Lesona 24 Anomea a le Faiaoga

O Le Perofeta o Iosefa Samita—O se Tagatavaai Filifilia

Na faamatalaina e le Alii le Perofeta o Iosefa Samita o se “tagatavaai filifilia” o le a “taua tele” i ona tagata (2 Nifae 3:7). Ae e ui lava i mea lelei uma na faia e le Alii e ala mai ia Iosefa Samita, ae toatele lava tagata na faitio i le Perofeta. O lenei lesona o le a saunia ai tagata aoga e tali atu ma le faatuatua i faitioga e faasaga ia Iosefa Samita ma faamalosia lo latou talitonuga o le Alii e faalauteleina i latou ua Ia valaauina.

Fautuaga mo le Aoaoina Atu

Na valaauina e le Alii ia Iosefa Samita i lona vaivaiga ma faalauteleina o ia e avea ma tagatavaai filifilia.

Faaali atu le ata lenei o le alii talavou o Iosefa Samita.

Valaaulia tamaiti aoga e faasoa mai upu ma fuaitau mai le vaega 1 o le anomea mo sauniuniga e faamatala ai le lagona o Iosefa e uiga i ona lava tomai i le taimi na valaauina ai o ia e fesoasoani e toefuatai mai le talalelei a Iesu Keriso.

Ia valaaulia tagata aoga e mafaufau e uiga i taimi na latou lagona ai lo latou lofituina pe le agavaa e faia le mea ua talosagaina i latou e le Alii po o Ana auauna latou te faia.

Faamatala atu o le valaau a le Alii ia Iosefa Samita o loo aoao mai ai se mataupu faavae mamana lea e mafai ona fesoasoani ia i tatou pe a tatou lagona le vaivai po o le le atoatoa i le faia o le galuega a le Alii. I le Tusi a Mamona, na toe faamatalaina ai e le perofeta o Liae se valoaga a Iosefa o Aikupito. Faitau le 2 Nifae 3:6–11, 15 o se vasega, vaavaai mo upu po o fuaitau na faaaoga e le Alii e faamatala ai se perofeta i le lumanai o le a igoa foi ia Iosefa.

• O a nisi o upu po o fuaitau na faaaoga e le Alii e faamatala ai Iosefa Samita ma le galuega o le a Ia fesoasoani ia te ia ia ausia?

• O le a le matafaioi na folafola e le Faaola na te faia i le galuega o le a valaauina Iosefa e faatino?

Faitau 2 Nifae 3:13 ma le Mataupu Faavae ma Feagaiga 124:1 faatasi o se vasega, vaavaai pe faapefea ona faamatala e le Alii ia Iosefa Samita. Tuu atu i tagata aoga e lipoti mai mea na latou mauaina.

• Aisea e te manatu e valaau ai e le Alii “mea vaivai o le lalolagi” e faia Lana galuega? (Mataupu Faavae ma Feagaiga 124:1).

• O a ni lesona e mafai ona tatou aoaoina mai le valaauina e le Alii o Iosefa Samita i lona vaivai?

Faaali atu le mataupu faavae lenei na aoaoina e Elder Neal A. Maxwell o le Korama a Aposetolo e Toasefululua, ma valaaulia se tamaitiiti aoga e faitau leotele:

O se tasi o savali maoae na oo mai i le faaaogaina e le Alii o Iosefa Samita o ‘se tagatavaai filifilia’ i aso e gata ai ua faapea ai, o loo i ai moni lava le faamoemoe mo i tatou taitoatasi! E mafai e le Alii ona valaau i tatou i o tatou vaivaiga ma faapea ona faalautele ai i tatou mo Ona faamoemoega. (Neal A. Maxwell, “O Se Tagata Vaai FIlifilia,” Ensign, Aug. 1986, 14; italics added)

• E faapefea e lenei mataupu faavae ona fesoasoani i tagata o loo tauivi ma vaivaiga faaletagata latou te matauina ia i latou lava, o latou taitai o le Ekalesia, ma isi tagata o le ekalesia?

• O anafea na e lagonaina ai le faalauteleina e le Alii o ou tomai e faia ai Lana galuega, e ui lava i ou vaivaiga? O anafea na e vaaia ai le faia e le Alii o lenei mea mo isi?

• O le a le mea na faia e Iosefa Samita e maua ai le mana faamalosi o le Alii? (Atonu e te valaaulia tagata aoga e iloilo le faamatalaga a Elder Marcus B. Nash o loo i totonu o le vaega 1 o anomea mo sauniuniga.)

Tuu atu i tagata aoga se taimi e mafaufau ma le agaga tatalo ma atonu latou te tusia mea e mafai ona latou faia e valaaulia ai i o latou olaga le mana o le Alii e faalautele ai i latou mo Ona faamoemoega.

O le igoa o Iosefa Samita “o le a tauleleia ma tauleagaina i totonu o atunuu uma”

Faamatala atu e ui lava i mea lelei uma na faia e le Perofeta o Iosefa Samita, sa toatele le taufaaleaga ma faitio. Ae e le o se mea na faateia ai Iosefa. Ina ua faatoa faaali atu Moronae ia Iosefa e 17 ona tausaga, sa ia tuuina atu ia Iosefa se malamalama i lona lumanai. Valaaulia tagata aoga e faitau le Iosefa Samita—Talafaasolopito 1:33, vaavaai mo ni lagona o tagata e uiga ia Iosefa.

• O le a se mea e mafai ona tatou aoaoina mai lenei fuaitau? (Fesoasoani i tagata aoga ia iloa le upu moni lenei: O le igoa o Iosefa Samita o le a tautalagia mo le lelei ma le leaga i tagata uma.)

• O a auala tatou te vaai ai i lenei valoaga ua faataunuuina i aso nei?

Faamalamalama atu na faamafanafanaina e le Alii ia Iosefa i se tasi o taimi sili ona pogisa o lona olaga ina ua faafalepuipuiina o ia i Liberty, Misuri. Valaaulia tagata aooga e faitau le Mataupu Faavae ma Feagaiga 122:1-3, ma vaavaai pe na faapefea ona faamautinoa e le Alii ia Iosefa.

• O le a se mea e mafai ona tatou aoaoina mai lenei fuaitau e uiga i le auala o le a tali atu ai tagata faamaoni ia Iosefa Samita ma lana misiona faaperofeta? (E ui lava o nisi e taufaifai ia Iosefa Samita, o le e mama i le loto o le a le liliuese ia te ia ae o le a sailia faamanuiaga ua avanoa e ala i lana galuega.)

Fai i tagata aoga e iloilo ia faamatalaga o loo i le vaega 2 o anomea mo sauniuniga mai ia i latou o e na iloaina le Perofeta o Iosefa Samita ma faasoa atu mea na tulagaese ia i latou.

• O a ni ou lagona ma lau molimau e uiga i le Perofeta o Iosefa Samita?

Faaali atu le saunoaga lenei a Elder Neil L. Andersen o le Korama a Aposetolo e Toasefululua, ma valaaulia se tagata aoga e faitau leotele:

O manatu faaalia le lelei e uiga i le Perofeta o Iosefa Samita o le a faateleina a o tatou agai atu i luma i le Afio i Faalua Mai o le Faaola. O faamatalaga taufaasese ma tala pepelo maaleale o le a le faaitiitia. O le a i ai tagata o le aiga ma uo o le a manaomia lau fesoasoani. (Neil L. Andersen, “Iosefa Samita,” Ensign po o le Liahona, Nov. 2014, 30)

Ia talanoaina o se vasega po o ni vaega laiti pe mafai faapefea ona fesoasoani tagata aoga i se tagata o le aiga po o se uo o loo popole e uiga i faamatalaga le lelei na latou faalogo pe faitau i ai e uiga i le Perofeta o Iosefa Samita. I le avea ai o se vaega o le talanoaga, atonu e mananao le vaega e iloilo le faʻamatalaga a Elder Andersen i le vaega 3 o anomea mo sauniuniga. O fesili nei e mafai foi ona aoga e aofia i le talanoaga:

• Aisea e te manatu ai e taua le uunaia o se tasi e suesue punaoa faatuatuaina faatasi ai ma le valaauliaina o le tagata e mafaufau loloto ma tatalo pe a sailia ni tali i fesili e uiga ia Iosefa Samita ma lana misiona faaperofeta?

• O le a se mea e te uunaia se tasi e fai e maua ai se molimau faaleagaga pe faamalosia ai lana molimau i le misiona paia a Iosefa Samita?

Faaiu i le molimau atu i le taua o le mauaina o se molimau faaleagaga mai le Atua o Iosefa Samita o Lana perofeta, na valaauina i ona vaivaiga ma faalauteleina e le Alii e avea ma tagatavaai filifilia o le Toefuataiga.

Mo Le Isi Taimi

Fesili atu i tagata aoga pe latou te popole ma tatalo e uiga i filifiliga e aafia ai lo latou lumanaʻi. Valaaulia i latou e suesue le anomea mo sauniuniga a le vasega mo le isi taimi. O le a latou aoao ai i le le mautonu na oo i ai le Au Paia ina ua mavae le maliu o Iosefa Samita ma lo latou faatuatua maoae i le mulimuli i se taitai fou i le vaomatua. Ia valaaulia tagata aoga e o mai saunia i le vasega e talanoaina mea na latou aoaoina mai le Au Paia i lenei taimi faigata.