama ma lavea ai o ia i lalo ifo o le fatu.

Na alaga o ia, “Lo’u Alii e, lo’u Atua e.”. Na taumalua agai i luma lona tino ma palasi ai i fafo o le faamalama e muamua i lalo lona ulu.

Na nanati atu Uiliata i le isi itu o le potu ma falō lona ulu i fafo a o alamū pulu lapotopoto i ona talane. Sa ia vaai ifo i lalo i le lolofi ane o tagata leaga faataamilo i le tino lavatoto o Iosefa. …

Ua maliu, Iosefa Samita, le perofeta ma le talifaaaliga a le Alii. (Au Paia: O Le Tala e uiga i le Ekalesia a Iesu Keriso i Aso e Gata Ai, vol. 1, O Le Tulaga o le Upumoni, 1815–1846 [2018], 548–552; tagai foi Mataupu Faavae ma Feagaiga 135:1–2)

Mafaufau Loloto a o Sauniuni mo le Vasega

O a ni ou manatu ma lagona a o e manatunatu i le osigataulaga na malilie Iosefa ma Ailama Samita e faia mo a laua molimau o le talalelei toefuataiina a Iesu Keriso?

Vaega 3

Ua faapefea ona faamanuiaina lo’u olaga i le misiona faaperofeta a Iosefa Samita?

I lalo o le taitaiga a le Korama a Aposetolo e Toasefululua, sa saunia ai se faasilasilaga tusitusia o le faamaturoga e faavae i tala a molimau vaaitino a Elder Ioane Teila ma Elder Uiliata Risati. O lenei faasilasilaga ua faamaumauina nei i le Mataupu Faavae ma Feagaiga 135.

Suesue e Sauniuni ai mo le Vasega

Suesue le Mataupu Faavae ma Feagaiga 135:3. Mafaufau e faailoga ia upu po o fasifuaitau e foliga mai e taua ia te oe.

Tusifaamaumau Ou Lagona Uunai

Mafaufau i lau molimau i le Perofeta o Iosefa Samita, ma auala ua faatosinaina ma faamanuiaina ai lou olaga e lana misiona faaperofeta. Mafaufau e tusifaamaumau ou mafaufauga i lau apitalaaga.

Manao Pea i Nisi Mea? (Tuu i le faitalia)

O fea e mafai ona ou aoao atili ai e uiga i le misiona faaperofeta ma le faamaturoga o Iosefa Samita?

Ua faasoa mai e Peresitene Dallin H. Oaks o le Au Peresitene Sili lana molimau i le soifuaga mataina ma le misiona faaperofeta a Iosefa Samita i lana tusiga “The Miraculous Mission of the Prophet Joseph Smith” (Ensign, Jan. 2019, 30–39).

O le vitio Iosefa Samita: Perofeta o le Toefuataiga (1:09:25) ua faaalia ai le soifuaga ma le faamaturoga o Iosefa Samita.