Lesona 18 Anomea a le Faiaoga

Tamaitai o le Au Paia o Aso e Gata Ai ma le Aualofa

O le Aualofa o se tasi o faalapotopotoga aupito leva ma, faatasi ai ma le silia i le 7.1 miliona o ona sui auai, o se tasi o faalapotopotoga aupito toatele o tamaitai i le lalolagi. O le Aualofa o se vaega taua o le Ekalesia toefuataiina a Iesu Keriso. O le lesona lenei o le a fesoasoani i tagata aoga ia mafai ona faasoa atu auala e taua ai tomai tulaga ese ma saofaga a tamaitai o le Au Paia o Aso e Gata Ai i le galuega a le Alii. O le a iloilo ai foi e tagata aoga le ala o le a latou auai atoatoa atili ai i totonu pe lagolago ai le Aualofa i le ausiaina o ona faamoemoega.

Fautuaga mo le Aoaoina Atu

E faia e tamaitai tausi-feagaiga se saofaga tulaga ese ma tulagaese e fausia ai le malo o le Atua.

Faaali atu se ata o, pe faamatalaina se tamaitai amiotonu i lou olaga. Ia faasoa puupuu atu i le vasega se mea ua avea ai o ia ma se tamaitai maoae ma auala ua ia saofaga ai i le fausia o le malo o le Atua.

Valaaulia tagata aoga e faasoa atu o latou manatu e uiga i se tamaitai amiotonu latou te iloa ma auala ua avea ai o ia ma se faatosinaga mo le lelei i le fausiaina o le malo o le Atua. (O le mea lenei sa valaaulia ai tagata aoga e mafaufau loloto i ai i anomea mo le sauniuniga.)

Faaali atu le saunoaga lenei a Peresitene Russell M. Nelson. Valaaulia se tagata aoga e faitau leotele le saunoaga, ma fai i le vasega e mulimuli ai, ma vaavaai mo mea o loo aoao mai e Peresitene Nelson e uiga i tamaitai amiotonu o le Ekalesia.

O’u tuafafine pele, o outou … o a matou paaga taua i lenei toe taimi. … O lo outou amioatua, malamalama, alofa, poto, lotototoa, uiga, faatuatua, ma olaga amiotonu o le a tosina mai ai tamaitai lelei o le lalolagi faatasi ai ma o latou aiga, i le Ekalesia i ni aofaiga e le mafaitaulia!

O i matou, o o outou tuagane, e manaomia lo outou malosi, lo outou liua, lo outou talitonuga maumaututu, lo outou tomai e taitai ai, lo outou atamai, ma o outou leo. E le mafai ona atoa le malo o le Atua ma e le mafai lava ona atoa e aunoa ma tamaitai o e osia feagaiga paia ona tausia lea, o tamaitai o e e mafai ona tautatala atu ma le mana ma le pule a le Atua! (Russell M. Nelson, “O Se Talosaga i O’u Tuafafine,” Ensign po o le Liahona, Nov. 2015, 96)

• O le a se mea o tulaga ese mai ia te oe i lenei faamatalaga?

• E faapefea ona e aoteleina se upumoni ua mafai ona tatou aoao mai i aoaoga a Peresitene Nelson e uiga i tamaitai tausi-feagaiga i totonu o le Ekalesia? (I le faaaogaina o upu a tagata aoga, tusi i luga o le laupapa pe faaali atu se upumoni e talitutusa i lenei: O uiga faaalia, tulaga faaletaitai, ma leo o tamaitai tausi-feagaiga e taua i le atinaeina o le malo o le Atua.)

• Aisea e te manatu ai, o le malo o le Atua “e le ma e le mafai ona atoatoa” e aunoa ma leo ma saofaga o tamaitai tausi-feagaiga?

Faamalamalama atu, e pei ona faamaumauina i le Mataupu Faavae ma Feagaiga 25, na valaau le Alii ia Ema Samita e faaaoga lona leo, taleni, ma tomai e fesoasoani ai e atinae Lona malo. Valaaulia tagata aoga e iloilo le Mataupu Faavae ma Feagaiga 25:5–7, 10–16, lea sa latou aoaoina i le vaega 1 o anomea mo le sauniuniga, ma fai atu ia i latou e faailoa mai le fautuaga ma tiutetauave na tuuina atu e le Alii ia Ema.

Fai atu i tagata aoga e faasoa mai le mea na faapitoa le tulaga ese ia i latou mai nei fuaiupu ma pe aisea. Tuu atu i tagata aoga se minute e mafaufau ai po o fea vaega o le fautuaga o le a finagalo le Alii ia latou taliaina atoatoa ma ola ai.

Na faatulagaina e le Alii le Aualofa e ala mai i le Perofeta o Iosefa Samita.

Faaali atu se ata o le Faleoloa Piliki Lanumumu o Iosefa Samita i Navu, Ilinoi, ma faamatala atu, o iinei sa faatulagaina ai le Aualofa ia Mati 1842.

Fai atu i tagata aoga e faamtala mai mai le vaega 2 o anomea mo le sauniuniga (pe valaaulia se tagata aoga i le amataga o le vasega e sauni na te faia lena mea) ia tulaga na taitai atu ai i le faavaeina o le Aualofa.

• O le a le mamanu na saunoa Iosefa Samita ua faatulagaina ai le Aualofa? (Ua faatulagaina le Aualofa e pei o le mamanu o le perisitua.)

• O le a le uiga o le, sa faatulagaina le Aualofa e pei o le mamanu o le perisitua? Aisea e taua ai lo tatou iloa o lenei mea? (Afai e manaomia, valaaulia tagata aoga e mafaufau i mea na latou aoaoina mai le vaega 2 o anomea mo sauniuniga.)

• O le a faapefea ona e aoteleina faamoemoega o le Aualofa? (Atonu e te valaaulia tagata aoga e iloilo faamatalaga a Sister Zina D. H. Young ma Sister Julie B. Beck i le vaega 3 o anomea mo sauniuniga e fesoasoani latou te iloa ai se upumoni e talitutusa ma lenei: O le Aualofa sa faatulagaina e tuuina atu le toomaga i e matitiva ma ia fesoasoani e laveai agaga.)

• O a ni auala ua e vaaia ai le faataunuuina e tamaitai o le Aualofa o nei faamoemoega? (Atonu foi e faasoa atu sa oe lava faataitaiga anoa po o se aafiaga.)

Tuu atu le taimi mo ni tuafafine se toalua i totonu o le vasega e faasoa mai o laua lagona e uiga i faamanuiaga o le Aualofa.

Fai atu i ni nai tagata aoga e faasoa mai a latou tali i fesili nei ia sa valaaulia i latou e mafaufau loloto i ai mai anomea mo sauniuniga:

• O a ni mea e mafai uma e tamaitai ma alii ona fai e malamalama ai i le vaaiga mamao a le Aualofa ma galulue faatasi ai e fesoasoani ia ausia ona faamoemoega?

Faaali atu fesili nei, ma valaaulia tagata aoga e mafaufau ma le agaga tatalo i ai ona tusi lea o se sini i a latou apitalaaga po o tamaiapi:

• Tuafafine e, o le a faapefea ona e auai atoatoa atili i le ausiaina o faamoemoega o le Aualofa e ala i ou gafatia, faatuatua, leo, ma le taitaiga?

• Uso e, o le a se mea o le a e faia e lagolago, faamalosiau ma galulue lelei ai ma tamaitai i le fausiaina o le malo o le Atua?

A uma ua lava se taimi, mafaufau e valaaulia ni nai tagata aoga e faasoa mai mea na latou tusia.

FAALELEIA O LO TATOU AOAO ATU MA LE AOAOINA

Fautuaga mo le fetuutuunaiga o le aoao atu. E mafai ona e filifili e faaaoga uma pe nao ni nai fautuaga mo le aoao atu i totonu o lesona taitasi, ma e mafai foi ona e fetuunaia ia manatu fautuaina e tusa ai ma le taitaiga a le Agaga ma manaoga ma tulaga o au tagata aoga. Pe a fetuunaia fautuaga mo le aoao atu po o le suitulaga ai o ni ou lava manatu, ia mafaufau i le taunuuga fuafuaina o le aoaoina o tagata aoga, ma filifili se isi manatu mo le aoao atu o le a maua ai le taunuuga fuafuaina.

Ina ia faaiu le lesona, mafaufau e fai se mea se tasi pe sili atu o mea nei:

1. Fai i tagata aoga pe o le a faapefea ona latou tali atu i se tasi e faapea mai, o tamaitai e tau leai so latou avanoa ma matafaioi i totonu o Le Ekalesia a Iesu Keriso o le Au Paia o Aso e Gata Ai.

2. Molimau atu i upumoni na faailoaina i le taimi o le lesona lenei.

3. Valaaulia se tagata aoga e faitau le valaaulia lenei mai ia Peresitene Russell M. Nelson:

O tamaitai ua liua, ma tausi-feagaiga … o o latou soifua amiotonu o le a tu matilatila atili i se lalolagi ua fai ifo, ma o le a vaaia e iloga lava ma e ese foi i auala e sili ona fiafia .

… Ou te augani atu ai i o’u tuafafine o Le Ekalesia a Iesu Keriso o le Au Paia o Aso e Gata Ai e laa i luma! Tu i lou tulaga tonu ma le manaomia i lou aiga, i lou nuu, ma i le malo o le Atua—ia sili atu nai lo le mea sa e i ai muamua. (Russell M. Nelson, “O Se Augani i O’u Tuafafine,” Ensign po o le Liahona, Nov. 2015, 97; faatusilima i le uluai tusiga)

Mo Le Isi Taimi

Faamalamalama atu i tagata aoga, o le isi taimi latou te feiloai ai, o le a latou taulai atu i se vaega o le talalelei toefuataiina na ta’ua e le Perofeta o Iosefa Samita o se tasi o tiutetauave silisili i lenei lalolagi, ua tuuina mai e le Atua i le Au Paia o Aso e Gata Ai (tagai Aoaoga a Peresitene o le Ekalesia: Iosefa Samita [2007], 475). Valaaulia tagata aoga e suesue ma le toto’a i anomea mo sauniuniga mo le lesona 19, ma ia o mai saunia e talanoa i folafolaga ofoofogia faaperofeta na faia ia i latou o e fesoasoani ia ausia galuega o le malumalu mo e ua maliliu.