Lesona 11 Anomea a le Faiaoga

O Le Faapotopotoina o Isaraelu

Na folafola mai e Iesu Keriso o le a ia faapotopotoina Ona tagata i aso nei e gata ai (tagai 3 Nifae 21:22-29). O lenei lesona ua fuafuaina ia fesoasoani i tagata aoga ia malamalama lelei ai i lo latou matafaioi e fesoasoani i le Alii e faapotopoto Isaraelu. O le a fesoasoani ai foi i tagata aoga ia fuafua le ala o le a latou auai atoatoa atili ai i lenei faapotopotoga.

Fautuaga mo le Aoaoina Atu

Ua poloaiina e le Alii Lana Au Paia e faapotopoto.

Faaali atu le ata lenei, ma valaaulia se tagata aoga e faitau leotele le Mataupu Faavae ma Feagaiga 29:1-2 .

• Mata o le a se mea o aoao mai e vaaiga faafaatusa o loo i nei fuaiupu e uiga i le Faaola? O le a se mea o finagalo Iesu Keriso e fai mo Lona nuu?

Faasino i le upu “togiola” i le fuaiupu 1. Faamalamalama atu, na aoao mai Peresitene Russell M. Nelson faapea, “i le faa-Eperu, o le upu faavae mo le togiola o le kaphar, o se veape o lona uiga ‘ia ufiufi’” (“The Atonement,” Ensign, Nov. 1996, 34).

• E tusa ai ma le fuaiupu 2, o ai le nuu o le Alii o loo Ia finagalo e faapotopoto ma ufiufi i Ona aao o le alofa mutimutivale?

Faamalamalama atu, o le Tusi Paia, le Tusi a Mamona, ma nisi o faaaliga na tuuina mai ia Iosefa Samita, o loo aoao uma mai e faapea, o le a faapotopoto e le Alii Lona nuu, o Isaraelu na faataapeapeina, i aso e gata ai (tagai Esekielu 28:25; 2 Nifae 10:8; Mataupu Faavae ma Feagaiga 33:6).

Valaaulia tagata aoga e faamalamalama mai mea ua latou malamalama i ai e uiga i le faapotopotoina o Isaraelu. (Faamalosiau ia i latou e toe tagai i le vaega 1 o anomea mo sauniuniga.) E mafai foi ona e faia ni fesili e pei o nei e fesoasoani e faaloloto ai le talanoaga:

• Aisea tou te manatu o le a ta’ua ai e Peresitene Nelson le faapotopotoina “o le lu’i aupito silisili, o le faamoemoe aupito silisili, ma le galuega aupito silisili i le lalolagi i le taimi nei”? (“Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le Ensign ma le New Era, 8, ChurchofJesusChrist.org; faatusilima i le uluai lomiga).

• O le a se mea e mafai ona tatou aoao mai e uiga i le Alii ma Lona tagata e ala i le faataapeapeina ma le faapotopotoina mai o Lona nuu o le feagaiga?

• O a nisi o mafuaaga ua finagalo ai le Alii i Lana Au Paia ia faapotopoto faatasi?

Faamalamalama atu, ia Tesema 1830, na maua ai e Iosefa Samita se faaaliga na poloaiina ai le Au Paia e siitia atu i Ohaio (tagai Mataupu Faavae ma Feagaiga 37:1–3). I se konafesi a le Ekalesia ia Ianuari 1831, na maua ai e Iosefa se faaaliga faaopoopo na tuuina mai ai mafuaaga a le Alii mo le poloaiina o le Au Paia e faapotopoto ma faamalamalama mai ai faamanuiaga folafolaina mo le faia o lea mea.

Valaaulia le vasega e faitau le Mataupu Faavae ma Feagaiga 38:28, 31–33, ma vaavaai mo auala o le a faamanuiaina ai le Au Paia pe afai latou te usitaia le poloaiga ia faapotopoto i Ohaio. Valaaulia tagata aoga e faasoa mai mea na latou mauaina.

Atonu e te faamamafa atu le upumoni lenei: E faapotopoto e le Alii Ona tagata, ina ia puipuia ma faamalolosia faaleagaga i latou.

• E faapefea e le faapotopoto faatasi i aso nei i a tatou uarota, siteki, ma malumalu ona mafai ona tatou maua ai le puipuiga ma le malosi faaleagaga mai le Alii?

• O a ituaiga puipuiga ua e mauaina, a o e faapotopoto faatasi ma isi tagata o le Au Paia?

E valaau ma fesoasoani le Alii i Ana auauna e faapotopoto Isaraelu.

Toe faasino i le ata o le matuamoa o loo ofaofata’i mai lana toloai i lalo o ona apaau. Faaali atu le upumoni lenei: Ua valaauina i tatou e le Alii ma o le a fesoasoani ia i tatou e faapotopoto mai Isaraelu.

Valaaulia tagata aoga e faitau le Mataupu Faavae ma Feagaiga 29:4–7 ma le 84:86–88, ma vaavaai mo auala o le a fesoasoani mai ai le Alii ia i tatou a o tatou fesoasoani i le faapotopotoina o Isaraelu. Tuu atu i tagata aoga e faasoa mai mea na latou maua.

Mo se faataitaiga o le ala o le a fesoasoani mai ai le Alii ia i tatou e faapotopoto Isaraelu, valaaulia tagata aoga e toe faamatala pe faitau faatasi le tala i le misiona a Heber C. Kimball i Egelani o loo maua i le vaega 2 o anomea mo sauniuniga. E mafai ona faia lenei mea i ni vaega toalaiti. Valaaulia vaega taitasi (po o le vasega) e talanoa faatasi i fesili nei pe a uma ona toe faamanatu le tala a Elder Kimball:

• O le a se mea e mafai ona ou aoao mai le aafiaga a Heber C. Kimball e ono aumaia ai ia te a’u le lototele atili e fesoasoani ai e faapotopoto Isaraelu e ala i le faasoa atu o le talalelei i isi?

• O anafea na ou lagonaina ai le alofa o le Alii i le folafolaina atu o le talalelei?

• O le a se mea e mafai ona ou faia e faaali ai lo’u faatuatua ma faasoa atili atu ai le talalelei i isi?

Faaali atu le saunoaga lenei a Elder Dieter F. Uchtdorf o le Korama a Aposetolo e Toasefululua. Valaaulia tagata aoga e faitau le saunoaga ona faasoa mai lea pe na faapefea ona latou faasoaina atu le savali o le talalelei i isi i ni auala aoga ae ua masani ai.

Po o fea lava o e i ai i lenei lalolagi, e anoanoai avanoa e faasoa atu ai le tala fiafia o le talalelei a Iesu Keriso i tagata tou te feiloai i ai, aooga faatasi, ma nonofo faatasi pe faigaluega ma tafafao faatasi. … E tele auala masani ma tupu fua e faia ai lenei mea. (Dieter F. Uchtdorf, “Galuega Faafaifeautalai: Faasoaina atu o Mea o loo i totonu o Lou Loto,” Ensign po o le Liahona, Me 2019, 15, 17)

E mafai ona tatou auai i totonu o le galuega ofoofogia o le faapotopotoina o Isaraelu.

Faaali atu le saunoaga lenei a Peresitene Nelson, ma fai i se tagata aoga e faitau leotele:

Soo se taimi e te faia ai soo se mea e fesoasoani ai i soo se tasi—po o le fea lava le itu o le veli—laa agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani e faapotopoto Isaraelu. (Russell M. Nelson, “Faamoemoe o Isaraelu,” 15; faatusilima i le uluai lomiga)

• E faavae i aoaoga a Peresitene Nelson, o le a se isi mea e mafai ona tatou faia e fesoasoani ai i le Alii e faapotopoto Isaraelu? (Fesoasoani i tagata aoga e faailoa mai se upumoni e tutusa ma lenei: Tatou te faapotopotoina Isaraelu pe a tatou fesoasoani i fanau a le Atua e laa agai i luma i le osia ma le tausia o feagaiga ma Ia.)

Manatua: O le a mafai e tagata aoga ona talanoa atili i le faapotopotoina o Isaraelu e ala i talafaasolopito o aiga ma auaunaga i le malumalu i le lesona 19, “Faaolataga o e Ua Maliliu.”

Valaaulia tagata aoga e faailoa mai ni auala fitoitonu e mafai ona latou fesoasoani ai e faapotopoto Isaraelu. Tusi a latou tali i luga o le laupapa. E mafai ona e fai atu i tagata aoga e faasoa mai ni o latou aafiaga na latou maua e faatatau i aitema o loo i le lisi.

Tuu atu se taimi mo tagata aoga e mafaufau loloto ai i le fesili lenei o loo maua i le vaega 2 o anomea mo sauniuniga ma tusi se sini latou te lagona e mafai ona latou ausia. Atonu latou te mananao e fai se fuafuaga e galulue i a latou sini faatasi ma se uo po o le vaega i totonu o le vasega. Atonu foi e te fesili atu pe i ai ni tagata aoga o le a mananao e lipoti mai i o latou aafiaga i le taimi o se talanoaga i le lumanai.

• O le a se mea o le a e faia i aso ma vaiaso o loo loma e faia ai se vaega sili atu ona mataalia i le faapotopotoina o Isaraelu?

Faaiu i le faasoa atu o lau molimau o loo faapotopotoina e le Alii ia Isaraelu i aso e gata ai. Faamautinoa atu i tagata aoga e uiga i le puipuiga ma le malosi o le a tuuina mai e le Alii ia i latou a o latou faapotopoto faatasi ma isi tagata o le Au Paia ma a o latou fesoasoani e faapotopoto Isaraelu.

Mo Le Isi Taimi

Faamalamalama atu, o le faapotopotoina o Isaraelu e vavalalata lava le fesootaiga ma le galuega a le Alii o le atinaeina o Siona i luga o le fogaeleele e sauniuni ai mo Lona Afio Mai Faalua. Valaaulia tagata aoga e suesue i anomea mo sauniuniga mo le lesona e sosoo ai, ma ia o mai saunia e talanoa po o le a le Siona ma faamanuiaga e oo mai mai le fesoasoani e atiina ae Siona i totonu o o latou aiga ma siteki.